Luke11
1एक दिन यीशु कोई जगह पर प्रार्थना कर रहलन हल। जखनी ऊ खतम कर चुकलन, तऽ उनकर एगो चेला उनका से कहलन, “हे प्रभु, हमरा सिखावऽ कि प्रार्थना कईसे करल जा हे। यूहन्ना बपतिस्मा देवे वाला अपन चेलवन के साथे अईसहीं करलन हे, आउर हम चाहऽ ही कि तोहूँ हमनी के साथे अईसहीं करऽ।”2ऊ ओखनी से कहलन, “जखनी तोहनी प्रार्थना करिहऽ, तऽ ई बात के बोलिहऽ: 'हे पिता, सभे कोई पवित्र मान के अपने के नाम के आदर करतन। अपने जल्दी ही तूँ सभे जगह के लोगवन पर राज दिहऽ।3रोजदिन हमनी के जौन भोजन के जरुरत हे कृपा कर के ऊ हमनी के देतन।4कृपा कर के हमनी के ऊ गलत काम ला मांफ करिहऽ जौन हमनी करली हे। हमनी खुद ही ऊ लोग के ऊ गलत काम ला मांफ कर देम जौन ओखनी हमनी के साथे करलन हे। तब कोई बात ला हमनी के परीक्षा में नऽ लावऽ, बाकि हमनी के मदत करिहऽ कि हमनी पाप नऽ करीयई।”5फिनो ऊ ओखनी से बोललन, मान लऽ कि तोहनी में से कोई आदमी अधरतिया में कोई दोस्त के घर गेलन हे। तूँ बाहरसी खड़ा होके ओकरा पुकारऽ हऽ, हे दोस्त, कृपा कर के हमरा के तीनगो रोटी पईंचा दऽ!6हमर एगो दोसर दोस्त यात्रा कर के अखनी तुरन्त हमर घरे अईलन हे। बाकि हमरा ही ओकरा आगे परसेला कोई पकल खाना नऽ हे!7आउर मान लऽ कि ऊ घर के भीतरहीं से जवाब देवे, हमरा परेशान मत करऽ! हम पहिलहीं से दुआरी बंद कर लेली हे आउर हमर सभे परिवार बिछौने पर हे। ई हमरा ला ढेर मुश्किल हे कि उठ के तोरा कुछ देऊँ!8हम तोरा से कहऽ ही कि भले ऊ उठ के अपन दोस्त के कुछ खाय ला येहिगुने देवे ला नऽ चाहऽ होतन काहेकि ऊ ओकर दोस्त हथन। बाकि जदि ऊ माँगतहीं रहतन, तऽ जौन आदमी भीतरे हे ऊ जरुर उठ के ओकरा सभे कुछ ओकरा देतन जेकर ओकरा जरुरत हे।9येहिगुने हम तोरा से कहऽ ही: जौन चीज के तोहनी के जरुरत हे ओकरा ला परमेश्वर से माँगते रहऽ, आउर ऊ तोरा ई सभे देतन। परमेश्वर के तरफ से ऊ चिजवन के खोज में रहऽ, आउर तूँ ओकरा पा लेवऽ। परमेश्वर दने से अपना ला काम के संभव बनावे लागी कहऽ, आउर ऊ तोरा दने से काम करतन।10तोरा ई येहिगुने करे के चाही काहेकि जौन कोई परमेश्वर से ऊ चीज के मंगईते रहऽ हथन जेकर ओकरा जरुरत हे तऽ ऊ ओकरा मिल जायेत। जौन कोई परमेश्वर से अपन काम के होवे ला कहऽ हे, तऽ परमेश्वर ओकरा तरफ से काम करतन।11मान लऽ कि तूँ बाबूजी में से कोई एगो के बेटा हऽ जौन तोरा से खाय लागी मछली माँगलक। तऽ जरुर तूँ ओकरा बदले कोई बिखधर साँप नऽ देवऽ!12मान लऽ कि ऊ तोरा से एगो अण्डा माँगलक। तऽ जरुर तूँ ओकर बदले कोई बिच्छा नऽ देवऽ!13जबकि तोहनी पापी हऽ, तहियो तोहनी जानऽ हऽ कि अपन लईकन के बढ़ियाँ तोहफा कईसे देम। येहिगुने ई तऽ आउर भी जरुरी हे कि तोर पिता जौन स्वर्ग में रहऽ हथन ऊ ओखनी के पवित्र आत्मा देतन जौन उनका से माँगऽ हथन।14एक दिन यीशु एगो अईसन दुष्टात्मा के मजबूर कर के निकास रहलन हलऽ जौन ऊ आदमियन के बोले से रोक के रखले हल। यीशु के ऊ दुष्टात्मा के निकास के बाहरी करलऽ के बाद, ऊ आदमी बोले लगल। ई बात ओज्जा पर मौजूद लोगवन के भीड़ के हैरान कर देलक।15बाकि ओखनी में से कुछ कहलन, “ऊ दुष्टात्मावन के राजा बालजबूल ही तऽ हथन, जौन दुष्टात्मा के अगुवा के मदत से निकास के बाहर करे में ई आदमी के जोग बनावऽ हे!”16ऊहाँ मौजूद दोसर लोग उनकर अधिकार पर सवाल करलन। ओखनी उनका से ई साबित करे लागी एगो आसमान से चिन्ह के माँग करलन कि परमेश्वर उनका भेजलन हल।17बाकि ऊ जानऽ हलन कि ओखनी का सोच रहलन हल। येहिसे ओखनी उनका से कहलन, “जदि एगो राज के लोग एक दोसर के खिलाफ में लड़ते रहतन तऽ, ओखनी अपन राज के ही नाश कर देतन। जदि एक ही घर के लोग एक दोसर के विरोधी हो जायेत, तऽ अपन परिवार के बरबाद कर देतन।18ओईसहीं जदि शैतान आउर ओकर दुष्टात्मा एक दोसर के खिलाफ लड़े लग जायेत, तऽ ई जरुरी हे ओकर राज पर शासन बनल नऽ रहत! काहेकि तोहनी कह रहलऽ हे कि हम बालजबूल के सामर्थ से दुष्टात्मावन के निकास बाहर करऽ ही!19जदि ई सच हे कि बालजबूल दुष्टात्मावन के निकास के बाहर करे लागी हमरा मजबूत कर रहल हे, तऽ एहु सच होत कि ऊ तोहनी के चेलवन के भी दुष्टात्मावन के निकास के बाहर करे लागी मजबूत कर रहल हे। बाकि तूँ जानऽ हऽ कि ई सच नऽ हे। येहिसे तोर चेलवन ई साबित करऽ हथन कि तूँ गलत हऽ।20बाकि हम सच में परमेश्वर के सामर्थ से ही दुष्टात्मावन के निकासऽ ही। एकर मतलब हे कि परमेश्वर के शक्ति तोहनी पर शासन करे लागी शुरु कर देलन हे।”21यीशु कहेला शुरु रखलन, “जखनी कोई अईसन तागतवर आदमी जेकरा भीर बड़ी हथियार हे अपन घर के देख भाल करऽ हे, तऽ कोई भीतरे रखल समान घर के चोरी नऽ कर सकऽ हे आउर शान्ति से रहऽ हे।22बाकि जब कोई आउर ओकरो से बढ़ के तागतवर आदमी पर हमला करऽ हे आउर ओकरा वश में कर ले हे, तऽ ऊ, ऊ हथियार के भी छीन ले हे जेकरा पर ऊ आदमी भरोसा करऽ हल। ओकर बाद ऊ, ऊ आदमी के घर में से जौन कुछ भी ऊ चाहे ओकरा चुरा सकऽ हे।23कोई भी आदमी जौन हमर सहयोग नऽ कर रहल हे ऊ हमर खिलाफत कर रहल हे। कोई भी जौन लोगवन के हमरा भीर लेके नऽ आ रहल हे ऊ ओखनी के हमरा से दूर भेज रहल हे।”24तऽ यीशु कहलन एगो अशुद्ध आत्मा कोई आदमी से निकल के कोई दोसर के भीतरे वास करे के खोज में जाय ला सुनसान जगह में भटकऽ हे। जदि ओकरा ऊहाँ कोई नऽ मिलऽ हे तऽ ऊ कहऽ हे, “हम ओही आदमी विजुन जा रहली हे जेकरा में हम रहऽ हली!25येहिसे ऊ वापस जा हे आउर पावऽ हे कि ऊ आदमी एगो अईसन घर के जईसन हे जेकरा कोई साफ-सुथरा कर के सजा-सँवार देलन हे, बाकि जेकरा में कोई नऽ रहऽ हे।26तऽ ऊ दुष्टात्मा जा के अईसन सातगो आउर आत्मावन के ले आवऽ हे जौन ओकरो से जादे दुष्ट हे। ओखनी सभे ऊ आदमी में हेल जा हे आउर ओकर में रहे लगऽ हे। पहिले ऊ आदमी के हालत बत्तर हलऽ, अखनी ओकरो से भी बत्तर हो जा हे।”27जखनी यीशु ई कहलन, तऽ भीड़ में से एगो औरत जौन सुन रहलन हल उनका पुकार के जोर से आवाज में कहल “धन्य हे ऊ औरत परमेश्वर खुश हथन जौन उनका जनम देलन हे जौन तोर पालन-पोषण करलन हे!”28तऽ ऊ जबाब में कहलन, परमेश्वर ऊ लोगवन से तऽ आउर भी धन्य हे हथन जौन उनकर वचन सुनऽ हे आउर ओकरा पालन करते रहऽ हे!29यीशु के चारो तरफ के भीड़ में शामिल होवे लागी ढेर के ढेर लोग आ रहलन हल। ऊ कहलन, ई समय में रहे वाला लोग दुष्ट आदमी हे। ऊ चाहऽ हे कि हम एगो चिन्ह करम ई साबित करे ला कि हम परमेश्वर के तरफ से अईली हे बाकि खाली एगो सबूत जौन ऊ देखतन ऊ, ऊ चिन्ह के जईसन हे जौन योना के साथे होल हल।30ढेर समय पहिले परमेश्वर योना लागी एगो चिन्ह करलन हल नीनवे शहर के रहे वाला लोगवन के ई देखावे ला कि ओकरा ओही भेजलन हल। ओईसहीं, परमेश्वर हमरा, आदमी के बेटा, लागी ओईसने चमत्कार करतन, ई घड़ी के लोगवन के ई देखावे ला कि ओही हमरा भेजलन हे।31जौन अकलमंदी के बात सुलैमान कहलन हलऽ ओकरा सुने लागी शीबा के रानी धरती के छोर से बड़ी पहिले ढेर दूर से यात्रा करलन हल। अखनी तोहनी भीर कोई सुलैमान से भी बढ़ के ईहाँ मौजूद हथन। बाकि तोहनी सचमुच में ऊ बात के नऽ सुनलऽ हे जौन हम कहऽ रहली हे येहिगुने, जौन घड़ी परमेश्वर सभे लोगवन के न्याय करतन, ऊ खड़ा होके ई घड़ी के रहेवालन लोगवन पर दोष भीर लगईतन। 32पुरनका नीनवे नगर में रहे वाला लोग अपन पापी रीति से मुड़ गेलन हल जखनी योना ओखनी से प्रचार करलन हल। आउर ई घड़ी हम, जौन योना से भी बढ़ के ही, आके तोहनी के प्रचार करली हे। बाकि तोहनी अपन पापी स्वभाव से नऽ मन फिरईलन। येहिगुने, जौन घड़ी परमेश्वर सभे लोगवन के न्याय करतन, तखनी नीनवे में रहे वाला लोग खड़ा होके ई समय के रहे वाला लोग पर दोष लगईतन। 33जौन लोग दीया जरावऽ हथन ऊ ओकरा लुकावऽ नऽ हथन चाहे ओकरा टोकरी के नीचे नऽ रखऽ हथन। एकर बदले ऊ ओकरा दीवट पर रखऽ हथन जेकरा से कि जे कोई घर में घूँसतन ऊ इंजोर के देख सकतन।34तोर आँख तोर देह में दीया के इंजोर आवे दे हे। जदि तोर आँख बढ़ियाँ से काम कर रहल हे, तऽ तोर सभे देह इंजोर से भर जायेत। बाकि जदि तोर आँख सही से काम नऽ कर रहल हे तऽ तोर देह के कोई इंजोर नऽ मिलत।35येहिगुने, चौकस रहऽ कि ई नऽ सोचऽ कि तोर आँख सही से काम कर रहल हे आउर इंजोर के भीतर आवे दे रहल हे जदि ऊ सचमुच में सही काम नऽ कर रहल हे आउर कोई इंजोर के भीतरे घूँसे नऽ दे रहल हे।36येहिगुने जदि इंजोर तोर देह के अंग-अंग में घूँसे रहल हे, येही वजह से ओकर कोई भी अंग अंधार में नऽ हे, तऽ तोर पूरा देह इंजोर से भर जायेत। तोर भीतरे सभे जगह उजला इंजोर आउर चमकत, जईसे कि दीया के उजला इंजोर तोरा पर सभे जगह चमकऽ हे।37जखनी यीशु ऊ बात कहे ला खतम कर लेलन तऽ ओकर बाद एगो फरीसी उनका अपना साथे भोजन करे ला विनती करलन। येहिसे यीशु ऊ फरीसी के घर गेलन आउर भोजन करे ला मेज पर बईठ गेलन।38ऊ फरीसी चौंक गेलन जखनी ऊ देखलन कि यीशु भोजन करे से पहिले नियम के मुताबिक अपन हाथ नऽ धोलन। 39प्रभु ओकरा से कहलन, तोहनी फरीसी लोग भोजन करे से पहिले कटोरा आउर थाली के बाहरे हिस्सा के साफ करऽ हऽ, बाकि तोहनी अपन भीतरे से बड़ी लालची आउर दुष्ट हऽ।40तोहनी मूरख लोग! जरुर तोहनी जानऽ हऽ कि परमेश्वर, नऽ खाली बाहरी भाग के बनईलन, बाकि भीतरी भाग के बनईलन हे!41बरतन के नियम से साफ-सुथरा करे के बजाय, दयालु बनऽ आउर जौन आदमी जरूरतमंद हे ओखनी के बरतन में जौन कुछ हे ऊ दऽ। तऽ तोर भीतरी भाग आउर बाहरी भाग दूनो ही परमेश्वर के अपनावे जोग होत।42बाकि तोहनी फरीसियन लागी ई केतना बड़ा आफत होत! तोरा भीर जौन कुछ भी हे तोहनी ओकर दसवाँ भाग परमेश्वर के बड़ी सावधानी से दे हऽ, ईहाँ ला पुदीना आउर सुदाब के साथे भी जेकरा तोहनी अपन बगईचा में उपजावऽ हऽ। बाकि फिनो तोहनी दोसर लागी परमेश्वर के प्रेम आउर निष्पक्षता नऽ देखावऽ हऽ। तोरा ई तय करे के चाही कि तोरा परमेश्वर के देवे के अलावे अईसन करऽ हऽ। 43तोहनी फरीसियन लागी ई केतना भयानक आउर आफत होत, काहेकि तोहनी आराधनालय में सभे से खास अासन पर बईठे ला पसन्द करऽ हऽ आउर तोहनी चाहऽ हऽ कि लोग तोहनी के बड़ी इज्जत से बाजार में प्रणाम करतन।44तोहनी लागी ई केतना आफत होत, काहेकि तोहनी बेगर निसान वाला ऊ कब्रवन के जईसन हऽ जेकरा पर लोग बेगर जानले चढ़ जा हथन आउर येहिगुने औपचारिक रूप से असुद्ध हो जा हथन।45यहूदी व्यवस्थापक जौन ऊहाँ मौजूद हलन ओकरा में से एगो यीशु से शिकायत करलन, “हे गुरु!जखनी तूँ अईसन बात कहऽ हऽ, तऽ तूँ हमनी के भी शिकायत करऽ हऽ!”46बाकि यीशु जबाब देलन, “तोहनी जौन यहूदी व्यवस्थापक हऽ, तोहनियो लागी ई केतना आफत होत! हम अईसन येहिगुने कहऽ ही काहेकि तोहनी लोगवन के बड़ी नियम के माने ला कहऽ हऽ, तईयो तोहनी ओखनी के मदत करे लागी जरी से जरिगो काम भी नऽ करऽ हऽ।47तोहनी लागी ई केतना आफत होत, काहेकि तोहनी भविष्यद्वक्तावन के कब्रवन के चिन्हासी करे लागी भवन के निर्माण करऽ हऽ, बाकि तोहनी के पुरखा ही ऊ लोग हलन जौन ओखनी के मार देलन हल!48येहिसे जखनी तोहनी ऊ भवन के बनावऽ हऽ, तऽ तूँ ई गवाह हऽ कि तूँ ओखनी के समर्थन करऽ हऽ जौन तोर पुरखा करलन हलऽ जहिया ओखनी ऊ भविष्यद्वक्तावन के मार देलन हल।49येहिसे परमेश्वर, जौन बड़ी बुद्धिमान हथन, ई भी कहलन, हम अपन लोगवन के राह देखावे लागी भविष्यद्वक्ता आउर प्रेरित के भेजम। बाकि ऊ ओखनी के बड़ी दुःख देतन। ओखनी ओकरा में कुछ के मारियो देतन।50एकर नतीजा हे, ई घड़ी रहे वाला लोग के ऊ सभे भविष्यद्वक्तावन के हत्या लागी दण्डित करल जायेत जेकरा ई संसार के पईदाईस के बाद से लोग मार देलन।51ओखनी के ऊ सभे हत्या लागी दण्ड देवल जायेत जौन आदमी के बेटा हाबिल जेकरा ओकर भाई कैन ओकरा मार देलक हल। से लेके जकर्याह भविष्यद्वक्ता के हत्या ला हे, जेकरा मन्दिर के अँगना में राजा के प्रतिनिधियन वेदी आउर पवित्र जगह के बीच में मार देलन हल। 52यहूदी व्यवस्थापक, तोहनी लागी ई केतना आफत होत। तोहनी परमेश्वर के बारे में ज्ञान के कुँजी लेला पर लोगवन के जाने से रोक रहलऽ हे! तोहनी खुदे परमेश्वर के नऽ जानऽ हऽ, आउर तोहनी बाकि लोगवन लागी बात के मुश्किल बना दे हऽ जौन परमेश्वर के आउर बढ़ियाँ से जाने ला चाहऽ हथन।”53जखनी यीशु ऊ बात कहे लागी खतम कर लेलन तऽ ओकर बाद ऊ फरीसी के घर से निकल के चल गेलन। तऽ यहूदी व्यवस्था के गुरु आउर फरीसी उनका प्रति ढेर दुश्मन जईसन वर्ताव करे लगलन। ओखनी उनका से ढेर बात के बारे में कड़ा सवाल करलन। आउर केतना सवाल से ओखनी के भड़कावे के कोशिश करलक।54ओखनी उनकर लगातार सुनते रहलन कि ऊ कुछ गलत बोलतन जेकरा से कि ऊ उनका पर झूठा शिक्षा देवे के इजलेम लगा सकतन।
Bridge Connectivity Solutions Pvt. Ltd.