Mark9
1यीशु भीड़ से आउर अपन चेलवन से ई भी कहलन, ''ई सच के धियान लगा के सुनऽ! अब तोहनी में से थोड़ा सा जे ईहाँ मौजूद हऽ एकरा से पहिले कि परमेश्वर के सामर्थी रूप से राज करते नऽ देख लेवऽ तखनी तक एकदम नऽ मरवऽ''2छौ दिन बाद यीशु अपन साथे पतरस, याकूब, आउर याकूब के भाई, यूहन्ना के लेके एगो ऊँचा पहाड़ पर चढ़ गेलन। जौन घड़ी ऊ ऊहाँ अकेले हलन तऽ ऊ उनका बड़ी अलग रूप में देखाई पड़लन।3उनकर कपड़ा चमकदार उजला हो गेल। ऊ धरती के कोई भी चीज से एतना जादे उजला हल कि कोई कपड़ा धोवे वाला भी ओईसन उजला नऽ कर पईतन।4मूसा आउर एलिय्याह, ई दूनो भविष्यद्वक्ता जौन बड़ी समय पहिले रहऽ हलन, तीनो चेलवन के आगे परकट होलन। फिन ऊ यीशु से बतियाय लगलन। 5कुछ समय के बाद पतरस यीशु से कहलन, “हे गुरु, ईहाँ होवे ला बड़ी अनोखा हे! येहिसे हमनी के तीन गो तम्बू बनावे ला आज्ञा दऽ। जेकरा में से एगो तोरा ला होत, एगो मूसा लागी होत, आउर एगो एलिय्याह लागी होत!”6ऊ अईसन येहिसे कहलन काहेकि ऊ कुछ कहे ला चाहऽ हलन, बाकि नऽ जानऽ हलन कि का कहम, काहेकि ऊ आउर बाकि दूनो चेलवन बड़ी डर गेलन हल।7तऽ एगो बादल प्रकट होके उनका झाँक लेलक। परमेश्वर ऊ बादल में से ई कह के उनका से बात करलन, “ई हमर बेटा हथन। येही हथन जेकरा से हम प्रेम करऽ ही। येहिगुने, जौन ऊ कहऽ हथन तोरा उनका पर धियान देवे के चाही!” 8जखनी ऊ तीनो चेलवन चारो तरफ देखलन कि, तऽ एकबैग ओखनी देखलन कि खाली यीशु ही उनका साथे हलन, आउर एलिय्याह आउर मूसा अब ऊहाँ नऽ हलन।9जौन घड़ी ऊ पहाड़ से नीचे उतर रहलन हलऽ, तऽ यीशु उनका से कहलन कि जौन अखनी-अखनी उनका साथे घटल हे ऊ बात कोई से मत कहिहऽ। ऊ कहलन, “जखनी हम, मतलब आदमी के बेटा, हमर मरला के बाद फिन से जिन्दा हो जायेम, तऽ तूँ उनका से ई बात कहऽ सकऽ हऽ।”10येही से ऊ बड़ी समय तक दोसरा के ई बात नऽ बतईलन। बाकि ओखनी अपने में चर्चा करलन कि ई बात के मतलब हे जखनी ऊ कहलन कि ऊ मरलकन में से जी उठथिन।11ऊ तीनो चेलवन यीशु से पूछलन, “यहूदी शास्त्री लोग कहऽ हथन कि मसीह के धरती पर आवे से पहिले एलिय्याह के धरती पर वापस आवेला जरुरी हे, बाकि हम अखनी-अखनी एलिय्याह के देखली हे, तऽ जहाँ ऊ सिखा रहलन हे का ऊ गलत हे?” 12यीशु उनका जबाब देलन, “ई सच हे कि परमेश्वर एलिय्याह के पहिले आके सबकुछ जईसन होवे के चाही ओईसहीं करे लागी भेजे के वादा करलन हलऽ। बाकि एलिय्याह पहिले ही आ चुकलन हे, आउर हमनी के अगुवन उनका साथे बड़ी खराब बर्ताव करली हे, जईसन कि ऊ करे ला चाहऽ हलन, जईसन बड़ी समय पहिले भविष्यद्वक्तावन कहलन हलऽ कि ऊ करतन। बाकि पवित्रशास्त्र में हमर, मतलब आदमी के बेटा के बारे में बड़ी कुछ लिखल हे। पवित्रशास्त्र कहऽ हे कि हम बड़ी दुःख उठायेम आउर लोग हमरा नकार देतन।”14ओकर बाद यीशु आउर उनकर तीनो चेलवन ऊहाँ पहुँच गेलन जहाँ दोसरका चेला मौजूद हलन। ओखनी दोसरा चेलवन के अगल-बगल एगो बड़ी भीड़ के देखलन आउर यहूदी शास्त्री कुछ आदमी उनका से वाद-विवाद कर रहलन हल।15यीशु के अईते देख के भीड़ बड़ी चकित हो गेलन। येही से ऊ दौड़ के उनका भीर गेलन आउर उनका ऊ नमस्कार करलन।16यीशु शास्त्री से पूछलन, “तूँ कौन बारे में चेलवन के साथे वाद-विवाद कर रहलऽ हे?”17भीड़ में से एगो आदमी उनका से जबाब देलन, “हे गुरु, हम ईहाँ अपने भीर अपन बेटा के लेके अईली हल ताकि तूँ ओकरा चंगा कर दऽ। ओकरा में एगो दुष्टात्मा समायेल हे जेकरा से ऊ बोल नऽ पावऽ हे।18जखनी भी ऊ दुष्टात्मा ओकरा वश में करऽ हे तऽ ओकरा नीचे गिरा देवऽ हे। ऊ मुँह से फेन निकासऽ हे, आउर दाँत पीसऽ हे, आउर अकड़ जा हे। हम अपने के चेलवन से ऊ बुरा आत्मा के निकासे ला विनती करली हल, बाकि भगावे में सक्षम नऽ होलन।”19यीशु अपन चेलवन के ई कह के ओखनी के उत्तर देलन, “हे अविश्वासी लोग! हम तोहर अविश्वाश से बड़ी थक गेली हे! ऊ लड़का के हमरा भीर लेके आवऽ।”20येहिसे ऊ लड़का के यीशु भीर लेके अईलन। जईसहीं ऊ दुष्टात्मा यीशु के देखलक, तऽ ऊ लईका के जोर से झटका देलक, आउर ऊ लईका जमीन पर गिर पड़ल। ऊ ईहाँ-ऊहाँ घोलटते आउर मुँह से फेन निकासे लगल।21यीशु ऊ लईका के बाबूजी से पूछलन, “एकर अईसन हालत कहिया से हे?” ऊ उत्तर देलक, “अईसन होवे ला तब से शुरु होल जब से ऊ छोटा ही हलन।22ऊ दुष्टात्मा खाली अईसन ही नऽ कर हलन, बाकि ऊ ओकरा मारे लागी बड़ी बार ओकरा आग में आउर पानी में फेंक दे हल। जदि तूँ कर सकऽ हऽ, तऽ हमनी पर तरस खा के हमर मदत करऽ!”23यीशु उनका से कहलन, “बेशक हम कर सकऽ ही! परमेश्वर ऊ आदमियन लागी कुछ भी कर सकऽ हथन जौन परमेश्वर में विश्वास करऽ हथन कि ऊ अईसन करे के लायक हथन!”24ऊ बालक के बाबूजी तुरन्त चिकरलन, “हम विश्वास करऽ ही कि तूँ हमर मदत कर सकऽ हऽ, बाकि हमरा में अविश्वाश हे। हमरा मदत करऽ कि हम पूरा मजबूती से विश्वास करियई!”25यीशु देखलन कि भीड़ बढ़ रहल हे। ऊ, ऊ अशुद्ध आत्मा के डाँटलन: “हे अशुद्ध आत्मा, तूँ ई लड़का के बहिर आउर बोले में असमर्थ कर रहलन हे! हम तोरा एकरा में से निकल जाय के आउर फिन कहियो एकरा में आवे के आज्ञा नऽ दे ही!”26ऊ दुष्टात्मा चिल्ला के ऊ लड़का के मरोड़ के पटक देलक, आउर फिन ऊ, ऊ लड़का में से निकल गेल। ऊ लड़का के देह मरल जईसन हो गेल। येहिसे ऊहाँ पर मौजूद अधिकतर लोग कहलन, “ऊ मर गेल हे!”27जबकि, यीशु ऊ लड़का के हाथ से पकड़ के खड़ा होवे में उनकर मदत करलन। फिन ऊ लड़का खड़ा हो गेल।28बाद में, जब यीशु आउर उनकर चेलवन एगो घर में अकेले हलन, तऽ ओखनी उनका से पूछलन, “हम ऊ दुष्टात्मा के निकासे के लायक काहे नऽ होली?”29यीशु उनका से कहलन, “तूँ ई तरह के दुष्टात्मा के खाली खाना से परहेज कर के आउर परमेश्वर से प्रार्थना के द्वारा निकास सकऽ हऽ। एकर अलावे आउर कोई उपाय नऽ हे जेकरा से तूँ ओकरा निकल सकऽ।”30यीशु आउर उनकर चेलवन ऊ देश से निकल के, गलील देश से होते यात्रा करलन। यीशु नऽ चाहऽ हलन कि केकरो ई बात पता होवे कि ऊ कहाँ हथन।31यीशु अपन चेलवन के शिक्षा देवे लागी समय चाहऽ हलन। ऊ ओखनी से कहे लगलन, “एक दिन दुश्मन हमरा बंदी बना लेतन, आउर हम आदमी के बेटा आदमियन के हाथ में कर देवल जायेम। ऊ सभे आदमी हमरा मार देतन। बाकि हमरा मरे के बाद तिसरका दिन, हम फिन से जिन्दा हो जायेम!”32चेलवन समझ नऽ पईलन कि यीशु उनका से का कह रहलन हल, आउर ओखनी उनका से पूछे में डेरा हलन कि उनका कहे के मतलब का हे।33ओकर बाद यीशु आउर उनकर चेला लौट के कफरनहूम नगर में अईलन। जौन घड़ी ऊ घर में हलन, तऽ यीशु उनका से पूछलन, “जखनी हम सड़क पर यात्रा कर रहली हल तऽ तूँ का बात करते हलऽ?”34बाकि चेलवन उत्तर नऽ देलन। ओखनी उत्तर देवे में शर्म महसूस कर रहलन हल काहेकि यात्रा करते समय, ऊ अपने में ई बात पर वाद विवाद कर रहलन हल कि ओखनी में से सभे से खास कौन हथन।35यीशु बईठ गेलन। ऊ अपन 12 चेलवन के अपना भीर बोलईलन, आउर फिन ऊ ओखनी से कहलन, “जदि कोई आदमी चाहऽ हथन कि परमेश्वर उनका सभे से जादे खास आदमी समझतन, तऽ उनका खुद के सभे से कम खास समझे के चाही, आउर उनका बाकि सभे लोगवन के सेवक बने के चाही।”36फिन यीशु एगो लड़का के लेके ओखनी के बीच में खड़ा कर देलन। ऊ, ऊ बालक के गोदी में लेलन, आउर फिन ऊ कहलन,37“जौन कोई ई तरह के बालक के हमर नाम से स्वागत कर हथन, ऊ हमरा से प्रेम कर हथन, तऽ परमेश्वर मानऽ हथन कि ऊ हमर स्वागत कर रहलन हे। जौन कोई हमर आदर करऽ हथन, तऽ ऊ समझऽ कि पिता परमेश्वर के आदर कर रहल हे, जौन हमरा उनका अगुवाई करे लागी भेजलन हे।”38यूहन्ना यीशु से कहलन, “हे गुरु, हमनी एगो आदमी के लोगवन में से तोर नाम लेके दुष्टात्मा निकासते देखली हे। ऊ दावा करऽ हथन कि उनका अईसन करे के अधिकार तोरा से मिलल हे। येही से हमनी उनका अईसन करे से रोकली, काहेकि ऊ हमनी चेलवन में से एगो नऽ हलन।”39यीशु कहलन, “उनका अईसन करे से मत रोकऽ। काहेकि कोई भी आदमी हमर नाम के अधिकार से कोई चमत्कार काम करला के तुरन्त बाद हमर बारे में गलत बात नऽ बोलतन।40जौन हमर विरोध नऽ करऽ हथन ऊ ओही लक्ष्य के प्राप्त करे के कोशिश कर रहलन हे। जौन हम कर रहली हे।41परमेश्वर सच में ऊ लोगवन के प्रतिफल देतन जौन कईसनो तरह से तोर मदत करऽ हथन, ईहाँ तक कि जदि ऊ साधारण रूप से तोरा एक गिलास पानी येहिसे पिलावऽ हथन काहेकि तूँ हमर, मतलब कि मसीह के अनुशरण करऽ हऽ!”42यीशु ई भी कहलन, ''बाकि जदि तूँ हमरा पर विश्वास करे वाला आदमी के आगे पाप करे के वजह रखवऽ तऽ परमेश्वर तोरा कठोर सजा देतन। जदि कोई आदमी तोहर गर्दन में एगो भारी पत्थर के चक्की बाँध के तोहरा समुद्र में फेंक देवे, तऽ ई तोरा लागी ओकरा से बढ़ियाँ होत, जखनी परमेश्वर तोरा हमरा पर विश्वास करे वालन आदमी के आगे पाप करे के कारण रखे लागी सजा देतन।43येही से जदि तूँ पाप करे लागी अपन एगो हाथ के इस्तेमाल करे ला चाहऽ हऽ तऽ ओकर इस्तेमाल मत करिहऽ! ईहाँ तक कि जदि तोहरा पाप करे के चलते अपना हाथ काट के फेंके भी पड़े, तऽ अईसन कर दिहऽ! ई बढ़ियाँ हे कि तूँ अनन्तकाल तक जिन्दा रहवऽ, भले धरती पर रहते घड़ी तोहरा भीर एगो हाथ नऽ रहे। बाकि ई बढ़ियाँ नऽ होत कि तूँ पाप करऽ आउर ओकर नतीजा के रूप में, परमेश्वर तोहर समूचे देह नरक में फेंक देतन। ऊहाँ के आग कहियो नऽ बुतत!44ऊ एगो अईसन जगह हे जहाँ कीड़ा ओकरा खाय लागी बंद नऽ करऽ हे, आउर उनका जलावे वाला आग कहियो नऽ बुतऽ हे45जदि तूँ पाप करे चलते अपन एगो गोड़ के इस्तेमाल करे लागी चाहऽ हऽ तऽ अपन गोड़ के इस्तेमाल करे से रुक जा! ईहाँ तक कि जदि तोरा पाप करे से बचे लागी अपन गोड़ काट के फेंके पड़े, तऽ अईसन कर दिहऽ! ई बढ़ियाँ होत कि तूँ पाप नऽ करऽ आउर अनन्तकाल तक जिन्दा रहऽ, भले धरती पर रहते भर में तोहरा भीर एगो गोड़ नऽ रहे। बाकि ई बढ़ियाँ नऽ होत कि तूँ पाप करऽ आउर ओकर नतीजा के रूप में परमेश्वर तोहर समूचे देह के नरक में फेंक देतन।46जहाँ कीड़ा उनका खाय लागी बंद नऽ करऽ हे आउर ओकरा जलावे वाला आग कभी नऽ बुतऽ हे47जदि तोर आँख के ठोकर के वजह से तूँ पाप में पड़ऽ हऽ, तऽ ऊ चिजवन के देखे से रुक जा! रुक जा ईहाँ तक कि जदि तोहरा पाप करे से बचे लागी अपन आँख भी निकल के फेंके पड़े, तऽ अईसन करऽ! खाली एगो आँख लेके ऊ राज में ढूके ला बढ़ियाँ हे जेकरा पर परमेश्वर शासन करऽ हथन, बजाय एकर कि दूगो आँख हो आउर ऊ तोरा नरक में फेंक देवल जाय।48ऊ जगह में ऊहाँ कीड़ा आदमियन के हमेशा खईते रहऽ हे आउर ऊहाँ आग कहियो नऽ बुतत। 49तोरा दुःख के के बरदास्त करे पड़त ताकि परमेश्वर तोरा से खुश हो जईतन। तोहर दुःख के चिजवन के शुद्ध करे वाला आग के जईसन हे तोहर धीरज ओईसन हे जईसन लोगवन अपन बलिदान पर नमक डाल के ओकरा शुद्ध करऽ हथन। 50नमक खाना में डाले लागी इस्तेमाल करल जा हे, बाकि जदि ऊ स्वादहीन हो जाय तऽ तूँ फिन से ओकरा नमकीन नऽ कर सकऽ हऽ। ओही तरह से, तोरा परमेश्वर लागी उपयोगी बनल रहे के हे, काहेकि जदि तूँ बेकार हो गेलऽ तऽ फिनो से परमेश्वर लागी उपयोगी कईसे बनवऽ। “तोरा एक दोसरा के साथे शान्ति से जिनगी बितावे के चाही।”
Bridge Connectivity Solutions Pvt. Ltd.