Luke23
1फिन उनकर समूचे भीड़ उठ खड़ा होल आउर यीशु के रोमी राजपाल पिलातुस भीर ले गेल।2ओखनी पिलातुस के सामने उनका पर इजलेम लगईलक। ओखनी बोललक, “हमनी देखली हे कि ई आदमी हमनी के देश के लोगवन के राह से भटका के परेशानी पईदा कर रहलन हे। ऊ ओखनी से ऊ लगान के भुगतान नऽ करे लागी कह रहलन हे जेकरा रोमी सम्राट, कैसर लागू करलन हे। साथही ऊ कह रहलन हल कि ऊ मसीह, एगो राजा हथन!”3तऽ पिलातुस उनका से पूछलन, का तूँ यहूदियन के राजा हऽ? यीशु जबाब देलन, “हाँ, जईसन तूँ हमरा से कहलऽ हे।”4फिन पिलातुस प्रधान याजक आउर भीड़ से बोललन, “ई आदमी कोई भी अपराध के दोषी नऽ हथन।”5बाकि यहूदी महासभा के तरफ से आयेल लोगवन के भीड़ यीशु पर इजलेम लगईते रहलन। ओखनी बोललक, “ऊ लोगवन में दंगा भड़कावे ला कोशिश कर रहलन हे। ऊ समूचे यहूदिया के इलाका में अपन वचन के प्रचार कर रहलन हे। ऊ गलील के इलाका में अईसहीं करे ला शुरु करलन हे, आउर ऊ ईहों अईसहीं कर रहलन हे!”6जखनी पिलातुस ई सुनलन जौन ओखनी कहलन हल, तऽ ऊ पूछलन, “का ई आदमी गलील इलाका के रहवईया हथन?”7जखनी पिलातुस के पता चलल कि यीशु गलील के रहवईया हथन, ऊहाँ हेरोदेस अन्तिपास राज पर अधिकार करऽ हलन, तऽ ऊ यीशु के उनका भीर भेज देलन। ऊ घड़ी ला हेरोदेस यरूशलेम में ही हलन।8जखनी हेरोदेस यीशु के देखलन तऽ ऊ बड़ी खुश होलन, काहेकि ऊ ढेर समय से यीशु के देखे ला चाहऽ हलन। अईसन येहिगुने हल काहेकि हेरोदेस उनका बारे में बड़ी सा बात सुनलन हल, आउर ऊ उनका से कोई चिन्ह करते देखे ला आशा रखऽ हलन।9येहिगुने हेरोदेस यीशु से ढेरमनी सवाल पूछलन, बाकि यीशु ओकरा में से कोई सवाल के भी उनका जबाब नऽ देलन।10आउर प्रधान याजक आउर यहूदी व्यवस्था के कुछ शास्त्री यीशु भीर ही खड़ा रहलन आउर उनका पर ढेरमनी अपराधवन के करे ला मजबूती से इजलेम लगईते रहलन।11फिन हेरोदेस आउर उनकर सिपाहियन यीशु के बेईज्जती करलन आउर उनकर मजाक उड़ईलन। ओखनी ई ढोंग करे लागी कि ऊ एगो राजा हलन बेसकीमती कपड़ा पेहेनईलन। तऽ हेरोदेस उनका वापस पिलातुस भीर भेज देलन।12ऊ घड़ी ला ऊ दूनो लोग एक दोसर के जान के दुश्मन हलन, बाकि ऊ दिन हेरोदेस आउर पिलातुस दोस्त बन गेलन।13फिन पिलातुस प्रधान याजक आउर दोसर धार्मिक अगुवन के आउर ऊ भीड़ के जौन अखनी भी ओज्जे पड़ी हलन एक साथे एकजूट करलन।14ऊ उनका से बोललन, “तोहनी ई आदमी के लेके हमरा भीर अईलऽ, ई कह के कि ई लोगवन के बगावत करे में अगुवाई कर रहलन हल। बाकि हम चाहऽ ही कि तोहनी जान लऽ कि जखनी तूँ सुन रहलऽ हे तऽ ओकर जाँच करलऽ के बाद, हम ई निचोड़ निकासऽ ही कि जौन काम लागी तोहनी कहलऽ हल कि ऊ करलन हे ओकरा में से कोई के भी करे लागी ऊ दोषी नऽ हथन।15साथही हेरोदेस इनका बेगर सजा देले हमरा भीर वापस भेज देलन हे। एकर मतलब हे कि ओहू येही निचोड़ निकासलन हे कि ऊ दोषी नऽ हथन येहिगुने ई साफ हे कि ई आदमी कुछ अईसन नऽ करलन हे जेकरा से कि ई मार देवल जाय के जोग होतन।16येहिगुने हम अपन सिपाहियन से कह के इनका सोंटा मरवायेम आउर फिनो इनका छोड़ देम।”17पिलातुस अईसन येहिगुने कहलन काहेकि उनका सभे फसह के परव में एगो कैदी के छोड़ देवे पड़ऽ हल।18बाकि समूचे भीड़ एकजूट होके चिल्लाय लगल, “ई आदमी के मार दऽ! एकर बदले हमनी लागी बरअब्बा के छोड़ दऽ!”19अखनी बरअब्बा ऊ आदमी हलन जौन यरूशलेम शहर में रोमी सरकार के खिलाफ बगावत करे लागी कुछ लोगवन के उसकईलन हल। ई अपराध के चलते ओकरा जेलखाना में डालल गेल हल।20बाकि पिलातुस बड़ी चाहऽ हलन कि यीशु के छोड़ देतन, येहिगुने फिनो से भीड़ से बात करे ला कोशिश करलन।21बाकि ऊ चिल्लईते रहलन, “उनका क्रूस पर चढ़ा दऽ! उनका क्रूस पर चढ़ा दऽ!”22तऽ पिलातुस तिसरका बेरा भीड़ से बात करलन। “नऽ ऊ कोई अपराध नऽ करलन हे! ऊ अईसन कुछ भी नऽ करलन हे जेकरा चलते ऊ मार देवल जाय के योग्य हथन। येहिगुने हम उनका अपन सिपाहियन से उनका सोंटा मरवायेम आउर फिनो हम उनका छोड़ देम।”23बाकि भीड़ में से लोग चिल्लईते रहलन आउर जिद्दपूर्वक कहलन कि पिलातुस यीशु के क्रूस पर चढ़ा देतन। आखिरकार, काहेकि जोर से भीड़ चिल्लईते रहल, येहिगुने ओखनी पिलातुस के मना लेलक।24येहिगुने पिलातुस ऐलान करलन कि जौन ऊ चाहऽ हथन ऊ ओकरा करतन।25फिन पिलातुस ऊ आदमी के छोड़ देलन जेकरा छोड़े ला भीड़ उनका से कह रहल हल। ऊ आदमी जेलखाना में ई चलते हलन काहेकि ऊ सरकार के खिलाफ लड़ाई लड़लक हल आउर लोगवन के जान मारलक हल! तऽ पिलातुस सिपाहियन के हुकूम देलन कि ओखनी यीशु के ले जा के ओईसहीं करतन जईसन भीड़ चाहऽ हल। 26अखनी ओज्जा पड़ी शमौन नाम के एगो आदमी हल, जौन अफ्रीका के कुरेने शहर के रहे वाला हलन। पिलातुस के महल से यरूशलेम आ रहलन हल। जौन घड़ी सिपाहियन यीशु के ले जा रहल हल, तऽ ओखनी शमौन के पकड़ लेलक। यीशु से ऊ क्रूस के ले लेलन जेकरा ओखनी उनका पर धईलक हल, आउर ओखनी ओकरा शमौन के कन्धा पर धर देलक। ओखनी ओकरा ऊ उठ के यीशु के पीछे चले ला कहलक।27अखनी एगो बड़का भीड़ यीशु के पीछे चल रहल हल। भीड़ में बड़ी मनी औरतियन हल जौन अपन दुःख परकट करे ला अपन छाती पीट रहल हल आउर दुःखी होके उनका ला रो रहल हल।28बाकि ओखनी एहसान के मान लेवे के बदले यीशु यरूशलेम के औरतियन तरफ घूर के बोललन, “हे यरूशलेम के औरतियन, हमरा लागी मत रोवऽ! बदले एकर, अपना ला आउर अपन संतान लागी जौन डेरावना बात होवे वाला हे ओकरा ला रोवऽ!29काहेकि हम चाहऽ ही कि तोहनी जान लऽ कि जल्दिये एगो अईसन समय आवत जखनी लोग कहतन, धन्य हे ऊ औरतियन केतना भाग्यशाली हे जौन कहियो भी कोई संतान के जनम नऽ देलन हे चाहे बच्चवन के दूध नऽ पिलईलन हे!30बाकि ई शहर में रहे वाला लोग कहतन, ‘हम चाहऽ ही कि हमनी पर पहाड़ गिर जाय आउर चट्टान हमनी के झाँक लेम!’31ई घड़ी लोगवन ला दोसरा के साथे गलत काम के करे ला मुश्किल हे, ओईसहीं जईसे कच्चा लकड़ी में आग लगावे ला मुश्किल होवऽ हे। बाकि ओकर बाद, दोसरा के साथे डेरावना काम के करे में लोग असानी से काबिल होतन, ओईसहीं जईसे सुखल लकड़ी में आग लगावे ला आसान होवऽ हे।”32दूगो दोसरका आदमी, जौन कि अपराधी हलन, ओही यीशु के साथे-साथे ऊ जगह पर जा रहल हल जहाँ रोमी लोग ओकरा मार देतन।33जखनी ऊ, ऊ जगह पर पहुँच गेलन जेकर नाम खोपड़ी हल, ऊहाँ पड़ी सिपाहियन यीशु के क्रूस पर काँटी से ठोक के उनका क्रूस पर चढ़ा देलक। ओखनी येही काम के दोसर अपराधियन के साथे भी करलन। ओखनी एगो के यीशु के दहिना क्रूस पर आउर दोसरका के उनकर बामा तरफ क्रूस पर खाड़ा कर देलक।34बाकि यीशु कहलन, “हे पिता, कृपा कर के ई लोगवन के मांफ कर दऽ। ई जानऽ नऽ हथन कि ई का कर रहलन हे।” फिन सिपाहियन उनकर कपड़वन के आउर पासा जईसन कोई चीज से ई तय करे ला जुआ खेललक कि सभे के कपड़ा के कौन टुकड़ा मिलत। 35बड़ी लोग ऊहाँ खड़ा होके देख रहलन हल। जखनी यहूदी अगुवा यीशु के मजाक उड़ा रहल हल। यहूदी अगुवन भी ओही तरह के काम करलन। ओखनी बोललन, “ई दोसर कोई के बचईलन! जदि परमेश्वर सचमुच इनका मसीह होवे ला चुनलन हे, तऽ इनका खुद के भी बचावे के चाही!” 36सिपाहियन भी उनकर मजाक बनईलक। उनका भीर आके ओखनी उनका कड़वा सिरका देलक। 37ओखनी उनका से कहलक, “जदि तूँ यहूदियन के राजा हऽ तऽ खुद के बचा लऽ आउर मजाक उड़इलक!”38उनकर माथा के ऊपरे, सिपाहियन एगो चिन्हासी भी लगईलक जेकरा में लिखल गेल हलन, “ई यहूदियन के राजा हथन।”39ऊ अपराधियन में से एगो जौन यीशु के क्रूस के बगल में लटकल हल ओही उनकर निन्दा करलक। ऊ बोललक, “जदि तूँ सचमुच मसीह रहतऽ हल, तऽ तूँ खुद के बचा लेतऽ हलऽ, आउर तूँ हमर भी बचा लेतऽ हलऽ!”40बाकि दोसरका अपराधी ओकरा अईसन बोले ला डाँटलक। ऊ ओकरा से कहलक, “तोरा परमेश्वर से तोरा सजा देवे से डेराय के चाही! तोहूँ तऽ क्रूस पर मर रहलऽ हे, जल्दिये परमेश्वर तोर न्याय करतन।41हमनी दूनो तऽ न्याय के मुताबिक दंड पा रहली हे। ऊ हमनी के येहिगुने सजा दे रहलन हे काहेकि हमनी ऊ गलत काम के चलते जौन हमनी करली हे एकर काबिल ही। बाकि जौन आदमी के तूँ अपमान कर रहलऽ हे ऊ कोई भी गलत काम नऽ करलन!”42फिनो ऊ यीशु से कहलन, “हे यीशु जहिया तूँ राजा के रूप में राज करे लगवऽ तऽ कृपया कर के हमर ख्याल रखिहऽ आउर हमरा साथे अच्छा सुलूक करिहऽ!”43यीशु जबाब देलन, “हम सच में चाहऽ कि तूँ जान लऽ कि आजे तूँ हमरा साथे स्वर्गलोक में होवऽ!” 44तऽ ई लगभग दूपहर के बेला हल। बाकि ऊ समूचे देश में दूपहर में तीन बजे ला अंधार होल रहल।45ऊहाँ सूरज के इंजोर नऽ रहल। आउर मन्दिर के भीतरे जौन मोटा परदा हल जौन परमपवित्र स्थान के झाँकऽ हल ऊ दू आधा में फट के हिगरा गेल। 46जखनी अईसन होल, तऽ यीशु ऊँचा आवाज में चिल्लईलन, “हे पिता, हम अपन आत्मा तोर देख-रेख में छोड़ऽ ही!” उनकर अईसन बोलला के बाद, ऊ साँस लेवे ला बंद कर देलन आउर मर गेलन।47जखनी ऊ सूबेदार जौन सिपाहियन के हुकूम दे रहल हल जौन घटना होल हल ओकरा देखलन, तऽ ऊ बोलल, “सच में ई आदमी कुछ गलती नऽ करलन हल, ई आदमी सच में धर्मी हलन!” जौन ऊ बोलल ओकरा से परमेश्वर के महिमा होल।48जखनी भीड़ के ऊ लोगवन जौन ई आदमी के मरते देखे ला साथ होल हल ऊ देखलन जौन सच में घटित होल हल, तऽ ऊ ई देखावे ला कि ऊ दुःखी हलन अपन छाती पीटते अपन घर में वापस चल गेल।49बाकि जखनी बचल भीड़ चल गेल तऽ, जेतना यीशु के पछानऽ हलन, ओकरा में ऊ औरतियन भी शामिल हलन जौन उनका जौरे गलील इलाका से अईलन हल, जहाँ थोड़ा दूर पर खड़ा हलन, ओज्जे से जौन घटित होल हल ओकरा देखते रहलन। 50ओज्जा एगो यूसुफ नाम के आदमी हलन जौन यरूशलेम में रहऽ हलन ऊ एगो अच्छा आउर धर्मी आदमी हलन जौन यहूदी महासभा के एगो सदस्य भी हलन।51बाकि ऊ दोसर महासभा के सदस्यवन से सहमत नऽ हलन जखनी ओखनी यीशु के मार देवे ला फईसला लेलन हल आउर जखनी ओखनी योजना बनईलन हल कि एकरा कईसे करे ला हे। ऊ यहूदिया के अरिमतियाह के रहे वाला हलन। ऊ उम्मीद कर के ऊ घड़ी के इंतजार कर रहलन हल जखनी परमेश्वर अपन राजा के राज करे ला शुरु करे ला भेजतन।52यूसुफ पिलातुस विजुन गेलन आउर यीशु के लाश के लेके ओकरा गाड़ेला इजाजत देवे लागी ऊ पिलातुस से विनती करलन पिलातुस उनका इजाजत दे देलन,53येहिगुने यूसुफ यीशु के देह के क्रूस पर से नीचे उतार लेलन। ऊ ओकरा सनी के कपड़ा के लम्बा चादर में लपेट देलन। तऽ ऊ यीशु के लाश के एगो कब्र में धर देलन जेकरा कोई खड़ा चट्टान में काटलन हल।54ई ऊ दिन घटित होल जहिया यहूदी लोग अपन विश्रामदिन ला तईयार हो रहलन हल। जल्दी सूरज डूब के सब्त के शुरुआत होवे वाला हल। 55जौन औरतियन यीशु के साथे गलील इलाका से अईलन हल, ऊ यूसुफ आउर उनकर साथियन के पीछे-पीछे गेलन, ओखनी ऊ कब्र के देखलक, आउर ई देखलक कि ओकरा भीतरे ऊ आदमी यीशु के लाश कईसे रखलक हल।56फिन ऊ औरतियन वापस चल गेल जहाँ पड़ी ओखनी ठहरल हल कि यीशु के देह पर लगावे लागी इत्र आउर सुगन्धित चीज तईयार करम। तहियो जखनी सब्त शुरु होल तऽ ओखनी काम करे ला बंद कर देलक, जईसे यहूदी व्यवस्था आज्ञा देलक हल।
Bridge Connectivity Solutions Pvt. Ltd.