John10
1“हम तोरा से सच कह रहली हे: जे कोई भेड़शाला में सामने दुआरी के छोड़ के कोई दोसर राह से ढूक जा हे ऊ चोर चाहे डकैत हे जे भेड़वन के चोरावे ला अईलन हे।2जे अादमी भेड़शाला में दुआरी से होके ढूकऽ हे ऊ भेड़वन के चरवाहा हे जे देख-रेख करे वाला हे।3जखनी चरवाहा कहीं गेल हे तऽ ऊ अादमी जे दुआरी के सुरक्षा करे वाला हे जखनी ऊ आवऽ हे तऽ चरवाहा लागी दुआरी के खोल दे हे। भेड़वन चरवाहा के आवाज सुनऽ हे। ऊ भेड़वन में से सभे के जे उनकर हे नाम ले बोलावऽ हे आउर उनका दुआरी में से बाहरसी ले जा हे।4जखनी चरवाहा ऊ सभे भेड़वन के दुआरी से बाहरसी ले जा हे जौन उनकर हे, तऽ ऊ उनकर आगे-आगे चलऽ हे। उनकर भेड़वन पीछे-पीछे उनकर ओईसहीं करऽ हे काहेकि ऊ उनकर बोली के पछानऽ हे।5उनकर भेड़वन कहियो कोई अईसन अादमी के पीछे नऽ जा हे जिनका ऊ नऽ जानऽ हे। बजाय एकर, ऊ उनका भीर से भाग जईतक काहेकि ऊ ऊ लोगवन के बोली के नऽ पछानऽ हे जिनका ऊ जानऽ नऽ हे।”6यीशु चरवाहवन द्वारा करल जाय वाला काम से लेके ई दृष्टान्त फरीसियन के बतईलन। तईयो ऊ समझलन नऽ कि ऊ दृष्टान्त के कौची माने कि हल।7येहिसे यीशु उनका से फिन से कहलन, “हम तोरा से सच कह रहली हे: हम ऊ दुआरी ही जेकरा से होके भेड़वन भेड़शाला में जा हे।8सभे अगुवन जे हमरा से पहिले परमेश्वर के अधिकार के बेगर अईलन ऊ चोर आउर डाकू हलन। जबकि, सच्चा भेड़वन उनकर कहना नऽ मानलक। 9हम अपनहीं स्वर्ग के दुआरी ही। परमेश्वर ऊ अादमी के अनन्त सजा से बचईतन जे हमरा पर भरोसा कर के उनका भीर आवऽ हथन। जे कोई हमरा पर भरोसा करऽ हथन ऊ अईसन भेड़ के जईसन हथन जे छुटहा होके एन्ने-ओन्ने घूमऽ हे आउर खा हे। 10तोहनी के अगुवन चोरवन के जईसन हथन जे खाली भेड़वन के चोरावे ला, मारे ला, आउर नाश करे ला आवऽ हथन। हम भेड़वन के अनन्त जिनगी देवे ला अईली हे जे आशीष से भरल होत। 11हम खुद एगो बढ़ियाँ चरवाहा ही। निमन चरवाहा अपन भेड़वन के सुरक्षा से रखे ला आउर बचावे ला प्राण देवे ला मर तईयार रहऽ हथन, आउर ओईसहीं हमहूँ अपन चेलवन लागी प्राण देवे ला तईयार ही। 12सोचऽ कि कोई अादमी एगो अईसन अादमी के भाड़ा पर रखऽ हथन जे चरवाहा नऽ हे ऊ भेड़वन के रखवाली लागी जे ऊ अादमी के नऽ हे। तऽ जखनी ऊ भेड़वन के मार डाले ला लागी भेड़िया के अईते देखऽ हे, तऽ ऊ भेड़वन के छोड़ के भाग जा हे, जेकरा से कि भेड़िया ओकरा में से कुछ के पकड़ले हे आउर बाकि सभे के तित्तर-बित्तर कर दे हे।13ऊ भाड़ा पर रखल गेल अादमी येहिगुने भाग जा हे काहेकि ऊ भेड़वन के देख भाल खाली धन पावेला कर रहलन हल। येहिगुने भेड़वन के साथ जे होवऽ हे ऊ ओकर बारे में चिंता नऽ करऽ हे।14हम खुद एगो बढ़ियाँ चरवाहा ही। जईसे बढ़ियाँ चरवाहा अपन भेड़वन के जानऽ हथन आउर उनकर भेड़वन उनका जानऽ हे, ओईसहीं जे हमर हथन हम ओकरा जानऽ ही, आउर ऊ हमरा जानऽ हथन।15ओईसहीं हम एक-दोसरा के जानऽ ही जईसे हमर पिता आउर हम एक-दोसरा के जानऽ ही। हम ऊ भेड़वन के फईदा लागी जे हमर हे प्राण देवे ला भी तईयार ही।16अईसनो भेड़वन हे जे हमर हे बाकि दोसर भेड़शाला के हे ऊ अईसन हे जे यहूदी नऽ हथन। हमरा ओकरो भी अपना भीर ले आवेला हे। जे हम कहऽ ही ऊ ओकर जबाब देतन, आउर जे हमर हे ऊ सभे एक झुण्ड के जईसे एक जगह हो जईतन, आउर हम उनकर एक्केगो गो चरवाहा रहम। 17हमर पिता हमरा से येहिगुने प्रेम करऽ हथन काहेकि हम जिनगी देवे ला तईयार ही जेकरा से कि हम अपने आप के फिन से जिन्दा कर सकम।18कोई हमरा पर जानऽ देवे ला जोर जबरदस्ती नऽ कर रहलन हे। बजाय एकर, हम अपनहीं मरे के चुनाव करली हे हमरा भीर अपन इच्छा से मरे के अधिकार हे आउर हमरा भीर अपने आप के फिन से जिन्दा करहूँ के अधिकार भी हे। ई ओही काम हे जेकरा करे के आज्ञा हमरा हमर पिता देलन हे।”19जे यीशु कहलन हल ओकर बारे में यहूदी अगुवन विरोध करे वाला झुण्ड में फिन से बँट गेलन।20बड़ी सा यहूदी अगुवन कहलन, “उनका कोई दुष्टात्मा वश में कर रहल हे, आउर ऊ पागल हे! उनकर मत सुनऽ!”21कुछ दोसर लोगवन कहलन, “जे ऊ कह रहलन हे ऊ अईसन कुछ नऽ हे जे कोई दुष्टात्मा के वश में रहे वाला आदमी कहियो कहतन, पक्का कोई दुष्टात्मा हो सकऽ हे कोई आंधर अादमी के देख पावे के लायक नऽ बना सकऽ हे!”22फिन यरूशलेम में मन्दिर के बनावे के खुशी के परव के बखत आ गेल।23यीशु मन्दिर के अँगना में ऊ जगह में टहलते हलन जे सुलैमान के ओसारा कहलावऽ हल।24यहूदी अगुवा यीशु के चारो पट्टी जमा हो गेलन आउर कहलन, “तूँ हमरा कहिया ला हमर मन के ई बारे में अचरज में रखवऽ कि तूँ कौन हऽ? जदि तूँ हीं मसीह हऽ, तऽ साफ-साफ हमरा से कह दऽ जेकरा से कि हम जानऽ लेम।”25यीशु उनका जबाब देलन, “हम तोरा बता देली हल, बाकि तईयो तूँ हमरा पर विश्वास नऽ करऽ हऽ। जे चमत्कारी काम के हम अपन पिता के नाम से करऽ ही ओही गवाही बता देत जे तोरा हमरा बारे में जाने के जरुरत हे।26जबकि, तोहनी सभे अखनियो हमरा पर येहिगुने विश्वास नऽ करऽ हऽ काहेकि तोरा हमरा से लगावऽ नऽ हे। तूँ अईसन भेड़वन के जईसन हऽ जौन हमर झुण्ड में के नऽ हे।27जईसे भेड़वन अपन चरवाहा के कहना मानऽ हे, ओईसहीं जे हम कहऽ ही हमर लोग ओकर जबाब दे हथन। हम उनका जानऽ ही, आउर ऊ हमरे चेला हथन।28हम उनका हमेशा ला स्वर्ग में परमेश्वर के साथे जिनगी बितावे के काबिल बनावऽ ही। कोई भी ओकरा नाश नऽ कर सकतन, आउर कोई भी कहियो भी उनका हमरा भीर से नऽ ले जा सकतन।29हमर पिता उनका हमरा देलन हे। ऊ सभे से बढ़ के हथन, आउर कोई ओकरा उनका भीर से लेवे जुकुर नऽ हे।30हमर पिता आउर हम एक्केगो परमेश्वर ही।”31ऊ यहूदी विरोधी अगुवन फिन से पत्थर उठा लेलन ताकि उनका पर फेंकतन आउर उनका मार देतन।32यीशु उनका से कहलन, “तूँ हमरा ऊ बड़ी मनी चमत्कारी भलाई के कामवन के करते देख लऽ जेकरा हमर पिता हमरा करे ला कहलन हल। ओकरा में से केकरा चलते तूँ पत्थर से हमरा जानऽ मारे ला जा रहलऽ हे?”33ऊ यहूदी अगुवन जबाब देलन, “हम पत्थरवन से तोरा जानऽ अपमान करे लागी नऽ चाहऽ ही काहेकि तूँ भलाई के काम के करलऽ हल। बजाय एकर, हम तोरा जानऽ मारे ला येहिगुने चाहऽ ही काहेकि तूँ परमेश्वर होवे के दावा कर के परमेश्वर के अपमान करलऽ, जबकि तूँ तऽ एगो आदमी हऽ!” 34यीशु जबाब देलन, “व्यवस्था में एगो भविष्यद्वक्ता लिखलन कि परमेश्वर कहलन, हम कहली हल कि तूँ ईश्वर हऽ। 35जबकि परमेश्वर उनका बोलईलन जिनका ऊ ईश्वर कहलन आउर कोई ई साबित नऽ कर सकलन कि पवित्रशास्त्र झूठा हे,36तऽ तूँ काहे कहऽ हऽ कि हम परमेश्वर के निन्दा कर रहली हे काहेकि हम कहली कि परमेश्वर के बेटा ही? ऊ हमहीं ही जेकरा हमर पिता खास तौर से पवित्र ठहरा के चुनलन आउर ई संसार में भेजलन।37जदि हम ऊ चमत्कारी काम के नऽ कर रहली हे जेकरा हमर पिता चाहऽ हथन कि हम करूँ, तऽ फिन तोरा हमरा पर विश्वास नऽ करे के चाही।38जबकि, काहेकि हम ई चमत्कारी काम के कर रहली हे, तऽ भलहीं तूँ हमरा पर भरोसा नऽ कर हऽ, तऽ जे ई काम हमरा बारे में परकट करलन हे उनका पर तोरा विश्वास करे के चाही। तोरा ई येहिगुने करे के चाही जेकरा से कि सिखऽ आउर समझऽ कि हमर पिता आउर हम पूरा-पूरा एक्केगो ही।”39काहेकि ऊ ई बात के कहलन, येहिगुने यहूदी अगुवन फिन से यीशु के कैद करे के कोशिश करलन, बाकि ऊ उनका भीर से निकस गेलन।40तऽ यीशु यरदन नदी के पूरब दने पार चल गेलन। ऊ, ऊ जगह में गेलन जहाँ यूहन्ना बपतिस्मा देवे वाला अपन सेवकाई के शुरु में बपतिस्मा दे हलन। यीशु ऊहाँ कुछ समय ला रहलन।41बड़ी मनी लोग ऊहाँ यीशु भीर गेलन। ऊ कहलन, “यूहन्ना बपतिस्मा देवे वाला तऽ कहियो कोई चमत्कारी चिन्हासी परकट नऽ करलन, बाकि यूहन्ना जे कुछो ई अादमी के बारे में कहलन ऊ सच हे!” ऊ जगह में ढेरमनी लोगवन उनका पर भरोसा करलन।42ऊ जगह पर ढेरमनी लोग उनका पर विश्वास करलन।
Bridge Connectivity Solutions Pvt. Ltd.