John6
1ई बात के घटला के बाद, यीशु गलील के झील के ऊ पट्टी पार होके चल गेलन, जेकरा कुछ लोगवन तिबिरियास के झील भी कहऽ हथन।2एगो बड़का भीड़ ओकर पीछे येहिगुने हो लगे काहेकि ऊ ऊ सभे चिन्ह काम के देखलन हल जेकरा ऊ कर रहलन हल, माने कि, ऊ लोगवन के निमन करे ला हल जे बड़ी बेमार हलन।3यीशु एगो ऊँचगर पहाड़ पर चढ़ गेलन आउर ऊहाँ अपन चेलवन के साथ बईठ गेलन।4अखनी ऊ घड़ी यहूदियन के फसह के परव आवे वाला हल।5तऽ यीशु आँख उठईलन आउर देखलन कि लोग के एगो बड़का भीड़ उनकर दने आ रहल हल। ऊ फिलिप्पुस से पूछलन, “हमनी रोटी कहाँ से खरीदम जेकरा से कि ई सभे लोगवन के खिलायेम?”6ऊ फिलिप्पुस से ई सवाल ई ला पूछलन जेकरा से ओकर विश्वास के जाँच करतन, काहेकि यीशु पहिले से जानऽ हलन कि ऊ, ऊ परेशानी के बारे कौची करे जा रहलन हे।7फिलिप्पुस उनका जबाब देलन, “जदि हमनी भीर एतना दीनार रहत हल जेकरा कोई अादमी 200 दिन काम कर के कमा सकलन हे, तऽ ओहू ई भीड़ के सभे आदमी के खाय लागी एक कोर खायला देवे लागी रोटी खरीदे ला जादे दीनार नऽ होत।” 8उनकर एगो दोसर चेला, शमौन पतरस के भाई अन्द्रियास, यीशु से बोललन,9“ईहाँ एगो लईका हे जेकरा हीं जौ के पाँचगो रोटी आउर दूगो मछली हे। तईयो, ई तनिसा रोटी आउर मछली ई सभे लोगवन के खिलावे ला जादे नऽ हे!”10यीशु अपन चेलवन से बोललन लोगवन के जौर कर के बईठा दऽ। अईसे कर के लगभग पाँच हजार लोग बईठ गेलन। ऊहाँ ऊ जगह पर ओखनी के बईठे ला ढेरमनी घास हल।11तऽ यीशु ऊ जौ के छोटका रोटी के लेलन, आउर ऊ भोजन लागी परमेश्वर के धन्यवाद देलन। फिनो ऊ आउर उनकर चेलवन ऊ लोगवन के खाय लागी रोटी देलन जे घास पर बईठल हलन। ओईसहीं ऊ दूगो मछली के साथ भी करलन। लोगवन ओतना रोटी आउर मछली खईलन जेतना ओखनी खायला चाहऽ हलन।12जबकि सभे आदमी तबले खईलन जबले कि ओखनी छक नऽ गेलन, तऽ यीशु अपन सभे चेलवन से बचल, जे बेगर खायेल जौ के रोटी के टुकड़वन जमा करे ला बोललन ताकि ओकरा में से कुछो बर्बाद नऽ होवे।13अईसे कर के उनकर चेलवन ऊ टुकड़वन के जमा करलन, अाउर ओखनी ऊ टुकड़वन के जे चूरचार हल बारहगो बड़का गो दौरी भर लेलन जेकरा लोग ऊ जौ के पाँचगो छोटकन रोटियन में से बचा देलन हल।14एकर वजह, जखनी लोग ई चमत्कारी चिन्हासी के देखलन जे यीशु ओखनी के सामने करलन हल, तऽ ओखनी कहलन, “जरुर ई सच में ऊहें भविष्यद्वक्ता हथन जिनका दुनियाँ में भेजे ला परमेश्वर वादा करलन हल!”15जखनी यीशु जानऽ गेलन कि ई लोग ई लागी उनका पकड़े के योजना बना रहलन हल कि उनका राजा बनावे ला उनका पर जोर डालतन, तऽ ऊ फिनो से ओखनी के छोड़ के अकेले रहे ला पहाड़ी पर चल गेलन।16जखनी साँझ भेल, तऽ यीशु के चेलवन पहाड़ से उतर के झील भीर चल गेलन।17ओखनी नाव पर चढ़ गेलन आउर झील के दोसर तरफ कफरनहूम नगर जाय लागी जल के यात्रा शुरु करलन। आउर ऊ घड़ी ला अंधार हो चुकल हल, आउर यीशु अखनियो ला ओखनी बिजुन नऽ अईलन हल।18काहेकि हवा तेज चल रहल हल जेकरा से समुद्र बड़ी हिलोर मार रहल हल।19यीशु के चेलवन नाव के लगभग साढ़े चार से पाँच किलोमीटर दूर झील में खेब चुकला के बाद, ओखनी यीशु के पानी पर चलते आउर नाव भीर अईते देखलन। ओखनी डेरा गेलन हल!20यीशु ओखनी से बोललन, “ई हम ही, यीशु! डेराय ला बंद करऽ!”21ओखनी उनका नाव पर चढ़ा के बड़ी खुश हलन। जईसहीं ऊ ओखनी साथ नाव पर चढ़लन, ओखनी के नाव ऊ जगह पहुँच गेल जहाँ ओखनी जा रहलन हल।22यीशु भीड़ के खिलावे के दोसरका दिन, लोगवन के भीड़ के जे झील के दोसर दने रुक गेल हल पता होल कि ऊहाँ एक दिन पहिले खाली एक्केगो नाव हल। ओखनी के एहु पता चलल कि यीशु अपन चेलवन के साथ नाव पर नऽ गेलन हल।23दोसरकन नाव पर तिबिरियास नगर से लोग अईलन हल। ओखनी अपन नाव के ऊ जगह पर रखले हलन जहाँ एकरा से प्रभु यीशु परमेश्वर के धन्यवाद करे के बाद भीड़ रोटी खईलन हल।24येहिगुने जखनी भीड़ के पता चल गेल कि ऊहाँ नऽ तऽ यीशु नऽ उनकर चेलवन हल, तऽ ओखनी ऊ नाव पर चढ़ गेल आउर यीशु के खोजे ला कफरनहूम नगर दने जलयात्रा करलन।25ऊ भीड़ के यीशु कफरनहूम गलील के झील के ऊ तरफ मिललन जे ओकर उल्टा तरफ हे जहाँ ऊ ओखनी के रोटी खिलईलन हल ओखनी उनका से पूछलन, “हे गुरु हम जानऽ ही कि तूँ कोई नाव से तऽ अईलऽ नऽ हे तऽ तूँ ईहाँ कफरनहूम में कखनी पहुँचलऽ?”26यीशु जबाब देलन, “हम तोरा से सच कह रहली हे कि तोहनी हमरा ई ला नऽ खोज रहलऽ हे काहेकि तोहनी ऊ चिन्ह के कामवन के देख लऽ हे जे हम करली हे। बजाय एकर, तोहनी खाली हमरा ई लागी खोज रहलऽ हे काहेकि तोहनी तब ला खईलऽ हल जखनी ला तोहनी छक नऽ गेलऽ हल जे हम तोहनी के देली हल।27अईसन खाना ला काम करेलागी बंद करऽ जे तुरन्त सड़ गल जईतक! बजाय एकर, अईसन खाना लागी काम करऽ जे स्वर्ग में हमेशा ला जिनगी ले आवे! ऊ भोजन अईसन रोटी हे जे हम, माने कि आदमी के बेटा, तोहनी के देम। खाली हमहीं तोहनी के ई दे सकली हे काहेकि परमेश्वर हमर पिता ओही पर छाप करऽ लगा देलन हे।”28तऽ भीड़ यीशु से पूछलन, “परमेश्वर के खुश करे ला हमनी के कौन काम करे के चाही?”29यीशु ओखनी के जबाब देलन, “जे काम परमेश्वर चाहऽ हथन कि तूँ करऽ ऊ ई हे: हमरा पर विश्वास करऽ, माने कि उनका पर जेकरा ऊ भेजलन हे।”30भीड़ उनका से पूछलक, “फिनो तूँ कौन चिन्ह करवऽ जेकरा से हमनी ओकरा देखम आउर तोरा पर विश्वास करम? तूँ हमनी लागी कौची करवऽ?31हमनी के पुरखावन जंगल में मन्ना खईलन जखनी ओखनी मूसा के साथ भटक रहलन हल जईसन कि भविष्यद्वक्तावन शास्त्र में लिखलन हे: परमेश्वर ओखनी के खायला स्वर्ग से रोटी देलन।” 32यीशु ओखनी के जबाब देलन, “हम तोरा से सच कह रहली हे, ऊ मूसा नऽ हलन जे तोहनी के पुरखावन के स्वर्ग से ऊ रोटी देलन हल। नऽ, ऊ तऽ हमर पिता हलन, जे अखनी तोहनी के स्वर्ग से सच्चा रोटी दे रहलन हे।33ई येहिगुने सच हे काहेकि परमेश्वर के तरफ से सच्चा रोटी स्वर्ग से उतरल हे आउर दुनियाँ के लोगवन के अनन्त जिनगी प्रदान करऽ हे।”34भीड़ के समझ में नऽ अईलक कि उनकर कहे के कौची माने हल येहिगुने ओखनी यीशु से पूछलन, “हे महोदय, दया कर के हर बखत हमनी के एही रोटी देते रहिहऽ।”35यीशु ऊ भीड़ से बोललन, “जईसे भोजन देह में जिनगी के बना के रखऽ हे हम ओही रोटी ही जे अनन्त जिनगी प्रदान करऽ हे। खाय आउर पिये के उल्टा, जे कोई हमरा पर विश्वास करऽ हे ऊ जरुर हमेशा लागी छकल रहतन।36तईयो, हम तोहनी के पहिलहीं से बता देली हे कि भलहीं तोहनी हमरा देखऽ हऽ, तोहनी अखनियो हमरा पर विश्वास नऽ करऽ हऽ।37ओखनी सभे लोग जिनका हमर पिता हमरा दे हथन ओखनी अईतन आउर हमर चेला बन जईतन आउर हम एकदम पक्का ओखनी में से कोई के कहियो भी नऽ निकासम।38हम अईसन कहियो येहिगुने नऽ करम काहेकि हम स्वर्ग से धरती पर ई ला नऽ अईली हे कि ऊ करम जे हम चाहऽ ही। बजाय एकर, हम नीचे एही ला अईली हे ताकि ऊ करम जे हमर पिता, जे हमरा भेजलन हे, चाहऽ हथन कि हम करूँ।39हमर पिता, जे हमरा भेजलन हे, ऊ ईहें चाहऽ हथन: ऊ हमरा से चाहऽ हथन ऊ सभे के सुरक्षा करे ला जेखनी के ऊ हमरा देलन हे। ऊ एहु चाहऽ हथन कि अंतिम दिन इनकनी में के हम फिन से जिन्दा करम जहिया हम सभे के न्याय करम।40ई येहिगुने सच हे काहेकि एहु हे जे हमर पिता चाहऽ हथन, आउर ऊ चाहऽ हथन कि जे पछानऽ हथन कि हम, माने कि बेटा, कौन ही, अाउर हमरा पर विश्वास करऽ हथन तऽ ऊ सभे कोई हमर साथ स्वर्ग में हमेशा ला जिन्दा रहतन। हम एखनी के अंतिम दिन में फिनो से जिन्दा कर देम जहिया हम सभे के न्याय करम।”41तऽ यहूदी अगुवन यीशु के बारे में बुदबुदाय ला शुरु कर देलन, काहेकि ऊ कहलन हल कि सच्चा रोटी ऊहें हथन जे स्वर्ग से उतरल हल।42ओखनी एक दोसरा से कहलन, “ई तऽ खाली यूसुफ के बेटा, यीशु हथन! हम जानऽ ही कि एकर माय-बाप कौन हथन। हो सकल हे ऊ स्वर्ग से नऽ उतर सकलन हे जईसन ऊ दावा करऽ हथन!”43यीशु ओखनी के जबाब देलन, “जे हम अखनी कहली ओकरा बारे में आपस में बुदबुदाय ला बंद करऽ।44खाली ऊहें जेकरा हमर पिता, जे हमरा भेजलन हे, आवे लागी आउर हमर चेला बने लागी प्रेरित करऽ हे अईसन करे जुकुर होवऽ हथन। हम खुद ही ऊ लोगवन के जे हमरा भीर आवऽ हथन अंतिम दिन में फिनो से जिन्दा कर देम जहिया हम सभे के न्याय करम।”45भविष्यद्वक्तावन लिखलन हल कि परमेश्वर सभे लोग के शिक्षा देतन। सभे कोई जे उनकर सुनऽ हथन अाउर हमर पिता से सिखऽ हथन ऊ अईतन आउर हमर चेला बनतन। 46हमर अलावे कोई भी परमेश्वर हमर पिता के नऽ देखलन हे। हमहीं ही जे परमेश्वर भीर से अईली हे। खाली हमहीं उनका देखली हे।47हम तोरा से सच कह रहली हे: कि जे कोई हमरा पर विश्वास करऽ हथन ऊ हमर साथ स्वर्ग में हमेशा ला जिन्दा रहतन।48ऊ सच्चा रोटी हम ही जे अनन्त जिनगी दे ही।49तोहनी के पुरखावन मूसा के साथ जंगल में भटकते मन्ना खयलन बाकि तईयो मर गेलन।50बाकि ई रोटी जेकरा बारे में हम बात कर रहली हे स्वर्ग से उतरल हे ताकि जे कोई ओकरा खाय आउर ऊ आदमी के आत्मा कहियो नऽ मरतक।51ई रोटी जे अनन्त जिनगी प्रदान करऽ हे आउर स्वर्ग से उतरल हे सचमुच में हमहीं ही। “जे कोई भी ई रोटी के खईतन ऊ हमरा साथ स्वर्ग में हमेशा ला जिन्दा रहतन। हमर देह भी ई रोटी हे। ई संसार में रहे वाला सभे कोई के अनन्त जिनगी ला हम अपन देह के त्याग कर देम।”52तऽ यहूदी अगुवन एक दोसर से बहस करे ला शुरु कर देलन। ओखनी कहलन, “ई आदमी सचमुच में अपन देह हमनी के नऽ दे सकलन हे ताकि हमनी ओकरा खायेम!”53येहिगुने यीशु ओखनी के बता देलन: “हम तोरा से सच कह रहली हे: तोहनी के हमरा, माने कि आदमी के बेटा के मांस खाय के चाही आउर हमर लहू पिये के चाही। जदि तोहनी ई कामवन के नऽ कर हऽ तऽ तोहनी के अनन्त जिनगी कहियो नऽ मिलत।54जे कोई भी हमर मांस खा हथन आउर हमर लहू पियऽ हथन ऊ हमर साथ स्वर्ग में हमेशा ला जिन्दा रहतन। हम भी ऊ आदमी के अंतिम दिन में फिनो से जिन्दा कर देम जहिया हम सभे के न्याय करम।55अईसन येहिगुने हे काहेकि हमर मांस सच्चा आत्मिक भोजन हे आउर हमर लहू सच्चा आत्मिक पिये के चीज हे।56जे हमर मांस खा हथन आउर हमर लहू पियऽ हथन ओखनी हमरा साथ जुड़ल रहतन, आउर हम ओखनी साथ जुड़ल रहम।57हमर पिता सभे के जिन्दा रख हथन। ओही हमरा ईहाँ भेजलन हे, आउर हम लोगवन के येहिगुने जिन्दा कर सकली हे काहेकि ऊ हमरा अईसन करे ला शक्ति देलन हे। एही तरीका से, जे हमरा से खा हथन ओखनी हमेशा ला ओकर वजह से जे हम ओखनी ला करम जिन्दा रहतन।58ऊ रोटी हम ही जे स्वर्ग से उतरल हे। ई रोटी ऊ रोटी के जईसन नऽ हे जेकरा इस्राएलियन के पुरखावन जंगल में खईलन हल बाकि अन्त में मर गेलन। जे कोई हमरा खा हथन माने कि ई रोटी के ऊ हमरा साथ स्वर्ग में हमेशा ला जिन्दा रहतन।”59यीशु ई कहावत यहूदी अगुवन से आराधनालय में कहलन हल जौन घड़ी ऊ कफरनहूम नगर में शिक्षा दे रहलन हल।60जे ऊ कहलन हल ओखनी सुनलन ओकर बाद, यीशु के बड़ी सा चेलवन कहलन, “जे ऊ सिखा रहलन हे ओकरा माने ला मुश्किल हे। सच में कोई भी एकरा मान नऽ सकलन हे!”61जबकि कोई भी उनका से नऽ कहलन, यीशु जानऽ हलन कि ओकर चेलवन बुदबुदा रहलन हल जे ऊ कहलन हल येहिगुने ऊ ओखनी से पूछलन, “का हमर शिक्षा से तोहनी के चोट लगल हे?62जदि ई शिक्षा से तोहनी के चोट लगल तऽ जदि तोहनी हमरा, माने कि माने कि आदमी के बेटा के स्वर्ग पर चढ़ते देखवऽ जहाँ हम पहिले हली तखनियो तोहनी के चोट लगत, 63खाली परमेश्वर के आत्मा ही हथन जे केकरो भी अनन्त जिनगी दे सकलन हे। ई मामला में देह के स्वभाव बेकार हे। जे बात हम तोहनी के सिखईली हे ऊ पवित्र आत्मा के तरफ से हे आउर अनन्त जिनगी प्रदान करऽ हे।64तईयो तोहनी में से कुछ ऊ बात पर विश्वास नऽ करऽ हथन जे हम कहली हे यीशु ई येहिगुने बोललन काहेकि जौन समय से ऊ अपन काम शुरु करलन हल तहिया से ऊ जानऽ हलन कि कौन ओकरा पर विश्वास नऽ करतन आउर कौन अन्त में उनका धोखा देतन।65फिनो यीशु कहलन, काहेकि तोहनी में से कुछ हमरा पर विश्वास नऽ करऽ हऽ, हम तोहनी के पहिलहीं बता देली हल कि जेकरा परमेश्वर पिता आवेला आउर हमर चेला बने ला शक्ति प्रदान करलन हे खाली ओही अईसन करे में सक्षम होतन।”66यीशु के ई बात के कहला के बाद, उनकर बड़ी सा चेला उनका से मिले से पहिले जे ओखनी कर रहलन हल ऊहें करे ला घूर के वापस चल गेलन आउर उनकर चेला बने ला छोड़ देलन।67काहेकि बड़ी सा उनका छोड़ देलन येहिगुने यीशु अपन बारहो चेलवन से पूछलन, “जरुर तोहनियो भी हमरा के छोड़े ला नऽ चाहऽ होतऽ, का अईसन चाहऽ हऽ?”68शमौन पतरस जबाब देलन, “हे प्रभु, जदि हमनी तोरा छोड़ देम, तऽ अईसन कोई भी नऽ हथन जिनका भीर हमनी जा सकम! खाली तूँही ऊ उपदेश सिखावऽ हऽ जे हमनी के स्वर्ग में हमेशा के जिनगी जिये ला इजाजत प्रदान कर हे!69हमनी तोरा पर विश्वास करऽ ही, आउर जरुर हमनी जानऽ ही कि तूँ ऊ पवित्र जन हऽ जे परमेश्वर के तरफ से अईलऽ हे!”70यीशु ओखनी के जबाब देलन, “जरुर हम तोहनी बारहगो चेला चुनली हे, बाकि तोहनी में से एगो शैतान के वश में हे!”71जखनी यीशु ई कहलन तऽ ऊ शमौन इस्करियोती के बेटा, यहूदा के बारे में बात कर रहलन हल, काहेकि बारहो चेलवन में से ऊहें एगो हल जे बाद में यीशु के धोखा देत।
Bridge Connectivity Solutions Pvt. Ltd.