Luke21
1फिन यीशु जहाँ ऊ बईठल हलन ओज्जा से नजर उठा के अमीर लोगवन के अपन धन के दान भवन के अँगना में धरल दान भण्डार में नईते देखलन।2ऊ एगो गरीब विधवा के भी ओही दान भण्डार में ताँबा के दूगो जरीगो सिक्का नईते देखलन।3आउर यीशु चेलवन से बोललन, “सच ई हे कि गरीब विधवा दान भण्डार में ई धनी लोग से बढ़ के नईलन हे।4हम तोरा बतावऽ ही कि ई सच का हे। ओखनी सभे धनवान लोग बड़ी दान देलन हे, बाकि ऊ दोसर के धन हल जेकर उनका सचमुच में जरुरत नऽ हल। बाकि ई विधवा जे कि बड़ी गरीब हथन, ऊ सभे दौलत दान भण्डार में दे देलन जौन उनका विजुन हल, ईहाँ तक कि उनका जिन्दा रहे ला सचमुच में एकर जरुरत हल।”5यीशु के कुछ चेलवन में से ई बारे में बात कर रहलन हल लोग के द्वारा देवल गेल सुन्दर पत्थरवन आउर सजावट के समान से कईसे भवन के सजावल गेल हल। बाकि यीशु बोललन,6“हम तोरा बतावऽ ही कि का घटना घटे वाला हे ई सामान के साथे जेकर तूँ बड़ाई कर रहलऽ हे। कोई दिन तोर दुश्मन एकरा पूरा तौर से बरबाद कर देतन।”7फिन ओखनी यीशु से पूछलन, गुरु, “ई बात कहिया होत? आउर ओकर का चिन्हासी होत?”8यीशु जबाब देलन, कोई भी तोरा राह से भरमावे नऽ पईतन। काहेकि ढेरमनी लोग अईतन आउर सभे कोई ई दावा ठोकतक कि ऊ हम ही। सभे कोई अपने बारे में बोलतक कि हम ओही। सभे कोई खुद के बारे में कहतक, हम मसीह ही! ऊ ई कहतक, ऊ घड़ी लगभग आ गेल हे जखनी राजा के रूप में परमेश्वर राज करतन। जौन ऊ कह रहलन हे ओकरा पर विश्वास मत करिहऽ! 9एकरा जौरे, तूँ लड़ईयन के आउर लोगवन के एक दोसर से झगड़ा के बारे में सुनबऽ। दुनियाँ के अन्त होवे से पहिले अईसन बात के होवे ला जरुरी हे। येहिगुने जखनी तूँ अईसन बात के सुनबऽ तऽ मत डेरईहऽ।10आगे कहलन, लोग के अलग-अलग राज एक दोसर पर हमला करत, आउर अलग-अलग देश के लोग एक दोसर से लड़ाई करत। 11आउर बड़ी जगह पर बड़का-बड़का भूकम्प होत। ऊहाँ पड़ी अकाल आउर महामारी भी होत। बड़ी सा बात होत जेकरा से आदमी बड़ी डेरा जईतन। लोग आसमान में भयंकर चीज के देखतन जेकरा से चिन्ह परकट होत कि कुछ बड़ी ही खास घटना घटे वाला हे।12बाकि ई सभे बात के घटित होवे से पहिले ओखनी हमर नाम के चलते तोर दुश्मन तोरा धर के तोरा साथ बड़ी बुरा व्यवहार करत। ऊ तोरा आराधनालय में ले जईतन, जिनकर न्यायी तोरा पर मुकदमा चलईतन आउर तोरा जेलखाना में डाल देत। काहेकि तूँ हमरा पर विश्वास करऽ हऽ येहिगुने तोर दुश्मन विजुन तोरा पर मुकदमा चलावे ला राजा आउर प्रधान सरकार के अधिकार भी होतन।13हमरा बारे में उनका गवाही बतावे ला ऊ तोरा लागी एगो समय होत।14येहिगुने ई बारे में समय से पहिले ई मन में चिंता नऽ करे के मजबूत वादा करऽ कि तूँ अपन बचाव लागी का कहवऽ,15काहेकि हम तोरा के सही वचन देम जेकरा से तूँ जानऽ लेवऽ कि का कहेला हे। एकर नतीजा कोई भी तोरा पर इजलेम लगावे वाला कोई भी आदमी ई नऽ कह पईतन कि तूँ गलत हऽ।16आउर ईहाँ ला कि तोरा माय बाप भाई आउर बहिन आउर दोसर हित नाता आउर दोस्त भी तोरा धोखा देतन, आउर ऊ तोहनी में से कुछ के मार देतन।17जादेतर लोग तोरा से ई ला दुश्मनी रखतन, काहेकि तूँ हमरा पर विश्वास करऽ हऽ18बाकि आत्मिक तौर से तोर पूरा वजूद सुरक्षा में रहत। 19जदि तूँ मुश्किल घड़ी से होके गुजरऽ हऽ आउर साबित करऽ हऽ कि तूँ परमेश्वर पर भरोसा करऽ हऽ, तऽ तोर मरला के बाद तोर आत्मा परमेश्वर के मौजूदगी में जिन्दा रहत।20जखनी तूँ दुश्मन के फौज यरूशलेम शहर के चारो तरफ देखवऽ तऽ तूँ जान जईहऽ कि ऊ जल्दिये ऊ शहर के खतम कर देत।21ऊ घड़ी तोहनी में से जौन यहूदिया इलाका के दोसरा जगह में रहतन, तऽ ऊ पहाड़ पर भाग जईतन। आउर तोहनी में से कोई लोग ई शहर में हऽ तऽ ऊ निकल जईतन। तोहनी में से जौन भीर के गाँव में हऽ, तऽ ऊ शहर में नऽ जईतन।22तोरा भाग जाय के चाही काहेकि परमेश्वर ई घड़ी यरूशलेम शहर के बदला लेतन। जखनी ऊ अईसन करऽ हथन तऽ, ई बारे में परमेश्वर जौन पवित्रशास्त्र में जौन कहलन हे पूरा होत। 23जखनी अईसन घटना होवे लगत तऽ गर्भवती औरतियन आउर अपन लईका के दूध पियावेवाली औरतियन लागी ई केतना आफत होत। देश में ढेर अत्याचार होत। परमेश्वर ई लोगवन पर खिसियईतन आउर उनका कड़ाई से सजा देतन।24ओकरा में से कुछ लोग मर जईतन काहेकि सिपाही उनका अपन हथियार से मार देत। बचलकन के पकड़ के उनकर दुश्मन कैद कर के दुनियाँ भर में केतना जगह पर भेज देत। जखनी तक परमेश्वर इजाजत दे हथन, तखनी तक अन्यजातियन यरूशलेम के काबू में रखतन। 25“ऊ घड़ी सूरज, चाँद, आउर तरेगन के साथे अचरज बात के आउर चिन्ह घटित होत। आउर धरती पर देश में रहेवालन के जातियन ढेर डेरा जईतन। ऊ ओईसहीं डेरा जईतन जईसे ऊ भारी हलफा वाला गरजते समुद्र से होवऽ हे। 26लोग एतना डेरा जईतन कि ऊ बेहोश हो जईतन काहेकि दुनियाँ में आगे का घटित होत ऊ ओकर इंतजार कर रहलन हे। आसमान के तरेगन अपन जगह से हट जायेत। 27तऽ लोग हमरा, आदमी के बेटा के, सामर्थी रूप से आउर चमकते महिमा के साथे बादल पर अईते देखतन। 28येहिगुने जखनी ई डेरावना बात घटित होवे लगत, तऽ आत्मविश्वास के मुद्रा धारण कर लिहऽ काहेकि परमेश्वर जल्दिये तोरा के छोड़ईतन।”29फिन यीशु उनका एगो दृष्टान्त देलन। ऊ कहलन, अंजीर के पेड़ के आउर सभे पेड़ के बारे में सोचऽ।30जखनी तूँ देखऽ हऽ कि ओकर पत्तियन के कोपल निकल रहल हे, तऽ तूँ जान ले हऽ कि ई गरमी के मौसम के शुरुआत हे।31येही तरीका से, जखनी तूँ ई बात के घटित होते देखवऽ, जेकर हम अखनी बखान करली हे, तऽ तूँ जान लेवऽ कि परमेश्वर खुद के जल्दिये राजा के रूप में राज करतन।32हम अपने के सच बता रहली हे। ऊ लोग जौन सभे से पहिले ई चिन्हवन के देखऽ हथन, जेकर हम बखान करली हे ऊ पक्का तौर से सभे बात के घटित होते देखे ला भी जिन्दा रहतन।33तोरा लगऽ होत कि आसमान आउर धरती हमेशा स्थाई हे। ऊ नऽ हे, बाकि हमर वचन स्थाई हे।34खुद पर काबू रखे में बड़ी ही होशियार रहिहऽ। जदि तूँ नशा में हो जा हऽ, तऽ तोर मन बाद में सचेत नऽ रहत। आउर जदि तूँ ई जिनगी के बात के चिंता करऽ हऽ, तऽ तूँ डगमगा जईवऽ। तऽ तूँ ऊ इशारा पर गौर नऽ करवऽ जेकरा बारे में हम तोरा बतईली हे, आउर जहिया हम वापस आयेम तऽ हम तोरा हैरान कर देम।35हम एतना अचानक से धरती पर आ जायेम कि ई अईसन होत जईसे कोई जाल एगो जानवर के फँसा दे हे। येहिगुने तोरा हमर वापसी पर गौर करे के जरुरत हो, काहेकि ई धरती के रहे वाला सभे आदमी के असर करत। 36येहिगुने तोहनी के हमर आगमन ला हमेशा तईयार रहे ला हे। प्रार्थना करऽ कि जखनी तोहनी ई मुश्किल बात के महसूस करवऽ जेकरा बारे में हम बात कर रहली हे। तऽ तूँ आदमी के बेटा प्रति विश्वासयोग्य बने के काबिल रहवऽ। येही तरीका से हम, मसीह, जहिया ई दुनियाँ के न्याय करे ला आयेम तऽ हम तोरा बेदाग घोषित कर देम।37रोजदिन यीशु लोग के परमेश्वर के भवन में शिक्षा दे रहलन हल। बाकि हर साँझ के ऊ शहर से बाहरी जा के पूरा रात भर जैतून के पहाड़ पर रहऽ हलन।38आउर रोज बिहने भोरिये, लोगवन के बड़का भीड़ उनका शिक्षा देते घड़ी उनकर संदेश सुने ला परमेश्वर के भवन में अईते रहऽ हलन।
Bridge Connectivity Solutions Pvt. Ltd.