John8
1फिन यीशु जैतून के पहाड़ पर गेलन आउर ऊ रात ऊहें बगल में रहलन।2बिहान होके भोरिये, यीशु मन्दिर के अँगना में गेलन आउर ढेरमनी लोग उनका भीर अईलन।3व्यवस्था के कुछ गुरु आउर फरीसी उनका भीर एगो औरत के ले अईलन। ओखनी ओकरा तखनी पकड़लन हल जखनी ऊ गलत काम कर रहल हल। ओखनी ऊ भीड़ में ओकरा खड़ा कर देलन।4याजक यीशु के परखे ला चाहऽ हलन ताकि उनका पर मूसा के व्यवस्था के तोड़े के बारे में सभे से ऊँचा यहूदी नियम कानून सभा के सामने दोष लगावे के जोग होतन। येहिगुने ओखनी उनका से कहलन, “हे गुरु जी, हमनी ई औरत के तखनी पकड़ली हे जखनी ऊ गलत काम व्यभिचार कर रहल हल, जे अपने आप में एगो घिनामन काम हे!5अखनी मूसा तऽ व्यवस्था में आज्ञा देलन हे कि हमनी के अईसन औरतियन के पत्थरवाह कर के मार देवे के चाही। तईयो, तूँ का कहऽ हऽ कि हमनी के का करे के चाही?” 6बाकि, यीशु मुड़ी गोत के नीचे झुकलन आउर अपन अँगुली से जमीन पर कुछो लिखे लगलन।7जखनी ऊ उनका से लगातार सवाल पूछतहीं रहलन, तऽ ऊ उठलन आउर उनका से कहलन, “तोहनी में से ऊ आदमी जे कहियो पाप नऽ करलन हे ओकरा पर पहिलका पत्थर मारतन आउर ओकरा जानऽ मारे में बाकि सभे के अगुवाई करतन!”8तऽ यीशु फिन से मुड़ी गोतलन आउर अपन अँगुली से जमीन पर लिखे लगलन।9उनकर शब्द सुनला के बाद, ऊ यहूदी अगुवन जे उनका से सवाल पूछ रहलन हल एक-एक कर के ऊहाँ से घँसकेला शुरु कर देलन। बूढ़वन पहिले घँसक गेलन आउर ओकर बाद जवान लोग। फिन ऊहाँ लोगवन के बीच में से ऊ औरत भीर खाली यीशु रह गेलन।10यीशु खड़ा होलन आउर ओकरा से पूछलन, “ओखनी सभे कहाँ हथन जे तोरा पर निन्दा कर रहलन हल? का कोई तोरा सजा देवे ला हलन सजा नऽ देलन?”11ऊ औरत जबाब देलक, “हे प्रभु, अईसन कोई नऽ हथन।” तऽ यीशु कहलन, “हमहूँ तोरा निन्दा करे ला नऽ चाहऽ ही। चल जा, आउर अब से अईसन पाप फिन मत करिहऽ!”12यीशु फिन से लोगवन से बात करलन। ऊ कहलन, “हम ओही ही जे संसार में रहे वाला लोगवन के परमेश्वर के अच्छा आउर सच्चा इंजोर दे ही। जे कोई हमर चेला बन जा हथन ऊ फिन कहियो पाप वाला अंधार में नऽ चलतन। बजाय एकर, ऊ अादमी के परमेश्वर के अच्छा आउर सच्चा इंजोर मिल जायेत जे अनन्त जिनगी दे हे।”13तऽ ऊ फरीसियन उनका से कहलन, “अपना बारे में खाली तूँही गवाह हऽ! बाकि मूसा के व्यवस्था के कम से कम दूगो गवाह जे जरुरत होवऽ हे, येहिगुने जे तूँ कहऽ हऽ ऊ सच नऽ हो सकल हे!”14यीशु जबाब देलन, “ईहाँ ला कि जदि अपने बारे में खाली हमहीं गवाह ही, तऽ जे हम कहऽ ही ऊ अखनियो सच हे काहेकि हम जानऽ ही कि हम कहाँ से आवऽ ही आउर हम जानऽ ही कि हम कहाँ जा रहली हे। तईयो तूँ नऽ जानऽ हऽ कि हम कहाँ से अईली हे आउर तूँ नऽ जानऽ हऽ कि हम कहाँ जा रहली हे।15आदमी के नाप तौल के मुताबिक तूँ आदमियन के इंसाफ करऽ हऽ। जबकि, हम ओईसे कर के हम कोई के न्याय करेलागी नऽ अईली हे।16ईहाँ ला कि जखनी हम लोगवन के न्याय करम, तऽ हम उनकर न्याय सच्चा मापदण्ड के मुताबिक करम, काहेकि हम लोगवन के न्याय अपने आप से नऽ करऽ ही। बजाय एकर, हम आउर हमर पिता जे हमरा भेजलन हे, एक साथ लोगवन के न्याय करम।17मूसा भी तोर व्यवस्था में लिखलन हे कि जखनी कम से कम दूगो गवाह एक्केगो बात के कहतन, तऽ जे ऊ कहऽ हथन ऊ सच हे। 18हम खुद के गवाह ही, बाकि हमर पिता जे हमरा भेजलन हे ओहू हमर गवाह हथन। येहिगुने, जे हम कहऽ ही ऊ सच हे।” 19काहेकि यीशु कहलन हल कि उनकर पिता उनका लागी गवाह हथन, येहिगुने फरीसियन उनका से पूछलन, “तोर पिता कहाँ हथन?” यीशु जबाब देलन, “तूँ हमरा नऽ जानऽ हऽ, आउर तूँ हमर पिता के भी नऽ जानऽ हऽ। जदि तूँ हमरा जानतऽ हल, तऽ तूँ हमर पिता के भी जानतऽ हल, बाकि तूँ हमरा नऽ जानऽ हऽ।”20अपन बारे में ई सभे बात ऊ तब कहलन जखनी ऊ मन्दिर के अँगना में सिखईते हलन। ऊ ई बात के मन्दिर के अँगना में ऊ जगह में कहलन जहाँ लोग धन के दान ले आवऽ हलन। कोई उनका नऽ पकड़लन, काहेकि अखनी ई उनकर मर जाय लागी सही बखत नऽ हल।21तऽ यीशु फिन से लोगवन के कहलन, “हम जा रहली हे, आउर तूँ हमरा खोज करवऽ, जबकि तूँ पाप से भरल रीति से हमरा इंकार करलऽ हे, येहिगुने परमेश्वर से अपन मांफी के बेगर ही तूँ मर जईवऽ। जहाँ हम जा रहली हे ऊ जगह में तूँ नऽ आ सकलऽ हे।”22तऽ ऊ यहूदी अगुवन अपने में कहलन, “जरुर ऊ अपने आप के मारे के योजना बना रहलन हे, आउर येहिगुने ओकर माने कि ई हे जखनी ऊ कहऽ हथन कि जहाँ ऊ जा रहलन हे ऊ जगह में हम नऽ आ सकली हे।”23यीशु उनका से कहलन, “तूँ नीचे ई धरती के हऽ, बाकि हम ऊपर स्वर्ग के ही। तूँ ई पापी संसार से माने कि रखऽ हऽ। हम ई पापी संसार से माने कि नऽ रखऽ ही।24एही चलते हम तोरा से कहली हल कि परमेश्वर के ऊ सभे पाप लागी जेकरा तूँ करलऽ हे अपन मांफ कईले बेगर तूँ मर जईवऽ। ई सच में होत जखनी तक कि तूँ विश्वास नऽ करवऽ कि हमहीं परमेश्वर ही, जईसे कि हम कहऽ ही कि हम ही।”25काहेकि ऊ अईसन कहलन हल, येहिगुने ओखनी उनका से पूछलन, “तूँ हऽ कौन?” यीशु जबाब देलन, “एही तऽ हम तोरा से एकदम शुरु से कह रहली हे!26हम तोरा बारे में ढेरमनी बात कह सकली हे आउर तोर न्याय कर सकली हे, बाकि ई घड़ी हम ऊ काम के नऽ करम बजाय एकर, हम संसार में रहे वाला लोगवन के खाली ओही बतायेम जे हम उनका से सुनली जे हमरा भेजलन हे। ऊ सभे घड़ी सच बोलऽ हथन।”27ऊ बुझ नऽ पईलन कि यीशु उनका स्वर्ग में विराजमान अपन पिता के बारे में कह रहलन हल।28येहिगुने यीशु उनका से कहलन, “जखनी हमरा मारे लागी तूँ हमरा, माने कि आदमी के बेटा के, ऊँचगर पर चढ़ईहऽ, तऽ तूँ जानऽ जईवऽ कि हमहीं परमेश्वर ही, आउर तूँ जानऽ जईवऽ कि हम अपन खुद के हक से कुछो नऽ करऽ ही। बजाय एकर, हम खाली ओही करऽ ही जे हमर पिता हमरा कहेला सिखईलन हे।29हमर पिता, जे हमरा भेजलन हे, सभे घड़ी हमरे साथ हथन। ऊ हमरा कहियो अकेले नऽ छोड़तन, काहेकि हम सभे घड़ी खाली ऊ काम के करऽ ही जेकरा से ऊ खुश होवऽ हथन।”30जखनी यीशु ई बात के कह रहलन हल, तऽ ढेरमनी लोगवन विश्वास करलन कि ओही मसीह हथन।31तऽ यीशु ऊ यहूदियन से जे विश्वास करलन हल कह देलन कि ओही मसीह हथन, “जदि तूँ उनकर मानवऽ जे हम सिखावऽ ही, तऽ तूँ हमर सच्चा चेला बनवऽ।32एकर अलावे, तूँ परमेश्वर के सच के जानवऽ, आउर ऊ सच पर विश्वास करे के चलते तोरा ओकरा से आजाद करतन जे तोरा दास बनईले हथन।”33ओखनी उनका जबाब देलन, “हमनी तऽ अब्राहम के खानदान ही। हमनी तऽ कहियो कोई के दास नऽ बनली हे! तऽ तूँ काहे कहऽ हऽ कि हमनी के आजाद होवे के जरुरत हे?”34यीशु जबाब देलन, “हम तोरा से सच कह रहली हे: सभे कोई जे पाप करऽ हथन ऊ अपन पापी मन से चलऽ हथन जईसे कोई दास अपन मालिक के द्वारा चलावल चलऽ हे।35दास अपन मालिक के घर के सदस्य के जईसे हमेशा ला बनल नऽ रहऽ हथन, बाकि शायद आजाद कर देवल जाय चाहे बेच देवल जाय। बाकि, एगो बेटा हीं हमेशा ला ऊ परिवार के सदस्य होवऽ हे। 36येहिगुने जदि बेटा तोरा पाप के गुलाम होवे से आजाद करऽ हथन, तऽ तूँ पूरा तरह पाप करे से दूर होवे में सक्षम हो पईवऽ।37हम जानऽ ही कि तूँ अब्राहम के शारीरिक खानदान हऽ। बाकि, तूँ हमरा मारे के कोशिश येहिगुने करऽ हऽ काहेकि तूँ ऊ बात पर विश्वास करे से नकारऽ हऽ जे हम कहऽ ही।38हम तोरा से ऊ बात के बारे में कह रहली हे जे हमरा हमर पिता देखईलन हे। येहिगुने, हम कहऽ ही कि तूँ ओही करऽ जे तोर पिता तोरा से करे लागी कहलन हे।” 39ओखनी उनका जबाब देलन, “हमर पिता अब्राहम हथन।” यीशु कहलन, “जदि तोहनी अब्राहम के कुल खानदान होतऽ हल, तऽ तोहनी ओही काम के कर रहलऽ होत जेकरा ऊ करलन हल।40हम तोरा ऊ सच्चा बात बता रहली हे जे परमेश्वर हमरा बतईलन हे, बाकि तूँ हमरा जानऽ मारे के कोशिश कर रहलऽ हे। अब्राहम अईसन कुछो नऽ करलन हल।41तूँ एकदम ओईसहीं काम के कर रहलऽ हे जईसे तोर आलसी पिता करलन हल।” ऊ उनका से कहलन, “हम व्यभिचार से जनम लेलक संतान नऽ ही, जईसे कि तूँ हऽ! हमर खाली एक्केगो गो पिता हथन, आउर ऊ परमेश्वर हथन।”42यीशु उनका से कहलन, “जदि परमेश्वर तोर पिता रहतन हल, जे हथन नऽ, तऽ तूँ हमरा से प्रेम करतऽ हल काहेकि हम उनके तरफ से अईली हे आउर हम ई संसार में अईली हे। ई येहिगुने सच हे काहेकि हम अपने आप के अधिकार से नऽ अईली हे। बजाय एकर, हम येहिगुने अईली काहेकि परमेश्वर हमरा भेजलन हे।43का तूँ जानऽ हऽ कि जे हम कहऽ ही तूँ ओकरा काहे नऽ समझऽ हऽ? अईसन येहिगुने हे काहेकि जे हम तोरा से कहली तूँ ओकरा मान नऽ हऽ आउर ओकरा पालन नऽ करऽ हऽ!44तूँ अपन पिता शैतान के तरफ से हऽ आउर तूँ ओही करे ला चाहऽ हऽ जे ऊ करऽ हथन। ऊ ओही घड़ी से लोगवन के जानऽ मारते हथन जखनी लोगवन पहिलका बेरा पाप करलन हल जे सच हे ओकरा ऊ येहिगुने नकार देलन, काहेकि ऊ कहियो ऊ सच बात के नऽ कहलन। जखनी कहियो ऊ झूठ बोलऽ हथन, तऽ ऊ ओही कर रहलन होत जे उनका लागी समझ के मुताबिक हे, काहेकि ऊ तऽ झूठा हथन। ईहाँ ला कि ऊ तऽ झूठ बोले के स्रोत हथन। 45अखनियो तूँ हमरा पर येहिगुने विश्वास नऽ करऽ हऽ, काहेकि हम तोरा ऊ बता देली हे जे सच हो!46बाकि हम कहियो पाप नऽ करली, येहिगुने तोहनी में से कोई भी साबित नऽ कर सकवऽ कि हम करली हे। बाकि जे सच हे हम तोरा ओही बतावऽ ही, येहिगुने अईसन कोई भी निमन वजह तोहनी भीर नऽ हो कि ओकरा पर विश्वास नऽ करवऽ जे हम कहऽ ही!47जे परमेश्वर से सम्बन्धित हे ऊ ओकरा सकार करऽ हथन आउर ओकर पालन करऽ हथन जे ऊ कहलन हे। बाकि ई सच हे, येहिगुने तूँ सकार नऽ करऽ हऽ आउर पालन नऽ करऽ हऽ जे परमेश्वर कहलन हे, काहेकि तूँ परमेश्वर से जुटल नऽ हऽ।”48यीशु के विरोध करे वाला यहूदियन उनका जबाब देलन, “हम सच में सही ही जखनी हम कहऽ ही कि तूँ सामरियन में एगो हऽ, जिनका से हम घिन मानऽ ही, आउर ई कि कोई दुष्टात्मा तोरा चला रहल हे!”49यीशु जबाब देलन, “हमरा कोई दुष्टात्मा नऽ चलावऽ हे! एकर उल्टा, हम स्वर्ग में विराजमान अपन पिता के इज्जत करऽ ही, आउर तूँ हमर अपमान करऽ हऽ!50हम लोगवन के पीछे पड़े के इच्छा नऽ करऽ ही कि ऊ हमर बड़ाई करतन। कोई आउर हथन जे अईसन करे ला चाहऽ हथन आउर न्याय करऽ हथन चाहे तूँ चाहे हम सच बोलऽ ही।51हम तोरा से सच कह रहली हे: जे कोई हमर शिक्षा के मानऽ हथन ऊ सच में अनन्तकाल तक नऽ मरतन!”52यीशु के विरोध करे वाला यहूदियन उनका से कहलन, “अखनी हम जानऽ गेली कि कोई दुष्टात्मा तोरा चला रहल हे! अब्राहम आउर भविष्यद्वक्ता तऽ बड़ी पहिलहीं मर गेलन! तईयो तूँ कहऽ हऽ कि जे कोई तोर शिक्षा के पालन करऽ हथन ऊ सच में अनन्तकाल तक नऽ मरतन!53तूँ सच में हमर पिता अब्राहम से बढ़ के नऽ हऽ! ऊ मर गेलन आउर सभे भविष्यद्वक्ता मर गेलन। येहिगुने तूँ का सोचऽ हऽ कि तूँ कौन हऽ?”54यीशु जबाब देलन, “जदि हम लोगवन के पीछे पड़म कि ऊ हमर बड़ाई करतन, तऽ ऊ बड़ाई बेकार होत। ऊ हमर पिता ही हथन जे हमर बड़ाई कर हथन। ओही हथन जिनका तूँ कहऽ हऽ कि ऊ तोर परमेश्वर हथन।55माने तूँ परमेश्वर के नऽ जानऽ हऽ, हम परमेश्वर के जानऽ ही। जदि हम कहम कि हम उनका नऽ जानऽ ही, तऽ तोरा में से सभे के सामने हमहूँ झूठा ठहरती हल। तोर उल्टा, हम उनका जानऽ ही, आउर जे ऊ कहऽ हथन हम सभे दिन ऊ बात के मानऽ ही।56तोर पिता अब्राहम ई सोच के एतना खुश हलन कि ऊ हमरा संसार में अईते देख पईतन। परमेश्वर उनका इजाजत देलन कि हमरा आवे के दिन अईते देखतन, आउर ऊ खुश हलन।”57काहेकि अईसन कहलन, येहिगुने उनकर विरोध करे वाला यहूदियन उनका से कहलन, “अब्राहम तऽ बड़ी पहिलहीं मर गेलन, आउर तूँ तऽ पचासो साल के भी नऽ हऽ! तऽ तूँ अब्राहम के कईसे देख लेलऽ?”58यीशु उनका से कहलन, “हम तोरा से सच कह रहली हे: अब्राहम के जनम लेवे से पहिले हम परमेश्वर हली!”59काहेकि ऊ परमेश्वर होवे के दावा कर रहलन हल, येहिगुने यीशु के विरोध करे वाला यहूदियन उनका मारे ला उनका पर बिगे लागी पत्थर उठा लेलन। बाकि यीशु भीड़ में लुक-छिप के मन्दिर के अँगना में से निकस गेलन।
Bridge Connectivity Solutions Pvt. Ltd.