Luke12
1येही बीच में हजारो आदमी यीशु के अगल बगल जमा हो गेलन। ऊ आदमी एतना जादे हल कि ओखनी एक दोसर पर चढ़ रहलन हल। जौन पहिला बात यीशु अपन चेलवन से कहलन, ऊ ई हल, “होशियार रहऽ कि तोहनी फरीसियन के जईसन कपटी मत बनऽ, जौन समाज में धर्मी काम करऽ हे बाकि लूका-छिप के ऊ गलत काम भी करऽ हे।”2लोगवन ला अपन पाप के छिपा के रखे के कोशिश करे ला बेकार हे। कोई दिन परमेश्वर सभे लोगवन के ऊ सभे कुछ बता देतन जेकरा लोग छिपावेला कोशिश कर रहलन हे।3कोई दिन लोग तोहनी के लुका-छिपा के कहल गेल सभे बात के सभे के सामने सुनतन। कोई दिन कोई जन छत पर चढ़ के चींख कर के प्रचार करतन ऊ सुनतन कि तोहनी अपन भीतरी कोठरी में का फुसफुसा रहलऽ हे।4हे हमर दोस्त, बड़ी गौर से सुनऽ! आदमी से नऽ डेरा। ऊ तोर देह के मार सकलन हे, बाकि ओकर बाद ऊ तोरा साथे आउर जादे कुछ नऽ कर सकलन हे।5हम तोरा बतायेम कि सचमुच तोरा केकरा से डेराय के चाही। तोरा परमेश्वर से डेराय के चाही। उनका भीर नऽ खाली आदमी के मार देवे के अधिकार हे, बाकि उनकर भीर आदमी के नरक में डाले के भी अधिकार हे! हाँ, हम तोरा कहऽ ही कि परमेश्वर ही हथन जिनका से सचमुच में तोरा डेराय के चाही!6गौरईयन के बारे में सोचऽ। ओकर दाम एतना कम होवऽ हे कि तूँ दूगो छोटा सिक्का से ओकरा में से पाँचगो के मोल कीन सकलऽ हे। आउर तईयो परमेश्वर ओकरा में से केकरो नऽ भूला हथन!7ईहाँ ला कि परमेश्वर के पता हे कि तोर माथा में केतना बाल हे। येहिगुने डेरा मत, काहेकि तोहनी परमेश्वर लागी बड़ी गौरईयन से जादे बेसकीमती हऽ।8हम तोरा से ई कहऽ ही कि जदि लोग दोसर लोगवन से कहऽ हे कि ओखनी हमर चेला हे, तऽ हम, आदमी के बेटा, परमेश्वर के स्वर्गदूतवन के सामने कहम कि ओखनी हमरे चेला हथन।9बाकि ऊ दोसर आदमी से कहतन कि ओखनी हमर चेला नऽ हे, तऽ हमहूँ परमेश्वर के स्वर्गदूतवन से कहम कि ओखनी हमर चेला नऽ हे।10हम तोरा से ई कहऽ ही कि जदि लोग हमरा, आदमी के बेटा, के बारे में बुरा बात बोलतन, तऽ एकरा लागी परमेश्वर ओखनी के मांफ कर देतन। बाकि जदि लोग पवित्र आत्मा के बारे में निन्दा करतन, तऽ एकरा चलते परमेश्वर ओखनी के मांफ नऽ करतन।11येहिगुने जखनी लोग तोहनी के आराधनालय में लेके आवऽ हथन कि ऊहाँ पर धार्मिक अगुवन के सामने तोरा से सवाल करतन आउर अन्य अधिकारियन के सामने जौन ऊ देश में शक्ति रखऽ हथन, तऽ ई लागी चिंता मत करिहऽ कि तूँ कईसे कर के ओकरा आज्ञा देवऽ चाहे ई बारे में तोरा का बोले के चाही,12काहेकि पवित्र आत्मा ओही घड़ी तोरा बता देतन कि तोरा का बोले के चाही।13तऽ भीड़ में से एगो आदमी यीशु से कहलन, “हे गुरु हमर बाबूजी के दौलत के हमरा साथे बाँट लेवे ला हमर भाई से कह दऽ।”14बाकि यीशु ओकरा जबाब में कहलन, “हे आदमी, लोगवन में दौलत के बारे में जौन लड़ाई हे ओकर न्याय करे ला कोई भी हमरा हाकिम नऽ बनईलन हे।” 15फिन यीशु ऊ भरल भीड़ से कहलन, कोई भी उपाय से लोभी नऽ होवे के बारे में “होशियार रहऽ! कोई आदमी के जिनगी के बारे में जौन मतलब रख हे ऊ ई नऽ हे कि ओकरा भीर केतना दौलत हे।”16ओकरा बाद यीशु भीड़ के ई दृष्टान्त बतईलन कोई “धनवान के खेत में ढेर अनाज उपजल।17ऊ अपन मन में ही सोचे लगलन, ‘हमरा नऽ पता कि का करे के चाही, काहेकि अपन सभे अनाज के भण्डार कर के रखे लागी हमर ही अईसन बड़गो कोई जगह नऽ हे!’18फिनो ऊ अपन मन में ही विचार करे लगलन, ‘हम जानऽ ही कि हम का करम! हम अपन गेहूँ के कोठियन के तोड़ के ओकरो से बड़गो बनायेम तऽ हम अपन सभे गेहूँ आउर दोसरकन सामान के ऊ नया बड़का-बड़का कोठियन के भण्डार बना के रख पायेम।19तऽ हम खुद अपन आत्मा से कहम, “अखनी हम ढेर साल लागी जरुरत से जादे सामान के भण्डार कर के रख लेली हे। येहिगुने हम जिनगी के आराम से बितावल करम। हम खायेम आउर पियम आउर खुश रहम!”’20बाकि परमेश्वर ओकरा से कहलन, हे मूरख आदमी! आज के रात प्राण ले लेवल जाय तऽ तूँ मर जईवऽ! तऽ जौन सभे चीज तूँ अपना लागी बचा के रखले हे ऊ तोर नऽ, बाकि कोई दोसर के हो जायेत!”21तऽ यीशु ई उदाहरण के ई कह के खतम करलन, “ई ओखनियो के साथे होत जौन खाली अपना लागी सामान के जमा कर के रखऽ हथन आउर ऊ सामान के महत्व नऽ दे हथन जेकरा परमेश्वर बेसकीमती मानऽ हथन।”22फिनो यीशु अपन चेलवन से कहलन, ईहाँ कुछ अईसन हे जौन ई खिस्सा से तोहनी के सीखे के चाही। चाहे तोहनी भीर जिनगी जिये लागी भरपूर भोजन हे। आउर फिनो गरम रहे लागी पेहने ला भरपूर कपड़ा रहे तईयो देह बारे में चिंता मत करिहऽ।23आखिरकार जौन भोजन तूँ खा हऽ ओकरा से बढ़ के जरुरी तोर जिनगी हे, आउर जौन कपड़ा तूँ पेहनऽ हऽ ओकरा से बढ़ के तोर देह हे।24कौवा के बारे में सोचऽ। ऊ बिच्चा नऽ बुनऽ हे, नऽ फसल काटऽ हे, नऽ खलिहान होवऽ हे। ओखनी भीर भण्डारघर चाहे महल नऽ होवऽ हे जेकरा में ऊ फसल के जमा कर के रखतन, बाकि परमेश्वर ओखनी लागी व्यवस्था करऽ हथन। आउर तोहनी पक्षियन से जादे बेसकीमती हऽ। 25तोहनी में से कोई भी अपन जिनगी में चिंता कर के एक घड़ी भी जोर नऽ सकऽ हे। 26येहिगुने काहेकि तोहनी एगो छोटा काम भी नऽ कर सकऽ हऽ, तऽ जरुर तोहनी के कोई दोसर बात के भी चिंता नऽ करे के चाही।27जौन रीति से फूल बढ़ते रहऽ हे ओकरा पर विचार करऽ। ऊ धन कमाय लागी काम नऽ करऽ हे, आउर नऽ ही ऊ अपन खुद के कपड़ा बनावऽ हे। बाकि हम तोरा बतावऽ ही कि राजा सुलैमान, जौन ढेर समय पहिले जीवित हलन आउर जौन महिमा वाला कपड़वन के पेहेनले हलन, ऊ कहियो कोई सुन्दर फूल के जईसन कपड़ा नऽ पेहेनले हलन।28परमेश्वर छोटा पौधा घास के भी सुन्दर बनावऽ हथन, भले ही ऊ खाली थोड़ा समय लागी तरक्की करऽ हे। फिन आदमी ओकरा काट दे हे आउर ओखनी के आग के भट्ठी में झोंक दे हे। तऽ हे अल्पविश्वासियन बाकि तोहनी परमेश्वर लागी बड़ी बेसकीमती हऽ। ऊ तोहनी के चिंता ओकरो से बढ़ के करऽ हथन जेतना चिंता ऊ पौधवन के करऽ हथन। परमेश्वर पर तोरा ओकरो से बढ़ के भरोसा करे के चाही।29जहाँ ला तोहनी के बात हे, ई बारे में हैरान मत होवऽ कि तोहनी का खईवऽ आउर पिवऽ आउर, ऊ बात के बारे में चिंता करतही मत रहिहऽ।30जबकि संसार के लोग जे अन्यजाति जौन परमेश्वर के नऽ जानऽ हथन अईसने बात के बारे में चिंता करते रहऽ हथन तऽ तूँ निफिकिर हो सकलऽ हे कि स्वर्ग में विराजमान तोहनी के पिता जानऽ हथन कि तोहनी के ओकर जरुरत हे।31बजाय एकर, ई पर धियान दऽ कि तूँ परमेश्वर के राज लागी का कर सकल हे। जखनी तूँ अईसन करऽ हऽ, तऽ तोहनी लागी जरुरी सभे चिजवन के हासिल करवावे ला परमेश्वर पर भरोसा कर सकल हे।32येहिगुने हे हमर दोस्त छोटा झुण्ड, तोरा डेराय के नऽ चाही। स्वर्ग में विराजमान तोहनी के पिता चाहऽ हथन कि तोहनी उनकर राज के भागी बनऽ आउर उनकर सभे फईदा के पालऽ।33येहिसे जौन चिजवन तोहनी भीर हे ओकरा बेच दऽ आउर ऊ धन ऊ लोगवन के दे दऽ जेकरा जिन्दा रहे लागी भोजन चाहे कपड़ा चाहे एगो घर के जरुरत हे। अपना लागी अईसन झोली लेलऽ जौन फटऽ नऽ हे। हमर मतलब ई हे कि स्वर्ग में धन के जमा करऽ ऊहाँ ऊ हमेशा सुरक्षा से रहत। ऊहाँ कोई कईसनो चोर सामान के चोरी नऽ कर सकल हे आउर कोई भी पिल्लू तोर कपड़वन के बरबाद नऽ करत।34आखिरकार जे कोई धन के जमा करऽ हऽ, ऊ ओही हे जेकरा बारे में तूँ मन में विचार करते रहवऽ आउर अपन समय के खरचा करवऽ।35हमेशा तईयार रहऽ परमेश्वर के काम करे लागी, ऊ लोगवन के जईसन जौन अपन काम करे वाला कपड़वन के पेहेन लेलन हे आउर पूरा रात भर दीया के जराके रखऽ हे। 36तईयार रहऽ हमरा लौट आवे तक, ऊ दास जईसन जौन वियाह के भोज में शामिल होला के बाद अपन मालिक के लौट आवे के इंतजार कर रहलन हे। ऊ इंतजार कर रहलन हे कि जईसहीं ऊ पहुँचतन आउर केमाड़ी खटखटईतन तऽ ऊ उनका लागी जल्दी से केमाड़ी खोल देतन।37धन्य हे ऊ दास बड़ी बढ़ियाँ होत जदि ओखनी ऊ घड़ी ला जगल रहऽ हे जखनी ओखनी के मालिक लौटऽ हथन। तऽ हम सच तोरा ई बतावऽ ही: ऊ दास के जईसन कपड़ा पेहेन के, आउर ओखनी के बईठे लागी कह के खाना परस के ओखनी के तोहफा देतन आउर उनकर भीर आके सेवा करतन।38भले ही ऊ साँझ के पहर चाहे दोसरा पहर में चाहे भोर से पहिले चाहे देर से घर आवऽ हे, तऽ जदि ऊ पावऽ हथन कि उनकर दास जागल हे तऽ ऊ धन्य हे आउर उनका लागी तईयार हे, तऽ ऊ ओखनी सभे से बड़ी खुश हो जईतन।39हम चाहऽ ही कि तूँ एकरा पर गौर करऽ: जदि कोई घर के मालिक जानते रहतन कि एगो चोर आ रहल हे, आउर कौन घड़ी आ रहल हे, तऽ ऊ जागल रहतन हल, आउर ऊ चोर के अपन घर में चोरी होवे नऽ देतन।40येहिगुने तईयार रहऽ, काहेकि हम, आदमी के बेटा, अईसन समय पर लौट के आयेम जखनी तोहनी सभे हमर इंतजार नऽ करवऽ।41पतरस पूछलन, “हे प्रभु, का ई दृष्टान्त तूँ हमनी अपन चेलवने लागी दे रहलऽ हे? कि फिन ई भीड़ लागी भी हे?”42यीशु जबाब देलन, हम ई सभे कोई ला कह रहली हे जौन विश्वासयोग्य आउर बुद्धिमान दास के जईसन हे जौन अपन मालिक के घर में एगो भण्डारी हे। ओकर मालिक ओकरा दासवन के ऊपर सरदार येहिगुने बनईलन हे, ताकि ऊ तय करतन कि ओखनी सभे अपन भोजन सही समय पर पा लेतन।43जदि ओकर मालिक घर आके देखतन कि धन्य हे ऊ दास अपन काम के कर रहल हे, तऽ ऊ, ऊ अपन दास के इनाम देतन।44हम तोरा से सच कहऽ ही कि ऊ मालिक ऊ अपन दास के सभे धन-दौलत के सरदार बनईतन।45बाकि ऊ दास जेकरा सरदार बनावल गेल खुद अपन मन में कहतन कि, हमर मालिक लमहर समय लागी दूर जा रहलन हे। तऽ ऊ दोसर दासवन-दासियन के पीटे लगत। हो सकऽ हे ऊ खाय आउर बड़ी पिये लगतन, आउर पियक्कड़ बन जायेत।46जदि ऊ अईसन करऽ हे तऽ ओकर मालिक अईसन घड़ी वापस लौट के अईतन जेकरा ला ऊ दास उम्मीद नऽ करऽ होतन। तऽ ओकर मालिक ओकरा कड़ाई से सजा देतन आउर ओकरा ऊ लोगवन साथे जगह देतन जौन उनकर सेवा विश्वासघाती से करऽ हे।47ऊ दास जौन जानऽ हलन कि ओकर मालिक का चाहऽ हथन बाकि तईयार होके ओकरा नऽ करलक तऽ ढेर कड़ाई से सजा पईतन।48बाकि सभे ऊ दास जौन नऽ जानऽ हे कि ओकर मालिक ओकरा से का करवावे लागी चाहऽ हथन, आउर कुछ गलत करतन तऽ ऊ खाली हल्का फुल्का सजा पईतन। ऊ मालिक ऊ सभे दास से बड़ी जादे के आशा करतन जेकरा ऊ जादे सौंपलन हे। आउर ऊ मालिक ऊ दासवन से तऽ आउर भी जादे उम्मीद करतन जेकरा पर ऊ बड़ी मनी जिम्मेवारी के असरा लगईले हथन।49हम धरती लोगवन के आत्मिक जोश में हलचल मचावे ला अईली हे। हम चाहऽ हली कि ओखनी पहिले से हीं ओकर पर काम कर रहलन होत!50बाकि हमरा एगो बपतिस्मा लेवे ला हे, आउर जखनी तक ऊ पूरा नऽ हो जायेत, हम केतना बेचैन रहऽ ही!। 51तोरा जान लेवे के चाही कि हम धरती पर ई ला नऽ अईली हे कि लोग शान्ति से मिल के रहतन। नऽ, तोरा समझे पड़त कि एकर बदले, लोग हमरा ला आउर हमर खिलाफ पक्षपात करतन।52तईयार रहऽ, काहेकि एही हे जौन होवे वाला हे। पाँच लोग के एगो परिवार में, कुछ हमरा पर विश्वास करतन आउर कुछ नऽ करतन। परिवार के तीनगो लोग दूगो के खिलाफ में एकजूट हो जईतन।53परिवार के सदस्य में झगड़ा होत। एगो बाप अपन बेटा से विरोध करतन, चाहे फिन एगो बेटा अपन बाप से विरोध करतन। एगो माय अपन बेटी से विरोध करत, चाहे फिन बेटी अपन माय के विरोध करत एगो सास अपन पुतोह से विरोध करत चाहे फिन पुतोह अपन सास के विरोध करत। 54ऊ भीड़ से भी कहलन, जखनी तोहनी पच्छिम में एगो घना बादल के लगल देखऽ हऽ, तऽ तुरन्त तोहनी कहऽ हऽ, बरसा बरसे वाला हे! आउर अईसने होवऽ भी हे।55जखनी दक्खिन हवा चलऽ हे, तऽ तूँ कहऽ हऽ, ई दिन ढेर ही गरमी पड़े वाला हे! आउर तूँ सही रहऽ हऽ।56हे पाखण्डियन! धरती आउर आसमान में बादल आउर हवा पर गौर करे से, तूँ ई परखे में सक्षम हऽ कि मौसम के बारे में का हो रहल हे। तोरा ई भी समझे ला भी काबिल होवे के चाही कि ई मौजूद समय में परमेश्वर का कर रहलन हे!57तोहनी में से सभे कोई के अपने आप में फईसला लेवे के चाही कि का सही हे!58ईहाँ एगो काम हे जौन तोरा करे के चाही। जौन घड़ी तूँ अखनी कचहरी जाय ला राह में हऽ तऽ तोरा ऊ आदमी के साथे मामला के निपटावे के कोशिश करे के चाही जौन तोरा पर दोष लगईलन हे। जदि ऊ तोरा न्यायाधीश विजुन जाय ला मजबूर करऽ हे, तऽ न्यायाधीश ई फईसला ले सकलन हे कि तूँ दोषी हऽ आउर तोरा अदालत के अधिकारी के हाथ में सौंप सकलन हे। तूँ दोषी हऽ तऽ ऊ अधिकारी तोरा जेल में डाल देतन।59हम तोरा से कहऽ ही कि जदि तूँ जेल में जा हऽ, तऽ तूँ तब तक ऊहाँ से कहियो नऽ निकल पईवऽ जब तक कि तूँ न्यायाधीश के कहला पर जौन कुछ तोरा पर कर्जा हे, ओकरा पाई-पाई कर के चुकावे के काबिल नऽ हो जईवऽ।
Bridge Connectivity Solutions Pvt. Ltd.