Judges1
1फिन अईसन होल कि यहोशू के मरला के बाद इस्राएली लोग यहोवा से पूछलन, “कनानी लोग से लड़े ला हमरा दने से पहिले कौन चढ़ाई करतन?”2यहोवा जबाब देलन, यहूदा चढ़ाई करतन; देखऽ, हम कनान देश उनकर हाथ में कर देली हे।3तब यहूदा गोत्र अपन भाई शिमोन से कहलन, "हमरा साथे हमर भाग वाला देश में चलऽ, आउर हमनी मिल के कनानियन से लड़म। हम खुद तोरा साथे तोर भाग में लड़ाई करम।" येहिसे शिमोन उनका साथे गेलन।4यहूदा चढ़ाई कईलन, आउर यहोवा कनानी आउर परिज्जी के उनकर हाथ में कर देलन, आउर ऊ बेजेक शहर में ओखनी में से दस हजारो आदमी के मार देलन।5आउर बेजेक में उनका बेजेक के राजा अदोनीबेजेक मिलल, आउर ऊ ओकरा से लड़लन। आउर ऊ कनानी आउर परिज्जी के मार देलन।6तब अदोनीबेजेक भाग गेल, बाकि ऊ ओकर पीछा कईलन। आउर ओकरा पकड़ लेलन आउर ओकरा हाथ-गोड़ के अंगूठा काट देलन।7अदोनीबेजेक कहलक, "सत्तरगो राजा जेकर हाथ आउर गोड़ के अंगूठा काटल गेल लोग हमर टेबुल के नीचे से खाना के टुकड़ा बटोरऽ हल। जईसन हम कईली हे, ओईसहीं परमेश्वर हमरा बदला देलन हे।" तब यहूदा के योद्धा उनका यरूशलेम में ले अईलन, आउर ऊ ऊहें मर गेलन।8यहूदा के बेटा यरूशलेम से लड़लन आउर ऊ ओकरा ले लेलन। ऊ ओकरा पर तलवार से हमला कईलन आउर नगर के आग में झोंक देलन।9एकर बाद, यहूदा के बेटा पहाड़ी देश, आउर दक्खिनी रेगिस्तान, आउर पच्छिम के निचला देश में रहे वालन कनानियन से लड़े ला चल गेलन। 10तब यहूदा हेब्रोन में रहे वालन कनानियन भीर गेलन, हेब्रोन के नाम पहिले किर्यतअर्बा हल, आउर ऊ अनाक के कुल के शेशै, अहीमन, आउर तल्मै के मार देलन।11उहाँ से यहूदा के सिपाही जा के दबीर के रहबईयन पर चढ़ाई कईलन दबीर शहर के नाम पहिले किर्यत्सेपेर हल12तब कालेब कहलन, “जौन कोई किर्यत्सेपेर के मार के ओकरा पर अधिकार करतन, हम ओकरा अपन बेटी अकसा से बियाह देम।” 13आउर कनजी के बेटा ओत्नीएल, जौन कालेब से छोटा हल, ओकरा पर अधिकार कर लेलन, आउर उनका से अपन बेटी अकसा के बियाह देलन।14अब अईसन होल, कि अक्सा आके अपन मरदाना के उकसईलन, कि अपन बाबूजी से कुछ जमीन मांग लेतन। ओत्निएल गदहा पर से उतरल, आउर कालेब उनका से कहलन, “हम तोरा ला का कर सकली हे?”15तब ऊ उनका से कहलन, हमरा आशीर्वाद दऽ। जबकि तूँ हमरा दक्खिन के देश देलऽ हे, तईयो तूँ हमरा जल के सोता भी देवऽ। येहिसे कालेब उनका ऊपरे के सोता आउर नीचे के सोता दे देलन।16मूसा के ससुर केनी के बेटा यहूदा के बेटवन के साथे खजूर के नगर से यहूदा के जंगल में, जौन अराद के दक्खिन में हे, चढ़ गेलन। येहिसे ऊ चल गेलन आउर लोग के बीच में रहे लगलन। 17तब यहूदा के लोग अपन भाई शिमोन के साथे गेलन, आउर सपत शहर में रहे वालन कनानी के मार देलन। येहिसे ऊ नगर के नाश करे लागी सौप देलन आउर ऊ, ऊ नगर के नाम होर्मा रखलन। 18आउर यहूदा गाजा आउर ओकर सिवाने के, आउर अश्कलोन आउर एक्रोन आउर ओकर सिवाने पर अधिकार कर लेलन।19अब अईसन होल कि यहोवा यहूदा के साथे हलन, आउर ऊ पहाड़ी देश पर कब्जा कर लेलन, बाकि लोहा के रथवन के चलते घाटी में रहे वालन के ऊ नऽ निकासलन।20आउर मूसा के आज्ञा के मोताबिक ऊ हेब्रोन कालेब के दे देलन, आउर ऊ अनाक के तीनो बेटवन के उहाँ से निकास देलन।21बाकि बिन्यामीन के वंश यरूशलेम में रहे वालन यबूसियन के नऽ निकासलन। ई तरह यबूसियन आज के दिन तक यरूशलेम में बिन्यामीनियन के साथे रहते अईलन हे।22ई तरह से यूसुफ के घराना भी बेतेल पर चढ़ाई कईलन, आउर यहोवा उनका साथे हलन।23यूसुफ के घराना मनश्शे के गोत्र बेतेल के भेद लेवे लागी जासूस भेजलन; पहिले नगर के नाम लूज हल।24आउर भेदियन एगो आदमी के नगर से बहारसी निकसते देखलन, आउर ऊ ओकरा से कहलन, "नगर के प्रवेश द्वार हमरा दिखावऽ, तऽ हम तोरा पर दया करम।"25जब ऊ उनका नगर में प्रवेश के राह देखईलन, आउर ऊ नगर के तलवार से घात कईलन, बाकि ऊ आदमी आउर ओकर सभे घराना के आजाद कर के छोड़ देलन।26तब ऊ आदमी हित्ती लोग के देश में गेलन, आउर उहाँ ऊ एगो नगर बसईलन। ऊ ओकर नाम लूज रखलन, जौन आज तक ओकर नाम हे।27बाकि मनश्शे, बेतशान आउर ओकर बेटियन, चाहे तानाक आउर ओकर बेटियन, चाहे दोर आउर ओकर बेटियन, चाहे यिबलाम आउर ओकर बेटियन, चाहे मगिद्दो के बासिन्दा आउर ओकर बेटियन आउर ओकर सब बेटी के अपन अधिकार में नऽ लेलन, काहेकि कनानी ऊ देश में रहे के फैसला लेलन हल।28फिन अईसन होल कि जब इस्राएल देश शक्तिशाली हो गेल, तब ऊ कनानी लोग से बेगारी करावे लगलन, बाकि ओखनी पर कब्जा नऽ कईलन।29आउर एप्रैम के गोत्र गजेर के बासिन्दा कनानी लोग के नऽ निकासलन, अईसे कनानी गेजेर में ओखनी के बीच में रहे लगलन।30जबूलून कित्रोन चाहे नहलोल के रहबईयन के नऽ निकासलन, येहिसे कनानी लोग उनकर बीच में बस गेलन। बाकि ओखनी गुलामी करते रहलन।31आशेर के लोग, अक्को के लोग, चाहे सीदोन, चाहे अहलाब, चाहे अकजीब, चाहे हेलबा, चाहे अपीक, चाहे रहोब के रहबईयन के नऽ निकासलन हल;।32येहिसे आशेरी ऊ देश में रहे वालन कनानी लोग के बीच में रहे लगलन, काहेकि ऊ उनका ऊ देश से नऽ निकासलन हल।33नप्ताली के गोत्र बेतशेमेश आउर बेतनात के रहबईयन के, चाहे बेतअनात के रहबईयन के बेदखल नऽ कईलन। येहिसे ऊ देश में रहबईयन कनानी लोग के बीच में रहे लगलन। जबकि, बेतशेमेश आउर बेतनात के रहबईयन लोग बेगारी करते रहलन।34एमोरी दान के बेटवन के पहाड़ी देश में दबा देलन, आउर ओकरा तराई में उतरे नऽ देलन।35एमोरी लोग हेरेस पहाड़ पर, अय्यलोन में, आउर शालबीम में रहे ला पक्का कईलन, बाकि यूसुफ के घराना के हाथ भारी हो गेल, आउर उनका कर देवे पड़ल।36आउर एमोरी के सीमा अक्रब्बीम आउर सेला शहर पहाड़ के चढ़ाई से लेके चट्टान तक आउर ऊपरे दने हल।
Bridge Connectivity Solutions Pvt. Ltd.