Joshua14
1यरदन नदी के पच्छिम कनान देश में जे भाग इस्राएली लोग के विरासत में मिलल हल ऊ सब येही हे, जेकरा एलीआजर याजक, आउर नून के बेटा यहोशू, आउर इस्राएलियन के गोत्र के पुरखन के मुखिया खास-खास आदमी के बाँट देलन हल। 2ओखनी के भाग नौ गो गोत्र आउर आधा गोत्र लागी चिट्ठी डाल के दे देलन, जईसन यहोवा मूसा के द्वारा आज्ञा देलन हल।3काहेकि मूसा यरदन के पार दो गोत्र के आउर आधा गोत्र के भाग देलन हल, बाकि लेवी लोग के ओकरा में से कोई भाग नऽ देलन।4काहेकि यूसुफ के बेटा मनश्शे आउर एप्रैम दुगो गोत्र हो गेलन हल। बाकि ऊ ओखनी के रहे लागी केवल नगर देल लेवियन के ऊ देश में से कोई भाग नऽ देलन, बाकि ओखनी के जानवर ला चारागाह आउर रहे लागी जमीन देवल गेल।5जईसे यहोवा मूसा के आज्ञा देलन हल, इस्राएलियन ओईसहीं कईलन, तऽ ओखनी देश के बाँट लेलन।6तऽ यहूदा के बेटा गिलगाल में यहोशू भीर अईलन, आउर कनजी यापुन्ने के बेटा कालेब ओकरा से कहलन, जे वचन परमेश्वर के भक्त मूसा हमर आउर कादेशबर्ने में तोर बारे में कहलन हल, ओकरा तूँ जानऽ हऽ। 7हम चालीस साल के हली, जखनी यहोवा के दास मूसा हमरा कादेशबर्ने से देश के भेद लेवे लागी भेजलन हल।8बाकि हमर साथी इस्राएली, जे हमरा साथे आगे गेलन, ओखनी लोग के मन के निराश कर देलन। बाकि हम पूरा रीति से अपन परमेश्वर के बात मानली।9तऽ मूसा ओही दिन शपथ खा के कहलन, जरुर जौन देश पर तोर गोड़ पड़त ऊ तोरा आउर तोर बेटवन के भाग हमेशा लागी रहत, काहेकि तूँ हमर परमेश्वर यहोवा के पूरा अच्छा से मान लऽ हे। 10अखनी देखऽ! यहोवा हमरा ई पैंतालीस साल से जिन्दा रखलन हे, जईसे कि ऊ कहलन हल-जहिया से यहोवा मूसा से ई वचन कहलन हल, जहिया इस्राएली लोग जंगल में घूम फिर रहलन हल। अब देखऽ, आज हम पचासी साल के ही।11हम आज भी ओतने ही जवान ही जेतना कि ऊ दिन हली जहिया मूसा हमरा भेजलन हल। जईसे ऊ घड़ी हमरा में ताकत हल, ओईसहीं हमर ताकत युद्ध लागी, आउर बाहर जाय आउर भीतर आवे लागी हे।12येहिगुने अखनी हमरा ई पहाड़ी देश दे दऽ, जेकरा बारे में यहोवा ऊ दिन कहलन हल। काहेकि ऊ दिन तोहनी सुनलऽ हल कि अनाकवंशी उहाँ हथन। आउर बड़का गढ़ वाला नगर हे। हो सकऽ हे कि यहोवा हमनी के साथ रहतन आउर जईसे कि यहोवा कहलन हे, हम ओखनी के निकाल देम।13तऽ यहोशू ओकरा आशीर्वाद देलन, आउर हेब्रोन शहर के यपुन्ने के बेटा कालेब के निज भाग के रूप में दे देलन।14ई वजह से हेब्रोन कनिज्जी यपुन्ने के बेटा कालेब के आज तक निज भाग हे, काहेकि ऊ इस्राएल के परमेश्वर यहोवा के आज्ञा के ईमानदारी से पालन कईलन हल।15हेब्रोन के नाम पहिले किर्यतअर्बा हल। ऊ अनाकवंशियन के एगो महापुरुष हलन तऽ देश के युद्ध से शांति मिलल।
Bridge Connectivity Solutions Pvt. Ltd.