Joshua6
1अब इस्राएलियन के वजह से यरीहो के कस के बंद कर देवल गेल। नऽ कोई बाहर जा सकऽ हल आउर नऽ कोई भीतर आ सकऽ हल।2तऽ यहोवा यहोशू से कहलन, सुनऽ, हम यरीहो आउर ओकर राजा, आउर ओकर शूरवीर के तोर वश में कर देली हे।3तोहनी सभे योद्धा के साथ नगर के चारो तरफ से घेर लिहऽ, आउर तोहनी छ: दिन ला यरीहो शहर के चारो तरफ घूमते रहिहऽ।4सात याजक संदूक के आगे-आगे बकरा के सींग के सातगो तुरही लेके बजईते चलतन। फिनो सातवाँ दिन नगर के चारो तरप सात बार परिकरमा करतन आउर याजक तुरहियन के फूकतन आउर जोर से बजईतन।5अईसन तखनी होत जखनी ओखनी मेढ़ा के सींग के साथ बड़ी जोरदार धमाका करतन, जखनी तोहनी तुरही के आवाज सुनिहऽ, तऽ सभे लोग बड़ी जोर से चिल्लईहऽ, आउर नगर के दीवार ढह जायेत। तऽ लोग ओकरा पर चढ़ जईतन-सब आदमी अपन सोझे आगे बढ़तन।6तऽ नून के बेटा यहोशू याजक लोग के बुलईलन आउर ओखनी से कहलन, वाचा के संदूक उठावऽ, आउर यहोवा के संदूक के साथ सात मेढ़ा के सींग के तुरही बजावे वाला सातगो याजक के हमरा भीर ले आवऽ।7फिन ऊ सिपाही से कहलन, नगर के चारो तरप चलऽ, आउर हथियारबंद लोग यहोवा के संदूक के आगे आगे चलतन।8जईसन यहोशू लोग से कहलन हल, ओखनी सातगो याजक यहोवा के सात नरसिंगा लेके नरसिंगा फूँकते आगे बढ़ते गेलन, आउर यहोवा के वाचा के संदूक ओखनी के पीछे-पीछे चलते गेल।9हथियारबंद लोग याजक के आगे चललन, आउर ओखनी अपन तुरही के फूकलन, आउर पीछे के पहरदार संदूक के पीछे चललन आउर तुरहियन के फूँकते गेलन।10बाकि यहोशू प्रजा के लोगन के आज्ञा देलन, कि जब ला हम जय-जयकार करे लागी नऽ कहम, तब ला जय-जयकार नऽ करिहऽ, आउर जखनी ला तुरही के आवाज सुनाइ नऽ देत, तब ला कोई आवाज तोहनी के मुंह से नऽ निकले के चाही।11तऽ ओखनी यहोवा के संदूक नगर के चारो तरफ एक बार घूमे लागी ठहरईलन। तऽ ओखनी छावनी में गेलन, आउर ओखनी रात भर छावनी में रहलन।12तऽ यहोशू बिहने तड़के उठलन, आउर याजक लोग यहोवा के संदूक उठा लेलन।13सातगो याजक जे मेढ़वन के सींग के तुरही लेले हलन, यहोवा के संदूक के आगे रोजदिन चलते रहलन आउर नरसिंगा फूँकते रहलन। हथियारबंद सिपाही ओखनी के आगे-आगे चललन, बाकि पीछे के पहरेदार यहोवा के संदूक के पीछे-पीछे चलते रहल, आउर ओखनी तुरही के फूँकते रहलन।14ओखनी दूसरका दिन एक बेरा फिन शहर के चारो तरफ परिकरमा कईलन आउर शिविर में लौट अईलन। ओखनी छः दिन ला अईसहीं कईलन।15अईसन होल कि सातवाँ दिन ओखनी बिहान होके तड़के उठलन, आउर ओखनी सात बार ओईसहीं नगर के चारो तरप परिकरमा कईलन, खाली ओही दिन ओखनी नगर के चारो दने सात बेरा परिकरमा कईलन।16अईसन होल कि सातवाँ बार याजक नरसिंगा फूकलन, आउर यहोशू लोग से कहलन, जय-जयकार करऽ! काहेकि यहोवा तोहनी के नगर दे देलन हे।17ऊ नगर आउर जे कुछ ओकरा में हे, ओकरा तहस-नहस करे लागी यहोवा से अलग करल गेल। खाली राहाब वेश्या ही जिन्दा रहत ऊ आउर ओकर घर के सभे लोग, काहेकि ओखनी ऊ दूतवन के छिपा देलन हल जेकरा हमनी भेजली हल।18बाकि जे कुछ विनाश लागी अलग रखल गेल हे, ओकरा से अपने आप के बचा के रखिहऽ, अईसन नऽ होवे कि जखनी तूँ जे कुछ अलग रखल गेल हे ओकरा में से ले लिहऽ, आउर ई कारण से इस्राएल के छावनी विनाश लागी अलग कर देतन, आउर ओकरा पर विपत्ति ला देतन ।19सभे सोना, चाँदी, आउर पीतल आउर लोहा के बरतन जे यहोवा लागी अलग रखल गेल हे। ऊ यहोवा के भण्डार में जाय के चाही।20तऽ लोग जय जयकार कईलन आउर तुरही फूकलन। आउर अईसन होल कि जखनी लोग नरसिंगा के आवाज सुनलन, आउर लोग बड़ी जय जयकार के साथ शोर करे लगलन, तऽ शहरपनाह के दीवार गिर गेल, आउर लोग नगर में चढ़ गेलन, आउर सभे आदमी अपन सामने चढ़लन आउर ओखनी नगर पर कब्जा कर लेलन। 21ऊ नगर में जे कुछ हल मरद से लेकर औरत ला, जवान से बूढ़ा ला, बैल, भेड़-बकरी, आउर गदहा ला ऊ सभे के तलवार से नाश कर देलन।22तऽ यहोशू ओखनी दूनो आदमी से, जे सब ऊ देश के भेद लेलन हल, कहलन, ऊ औरत मतलब कि वेश्या के घर में जा के ऊ औरत के, आउर जेतना ओकर घर में हे, ऊ सभे के उहाँ से निकाल ले आवऽ, जईसन तूँ ओकर बारे में सपथ खईलऽ हल।23तऽ जे जवान जासूस हल, भीतर गेल आउर राहाब वेश्या के बाहर ले अईलन। आउर ओकर बाबूजी, आउर ओकर माई, आउर ओकर पूरा परिवार, आउर जे कुछ ओकर हल, सब बाहर ले अईलन, आउर इस्राएल के छावनी के बाहर रख देलन आउर बचा लेलन24इस्राएली नगर आउर जे कुछ ओकरा में हल सभे कुछ के आग में जला देलन। खाली चाँदी, सोना, आउर पीतल आउर लोहा के बरतन ही ओखनी यहोवा के भवन के भण्डार में रख देलन हल।25बाकि यहोवा राहाब वेश्या के, आउर ओकर पिता के घराना के, बलुक ओकर सभे धन के भी बचा के रखलन। ऊ आज ला इस्राएली लोग के बीच में रहऽ हथन, काहेकि ऊ, ओखनी सब दूत लोग के छिपा के रखलन हल, जेकरा यहोशू यरिहो जासूसी करे लागी भेजलन हल।26तऽ यहोशू ओही घड़ी ओकरा किरिया खिला के कहलन, ऊ पुरुष यहोवा भीर शापित हे, जे उठ के ई नगर यरीहो के फिनो से बनईतन। सब से छोटका बेटा, एकरा दोबारा बनईतन।27अईसे यहोवा यहोशू के साथे रहलन, आउर ओकर काम कनान देश में फैल गेल।
Bridge Connectivity Solutions Pvt. Ltd.