Luke3
1इतिहास के ई अगला भाग ऊ घड़ी घटल जहिया तिबिरियुस कैसर के रोमी साम्राज्य पर शासन करते लगभग पन्द्रह साल हो गेल हल। ऊ घड़ी, पुन्तियुस पिलातुस यहूदिया राज के राजपाल हलन, आउर हेरोदेस अन्तिपास गलील जिला पर शासन कर रहलन हल, आउर ओकर भाई फिलिप्पुस इतूरैया त्रखोनीतिस के इलाका पर राज कर रहलन हल, आउर अबिलेने के इलाका पर लिसानियास राज कर रहलन हल।2यरूशलेम के भवन में हन्ना आउर कैफा महायाजक हलन। ऊ समय के दौरान, परमेश्वर जकर्याह के बेटा यूहन्ना से सुनसान इलाका में बात करलन, ऊ घड़ी ऊ, ऊहें रहल करऽ हलन।3यूहन्ना यरदन नदी के अगल बगल के समूचे इलाका में यात्रा करलन। जौन लोग उनकर सुने ला लागी उनका भीर अईलन उनका से ऊ प्रचार करते गेलन, "जदि तूँ चाहऽ हऽ कि परमेश्वर तोर पापवन के मांफ करतन, तऽ तोरा जिनगी जीये के गलत रीति रिवाज के छोड़ मन फिरावे पड़त। तऽ हम तोरा बपतिस्मा देवो!"4जखनी यूहन्ना अईसन प्रचार करलन तऽ, ऊ बात सच हो गेल जौन यशायाह भविष्यद्वक्ता बड़ी समय पहिले ही एगो किताब में लिखलन हल:"सुनसान इलाका में, कोई आदमी लोगवन के पुकार रहलन होत:प्रभु के राह आउर सड़कवन के तईयार आउर सीधा करऽ!उनकर आगमन के समय लागी खुद के तईयार करऽ!"5जखनी कोई खास आदमी कोई खास सड़क से आवे वाला होतन तऽ, लोगवन समूचे गबड़वन के भर दे हथन आउर सभे उबड़-खाबड़ जगह के चौरस कर दे हथन।ऊ, ऊ सड़क के सीधा कर दे हथन जौन केज्जो से भी टेढ़ा-मेढ़ा होवे,आउर ऊ सभे रुकावट के बराबर कर दे हथन। ई तरह से परमेश्वर ई तय करतन कि कुछ लोग अईसन भी होतन जौन मसीह लागी तईयार हथन।6तऽ सभे लोग के बचावे लागी परमेश्वर के उद्धार के जान लेतन 7लोगवन के बड़का झुण्ड निकल के ऊ सुनसान जगह पर जहाँ यूहन्ना हलन आ रहलन हल ताकि ऊ उनका बपतिस्मा देतन। येहिगुने यूहन्ना उनका से कहलन, “तूँ लोग बिखधर साँपवन नियर डरपोक आउर खतरनाक हऽ! तूँ अईसन सोच विचार रखऽ हऽ कि जदि हम तोरा बपतिस्मा दे देही, तऽ जहिया परमेश्वर गोस्सा से पापियन के सजा देतन तऽ ऊ तोरा छोड़ देतन। बाकि हम अईसन नऽ कहली!8तोरा ऊ सभे काम करे के जरुरत हे जेकरा से परकट होवे कि तूँ अपन पिछलका पाप भरल जिनगी जीये के तरीका से मन फिरा लेलक हे! आउर खुद से ई कहेला भी शुरु नऽ करऽ कि, पक्का परमेश्वर हमनी के येहिगुने सजा नऽ देतन, काहेकि हम अब्राहम के कुल वंश के ही! ई परमेश्वर के प्रभावित नऽ करऽ हे! हम तोरा भरोसा दिलावऽ ही, कि परमेश्वर ई पत्थरवन के अब्राहम के कुल वंश में बदल सकऽ हथन।9तूँ अईसन फलदार पेड़ नियर हऽ जौन बढ़ियाँ फल नऽ फरऽ हे। परमेश्वर ऊ आदमी के जईसन हथन जौन अपन कुल्हाड़ी के धार ऊ पेड़वन के जड़ी पर रखले हथन, आउर ओकरा काट के आग में झोंके लागी तईयार हथन। जदि तूँ लगातार पाप करते रहवऽ तऽ परमेश्वर भी तोरा अईसन तरह से सजा देवे ला तईयार हथन।”10तऽ भीड़ में से बड़ी लोग उनका से पूछलन, “तऽ परमेश्वर कौन तरह के काम के चाहऽ हथन कि हमनी करम?”11ऊ ओखनी के जबाब देलन, “जदि तोहनी में से केकरो भीर दूगो कुरता हे, तऽ तोरा ओकरा में से एगो ओकरा दे देवे के चाही जेकरा भीर एक्कोगो कुरता नऽ हे। जदि तोहनी में से केकरो भीर बड़ी जादे भोजन हे, तऽ जेकरा भीर खाना नऽ हे तोरा ओखनी के थोड़ा भोजन दे देवे के चाही।”12कुछ लगान वसूले वालन भी अईलन, जौन चाहऽ हलन कि यूहन्ना ओखनी के बपतिस्मा देतन। ऊ उनका से पूछलन, “हे गुरु, का करम जौन परमेश्वर हमरा से चाहऽ हथन?”13ऊ ओखनी से कहलन, "जेतना धन रोमी सरकार लोगवन से वसूले लागी तोरा से कहलन हे ओकरा से जादे मत वसूलऽ!"14ऊहाँ कुछ अईसन आदमी भी हलन जौन सिपाही हलन। ऊ सभे उनका से पूछे लगलन, “आउर हमरा बारे में का? परमेश्वर का चाहऽ हथन कि हम करूँ?” ऊ उनका से कहलन, “लोगवन के घटा पहुँचावे ला धमकी दे के चाहे ओखनी पर कुछ गलत करे के झूठा इजलेम लगा के तोरा धन देवे लागी मजबूर मत करऽ। एगो सिपाही के रूप में तूँ जेतना धन कमा हऽ ओकरे से संतोष करऽ।”15मसीह के आवे के ढेर लम्बा समय से, लोगवन इंतजार कर रहलन हल। बाकि अखनी ओखनी यूहन्ना के लेके अपन मन में ढेर उम्मीद से भरल हलन। ओखनी के लगऽ हल कि ऊ मसीह हो सकऽ हथन।16बाकि ओखनी सभे से यूहन्ना कहलन, “हम मसीह नऽ ही। ऊ आ रहलन हे, आउर ऊ हमरा से बड़ी बढ़ के हथन। ऊ एतना महान हथन कि हम उनकर दास बने के काबिल भी नऽ ही कि जखनी ऊ घर में अईतन तऽ उनकर जूता के फीता खोलम! जखनी हम तोरा बपतिस्मा देली, तऽ हम खाली पानी के इस्तेमाल करली। बाकि जखनी मसीह अईतन तऽ, ऊ तोरा पवित्र आत्मा से बपतिस्मा देतन, जौन तोर न्याय करतन आउर तोहनी के पवित्र भी करतन। 17मसीह ई ओही तरह से करे ला लागी तईयार हथन, जईसे एगो किसान अपन सूप के इस्तेमाल करे लागी तईयार होवऽ हथन। किसान खलिहान से बढ़ियाँ गेहूँ के बेकार भूंसवन से अलग करऽ हथन। ऊ गेहूँ के सोच समझ के भण्डार में रखऽ हथन, बाकि ऊ भूंसवन के राख होवे घड़ी तक जरावऽ हथन ई देखावऽ हथन कि कईसे मसीह ऊ लोगवन के एक जगह करतन जौन परमेश्वर के खुश रखऽ हथन, आउर ऊ ओखनी लोगवन के सजा देतन जौन परमेश्वर के नराज रखऽ हे।”18ई तरह के ढेरमनी अलग-अलग उपाय से, यूहन्ना लोगवन से पाप करे ला बंद कर देवे आउर खुद के परमेश्वर के अधीन में करे लागी निवेदन करलन, जखनी ऊ उनका परमेश्वर के तरफ से शुभ संदेश सुनावल जा रहल हल।19ईहाँ तक कि यूहन्ना राजा हेरोदेस के बड़ी बुरा काम लागी डाँटवो करलन जौन हेरोदेस करलन हल। बाकि जखनी यूहन्ना हेरोदेस के अपन बड़ा भाई के मेहरारू हेरोदियास से वियाह करे लागी डाँटे लगलन, जबकि ओकर भाई जिन्दे हलन,20तऽ हेरोदेस एगो आउर गलत काम करलन। ऊ अपन सिपाहियन से कह के यूहन्ना के जेलखाना में डाल देलन।21बाकि हेरोदेस के अईसन करे से पहिले ही, जखनी यूहन्ना ढेर लोगवन के बपतिस्मा दे रहलन हल, तऽ यूहन्ना यीशु के भी बपतिस्मा देलन। ओकर बाद जखनी यीशु प्रार्थना कर रहलन हल, तऽ आसमान खुल गेल हल।22तऽ पवित्र आत्मा, देह के रूप में कबूतर के समान में उतर के यीशु पर ठहर गेल। तऽ परमेश्वर स्वर्ग से यीशु से बात करलन। ऊ कहलन, "तूँ हमर खास बेटा हऽ, जेकरा से हम ढेर जादे प्रेम करऽ ही। हम तोरा से ढेर जादे खुश ही!"23ओही घड़ी यीशु परमेश्वर लागी अपन काम के शुरु करलन। ऊ लगभग तीस साल के उमर के हलन। ई यीशु के वंशावली हे: लोग यीशु के यूसुफ के बेटा समझऽ हलन। यूसुफ एली के बेटा हलन।24एली मत्तात के बेटा हलन। मत्तात लेवी के बेटा हलन। लेवी मलकी के बेटा हलन। मलकी यन्ना के बेटा हलन। यन्ना यूसुफ के बेटा हलन।25यूसुफ मत्तित्याह के बेटा हलन। मत्तित्याह आमोस के बेटा हलन। आमोस नहूम के बेटा हलन। नहूम असल्याह के बेटा हलन। असल्याह नग्गई के बेटा हलन।26नग्गई मात के बेटा हलन। मात मत्तित्याह के बेटा हलन। मत्तित्याह शिमी के बेटा हलन। शिमी योसेख के बेटा हलन। योसेख योदाह के बेटा हलन।27योदाह यूहन्ना के बेटा हलन। यूहन्ना रेसा के बेटा हलन। रेसा जरुब्बाबेल के बेटा हलन। जरुब्बाबेल शालतीएल के बेटा हलन। शालतीएल नेरी के बेटा हलन। 28नेरी मलकी के बेटा हलन। मलकी अद्दी के बेटा हलन। अद्दी कोसाम के बेटा हलन। कोसाम एल्मदाम के बेटा हलन। एल्मदाम एर के बेटा हलन।29एर येशू के बेटा हलन। येशू एलीएजेर के बेटा हलन। एलीएजेर योरीम के बेटा हलन। योरीम मत्तात के बेटा हलन। मत्तात लेवी के बेटा हलन।30लेवी शमौन के बेटा हलन। शमौन यहूदा के बेटा हलन। यहूदा यूसुफ के बेटा हलन। यूसुफ योनान के बेटा हलन। योनान एलयाकीम के बेटा हलन।31एलयाकीम मलेआह के बेटा हलन। मलेआह मिन्नाह के बेटा हलन। मिन्नाह मत्तात के बेटा हलन। मत्तात नातान के बेटा हलन। नातान दाऊद के बेटा हलन। 32दाऊद यिशै के बेटा हलन। यिशै ओबेद के बेटा हलन। ओबेद बोअज के बेटा हलन। बोअज सलमोन के बेटा हलन। सलमोन नहशोन के बेटा हलन। 33नहशोन अम्मीनादाब के बेटा हलन। अम्मीनादाब आदमी नऽ के बेटा हलन। आदमी अरनी के बेटा हलन। अरनी हेस्रोन के बेटा हलन। हेस्रोन पेरेस के बेटा हलन। पेरेस यहूदा के बेटा हलन।34यहूदा याकूब के बेटा हलन। याकूब इसहाक के बेटा हलन। इसहाक अब्राहम के बेटा हलन। अब्राहम तेरह के बेटा हलन। तेरह नाहोर के बेटा हलन। 35नाहोर सरूग के बेटा हलन। सरूग रऊ के बेटा हलन। रऊ पेलेग के बेटा हलन। पेलेग एबेर के बेटा हलन। एबेर शिलह के बेटा हलन।36शिलह केनान के बेटा हलन। केनान अर्पक्षद के बेटा हलन। अर्पक्षद शेम के बेटा हलन। शेम नूह के बेटा हलन। नूह लेमेक के बेटा हलन।37लेमेक मथूशिलह के बेटा हलन। मथूशिलह हनोक के बेटा हलन। हनोक यिरिद के बेटा हलन। यिरिद महललेल के बेटा हलन। महललेल केनान के बेटा हलन।38केनान एनोश के बेटा हलन। एनोश शेत के बेटा हलन। शेत आदम के बेटा हलन। आदम परमेश्वर से पईदा होलन हल।
Bridge Connectivity Solutions Pvt. Ltd.