Luke24
1सप्ताह के पहिला दिन एतवार के सवेरे बड़ी भोरिये ऊ औरतियन जे गलील यीशु के साथ अईलन हल कब्र पर गेलन। ऊ अपना साथे सुगन्धित मसाला लेले अईलन जेकरा यीशु के लाश पर रगड़े ला ओखनी तईयार करलन हल।2जखनी ऊ पहुँचल, तऽ ओखनी देखलक कि कोई कब्र पर से ऊ पत्थर के जे घूँसे वाला दुआरी के बंद कईले हल लोंघड़ा के दूर बिग देलक हल।3ऊ कब्र में भीतरे गेल, बाकि प्रभु यीशु के लाश ऊहाँ पर नऽ हल!4ओखनी नऽ जानऽ हल कि एकरा बारे में का विचार करे ला हे। तखनी दूगो आदमी फह-फह उजला, चम-चम कपड़ा पेहेनले एकबैग ओखनी विजुन आके खड़ा होल!5ई बात ऊ औरतियन के बड़ी डेरा देलक। ओखनी जमीन तरफ झुक के बईठ गेल। ऊ दूनो आदमी औरतियन से पूछलन, “जौन आदमी जिन्दा हे तोरा ऊ आदमी के खोज ऊ जगह पर नऽ करे ला चाही जहाँ पड़ी ओखनी मरलकन के लाश के गाड़ऽ हथन! 6ऊ ईहाँ पड़ी नऽ हथन। ऊ जिन्दा हो गेलन हे! याद करऽ जहिया ऊ तोहनी के साथे गलील में हलन, तऽ ऊ तोरा से बोललन हल,7ऊ हमरा, आदमी के बेटा, के पापी आदमियन के हाथे सौंप देतन। ऊ आदमी हमरा क्रूस पर चढ़ा के मार देतन। बाकि दू दिन के बाद, हम फिनो से जिन्दा हो जायेम।”8ऊ औरतियन के याद आयेल जौन यीशु ओखनी से कहलन हल।9येहिगुने ऊ कब्र छोड़ के ऊ यीशु के 11 चेलवन आउर दोसर सभे लोग विजुन गेलन आउर जौन घटना होल हल ओखनी के बतईलक।10जौन औरतियन ई बात के प्रेरितवन के बतईलक हल ओखनी मगदला गाँव के रहे वाली मगदलीनी मरियम, योअन्ना, याकूब में माय मरियम, आउर दोसर औरतियन हल जौन ओखनी के साथे हलन,11बाकि 11 प्रेरितवन सोचलन कि ई बात बेवकूफी भरल ही हल, येहिगुने ओखनी ऊ औरतियन के विश्वास नऽ करलन।12तईयो पतरस ई देखे ला कि बात सच हल कि नऽ, ई फईसला लेलन। ऊ कब्र तरफ दौड़ पड़लन। ऊ तरे झुकलन आउर भीतरे ताकलन। ऊ, ऊ सनी के कपड़ा देखलन जेकरा में यीशु के लाश लपेटल हल, बाकि यीशु ओज्जा नऽ हलन। येहिगुने जौन कुछ घटना होल हल ओकरा बारे में सोचते, ऊ कब्र पर से चल गेलन।13ओही दिन यीशु के दूगो चेलवन इम्माऊस नाम के दूर के एगो गाँव दने जा रहलन हल। जे यरूशलेम से लगभग 11 किलोमीटर दूर हल।14ओखनी ऊ सभे बात के बारे में एक दोसर से बात रहलन हल जौन यीशु के साथ घटना होल हल।15जौन घड़ी ओखनी जा रहलन हल आउर ऊ बात के चर्चा कर रहलन हल तऽ यीशु खुद अचानक उनका विजुन पहुँचलन आउर उनकर साथे-साथे चले लगलन।16बाकि परमेश्वर उनका ई समझे से रोक देलन कि ऊ यीशु हथन।17यीशु ओखनी से पूछलन, “तोहनी दूनो चलते-चलते केकरा बारे के बात रहलऽ हलऽ?” ओखनी रुक गेलन, आउर ओखनी के चेहरा पर बड़ी दुःख के भाव हल।18बाकि ओखनी में से एगो जेकर नाम क्लियुपास हल, उनका जबाब देलक, “तूँही एगो अकेले आदमी होवऽ जौन यरूशलेम के यात्रा कर रहलऽ हे आउर जौन हाले के दिन में ऊहाँ के होल घटना के बारे में नऽ जानऽ हऽ!”19ऊ उनका से पूछलन, “कईसन घटना?” ओखनी जबाब देलन, “ऊ बात जौन यीशु के साथ घटित होल, ऊ आदमी जौन नासरत के रहे वाला हलन, जे कि एगो भविष्यद्वक्ता हलन। परमेश्वर उनका बड़का-बड़का चमत्कार देखावे में आउर परमेश्वर उनका अचरज सन्देशवन के शिक्षा देवे के काबिल बनईलन। जादेतर लोगवन के विचार में ऊ अजगुत हलन।20बाकि हमनी के प्रधान याजकवन आउर अगुवन उनका रोमी अधिकारियन के सौंप देलन। ओखनी उनका मौत के सजा देलन, आउर ओखनी उनका क्रूस पर चढ़ा के मार देलन।21हमनी उम्मीद कर रहली हल ई ओही आदमी हलन जौन हमनी इस्राएलियन के हमनी के दुश्मन से छोड़ईतन! बाकि ई अखनी ई संभव नऽ हे, काहेकि रोमियन के द्वारा मार देवल गेला के बाद से तीन दिन गुजर गेल हे।22एकर बदले, हमनी के समाज के कुछ औरतियन हमरा अचरज में डाल देलक। आज बिहने भोरिये ओखनी कब्र पर गेल जहाँ यीशु के गाड़ल गेल हल,23बाकि यीशु के लाश ओज्जा पड़ी नऽ हल! ओखनी घूर के आके हमनी के बतईलक कि ओखनी दर्शन में कुछ स्वर्गदूत के देखलन। ऊ स्वर्गदूत बतईलन कि यीशु जिन्दा हथन!24तऽ ओखनी में से कुछ जौन हमनी के साथ हलन जखनी ऊ औरतियन आके ई बतईलक तऽ कब्र पर गेली। ओखनी देखलन कि ऊ बात ओईसहीं हल जईसन ऊ औरतियन खबर देलक हल। बाकि ओखनी यीशु के नऽ देखलन।”25तऽ यीशु ओखनी दूनो चेलवन से बोललन, तोहनी दूनो बेवकूफ हऽ! जौन सभे बात भविष्यद्वक्तावन मसीह के बारे में लिखलन हे ओकरा पर अपन मन में विश्वास करे में तोहनी बड़ी ढीला हऽ!26पक्का तौर से तोहनी के पता होवे के चाही कि मसीह लागी ई जरुरी हल कि ऊ सभे बात में दुःख उठईतन आउर महिमा में प्रवेश करतन, आउर फिन परमेश्वर के तरफ से इज्जत-मर्याद के पा लेतन!27तऽ यीशु ओखनी के सभे बात समझा देलन जौन उनका बारे में कहल गेल हे। ऊ मूसा के लिखल पवित्रशास्त्र में से बात शुरु करलन, आउर फिन उनका समझईलन कि सभे भविष्यद्वक्तावन का लिखलन हल। 28जखनी ओखनी ऊ गाँव विजुन पहुँच गेलन जहाँ ऊ दूनो आदमी जा रहल हल, आउर अईसन लगल कि यीशु सड़क पर बुलते आगे जा रहलन हल।29बाकि ओखनी उनका से अईसन नऽ करे ला विनती करलन ओखनी कहलन, “आज रात हमनी के साथ रहऽ काहेकि दूपहर गुजर गेल हे आउर जल्दी अंधार हो जायेत।” येहिगुने ऊ उनका साथे रहे लागी घर में भीतरे गेलन।30जखनी ओखनी के साथ खाना खाय लागी बईठ गेलन, तऽ यीशु जरीसुन रोटी लेलन आउर ओकरा ला परमेश्वर के धन्यवाद देलन। फिन ऊ ओकरा टुकड़ा-टुकड़ा तोड़लन आउर ऊ दूनो आदमी के जरीसुन देवे लगलन।31आउर तऽ परमेश्वर ओखनी के उनका पछाने के काबिल बनईलन। बाकि तुरन्त ऊ गायब हो गेलन!32ओखनी एक दोसर से बोललन, “जखनी हम सड़क पर चल रहली हल आउर ऊ हमनी से बात रहलन हल आउर हमनी के पवित्रशास्त्र के समझे काबिल बना रहलन हल, हमनी भीतरे से अपन मन में ढेर जादे हौसला से भर गेली हल! ई सभे के येहिगुने मकसद निकलऽ हे कि मसीह के दुःख उठावऽ ही पड़त बाकि ओकर बाद बड़का इज्जत हासिल होत।”33येहिगुने ओखनी तुरन्त निकल के यरूशलेम लौट गेलन। ओज्जा ओखनी ऊ यीशु के 11 प्रेरितवन आउर कुछ दोसर लोगवन के पईलन जौन उनका साथे जमा हो गेलन हल।34प्रेरितवन ऊ दूनो आदमी से कहलन, “ई सच हे कि प्रभु फिन से जी उठलन हे ऊ शमौन के देखाई भी देलन हे!”35फिन ऊ दूनो आदमियन दोसर कोई के बतईलन कि जखनी ऊ सड़क पर चल रहलन हल तऽ का होल हल। ऊ ओखनी के ई बतईलन कि कईसे ऊ दूनो यीशु के पछान गेलन जखनी ऊ ओखनी लागी कुछ रोटी तोड़लन।36जखनी ऊ ई कह ही रहलन हल, अचानक में यीशु खुद उनकर बीचवे में परकट हो गेलन। ऊ ओखनी से बोललन, “परमेश्वर तोहनी के शान्ति प्रदान करतन!”37बाकि ओखनी शान्ति में नऽ हलन। ओखनी चौंक गेलन हल आउर डेरा गेलन हल काहेकि ओखनी के लगल कि ओखनी कोई आत्मा के देख रहलन हे!38बाकि यीशु ओखनी से कहलन, “तोहनी के मन में चिंता नऽ करे के चाही। आउर तोहनी के शंका भी नऽ करे के चाही कि हम जिन्दा ही।39हमर हाथ के जख्म के आउर हमर गोड़वन के देखऽ! अईसे कर के तूँ तय कर सकल हे कि ई सचमुच में हमहीं ही। आत्मा के देह नऽ होवऽ हे, जईसन कि तूँ देखऽ हऽ कि हमरा पास हे, आउर तूँ ई साबित करे ला हमरा छू भी सकलऽ हे कि हमर देह सचमुच में हे।”40ओखनी से अईसे बोलला के बाद, ऊ ओखनी के अपन हथवन आउर गोड़वन के जख्म देखईलन।41ओखनी एतना खुश हलन कि ऊ अखनी भी अविश्वाश कर रहलन हल कि ऊ सचमुच में जिन्दा हलन येहिगुने ऊ ओखनी से बोललन, “का तोहनी भीर ईहाँ पड़ी कुछ हे जेकरा हम खा सकऽ?”42येहिसे ओखनी उनका भूंजल मछली के एगो टुकड़ा देलन43आउर जबकि ओखनी देखहीं रहलन हल, ऊ ओकरा लेके खा लेलन।44फिनो ऊ ओखनी से बोललन, “हम ओकरा फिनो से दोहरायेम जौन हम तोहनी से ऊ घड़ी कहली हल जहिया पहिले हम तोहनी साथे हली। परमेश्वर ऊ सभे कुछ करे वाला हथन जौन ऊ मूसा के व्यवस्था आउर भविष्यद्वक्तावन मसीह के बारे में समूचे पवित्रशास्त्र में कहलन हे, पूरा होवे।”45तऽ ऊ ओखनी के पवित्रशास्त्र के ऊ बात के जौन उनका बारे में कहल गेल हल समझे के काबिल बना देलन। ऊ ओखनी से बोललन,46“ई ओही हे जौन पवित्रशास्त्र में लिखल गेल हे: कि मसीह दुःख झेलतन आउर मर जईतन, बाकि ओकर बाद तिसरका दिन, ऊ फिन से जिन्दा हो जईतन। 47पवित्रशास्त्र ई कहऽ हे कि जौन कोई मसीह पर विश्वास करऽ हथन ऊ जा के उनका तरफ से मन फिराव के प्रचार करतन कि परमेश्वर ऊ देश के लोगवन के मांफ कर देतन जौन पाप करे ला बंद कर दे हथन। हम चाहऽ ही कि तूँ ई करऽ कि ईहाँ यरूशलेम से शुरु कर के दुनियाँ में रहे वाला सभे लोगवन के समाज में जईहऽ।48तोहनी के लोगवन के गवाही बतावे ला हे कि तोहनी हमरा साथे घंटेवाला ऊ सभे बात के देख लऽ हे जेकरा लागी पवित्रशास्त्र कहऽ हे कि ऊ मसीह के साथे घटित होत।49आउर जईसन कि हमर पिता प्रतिज्ञा करलन हल, हम तोरा विजुन स्वर्ग से पवित्रात्मा के भेजे वाला ही। बाकि तोहनी के ऊ घड़ी ला यरूशलेम के ई शहर में ठहरल रहे ला हे जब ला कि परमेश्वर तोहनी के पवित्र आत्मा के सामर्थ प्रदान नऽ करतन।”50फिन यीशु ओखनी के शहर से बाहरी ले गेलन जब ला कि बैतनिय्याह गाँव के नजदीक नऽ आ गेलन। ओज्जा पड़ी ऊ अपन दूनो हाथ के उठा के ओखनी के आशीष देलन।51आउर अईसन होल कि ऊ उनका आशीष देहीं रहलन हल, तऽ ऊ ओखनी के छोड़ के स्वर्ग में चल गेलन। 52उनका दण्डवत करला के बाद, ओखनी बड़ी खुशी से यरूशलेम घूर गेलन।53रोजदिन ओखनी भवन में गेलन आउर ईहाँ पड़ी परमेश्वर के स्तुति में समय गुजारलन।
Bridge Connectivity Solutions Pvt. Ltd.