Joshua5
1जखनी यरदन नदी के पार पच्छिम के तरफ रहे वाला एमोरियन के सभे राजा, आउर समुद्र के पार रहे वाला कनानियन के सभे राजा सुनलन, कि यहोवा यरदन के पानी अपन संतान लागी सुखा देलन हे, आउर इस्राएल के लोग ई पार आ गेलन हे, तऽ एतना ओखनी के मन में घबरा गेल, कि इस्राएल के लोग के कारण फिर ओखनी में कुच्छो जान नऽ रहल।2ऊ घड़ी यहोवा यहोशू से कहलन, अपना लागी चमचम चाकू बनावऽ, आउर सभे इस्राएली के दोबारा खतना करऽ जिनका अभी तक खतना नऽ होल हे।3तऽ यहोशू अपना लागी चमचम पत्थर के चाकू बनइलन आउर ऊ गिबत हारलोत में इस्राएल के संतान के खतना कईलन।4ई कारण से यहोशू ओखनी के खतना कईलन: जेतना लोग मिस्र से निकलल हल, ओखनी सभे पुरुष हल, जे सभे योद्धा हल ओखनी मिस्र से निकले के बाद जंगल के मार्ग में मर गेल।5काहेकि जेतना लोग मिस्र से निकललन हल, ओखनी के खतना तऽ हो गेल हल, बाकि जेतना लोग मिस्र से निकलला के बाद जंगल के राह में पईदा होलन हल, ओखनी के खतना नऽ होल हल।6काहेकि इस्राएली लोग चालीस साल ला जंगल में भटकते रहलन, जब ला कि सभे जाति तहस-नहस नऽ हो गेल, मतलब कि जे योद्धा मिस्र से निकललन हल, ओखनी से यहोवा किरिया खईलन हल, कि ओखनी ऊ पूरा देश नऽ देख पईतन। जे हमनी के पुरखन के दूध आउर मधु के नदी बहे वाला देश हमनी के देवे लागी कहलन हल, काहेकि ओखनी यहोवा के आज्ञा नऽ मानलन हल।7बाकि ऊ ओखनी के संतान के ओखनी के जगह पर खड़ा कईलन, कि यहोशू जेतना लोग बिन खतना के हलन ओखनी के खतना कईलन, काहेकि राह में ओखनी के खतना नऽ होल हल,8फिन अईसन होल कि जखनी ओखनी सभे इस्राएली के खतना कईल पूरा हो गेल, तऽ ओखनी छावनी में अपन जगह में रहलन जब ला कि ओखनी चंगा नऽ हो गेलन।9तऽ यहोवा यहोशू से कहलन, आज से हम तोहनी के बीच में से मिस्र के नामधराई दूर कर देली हे। एहिसे ऊ जगह के नाम आज ला गिलगाल पड़ल हे। 10ई खातिर इस्राएली गिलगाल में डेरा खड़ा कईलन, आउर ओही महीना के चौदहवां दिन सांझ के यरीहो के अराबा में फसह के परव मनईलन।11फसह के पर्व के दूसरका दिन, ओखनी कनान देश में खेत के उपज में से अखमीरी रोटी आउर भूंजल अनाज खईलन।12आउर जौन दिन ओखनी कनान देश के उपज से खाय लगलन ओकर दोसरका दिन के बाद से मन्ना गिरेला बंद हो गेल। सभे इस्राएली लागी अब मन्ना नऽ हल, बाकि ओखनी ऊ साल जमीन के उपज से खईलन।13जखनी यहोशू यरीहो शहर के नगीच हलन, तऽ ऊ आँख उठा के देखलन, आउर कौची देखलन, कि एगो आदमी हाथ में नंगा तलवार लेके ओकर सामने खड़ा हे। यहोशू ओकर भीर में जा के पूछलन, तूँ हमनी के तरप के हऽ कि हमनी के दुश्मन के तरप के हऽ?14ऊ कहलन, नऽ बलुक हम यहोवा के सेना के सेनापति बन के अखनी अईली हे। तऽ यहोशू मुंह के भरे जमीन पर गिर के दण्डवत कर के उनका से कहलन, हमर स्वामी! अपन दास ला कौची आज्ञा हे?15तऽ यहोवा के सेना के सेनापति यहोशू से कहलन, अपन जूता के गोड़ से उतार दऽ, काहेकि जौन जगह पर तूँ खड़ा हऽ, ऊ पवित्र हे। येहिसे यहोशू ओईसहीं कईलन।
Bridge Connectivity Solutions Pvt. Ltd.