Joshua2
1तऽ नून के बेटा यहोशू दूगो आदमी के जासूस बना के शित्तिम में ई कह के भेजलन, कि जा के देश के, खास कर के यरीहो शहर के देखऽ ओखनी जा के एगो राहाब नाम के वैश्या के घर में पहुंचलन, आउर उहें ठहरलन। 2आउर यरीहो के राजा के ई समाचार मिलल, कि देखऽ, आज रात इस्राएलियन के तरप से लोग देश के भेद लेवे ला इहाँ अईलन हे।3तऽ यरीहो के राजा राहाब वेश्या के पास खबर भेजलन, कि जौन आदमी तोर घर में आयेल हे, ओकरा बाहर निकाल ले आवऽ, काहेकि ओखनी पूरा देश के भेद लेवे ला आयेल हे।4बाकि ऊ औरत ऊ दुन्नो आदमी के ले जा के छिपा देलक आउर कहलक, "हाँ, ऊ आदमी हमरा भीर आयेल हल, बाकि हम नऽ जानऽ ही कि ओखनी कहाँ से हल?" 5आउर अईसन होल, कि अंधार होते फाटक बंद हो गेल, आउर ऊ आदमी बाहर चल गेल, आउर हम नऽ जानऽ ही, कि ओखनी कहाँ गेल। जल्दी से उनकर पीछा करऽ, काहेकि तूँ ओखनी के पकड़ लेवऽ।6बाकि ऊ ओखनी के छत के ऊपर ले जा के सनाठी में छिपा देलन, ऊ ओकरा पर डंठल बिछा देलन।7येहिगुने राजा के सैनिक राह में यरदन नदी के घाट ला ओखनी के पीछा कईलन। आउर जईसही पीछा करे वाला ओखनी के पीछे निकसलन, तऽ नगर के फाटक बंद हो गेल।8अखनी ओखनी सुतलन भी नऽ हल कि ऊ छत पर ओखनी भीर आ गेल।9आउर ओखनी, ऊ सभे आदमी से कहलन, हम जानऽ ही, कि यहोवा तोहनी के ई देश दे देलन हे, आउर तोहनी के डर हमनी में समा गेल हे, आउर ई देश के सब रहबईया तोहनी से घबरा जइतन।10काहेकि हमनी सुनली हे, कि जहिया तोहनी मिस्र से निकललऽ हल, तऽ यहोवा तोहनी के आगे से लाल सागर के पानी के सुखा देलन हल, आउर तोहनी यरदन नदी के ई पार रहे वाला एमोरियन के ऊ दूनो राजा से, मतलब कि सीहोन आउर ओग तक हल, जेकरा तोहनी सत्यानाश कर देल।11ई सुनतही हमनी के मन पिघल गेल, आउर तोहनी के कारण केकरो में जान नऽ रहल, काहेकि तोर परमेश्वर यहोवा ऊपर स्वर्ग में आउर नीचे धरती पर परमेश्वर हथिन।12अखनी हम जे तोरा पर दया कईली हे, येहिगुने अखनी हमरा से यहोवा के किरिया खा, कि जईसे हम तोहनी के भलाई कईली हे, ओईसहीं तोहूँ हमर पिता के घराना के जौरे भलाई करवऽ आउर हमरा एगो पक्का चिन्हासी देवऽ। 13कि तूँ हमर पिता, आउर हमर माई, आउर हमर भईवन, आउर हमर बहिनियन, आउर ओकर सभे लोगन के जिन्दा छोड़ देवऽ, आउर तूँ हमर जान के मौत से बचईवऽ।14आउर ऊ दुन्नो जासूस ऊ औरत से कहलन, हम तोर जान के बदले जान लेम! जदि तूँ हमनी के कारोबार के बारे में कोई के कुछ नऽ बतईवऽ, तऽ जखनी यहोवा हमनी के ई देश देतन, तऽ हम तोरा साथे कृपा आउर सच्चाई से बर्ताव करम।"15तऽ ऊ ओखनी के शहर के देवाल से रसरी के सहारे खिड़की से बाहर निकास देलन, काहेकि घर तऽ शहरपनाह के बीचे में हल, आउर ओहू शहरपनाह में रहऽ हल। 16ऊ ओखनी से कहलक, पहाड़ी पर चल जा अईसन नऽ होवे कि तोहनी के पीछा करे वाला भीड़ तोहनी के सामना करे, आउर जब ला तोहनी के पीछा करे वाला घूर नऽ आवे, तब ला तीन दिन लागी ऊहे छिपल रहिहऽ, जब ला पीछा करे वाला नऽ लौट जायेत, आउर ओकर बाद तोहनी राह पर चल जईहऽ।17फिन ऊ जासूस ओकरा से कहलन, जे किरिया तूँ हमनी के खिलईलऽ हे, ओकरा पर हमनी बेकसूर ठहरम।18देखऽ! हमनी तोर देश में आ रहली हे, आउर जौन खिड़की से तूँ हमनी के बाहरसी निकास लऽ हे ओकरा में ई लाल रंग के कपड़ा बाँध दिहऽ, आउर तोर बाबूजी, आउर तोर माई, आउर तोर भईवन आउर अपन बाबूजी के पूरा परिवार के भी एही घर में जमा करिहऽ।19आउर जे कोई तोर घर के दरवाजा से निकस के चौराहा पर निकसतन, ओकर खून ओकरे माथा पर पड़त, आउर हम बेकसूर ठहरम। आउर जदि तोरा साथे घर में रहे वाला कोई पर हाथ डालल जायेत तऽ ओकर दोष हमनी के माथा पर मढ़ायेत।20बाकि जदि तूँ हमनी के काम के चरचा केकरो से करबऽ, तऽ हमनी तोर ऊ किरिया के बारे में बेकसूर ठहरम, जेकरा तूँ हमनी के खिलईलऽ हे।21आउर ऊ कहलन, जईसन तूँ कहलऽ हे ओईसहीं होवत। येहिगुने ऊ ओखनी के विदा कईलन, आउर ओखनी चल गेलन, आउर ऊ लाल रंग के कपड़ा के खिड़की पर बाँध देलन।22तऽ ओखनी चल गेलन, आउर पहाड़ पर गेलन आउर ओखनी तीन दिन ला उहें रहलन, जब ला कि पीछा करे वाला वापिस लौट नऽ अईलन, आउर पीछा करे वाला सभे जगह ढूँढ़लन, बाकि ओखनी के नऽ पईलन।23ओखनी दूनो जासूस पहाड़ी देश से उतर के पार होके नून के बेटा यहोशू भीर अईलन, आउर जे कुछ उनका साथे बीतल हल, ओखनी उनका से बता देलन।24ओखनी यहोशू से कहलन, सचमुच यहोवा पूरा देश के हमनी के हाथ में कर देलन हे। आउर कनान देश के सभे निवासी भी हमनी के कारण घबरा रहलन हे।
Bridge Connectivity Solutions Pvt. Ltd.