John1
1दुनियाँ के पैदाईस से पहिलहीं वचन अस्तित्व में हल। वचन परमेश्वर के जौरे हल। वचने परमेश्वर हलन।2दुनियाँ के अस्तित्व में आवे से पहिलहीं ऊ, माने कि वचन, परमेश्वर के साथ हल।3परमेश्वर वचन के जरिये सभे चिजवन के रचना करलन। परमेश्वर ओकरा से ई दुनियाँ के सभे चिजवन के रचना करलन।4वचन अनन्त जिनगी दे हे, आउर ऊ अनन्त जिनगी परमेश्वर के बढ़ियाँ आउर सच्चा इंजोर हे जेकरा ऊ आदमियन पर प्रकट करऽ हथन।5परमेश्वर अपन भला आउर सच्चा इंजोर के ई बुरा संसार पर भी प्रकट करलन, आउर ई बुरा संसार ओकरा नऽ अपनईलक।6परमेश्वर यूहन्ना नाम के एगो अादमी के पेठईलन जेकरा यूहन्ना बपतिस्मा देवे वाला के नाम से भी जानल जा हल।7ऊ यीशु के बारे में जे इंजोर हथन, लोगवन के प्रचार करेलागी अईलन हल। ऊ ई बात के प्रचार करलन जेकरा से कि सभे कोई उनकर गवाही के माध्यम से ही ऊ इंजोर पर विश्वास करतन।8यूहन्ना खुद तऽ इंजोर नऽ हलन, बाकि ऊ येहिगुने अईलन हल जेकरा कि लोगवन के ऊ इंजोर के बारे गवाही देतन।9ऊ सच्चा इंजोर यीशु हलन, जे परमेश्वर के सच्चाई आउर भलाई के सबकोय पर प्रकट करलन। ऊ इंजोर ओही हलन जे संसार में आवे वाला हल।10वचन संसार में हल, आउर वचन दुनियाँ के रचना करलक। तईयो संसार के लोग उनका नऽ पछानलन। 11ऊ वचन उनकर अपन लोगवन, यहूदियन भीर अईलक, बाकि ओखनी ओकरा नऽ मानलन।12बाकि सभे ऊ लोग के जे उनका अपनईलन आउर उनका पर विश्वास करलन ऊ ओखनी के परमेश्वर के बेटा होवे के अधिकार देलन।13परमेश्वर के ई सभे संतान आत्मिक रूप से लहू आउर देह के माध्यम से पईदा नऽ होलन हल, अाउर नऽ आदमी के मन से, आउर नऽ ओखनी के पिता के इच्छा से नऽ आत्मिक रूप से पईदा लेलन हल। बलुक, ओखनी परमेश्वर के जरिये आत्मिक रूप से पईदा लेलन हल।14वचन एगो असली देह बन गेल आउर नश्वर रूप से ईहाँ पर जिनगी बीतईलन जहाँ हमनी जिनगी बितावल कर ही हमनी उनका अपन महिमामय प्रकृति के प्रदर्शन करते देखली हे। माने कि ऊ एकलौता बेटा के महिमामय प्रकृति जे पिता बिजुन से आयेल हथन। ऊ परमेश्वर के दया से भरल काम आउर सच्चा शिक्षा के पूरा हकदार हथन। 15यूहन्ना बपतिस्मा देवेवाला लोगवन के वचन बारे में गवाही दे रहलन हल। आउर जे उनकर अगल बगल हलन ओखनी पर ऊ चिकरलन, “हम तोहनी के बतईली हल कि हमर बाद कोई अईतन अाउर एहु कि अाउर ऊ हमरा से कहीं जादे खास हथन काहेकि ऊ हमरा से ढेर पहिले अस्तित्व में हलन।”16हमनी जानऽ ही कि वचन पूरा तरह परमेश्वर के दयावान कामवन के अाउर सच्चा शिक्षावन के धारण करलन हे काहेकि जे पूरा तरह अधिकारी हलन उनकर वजह से हमनी सभे कोई के फईदा होल, अाउर एगो के बाद एगो निमन कामवन से फईदा मिलल हे।17अईसन येहिगुने हे काहेकि परमेश्वर मूसा के जरिये अपन व्यवस्था इस्राएलियन के देलन हल। बाकि परमेश्वर के दयालु काम अाउर सच्चा संदेश यीशु मसीह के जरिये समूचे अस्तित्व में अईलक।18कखनियो कोई भी अादमी परमेश्वर के नऽ देखलन हे। बाकि ऊ एकलौता यीशु ही परमेश्वर हथन। ऊ परमेश्वर पिता के करीबी में हथन, अाउर ऊ खुद पिता के परकट भी करलन हे।19यूहन्ना बपतिस्मा देवेवाला एही गवाही देलन हल जखनी यहूदी अगुवन यरूशलेम नगर से कुछ याजकवन अाउर लेवियन के उनका से ई पूछे लागी भेजलन हल कि “तूँ के हऽ?”20ऊ बखत यूहन्ना हिम्मत कर के मान लेलन कि “हम मसीह नऽ ही!”21तऽ ओखनी उनका से पूछलन, “जदि अईसन हे तऽ, फिनो तूँ हऽ कौन? का तूँ एलिय्याह हऽ?” ऊ कहलन “नऽ।” ओखनी फिनो से पूछलन, “का तूँ ओही भविष्यद्वक्ता हऽ जेकरा बारे में परमेश्वर कहलन हल कि ऊ अईतन?” यूहन्ना जवाब देलन नऽ।22येहिगुने एखनी याजकवन अाउर लेवियन एक बेरा फिनो यूहन्ना से पूछलन, “तूँ हऽ के? हमरा बतावऽ जेकरा से कि हमनी ऊ अगुवन के जे हमनी के भेजलन हे खबर देम कि तूँ कौची कहऽ हऽ तूँ कौन होवे के दावा ठोकऽ हऽ?”23यूहन्ना ओखनी से कहलन, “हम ऊ आदमी ही जे ई सुनसान जगह में येहिगुने पुकारऽ ही कि जखनी प्रभु अईतन तऽ प्रभु के अपनावे लागी तोहनी के तईयार करम। हम उँहें ही जेकरा बारे में यशायाह भविष्यद्वक्ता शास्त्र में पहिलहीं से बता देलन हल।” 24ई याजक अाउर लेवी जिनका यूहन्ना भीर यरूशलेम के अगुवन भेजल हल फरीसी हलन।25ओखनी उनका से पूछलन, “जदि तूँ नऽ मसीह हऽ अाउर नऽ एलिय्याह हऽ अाउर नऽ कोई भविष्यद्वक्ता हऽ, तऽ फिन तूँ लोगवन के बपतिस्मा कईसे दे रहल हे?”26यूहन्ना जवाब देलन, “हम तऽ अादमी के पानी से बपतिस्मा दे रहली हे, बाकि ई घड़ी तोहनी के बीच में कोई अादमी अईसन भी हथन जिनका तोहनी नऽ जानऽ हऽ।27ऊ हमर बाद आवऽ हथन, बाकि हम एतना काबिल भी नऽ ही कि उनकर जूता के फीता खोलम।” 28ई घटना यरदन नदी के पार पूरब दिशा में बसल बैतनिय्याह शहर में घटित होल हल। ईहें ऊ जगह हे जहाँ यूहन्ना लोगवन के बपतिस्मा दे रहलन हल।29ई बात के घटे के एक दिन बाद यूहन्ना यीशु के अपना तरफ अईते देखलन। तऽ ऊ लोगवन से कहलन, “देखऽ! ऊ हथन परमेश्वर के मेम्ना! ऊ ई संसार में रहेवालन लोगवन के पापवन के मांफ ला अपने आप के बलि कर देतन। 30ईहें ऊ आदमी हथन जिनकर बारे में हम कहली हल कि कोई हथन जे हमर बाद आवे वाला हथन अाउर जे हमरा से बढ़ के खास हथन, काहेकि हमरा से बड़ी पहिले अस्तित्व में हलन।31पहिले तऽ हम नऽ जानऽ हली कि ऊ कौन हथन। तईयो, हम लोगवन के एही मकसद से पानी से बपतिस्मा दे रहल हल कि उनका इस्राएल के लोगवन पर प्रकट करूँ।”32अाउर यूहन्ना गवाही देलन, “हम परमेश्वर के पवित्र आत्मा के एगो कबूतर के जईसन प्रकट होते स्वर्ग से नीचे उतरते देखली। फिन पवित्र आत्मा यीशु पर रुक गेल।33पहिले तऽ हम नऽ जानऽ हली कि ऊ कौन हथन, बाकि परमेश्वर हमरा सभे अादमी के पानी से बपतिस्मा देवे लागी भेजलन आउर हमरा से कहलन, जौन अादमी पर तूँ हमर आत्मा उतरते अाउर रुकते देखवऽ ओही ऊ अादमी हथन जे पवित्र आत्मा से बपतिस्मा देतन।34हम ई देखली हे, अाउर हम तोहनी से ई गवाही दे ही कि ई अादमी, यीशु, यीशु परमेश्वर के बेटा हथन।”35ई बात घटित होवे के अगला दिन, यूहन्ना बपतिस्मा देवेवाला फिनो से दूगो चेलवन के साथ हलन।36जखनी ऊ यीशु के भीर से गुजरते देखलन, तऽ ऊ कहलन, “देखऽ! ईहें हथन परमेश्वर के मेम्ना!”37तऽ यूहन्ना के दूनो चेलवन सुनलक जे ऊ कहलन हल अाउर ओखनी यीशु के पीछे चल गेलन।38जखनी यीशु पीछे मुड़लन अाउर ओखनी के अपन पीछे अईते देखलन, तऽ ऊ ओखनी से पूछलन, “हे रब्बी यहूदियन के अरामी भाषा में जेकर माने कि गुरु होवे हे, तूँ केज्जा रुकल हऽ?”39ऊ जबाब देलन, “हमरा साथ आवऽ, अाउर तूँ देखे लगवऽ!” येहिगुने ऊ अईलन अाउर देखलन जहाँ यीशु ठहरल हलन। ऊ दिन ऊ ओखनी के जौरहीं रुक गेलन काहेकि देर होते हल ई लगभग चार बजे दूपहर बाद के समय हल।40जिनकनी ऊ बात सुनलन हल जे यूहन्ना कहलन हल अाउर यीशु के पीछे हो लेलन हल ऊ दूनो चेलवन में से एगो अन्द्रियास हलन। ऊ शमौन पतरस के भाई हलन।41अन्द्रियास पहिले गेलन अाउर अपन भाई शमौन से मिललन। जखनी ऊ ओकरा बिजुन अईलन, तऽ ऊ कहलन, “हमनी के मसीह मिल गेलन हे!” यूनानी भाषा में मसीह के माने कि “ख्रीस्त” होवऽ हे।42अन्द्रियास शमौन के यीशु बिजुन ले गेलन। जखनी यीशु पतरस पर नजर डाललन, तऽ ऊ कहलन, “तूँ शमौन हऽ। तोर बाबूजी के नाम यूहन्ना हे। अखनी से तोर नाम कैफा भी होतन।” कैफा एगो अरामी शब्द हे जे कि यूनानी में “पतरस” हे अाउर ओकर अर्थ “चट्टान” होवऽ हे।43ई बात के बीतला के अगला दिन यीशु ऊ जगह के छोड़ देवे ला फईसला लेलन। ऊ गलील प्रान्त में चल गेलन अाउर उनका फिलिप्पुस नाम के एगो आदमी मिलल। यीशु ओकरा से कहलन, “आवऽ हमर चेला हो जा।”44फिलिप्पुस गलील में मौजूद बैतसैदा शहर के रहे वाला हलन। ईहें ऊ नगर हे जहाँ के रहे वाला अन्द्रियास अाउर पतरस हलन।45तऽ फिलिप्पुस गेलन अाउर ओकरा नतनएल से मिललन। जखनी ऊ ओकरा बिजुन अईलन, तऽ ऊ कहलन हमनी के मसीह मिल गेलन हे जेकर बारे में मूसा व्यवस्था में जे परमेश्वर इस्राएलियन के देलन हलन लिखलन हल अाउर जेकर बारे में भविष्यद्वक्ता कहलन हल कि ऊ अईतन। यीशु ही ऊ मसीह हथन। उनकर बाबूजी के नाम यूसुफ हे। ऊ नासरत नगर के रहे वाला हथन। 46नतनएल जबाब देलन, “नासरत के रहे वाला? जरुर ऊ नगर से कुछो भी अच्छा चीज नऽ निकल सकल हे!” फिलिप्पुस जबाब देलन, “चलऽ अाउर खुद ही देख लऽ!”47जखनी यीशु नतनएल के अपन नजदीक अईते देखलन, तऽ ऊ ओकरा से कहलन, “देखऽ! ईहाँ एगो सच्चा इस्राएली हथन! ऊ कखनियो केकरो धोखा नऽ दे हथन!”48नतनएल उनका से पूछलन, “तूँ कईसे जानऽ हऽ कि हम कौन किसीम के आदमी ही?” यीशु जवाब देलन, “एकरा से पहिले कि फिलिप्पुस तोरा बोलईलन हम तोरा देखली हल, जखनी तूँ अंजीर के पेड़ के नीचे अकेलहीं बईठल हल।”49तऽ नतनएल ऐलान करलन कि, “हे गुरु, तूँ जरुर परमेश्वर के बेटा हऽ! तूँ इस्राएल के महाराजा हऽ, जिनकर हमनी असरा देख रहली हल!” यीशु के शिक्षक कहलन50यीशु जवाब देलन, “का तूँ हमरा पर खाली येहिगुने विश्वास करऽ हऽ काहेकि हम तोरा कहली कि हम तोरा अंजीर के पेड़ के तरे देखली हल? तूँ हमरा अईसन काम करते देखवऽ जे ओकरो से भी बड़ी बढ़ के हे!”51फिनो यीशु ओकरा से कहलन, “हम तोरा से सच कह रहली हे: जईसन दर्शन तोर पुरखा याकूब ढेर समय पहिले देखलन हल, तूँ स्वर्ग के खुलल देखवऽ, अाउर तूँ परमेश्वर के स्वर्गदूतवन के ऊपर जईते अाउर हमरा आदमी के बेटा पर उतरते देखवऽ।”
Bridge Connectivity Solutions Pvt. Ltd.