Luke2
1ओही समय के दौरान, कैसर औगस्तुस, जौन समूचे रोमी साम्राज्य पर शासन करऽ हलन आदेश निकासलन कि उनकर साम्राज्य में रहे वाला सभे दुनियाँ के आदमी के अपन नाम पंजीकरण करवावे ला जरुरी हे मतलब उनकर नाम ऊहाँ के बसिन्दा लोगवन के एगो सरकारी खतियान में होवे ला जरुरी हे।2ई पहिला दफा हल जब रोमियन अपन साम्राज्य में रहे वालन सभे आदमी के नाम लिखाई करलन हल। ई ओखनी ऊ समय के दौरान करलन हल जहिया क्विरिनियुस सीरिया प्रान्त के राजपाल हल।3येही से सभे आदमी के पंजीकरण करवावे लागी अपन घराना के गृहनगर में जाहीं ला हलक।4यूसुफ भी, मरियम के साथे, जेकरा से उनकर मँगनी हो गेल हल आउर ऊ पेट से हलन, अपन कुल खानदान के शहर में जाय लागी यात्रा करलन। काहेकि यूसुफ दाऊद के कुल से हलन, येही से गलील प्रदेश के नासरत शहर के छोड़ के ओखनी यहूदिया प्रदेश के, बैतलहम शहर चल देलन, जेकरा दाऊद के नगर के रूप में जानल जा हल। यूसुफ आउर मरियम ऊहाँ सार्वजनिक खतियान पंजीकरण करवावे ला गेलन।6जखनी ऊ बैतलहम पहुँचलन, तऽ जहाँ पर साधारण मेहमान ठहरऽ हलन ऊ जगह पर उनका ठहरेला कोई जगह नऽ हल। येही से उनका उँहें बैतलहम में एगो अईसन जगह सराय में रुके पड़ल जहाँ पर रात में जानवर सुतल रहऽ हल। जौन घड़ी ऊ ऊहाँ हलन तबहिये मरियम के प्रसव होवे के समय आ गेल आउर ऊ अपन पहिलौठा बच्चा, एगो बेटा के जनम देलन। ऊ ओकरा बुटीदार कपड़ा के चौड़ा फलिया में लपेट के ऊहें पर चरनी में सुता देलन जहाँ पर खलिहान में जानवर ला गौत रखल जा हल।8ओही रात कुछ चरवाहा बैतलहम भीर खुलल मैदान में डेरा डालले हलन। ओखनी ओज्जा पर अपन भेड़ियन के पहरा दे रहलन हल।9एकबैग ओखनी प्रभु के तरफ से आयेल एगो स्वर्गदूत के अपना भीर खड़ा होल देखलन। प्रभु के तरफ से एगो प्रभु के महिमा के इंजोर ओखनी के चारो तरफ चमक उठल। ऊ बड़ी डेरा गेलन।10बाकि ऊ स्वर्गदूत उनका से कहलन, “डेरा मत! गौर से सुनऽ, काहेकि हम तोरा बड़ी खुशी के शुभ संदेश सुनावे अईली हे! ई शुभ समाचार सभे लोगवन लागी हे, आउर एकरा से सभे कोई के खुश होवे के चाही!11ऊ खुश होतन काहेकि आज बैतलहम में दाऊद के शहर में, उद्धारकर्ता पईदा होलन हे जौन तोरा तोर पाप से बचईतन! ओही मसीह, प्रभु हथन!12आउर ऊहाँ तोरा लागी एगो चिन्ह हे। जदि तूँ बैतलहम जईवऽ, तऽ ऊहाँ तोहनी एगो लईका के कपड़ा के फलिया में लपेटल जानवर के गौत खाय के जगह चरनी में सुतावल पईवऽ।”13एकबैग स्वर्गदूत के एगो बड़का झुण्ड दोसर स्वर्गदूत के साथे स्वर्गीय सेना परकट होल। ओखनी सभे के सभे ई कहते परमेश्वर के स्तुति कर रहलन हल,14“सभे स्वर्गदूत सभे से ऊँचा स्वर्ग में परमेश्वर के स्तुति करऽ! आउर धरती पर ऊ समूचे लोगवन में परमेश्वर के आउर एक दोसरा के साथे शान्ति बनल रहे जौन परमेश्वर के खुश करऽ हे!”15जखनी स्वर्गदूत उनका छोड़ के स्वर्ग लौट गेलन, तऽ चरवाहा एक दोसरा से कहलन, "हमनी के येही घड़ी बैतलहम जा के ई अचरज बात के देखे के चाही जौन होल हे, आउर जेकरा बारे में प्रभु हमरा बतईलन हे!"16येहिगुने ऊ जल्दी से गेलन, आउर जखनी ओखनी ऊ जगह जहाँ मरियम आउर यूसुफ ठहरल हलन मिल गेल तऽ ओखनी लईका के जानवर के गौत खाय के नाद में सुतल देखलन।17ओकरा देख लेला के बाद, जौन परमेश्वर ऊ लईका के बारे में उनका पर परकट करलन हल ओखनी सभे के कह देलन।18जौन सुन रहलन हल ऊ समूचे लोग मानलन कि जौन चरवाहवन उनका बतईलन हे ऊ अनोखा हल।19बाकि मरियम सोच समझ के ई सभे बात के अपन मन में याद रखलन आउर ओकरा बारे में हमेशा विचार करते रहलन।20ऊ सभे गड़ेरियन जहाँ पर उनकर भेड़ियन हल ऊ मैदान में लौट गेलन। ओखनी ई बारे में बतियईते रहलन कि परमेश्वर केतना महान हथन आउर ऊ सभे बात लागी उनकर स्तुति करते रहलन जौन ओखनी सुनलन आउर देखलन हल। सभे बात ठीक ओईसहीं होल जईसन कि ऊ स्वर्गदूत उनका होवे ला बतईलन हल।21ऊ लईका के जनम लेला के बाद अठवाँ दिन, ओखनी ओकर खतना करलन आउर ओकर नाम यीशु रखलन। ई ओही नाम हल जौन ऊ स्वर्गदूत मरियम के पेट में लईका रहे से पहिले ही ओकरा रखे ला ओखनी से कहलन हल। 22मरियम आउर यूसुफ ओतना दिन तक इंतजार करलन कि जेतना संस्कारित रीति से लईका के जनम देला के बाद ओकरा फिनो से शुद्ध होवे लागी मूसा के व्यवस्था में जरुरी हल। फिनो ऊ ओकरा लेके यरूशलेम के अईलन जेकरा से ओखनी ओकरा प्रभु लागी आराधनालय में सौंप देतन। 23ओखनी प्रभु के व्यवस्था के आज्ञा पालन करे लागी अईसन करलन, जौन कहऽ हे, “जौन जनम लेवे में पहिलौठा हे ऊ सभे मरद लईका के तूँ प्रभु लागी पवित्र आउर अलग करिहऽ।” 24ओज्जा पर ओखनी ऊ बलिदान चढ़ईलन जेकर नया जनम लेवल बेटा के माय-बाप के चढ़ावे लागी प्रभु के व्यवस्था कहऽ हे, “दूगो पण्डुक, चाहे कबूतर के दूगो बच्चा।” 25ऊ घड़ी यरूशलेम में एगो धर्मी आदमी हल, जेकर नाम शमौन हल। ऊ ओही करऽ हलन जेकरा से परमेश्वर प्रसन्न होवऽ हलन आउर परमेश्वर के व्यवस्था के मानल करऽ हलन। ऊ इस्राएल के लोगवन के हौसला बढ़ावे ला लागी परमेश्वर द्वारा मसीह के भेजे ला खुशीपूर्वक इंतजार कर रहलन हल। पवित्र आत्मा उनकर अगुवाई कर रहलन हल। 26पवित्र आत्मा पहिले से ही उनका पर ई परकट कईले हलन कि उनका मरे से पहिले, प्रभु अपन मसीह के भेजतन आउर ऊ, उनका देख पईतन।27येहिगुने पवित्र आत्मा शमौन के भवन के अँगना में जाय लागी अगुवाई करलन। ऊ घड़ी ऊ, ऊहें पर मौजूद हलन जब यूसुफ आउर मरियम लईका यीशु के लेके अईलन जेकरा से ऊ ओकरा ला ऊ संस्कार के कर सकतन जेकर आज्ञा परमेश्वर व्यवस्था में दे देलन हे।28जखनी शमौन यीशु के देखलन, तऽ ऊ उनका अपन गोदी में उठा के परमेश्वर के धन्यवाद देलन, आउर फिनो ऊ कहलन,29"हे प्रभु, तूँ हमरा से करल गेल अपन वचन के पूरा करलऽ हे, आउर अखनी हम तोरा से संतुष्ट ही कि अब अपन दास के शान्ति से मर जाय दऽ।30काहेकि हम ऊ आदमी के ऊ उद्धार देख लेली हे जिनका तूँ लोगवन के बचावे लागी भेजलऽ हे,31ऊ आदमी जेकरा तूँ येही से तईयार करलऽ हे कि सभे लोगवन देखतन।32ऊ एगो अईसन इंजोर जईसन होतन जौन तोर सच्चाई के अन्यजाति पर उजागर करतन। ऊ ई उजागर करतन कि तोर प्रजा, इस्राएल लागी तोर योजना केतना महिमामय होत। 33जौन बात शमौन यीशु के बारे में कहलन उनका पर उनकर माय-बाप चौंक गेलन।34फिन शमौन ओखनी के आशीषित करलन, आउर यीशु के माय, मरियम से कहलन, “जौन हम कहऽ ही ओकरा पर बढ़ियाँ से गौर करऽ: परमेश्वर ई तय करलन हे कि, ई लईका के वजह से, इस्राएल में रहे वालन बड़ी लोगवन परमेश्वर के पुनरुत्थान के नकार देतन आउर बड़ी लोग खुद के परमेश्वर के अधीन कर देतन। ऊ परमेश्वर के तरफ से एगो अईसन चिन्ह ठहरत जेकर बड़ी लोग विरोध करतन। 35जहाँ तक तोर बात हे, लोग उनके साथे जौन निठूर काम के करतन ऊ तोरा आत्मा के एतना दुःख कर देतन कि ई तोरा अईसन लगत कि जईसे कोई तलवार तोर हृदय के छेद रहल हे बाकि ई येही से जरुरी हे जेकरा से बड़ी लोगवन के छिपल विचार के उजागर कर सकतन।”36ऊहाँ भवन के अँगना में हन्नाह नाम के एगो भविष्यद्वक्तिनी भी मौजूद हलन। ऊ बड़ी बूढ़ी हलन। ऊ फनूएल के बेटी हलन, जौन आशेर के गोत्र के हलन। एगो जवान लईकी के रूप में, ऊ शादीशुदा के रूप में सात साल तक जिन्दा रहलन हल, आउर फिन उनकर मरद के मौत हो गेल हल।37ओकर बाद, ऊ 84 साल से जादे विधवा के रूप में रह रहलन हल। अईसन लगऽ हल कि जईसे ऊ हमेशा से भवन में रहऽ हलन, आउर रात आउर दिन हर घड़ी उपवास आउर प्रार्थना करते परमेश्वर के आराधना करल करऽ हलन।38ओही समय पर, हन्नाह यूसुफ आउर मरियम आउर ऊ लईका भीर पहुँचलन। हन्नाह ऊ लईका लागी परमेश्वर के धन्यवाद देवे लगलन। ओकर बाद ऊ ढेर दोसर लोगवन से यीशु के बारे में बतईते रहलन जौन ऊ मसीह के परमेश्वर द्वारा भेजे के इंतजार कर रहलन हल जौन यरूशलेम के लोगवन के छुटकारा देतन। 39यूसुफ आउर मरियम के ऊ सभे काम के खतम कर लेला के बाद जौन प्रभु के व्यवस्था के मुताबिक पहिलौठा बेटा के माय-बाप लागी जरुरी हल, ओखनी गलील राज में बसल अपन नगर, नासरत लौट गेलन।40जईसे-जईसे ऊ लईका यीशु बढ़ते गेलन, ऊ तागतवर आउर बड़ी बुद्धिमान होते गेलन, आउर परमेश्वर के अनुग्रह उनकर जिनगी में मौजूद हलन।41हर साल यीशु के माय-बाप फसह के परव मनावे लागी यरूशलेम के यात्रा करते रहऽ हलन। 42येहिगुने जहिया यीशु 12 साल के उमर के हलन, तऽ ओखनी सभे एक साथे होके यरूशलेम के यात्रा करलन जहिया फसह के परव के समय हल।43जखनी परव के मनावे के दिन खतम हो गेल तऽ यीशु के माय-बाप घरे लौटे लगलन, बाकि उनकर बेटा, यीशु, पीछहीं यरूशलेम में रह गेलन उनकर माय-बाप ई नऽ जानऽ हलन कि ऊ अखनी भी ऊहें पर हलन।44ओखनी सोचलन कि ऊ ओखनी दोसर लोगवन के साथे होतन जौन ओखनी साथे यात्रा कर रहलन हल। बाकि एक दिन चलला के बाद, ओखनी उनका उनकर परिवार के लोग आउर दोस्त लोग के बीच में खोजे ला शुरु करलन। 45जब ऊ ओखनी के नऽ मिलल तऽ ओखनी उनका खोजते-खोजते यरूशलेम पहुँच गेलन।46मरियम आउर यूसुफ के यरूशलेम से निकल जाय के तीन दिन के बाद, यीशु ओखनी के आराधनालय में मिललन। ऊ यहूदी धरम गुरुअन के बीच में बईठल हलन। ऊ उनका देवल गेल परवचन के सुन रहलन हल आउर ऊ ओखनी से सवाल भी पूछ रहलन हल।47सभे लोग ओखनी उनकर बात सुनलन, ऊ ई बात से हैरान हलन कि ऊ केतना समझ लेलन आउर ऊ केतना बढ़ियाँ से गुरुअन द्वारा पूछल गेल सवाल के जबाब देलन हे।48जखनी उनकर माय-बाप उनका देखलन, तऽ ऊ ढेर चौंक गेलन। उनकर माय-बाप उनका से कहलन, “हे हमर बेटा, तोरा हमरा साथे अईसन नऽ करे के चाहऽ हल। हमर बात सुनऽ! तोरा खोजते तोर बाबूजी आउर हम बड़ी फिकिर में हली!”49ऊ उनका से कहलन, “हम बड़ी हैरान ही कि तोरा हमरा खोजे के जरुरत पड़ल। हम सोचली हल कि तोहनी जानऽ होतऽ कि हमरा उनकर बारे में जाने लागी अपन पिता परमेश्वर के घर में रहे ला जरुरी हे।”50बाकि जौन कुछ ऊ उनका से कहलन ओकर मतलब ओखनी नऽ समझ पईलन।51फिन ऊ उनका साथे नासरत शहर लौट गेलन। आउर ऊ हमेशा उनकर बात के अपन मन में मानते रहलन। जौन घटना होल हल, ऊ सभे बात के बारे में उनकर माय गहराई से सोचते रहलन।52जईसे-जईसे साल गुजरते गेल, यीशु बुद्धिमान होते गेलन, आउर ऊ कद में भी बढ़ गेलन। परमेश्वर आउर आदमियन के अनुग्रह भी उनका जादे से जादे समर्थन करते रहलन।
Bridge Connectivity Solutions Pvt. Ltd.