Luke22
1अखनी लगभग ऊ घड़ी आ ही गेल हल जखनी अखमीरी रोटी के परव मनावल जाय, जेकरा लोग फसह भी कहऽ हथन।2प्रधान याजक आउर यहूदी व्यवस्था के गुरु अईसन कोई उपाय के खोजे में हलन कि ऊ बड़ी मनी लोगवन में जौन ई विचार रखऽ हलन कि ऊ कोई महान पुरुष हथन बेगर कोई दंगा कईले ऊ यीशु के मार देतन, बाकि ऊ लोग यीशु डरऽ हलन।3तऽ शैतान यहूदा में घूँसल, जेकर दोसरका नाम इस्करियोती हल। ऊ बारहो चेलवन में से एगो हल।4ऊ जा के प्रधान याजक आउर परमेश्वर के पहरदारवन के सरदार से ई बारे में बात करलक कि ऊ कईसे यीशु के पकड़े में उनकर मदत कर सकल हल।5यहूदी अगुवा बड़ी खुश होलन जखनी अईसन करे ला विचार रखलक। ओखनी बोललन कि जदि ऊ अईसन करत तऽ ऊ ओकरा दौलत देतन।6येहिगुने यहूदा मान गेल, आउर फिनो ऊ यीशु के पकड़े में उनकर मदत करे ला कोई अईसन उपाय के खोज करे लगलन जहाँ भीड़ एकरा देखे नऽ पायेम।7फिन अखमीरी रोटी के दिन आयेल। ऊ दिन फसह के बलिदान करे ला जरुरी हे। 8येहिगुने यीशु पतरस आउर यूहन्ना के ई हुकूम दे के बाहरी भेजलन; “जा के फसह मनावे ला भोज के तईयारी करऽ जेकरा से हमनी एक साथे ओकरा खईवऽ।”9ओखनी उनका जबाब देलतन, “अपने केज्जा चाहऽ हथन कि हमनी फसह के तईयारी करीयई?”10ऊ जबाब देलन, “गौर से सुनऽ। जखनी तोहनी शहर में जईवऽ, तऽ एगो आदमी एगो बड़का गो बरतन उठईले तोरा मिलतन। ओकर पीछे-पीछे ऊ घर में जईहऽ जेकरा में ऊ घूँसतन।11ऊ घर के मालिक से कहिहऽ, 'हमर गुरु जी कहऽ हथन कि हमरा ऊ घर देखावऽ जेकरा में हमनी के, मतलब कि ऊ अपन चेलवन के साथे ऊ अपन फसह के भोज खा सकतन।12ऊ तोरा एगो बड़का गो घर देखईतन जौन ऊ घर के ऊपरका कोठरी पर होत। ऊ मेहमान के स्वागत लागी पूरा तईयार रहतन। ऊहाँ पड़ी हमर भोज के तईयारी करिहऽ।”13येहिगुने ओखनी दूनो चेलवन शहर में चल गेलन। ओखनी सभे कुछ ओईसहीं पईलन जईसन यीशु ओखनी से कहलन हल। येहिगुने ओखनी ऊहाँ फसह मनावे के भोज के तईयारी करलन।14जखनी ऊ भोज के खाय घड़ी अईली तऽ यीशु आके ऊ बारहो प्रेरितवन के साथ मेज पर बईठ गेलन।15यीशु चेलवन से कहलन, “हम अपन मरे से पहिले तोहनी साथे फसह के ई खास भोज खायला चाहली हल।16काहेकि हम तोरा से कहऽ ही कि जब तक ऊ परमेश्वर के राज में पूरा नऽ होवे तब तक हम ऊ कहियो नऽ खायेम।”17तऽ ऊ दाखरस के कटोरा के उठा के परमेश्वर के धन्यवाद देलन। ऊ अपन प्रेरित से बोललन, “ई दाखरस के लेके अपने में बाँट लऽ।18हम चाहऽ ही कि तोहनी अईसहीं करिहऽ काहेकि हम तोहनी से कहऽ ही कि हम फिनो से ऊ घड़ी ला दाखरस नऽ पियम जब ला कि परमेश्वर के रूप में सभे जगह पर राज नऽ करम।”19फिन यीशु कुछ रोटी लेके ओकरा ला परमेश्वर के धन्यवाद देलन। ऊ ओकरा टुकड़ा-टुकड़ा तोड़ के खाय लागी ओखनी के देलन। जखनी ऊ अईसन करलन, तऽ ऊ बोललन, “ई रोटी हमर देह हे, जेकरा हम अपने लागी बलि चढ़ावे वाला हे। बाद में हमर इज्जत करे ला फिन से करतन।”20ई तरीका से, उनकर भोज खा लेला के बाद, ऊ दाखरस के कटोरा के उठ के बोललन, “ई नया वाचा हे जेकरा हम अपन खुद के लहू के काम में लाके हम बाँधम, जौन हमर मरे के घड़ी हमर घाव से तोहनी लागी बहत। 21बाकि हम चाहऽ ही कि तोहनी सभे जानऽ लऽ कि जौन कोई हमरा हमर दुश्मन के हाथ में सौंपत ऊ ईहाँ हमरा साथे भोजन कर रहल हे। 22हम ई येहिगुने कहऽ रहली हे काहेकि हम, आदमी के बेटा, सचमुच में ई तरीका से मरम जेकरा लागी परमेश्वर योजना बनईलन हे। बाकि ऊ लोग ला ई केतना आफत होत जौन हमरा हमर दुश्मन के हाथ में सौंपत!”23तऽ ओखनी प्रेरितवन एक दोसर से पूछे लगल कि ओखनी में से कौन सचमुच में यीशु के पकड़वावे लागी तईयार हे।24एकर बाद ऊ प्रेरित अपने में बकझक करे लगलन, कि ओखनी में से किनका ई विचार करे के चाही ऊ सभे से बड़का आदमी हथन।25बाकि ऊ उनका से कहलन, अन्यजाति के राजा ओखनी पर प्रभुता करऽ हे, आउर जौन ओखनी पर अधिकार रखऽ हे ऊ उपकारक कहलावऽ हथन।26बाकि तोहनी के ऊ राजावन के जईसन नऽ बने ला हे! बजाय एकर तोहनी में से सभे से जादे इज्जतदार लोग के अईसन वर्ताव करे के चाही जईसे कि ऊ तोहनी में से सभे से कम इज्जतदार आदमी हथन जे कोई लोग अगुवा हथन उनका दास के जईसन सेवा करे के चाही।27काहेकि तोहनी जानऽ हऽ कि बड़ी बड़का लोग ऊ हथन जौन मेज पर खाना खा हथन, ऊ नौकर नऽ जौन खाना लेके आवऽ हे। बाकि जौन घड़ी हम तोहनी के बीच में ही तऽ हम, तोहनी के अगुवा तोहनी के सेवा कर के तोहनी लागी एगो नमूना रख रहली हे।28तोहनी ओही लोग हऽ जे ऊ सभे मुश्किल समय में हमरा साथे बनल रहल जेकरा से हम दुःख होली हल।29येहिगुने हम अखनी तोहनी के ऊ खास पद पर रख रहली हे जेकरा से तोहनी राज करवऽ, जईसे हमर पिता हमरा राजा के रूप में राज करे ला रखलन हे।30जहिया हम राजा बनम तऽ हमर राज में तोहनी हमरा साथे मेज पर बईठ के खईवऽ आउर पिवऽ। बलुक तोहनी सिंहासनवन पर बईठ के इस्राएल के बारहो गोत्र के लोग के न्याय करवऽ। 31तब यीशु शमौन से कहलन, “हे शमौन, हे शमौन, गौर करऽ!” शैतान परमेश्वर से तोहनी सभे के अईसहीं परखे ला बोलल हे, जईसे कोई चलनी में अनाज चालऽ हे, आउर परमेश्वर उनका अईसन करे के इजाजत दे देलन हे।32बाकि हे शमौन, हम तोरा लागी प्रार्थना करली हे। हम परमेश्वर से कहली हे कि तूँ हमरा पर विश्वास करे ला पूरा तौर से बंद नऽ करवऽ। येहिगुने जखनी तूँ ई फईसला लेवऽ कि सचमुच में हमरा पर विश्वास करऽ हऽ, तऽ दोसर प्रेरित भाई के भी हमरा पर विश्वास करे ला हौसला बढ़ईहऽ। 33पतरस उनका जबाब देलन, “हे प्रभु हम तोरा साथे जेलखाना में भी जाय लागी तईयार ही। ईहाँ ला कि हम तोरा लागी मरे ला भी चाहऽ ही!”34बाकि यीशु जबाब देलन, “हे पतरस हम चाहऽ ही कि तूँ जानऽ लऽ कि आज के रात एकरा से पहिले कि मुर्गा बाँग देत, तूँ तीन बेरा कहवऽ कि तूँ हमरा नऽ जानऽ हऽ।”35तब यीशु चेलवन के पूछलन, “जखनी हम तोरा बाहरी भेजली गाँव में, आउर तूँ चल गेलऽ बेगर कोई बटुआ, आउर झोली, आउर भोजन, चाहे जूतवन लेले, तऽ का कुछ अईसन भी होल जेकर तोरा जरुरत पड़ल बाकि ऊ नऽ मिलल?” ओखनी जबाब देलन, “नऽ अईसन कुछ भी नऽ हल!”36फिनो यीशु कहलन, “बाकि अखनी जदि तोहनी में से कोई भीर धन हे, तऽ ऊ ओकरा अपना साथ ले जईतन। साथे-साथ जौन कोई भीर खाना हे, आउर झोली भी ऊ ओकरा अपना साथ ले जईतन। आउर जेकरा ही तलवार नऽ हे, तऽ ऊ अपन कुरता बेच के मोल कीन लेतन!”37हम तोहनी से ई येहिगुने कहऽ ही काहेकि एगो भविष्यद्वक्ता हमरा बारे में पवित्रशास्त्र में जौन लिखलन हल ऊ जरुर पूरा होत: लोगवन उनका साथ अपराधियन जईसन वर्ताव करलन। जौन कुछ भी पवित्रशास्त्र हमरा बारे में कहऽ हे ऊ होवे वाला हे। 38चेलवन जबाब देलन, “हे प्रभु, देखतन! हमनी विजुन दूगो तलवार हे!” ऊ जबाब देलन, “हमनी के दूगो से जादे के जरुरत नऽ पड़त।”39यीशु शहर से निकल के जैतून के पहाड़ पर चल गेलन, जईसन कि ऊ साधारण रूप से करते रहऽ हलन। उनकर चेलवन भी उनका साथे गेलन।40जखनी यीशु अपन चेलवन के साथे ऊ जगह पर अईलन, जहाँ पड़ी ऊ जादेतर रात गुजारऽ हलन, तऽ ऊ उनका से कहलन, “प्रार्थना करऽ कि जखनी तोहनी परीक्षा में पड़िहऽ तऽ पाप नऽ करे में परमेश्वर तोहनी के मदत करतन।”41फिन ऊ उनका से तीस गज के दूरी पर गेलन, आउर ठेहुनियाँ मार के प्रार्थना करलन।42ऊ बोललन, “हे पिता जदि तोर इच्छा होत तऽ कृपा कर के ऊ दुःख के कटोरा महसूस नऽ होवे के इजाजत दऽ जौन होवे वाला हे। बाकि ऊ नऽ करतन जौन हम चाहऽ ही। ओही करतन जौन तूँ चाहऽ हथन।”43तऽ एगो स्वर्गदूत स्वर्ग से उनका विजुन आके उनका हिम्मत प्रदान करलक।44उनका भारी दिक्कत हो रहल हल। येहिगुने ऊ बड़ी वेदना से प्रार्थना करलन। उनकर पसेना खून के बड़का-बड़का ठोप बन के जमीन में गिर रहल हल।45जखनी यीशु प्रार्थना कर के उठलन, तऽ ऊ अपन चेलवन विजुन घूर अईलन। ऊ पईलन कि ओखनी सूत रहलन हल। ऊ बड़ी दुःखी हलन आउर येही बात उनका बेचैन कर देलक हल।46ऊ ओखनी के जगा के उनका से बोललन, “ई तोहनी लागी सुतल रहे के घड़ी नऽ हे! उठऽ! प्रार्थना करऽ कि परमेश्वर तोहनी के मदत करतन। कि कोई भी बात तोहनी के पाप करे लागी परीक्षा में नऽ डाले।”47जखनी यीशु बोलहीं रहलन हल, तऽ लोगवन के एगो भीड़ उनका विजुन आयेल। यहूदा जौन बारहो प्रेरितवन में से एगो हल, ओखनी के राह देखा रहल हलऽ ऊ यीशु के गाल पर चूम के प्रणाम करे ला उनका विजुन अईली।48बाकि यीशु ओकरा से पूछलन, “हे यहूदा, तूँ हमरा, आदमी के बेटा के हमर दुश्मन के हाथ में देवे ला चुम्बन के काम में लावे के हिम्मत कईसे करलऽ!”49जखनी चेलवन के समझ में आ गेल कि का होवे जा रहल हे, तऽ ओखनी कहलन, “हे प्रभु, का हमनी के ओखनी के तोरा कैद करे से रोके ला अपन हथियार के काम में लावे के चाही?”50चेलवन में से एगो अपन तलवार के खींच के महायाजक के नौकर पर चला देलक, बाकि खाली ओकर दहिनवारी कान के ही काटलक।51बाकि यीशु बोललन, “एकरा से आगे कुछ भी नऽ करऽ!” फिनो ऊ, ऊ नौकर के ओज्जा पड़ी छूलन जहाँ उनका जख्म होल हल आउर उनका चंगा कर देलन।52फिन यीशु प्रधान याजक, भवन के पहरदार के सरदार, आउर यहूदी पुरनियन से कहलन जौन उनका कैद करे ला अईलन हल, “ई अचरज के बात हे कि तोहनी ईहाँ तलवार आउर लाठी के लेके हमरा कैद करे ला अईलऽ हे। जईसे कि हम कोई डकैत ही।”53ढेर दिन ला हम तोहनी के साथे भवन में हली। बाकि तोहनी हमरा कैद करे के जला भी कोशिश नऽ करल! बाकि ई ऊ घड़ी हे जेकरा में तूँ ऊ कर रहलन हे जौन तूँ चाहऽ हऽ। ई ऊ घड़ी भी हे जखनी शैतान ऊ अधिकार गलत काम के कर रहल हे जईसन कि ऊ करे ला चाहऽ हे।54यहूदी अगुवन आउर सिपाहियन यीशु के धर लेलक आउर उनका ले गेल। ऊ उनका महायाजक के घरे ले अईलक। पतरस ढेर पिछाड़ी से एगो सुरक्षा भरल दूर रह के उनका पीछा करलन।55कुछ लोग आग जराके अँगना में एक साथ बईठ गेलन। पतरस भी आके उनकर बीच में बईठ गेलन।56एगो दासी पतरस के ओज्जा बईठल देखलन जखनी आग के इंजोर उनका पर पड़ल। ऊ उनका गौर से देख के कहलन, “ई आदमी भी ऊ आदमी के साथे हल जेकरा ऊ कैद करलन हे!”57बाकि पतरस ई कहऽ के नकार देलन, “हे बहिन, हम उनका नऽ जानऽ ही!”58थोड़ा देर के बाद कोई दोसर पतरस के देख के कहलन, “तोहूँ ओकरा में से हऽ जौन ऊ आदमी के साथे हलऽ जिनका ओखनी कैद करलन हे। बाकि पतरस बोललन नऽ महोदय, हम ओखनी में से कोई नऽ ही!”59लगभग एक घंटा के बाद कोई आउर जोड़गर आवाज में बोलल, “जौन तरीका से ई आदमी बात करऽ हे ओकरा से लगऽ हे कि ऊ सच में गलील इलाका के रहवईया हे। येहिगुने ई पक्का ऊ ईहाँ ई आदमी के साथ अईलन हे जिनका ओखनी कैद करलन हे!”60बाकि पतरस कहलन, “हे श्रीमान, ई सच नऽ हे!” तुरन्त जखनी पतरस बोल ही रहलन, कि तुरन्त मुर्गा बाँग देलक।61प्रभु पीछे मुड़ के पतरस पर नजर डाललन। तऽ पतरस के याद अईलक जौन यीशु उनका से कहलन हल “आज के रात, एकरा से पहिले कि मुर्गा बाँग देत, तूँ तीन बेरा नकार देवऽ कि तूँ हमरा नऽ जानऽ हऽ।”62आउर पतरस अँगना से बाहरी जा के बड़ी दुःखी होके रोवे लगलन।63जौन आदमी यीशु के प्रभारी रक्षक पहरदारी कर रहल हल ऊ ओखनी उनकर मजाक उड़ईलन आउर उनका मारलक-पिटलक।64ओखनी उनकर आँख पर पट्टी बाँध देलक जेकरा से कि ऊ देखे नऽ पईतन आउर तऽ उनका पीटे के पारी लेवे लगलक। ओखनी उनका से पूछलक, “हमरा देखावऽ कि तूँ भविष्यद्वक्ता हऽ! भविष्यद्वाणी कर कि तोरा कौन मारलक हे!”65ओखनी उनकर मजाक उड़ा के, उनका बारे में बड़ी दोसरा कठोर बात बोललन, आउर निन्दा करलन।66दोसरका दिन भोरिये, यहूदी अगुवन में से बड़ी सा एक जगह एक साथे होलन। ई झुण्ड के पुरनिया आउर प्रधान याजक के जौरे ऊ शास्त्री भी हलन जौन यहूदी व्यवस्था के शिक्षा देते रहऽ हलन। ओखनी सिपाहियन के यीशु के यहूदी महासभा में लावे ला कहलन।67ओज्जा ओखनी उनका से कहलन, “जदि तूँ मसीह हऽ, तऽ हमरा बता दऽ!” बाकि ऊ जबाब देलन, “जदि हम कहम कि हम मसीह ही, तऽ तूँ हमर विश्वास नऽ करवऽ।68बाकि जदि हम तोरा से पूछम कि का अपने के लगऽ हे कि हम मसीह ही, तऽ अपने हमरा जबाब नऽ देतन।69बाकि अखनी से, हम, आदमी के बेटा, सर्वशक्तिमान परमेश्वर के बगल में बईठम आउर शासन करम!” 70फिनो ऊ सभे पूछलन, “जदि ई अईसन हे, तऽ का तूँ कहऽ रहलऽ हे कि तूँ परमेश्वर के बेटा हऽ?” ऊ जबाब देलन, “हाँ, जौन तूँ कह रहलऽ हे ऊ सच हे।”71तऽ ओखनी एक दोसर से कहलन, “हम खुद ही उनका कहते सुन लेली हे कि ऊ परमेश्वर के नजदीक हथन! आउर हमनी के ई पक्का तौर से उनकर खिलाफ में ई निन्दा के इजलेम में गवाही देवे ला दोसर लोग के जरुरत नऽ हे।”
Bridge Connectivity Solutions Pvt. Ltd.