Leviticus16
1यहोवा मूसा से ई बात कईलन, कि ई हारून के दूनो बेटवन के मरला के बाद होल, जखनी ऊ यहोवा भीर गेलन फिर मर गेलन। 2यहोवा मूसा से कहलन अपन भाई हारून से कहऽ, कि ऊ कहियो संदूक के ऊपर के पछतावा के सामने परदा के भीतरे परमपवित्र स्थान में नऽ अईतन। जदि ऊ अईसन करतन तऽ मर जईतन, काहेकि हम पछतावा के ढक्कन के ऊपर बादल में प्रकट होवऽ ही। 3येहिगुने हारून के परमपवित्र स्थान में अईसे जाय के चाही; ऊ पापबलि लागी एगो बछड़ा, आउर होमबलि लागी एगो मेढ़ा लेके अईतन।4उनका पवित्र सनी के कपड़ा के अंगरखा, आउर सनी के कपड़ा के कमर बंद आउर सनी के कपड़ा के जांघिया, सनी के कपड़ा के पगड़ी पहिनतन। ई पवित्र कपड़ा हे, उनका पानी से नहा लेवे के चाही आउर फिन ई कपड़ा के पहिने के चाही।5आउर ऊ इस्राएलियन के मंडली में से पापबलि लागी दुगो बकरा, आउर होमबलि लागी एगो मेढ़ा लेवे के चाही।6तऽ हारून के पापबलि ला बछड़ा के चढ़ावे के चाही, जौन-जौन उनके ला होत, आउर अपना लागी आउर अपन परिवार लागी पछतावा करतन। 7तब ऊ दूनो बकरा के लेके मिलापवाला तम्बू के द्वार पर यहोवा के सामने खड़ा करतन।8तब हारून के दूनो बकरा लागी चिट्ठी डाले के चाही, एगो यहोवा लागी आउर दूसरा चिट्ठी बलि के बकरा लागी। 9फिरो हारून ऊ बकरा के सामने ले अईलन जेकरा पर यहोवा लागी चिट्ठी निकलल हल, आउर ऊ बकरा के पापबलि कर के चढ़ईतन।10बाकि जौन बकरा पर पापबलि लागी चिट्ठी निकलत ओकरा जिन्दा यहोवा के सामने लेके अईतन, कि ऊ पापबलि के बकरा बना के जंगल में छोड़ देवल जइतक।11तऽ हारून ऊ पापबलि के बछड़ा के, जौन उनका ला होवत, नजदीक ले अईतन, आउर अपना आउर अपन परिवार लागी पछतावा करतन, अईसे कर के ऊ पापबलि ला बछड़ा के बलि करतन।12हारून यहोवा के सामने वेदी पर से आग से भरल धूपदान के लेतन, आउर अपन मुट्ठी में महीन पिसल गेल खुशबूदार धूप से भर के ई सब चीजवन के परदा के भीतरे लेके अईतन। 13आउर उहाँ यहोवा के सामने धूप जलईतन कि धूप के बादल ऊ पछतावा के ढक्कन के जौन वाचा के नियम के उपर हे, झाँप लेवे। ओकरा अईसन करे से ऊ नऽ मरतन।14तब ओकरा बछड़ा के खून मे से कुछ ले लेवे के चाही, आउर ओकरा अपन अँगुली से पछतावा के ढक्कन के सामने छिड़के के चाही। ओकरा पछतावा ढक्कन के सामने अपन अँगुली से खून के भाग सात बार छिड़के के चाही। 15तऽ फिन ऊ बकरा के जौन लोग के पापबलि ला हे बलि करतन, आउर ओकर लहू के बीचवाला परदा के भीतर ले अईतन। आउर उहाँ ऊ ओकर खून से ओईसहीं करतन, जईसन ऊ बछड़ा के खून से कईलन हल, मतलब कि ओकरा पछतावा के ढक्कन के सामने छिटतन, आउर फिन ओकर सामने छिटतन।16आउर ऊ इस्राएलियन के अशुद्ध काम, आउर ओखनी के बगावत आउर ओखनी के सभे पाप के चलते पवित्रस्थान लागी पछतावा करतन। आउर ऊ मिलापवाला तम्बू लागी भी पछतावा करतन, जेज्जा यहोवा ओखनी के बीच में रहऽ हथन।17जखनी हारून परमपवित्र स्थान मे पछतावा करे लागी मिलापवाला तम्बू में प्रवेश करतन, आउर जब लागी ऊ अपन आउर अपन कुल लागी आउर इस्राएल के सभे मंडली लागी पछतावा कर के बाहर नऽ आ जा हथन, तब ला कोई भी आदमी मिलाप वाला तम्बू मे नऽ रहतन।18आउर ऊ यहोवा वाला वेदी के भीर जइतन, जौन उनकर सामने हे, आउर ओकरा लागी पछतावा करतन, आउर ऊ बछड़ा आउर बकरा के खून में से कुछ लेतन, आउर वेदी के चारो तरप के सिंगवन पर लगइतन।19आउर ऊ लहू में से अपन अँगुली से सात बार ओकरा पर खून छीटतन, जेकरा से ऊ शुद्ध हो जायेत, आउर इस्राएल के लोग के अशुद्ध काम से दूर कर के यहोवा लागी पवित्र करतन।20जखनी ऊ परमपवित्र स्थान, आउर मिलापवाला तम्बू, आउर बेदी लागी पछतावा कर चुकलन हे, तऽ ओकरा जिन्दा बकरा के चढ़ईतन।21हारून के अपन दूनो हाथ बकरा के सिर पर रखे के चाही। आउर इस्राएल के लोगवन के सभे बुराई, ओखनी के सभे बगावत आउर ओखनी के सभे पापवन के मान लेवे के चाही। फिन ऊ ओखनी के पाप के बकरा के सिर पर डाल देतन, आउर बकरा के कोई अईसन आदमी के हाथ में छोड़ देतन, जौन बकरा के जंगल मे ले जाय लागी तैयार हे। 22बकरा के सभे लोग के सभे पाप के भार अपना उपर उठ के एकांत जगह में ले जाय। उहाँ जंगल मे आदमी के बकरा के आजाद छोड़ देवे के चाही।23तऽ हारून के मिलापवाला तम्बू मे लौट जाय के चाही, आउर ऊ सनी के कपड़ा के उतार देवे के चाही, जेकरा ऊ परमपवित्र स्थान में जाय के पहिले पहिनलन हल, उतार देतन आउर ऊ कपड़ा के ऊँहे छोड़ देवे के चाही।24ऊ अपन शरीर कि कोई पवित्र जगह में पानी से नहा लेतन अपन पुराना कपड़ा पेहेन लेतन, तऽ ऊ बाहर जा के अपना ला होमबलि आउर परजा लागी होमबलि चढ़इतन, आउर अईसे कर के अपना ला आउर परजा ला पछतावा करतन।25ओकरा पापबलि के चर्बी के बेदी पर जला देवे के चाही।26जौन आदमी बलि के बकरा के आजाद छोड़ दे हे उनका अपन कपड़ा धो लेवे के चाही आउर जल से नहा लेवे के चाही, एकर बाद ऊ तम्बू मे वापिस आ सकलन हे।27पापबलि के बछड़ा आउर पापबलि के बकरा के, जेकर खून पवित्रस्थान मे पछतावा ला लावल गेल हे, ओकरा छावनी से बाहर ले जा के ओकर खाल, मांस आउर गोबर के उहें जला देवे के चाही।28जौन आदमी ऊ अंग के जलावऽ हे ओकरा अपन कपड़ा धोवे, आउर पानी से नहाय के चाही; ओकर बाद ऊ तम्बू में वापस आ सकलन हे।29तोरा लागी हमेशा ई विधि रहत, कि हर साल के सातवाँ महिना के दसवाँ दिन तूँ खुद के नम्र बनईहऽ, आउर चाहे तोर बीच में रहे वाला स्वदेशी, चाहे परदेशी होवे, कोई काम काज नऽ करतन।30एकर कारण हे, कि आज के दिन तोरा ला पछतावा कईल जायेत, आउर तोरा तोर सभे पापवन से शुद्ध कईल जायत, आउर तूँ यहोवा के शुद्ध ठहरवऽ।31ई तोरा लागी परम विश्राम के दिन हे, ओकरा में तूँ नम्र हो जईहऽ, आउर कोई काम-काज नऽ करिहऽ। ई तोहनी के बीच हमेशा ला विधि बनल रहत। 32ऊ महायाजक जिनका अभिषेक कईल जायेत, आउर जौन अपन पिता के जगह पर महायाजक होवे लागी अभिषिक्त करल जईतन, उनका ई पछतावा करे के चाही आउर सनी के कपड़ा, मतलब कि पवित्र कपड़ा पहेने के चाही।33ऊ परमपवित्र स्थान लागी पछतावा करतन, ऊ मिलापवाला तम्बू आउर वेदी लागी पछतावा करतन, आउर याजक आउर मंडली के सभे लोग लागी भी पछतावा करतन।34ई तोहनी लागी हर साल के विधि ठहरत, कि इस्राएलियन लागी उनकर सभे पाप के कारण हर साल एक बार पछतावा करल जाय। ई ओईसहीं कईल गेल हे जईसन यहोवा मूसा के जौन आज्ञा देलन हल।
Bridge Connectivity Solutions Pvt. Ltd.