John9
1जखनी यीशु राह धईले जा रहलन हल, तऽ ऊ एगो अादमी के देखलन जे तहिया से आंधर हल जहिया ऊ जनम लेलक हल।2उनकर चेलवन उनका से पूछलन, “हे गुरु, किनकर पाप ई अादमी के तहिया आंधर कर देलक जहिया ई जनम लेलक हल? का ई अादमी के कि एकर माय-बाप के पाप?”3यीशु जबाब देलन, “ई, नऽ तऽ ई अादमी के पाप हल आउर नऽ ही एकर माय-बाप के पाप हल जौन एकरा तहिया आंधर कर देलक जहिया ई जनम लेलक हल बजाय एकर, जखनी ई जनम लेलक तऽ ई आंधर हल जेकरा से कि हम लोगवन पर ऊ चमत्कारी काम के परकट करूँ जेकरा परमेश्वर ओकरा में करतन।”4जबकि हम अखनी ला तोरे साथही, तऽ हमरा ऊ चमत्कारी काम के करे ला जरुरी हे जेकरा हमर पिता जे हमरा भेजलन हे चाहऽ हथन कि हम करूँ। जईसे दिन के बाद रात होवऽ हे, जेकरा में लोग काम नऽ कर सकऽ हथन, ओईसहीं एगो समय आवत जहिया ऊ करेलागी हमरा बड़ी देर हो चुकल होत जे परमेश्वर चाहऽ हथन कि हम करूँ।5जबकि हम अखनी ई संसार में रह रहली हे, तऽ हम ओही ही जे ई संसार में रहे वाला लोगवन के परमेश्वर के भला आउर सच्चा ज्योति देवऽ ही।6जखनी ऊ ई कहलन तऽ ऊ मट्टी पर थूकलन आउर अपन लार से मट्टी के साथ सान के घोल बनईलन। फिन ऊ, ऊ घोल के ऊ आंधर अादमी के आँख पर लगा देलन।7फिन यीशु ऊ आंधर अादमी से कहलन, “जा आउर घोल के शीलोह के कुण्ड में धो लऽ!” अरामी भाषा में शीलोह के माने कि “भेजल गेल” होवऽ हे। तऽ ऊ अादमी चल गेल आउर कुण्ड में घोल के धो लेलक। जखनी ऊ देखे लगलक तऽ फिन ऊ घरे चल गेलक।8ऊ अादमी के पड़ोसियन आउर दोसरा जौन सभे ओकरा पहिले में देखलन हल आउर जानऽ हलन कि ऊ एगो भिखारी हलक आउर कहलन, “जरुर में ई ओही अादमी हे जे ईहाँ बईठऽ हल आउर भीख माँगऽ हल!”9कुछ लोगवन कहलन, “हाँ, ई ओही अादमी हे।” दोसरा लोगवन कहलन, “नऽ, बाकि ई तऽ ओही अादमी के जईसन लगऽ हे।” बाकि ऊ अादमी अपनहीं कहलन, “हाँ, हम ओही अादमी ही जे आंधर हली!”10येहिगुने ओखनी ओकरा से पूछलन, “तऽ अईसन कईसे होल कि तूँ अखनी देख सकलऽ हे?”11ऊ जबाब देलन, “ऊ अादमी जिनका लोग यीशु कहऽ हथन ऊ मट्टी आउर लार से घोल बनईलन आउर ओकरा हमर आँख पर लगा देलन। फिन ऊ हमरा से शीलोह कुण्ड में जा के घोल के धो लेवे लागी कहलन। तऽ हम ऊहाँ गेली आउर घोल के धो लेली। तऽ हम पहिला बेरा देखे लगली।”12ओखनी ओकरा से पूछलन, “ऊ अादमी कहाँ हे?” ऊ जबाब देलन, “हम नऽ जानऽ ही कि ऊ कहाँ हथन।”13ऊहाँ के कुछ लोग ऊ अादमी के जे पहिले आंधर हलक कुछ फरीसियन भीर ले गेलन।14अखनी जौन दिन यीशु अपन लार से घोल बनईलन हल आउर ऊ अादमी के देख पावे में मदत करलन हल ऊ यहूदियन के सब्त दिन हलक।15तऽ ऊ फरीसियन ऊ अादमी से दोसरका बेरा सवाल करलन। ई बेरा भी, ओखनी एकरा बारे में पूछलन कि ऊ देख पावे में सक्षम कईसे होलक। ऊ उनका से कहलन, “ऊ अादमी हमर आँख पर घोल लगईलन, आउर हम ओकरा धो लेली, आउर अखनी हम पहिलका बेरा देख पावे में सक्षम ही।”16तऽ फरीसियन में से कुछ कहलन, “हम जानऽ ही कि ई अादमी परमेश्वर के तरफ से नऽ अईलन हे, काहेकि ऊ यहूदियन के सब्त के दिन के नियम के पालन नऽ करऽ हथन।” कुछ दोसरा फरीसियन कहलन, “सच में कोई पापी अादमी अईसन चमत्कार के चिन्हासी के नऽ कर सकलन हे जे ई अादमी करऽ हथन!” येहिगुने ऊ फरीसी एकर बारे में कि यीशु कौन हलन एक-दोसरा से असहमत हो गेलन।17येहिगुने फरीसियन ऊ आंधर अादमी से एक बेरा फिन पूछलन, “ऊ अादमी के बारे में तूँ का कहऽ हऽ, कि तूँ कहऽ हऽ कि ओही हथन जे तोरा देख पावे में सक्षम करलन?” ऊ अादमी कहलन, “ऊ जरुर एगो भविष्यद्वक्ता हथन।”18काहेकि ऊ अादमी ई विश्वास करलन कि यीशु एगो भविष्यद्वक्ता हथन, येहिगुने यहूदी अगुवन विश्वास नऽ करलन कि ई अादमी आंधर हलक आउर फिन देखे जुकुर हो गेलक जब ला कि ओखनी ऊ अादमी के माय-बाप के बोला नऽ लेलन ताकि ओकरा से सवाल करतन।19ओखनी ऊ अादमी के माय-बाप से पूछलन, “का ई अादमी तोर बेटा हे? का तूँ ई कहऽ हऽ कि जहिया ई जनम लेलक हल तऽ ई आंधर हल? जदि अईसन हे तऽ, फिन ई देख पावे के काबिल सक्षम कईसे हे?”20ओकर माय-बाप जबाब देलन, “हम जानऽ कि ई अादमी हमरे बेटा हे। हम एहु जानऽ ही कि जहिया ई जनम लेलक हल तऽ ई आंधर हलक।21तईयो, हम नऽ जानऽ ही कि ई घड़ी ऊ देख पावे के काबिल कईसे हे। हम एहु नऽ जानऽ ही कि ओकरा देख पावे के काबिल में कौन बनईलन। ओकरे से पूछऽ। ऊ अपन बारे में बोले लागी सरेख हे।”22यहूदी अगुवन पहिलहीं से अपने में ई बात के सहमति बना लेलन हल कि जे भी ई ऐलान करतन कि यीशु हीं मसीह हथन तऽ ऊ उनका यहूदी आराधनालय से निकास देतन। एही चलते, ऊ अादमी के माय-बाप उनका से डेरायेल हलन आउर उनका से ई बात के बोललन हल।23एही चलते ओखनी यहूदी अगुवन से कहलन हल कि “ओकरे से पूछऽ ऊ होशियार हे।”24येहिगुने यहूदी अगुवन दोसरका बेरा ऊ अादमी के बोलईलन जे पहिले आंधर हलक। ओखनी उनका से कहलन, “परमेश्वर के सामने खाली सच कहे के चलते परमेश्वर के महिमा करऽ! हमरा खुद विश्वास हे कि ऊ अादमी जेकरा लागी तूँ कहऽ हऽ कि ऊ तोरा चंगा करलन पापी हथन।”25ऊ अादमी जेकरा यीशु चंगा करलन हल जबाब देलक, “हम नऽ जानऽ ही कि ऊ पापी हथन कि नऽ। हम तऽ एगो बात जानऽ ही जे ई हे कि हम पहिले आंधर हली, बाकि अखनी हम देख सकली हे।”26फिन ओखनी उनका से पूछलन, “ऊ तोर चंगा करे लागी तोर साथ कौची करलन? ऊ तोरा देख पावे के काबिल कईसे बनईलन?”27ऊ जबाब देलक, “हम तोहनी के पहिलहीं ऊ सवाल के जबाब दे देली हे, बाकि जे हम कहली तोहनी ऊ सुनलऽ नऽ। तोहनी काहे चाहऽ हऽ कि हम तोहनी के फिन से बताऊँ? का अईसन हो सकऽ हे कि तोहूँ उनकर चेला बने ला चाहऽ हऽ?”28तऽ ओखनी बेईज्जती भरल तरीका से ओकरा से कहलन: “तूँही ऊ अादमी के चेला हऽ! जहाँ ला हमर बात हे, हम मूसा के चेला ही!29हम जानऽ कि परमेश्वर बड़ी समय पहिले मूसा से बात करलन। जहाँ ला ई अादमी के बात हे, तऽ हम जानबो नऽ करऽ ही कि ऊ कहाँ से अईलन हे!”30ऊ अादमी जबाब देलक, “हमरा अचरज हे! तोहनी जानबो नऽ करऽ हऽ कि ऊ कहाँ से अईलन हे, बाकि ओही तऽ हथन जे हमरा देख पावे जुकुर बनईलन!31हम जानऽ ही कि परमेश्वर पापी लोगवन के प्रार्थना के जबाब नऽ दे हथन बजाय एकर, ऊ, ऊ लोगवन के प्रार्थना के जबाब दे हथन जे उनकर आराधना करऽ हथन आउर जे ओही करऽ हथन जे ऊ चाहऽ हथन कि ऊ करतन।32दुनियाँ के शुरुआत से पहिले ई कहियो कोई भी नऽ सुनलक कि कोई आदमी अईसन अादमी के देख पावे के जुकुर बनईलन जे जहिया जलमलन हल तहिये से आंधर हल!33जदि ई अादमी परमेश्वर भीर से नऽ अईलन होत, तऽ ऊ अईसन चमत्कार नऽ कर सकलन हल!”34यहूदी अगुवन ओकरा जबाब देलन, “तूँ पूरा तरह से अपन माय-बाप के पापवन के चलते आंधर जलमलऽ हल! तोरा हमरा सिखावे के हिम्मत कईसे होल!” तऽ ओखनी ओकरा यहूदी सभास्थल जायला रोक लगा देलन।35यीशु सुनलन कि यहूदी अगुवन ऊ अादमी के यहूदी सभास्थल जाय से मानऽ कर देलन जिनका ऊ चंगा करलन हल। जखनी ऊ उनका खोज करलन आउर उनका खोज लेलन, तऽ ऊ उनका से पूछलन, “का तूँ आदमी के बेटा पर विश्वास करऽ हऽ?”36ऊ अादमी जबाब देलन, “हे महोदय, ऊ कौन हथन? कृपा कर के हमरा बता दऽ, ताकि हम उनका पर विश्वास करम।”37यीशु उनका से कहलन, “तूँ उनका पहिलहीं देख लऽ हे। हम ओही ही जे तोरा से बात कर रहली हे।”38ऊ अादमी कहलन, “हे प्रभु, हम विश्वास करऽ ही कि तूँही अादमी के बेटा हऽ।” तऽ ऊ अपन ठेहुनियाँ मार के झुक गेलन आउर यीशु के आराधना करलन।39यीशु कहलन, “हम ई संसार में येहिगुने अईली हे जेकरा से कि इनकर लोगवन के न्याय करूँ। एकर फल होत कि ऊ लोग जे जानऽ हथन कि ऊ परमेश्वर के सच के नऽ समझऽ हथन ऊ उनका अईसन समझऽ हथन जईसन कोई आंधर अादमी देख पावे लायक हो रहलन हे। दोसरा फल अईसन होत कि जे लोग सोचऽ हथन कि ऊ परमेश्वर के सच के समझऽ हथन ऊ उनका नऽ समझऽ हथन, जईसे ऊ अादमी जे देखऽ हथन आउर आंधर हो गेलन।”40कुछ फरीसियन जे यीशु भीर हलन जखनी उनका ई कहते सुनलन, तऽ ओखनी उनका से पूछलन, “का तूँ अईसन सोचऽ हऽ कि हमहूँ आंधर लोगवन के जईसन परमेश्वर के सच के नऽ समझ सकली हे?”41यीशु जबाब देलन, “जदि तूँ जानऽ हऽ कि तूँ आत्मिक रूप से आंधर हऽ, तऽ तूँ पाप लागी दोषी नऽ होवऽ। बाकि, काहेकि तूँ कोई देखे वाला के जईसन परमेश्वर के सच के समझे के दावा करऽ हऽ, तऽ तूँ अखनियो अपन पाप लागी दोषी हऽ।”
Bridge Connectivity Solutions Pvt. Ltd.