John20
1एतवार के बिहने भोरिये, जबकि अखनी अंधारे हल, मरियम मगदलीनी कब्र पर अईलन जहाँ ओखनी यीशु के गाड़लन हल। ऊ देखलन कि कोई कब्र में घूँसे वाला दुआरी से पत्थर के हटा देलन हल।2येहिगुने ऊ ओन्ने धौगल जन्ने शमौन पतरस आउर दोसरा चेला, यूहन्ना, जिनका से यीशु प्रेम करऽ हलन, रहऽ हलन ऊ उनका बतईलन, “कुछ लोगवन प्रभु के लाश के कब्र में हटा देलन हे, आउर हम नऽ जानऽ कि ओखनी उनका कहाँ रखलन हे!”3जखनी ओखनी ई सुनलन, तऽ पतरस आउर यूहन्ना दूनो चेलवन जहाँ पर रहऽ हलन ऊहाँ से निकस के कब्र पर गेलन।4ऊ दूनो धौग रहलन हल, बाकि दोसरा चेला यूहन्ना पतरस से तेजी धौग के कब्र पर उनका से पहिले पहुँच गेलन।5जखनी यूहन्ना झुक के कब्र के भीतरे देखलन, तऽ ऊ सन के कपड़ा के ऊ पट्टी के जेकरा ओखनी यीशु के लाश के चारो बगल लपेटल हल ऊहाँ पड़ल देखलन जहाँ उनकर लाश रखल गेल हल, बाकि ऊ कब्र के भीतरे नऽ गेलन।6यूहन्ना के पीछे-पीछे शमौन पतरस धौग रहलन हल। ओहू ऊहाँ पहुँच गेलन आउर कब्र के भीतरे गेलन। ओहू सनी के कपड़ा के पट्टी के ऊहाँ पड़ल देखलन जहाँ यीशु के लाश रखल गेल हल।7पतरस ऊ कपड़ा के देखलन जेकरा कोई यीशु के माथा के चारो बगल लपेटल हल। ऊ सनी के कपड़ा के पट्टी के साथे नऽ पड़ल हल। एकर जगह पर, कोई ओकरा तह लगा के उनका से अलग कर देलन हल।8तऽ यूहन्ना, ओही दोसरका चेला जौन पतरस से पहिले कब्र पर पहुँच गेलन हल, ओहू भीतरे गेलन। ऊ ई चिजवन के देखलन आउर विश्वास करलन कि यीशु फिन से जिन्दा हो गेलन हे।9ऊ घड़ी तऽ ऊ नऽ समझलन जौन बात भविष्यद्वक्तावन ऊ पवित्रशास्त्र में लिखलन हल जे कहऽ हे कि यीशु के मरे ला हल आउर फिन से जिन्दा होवे ला हल।10फिन ऊ चेलवन ऊ जगह में चल गेलन जहाँ ऊ यरूशलेम में रह रहलन हल।11मरियम मगदलीनी कब्र के बाहरसी खड़ा होके रो रहलन हल। जौन घड़ी ऊ रो रहल हल, तऽ ऊ झुक के कब्र के भीतर देखलक।12ऊ, उजला कपड़ा पेहेनले दूगो स्वर्गदूत के देखलक। ऊ, ऊ जगह पर बईठल हलन जहाँ लोग यीशु के देह के रखलन हल। एगो स्वर्गदूत ऊ जगह पर बईठल हल जेज्जा यीशु के माथा हल। दोसरा स्वर्गदूत ऊ जगह में बईठल हल जहाँ यीशु के गोड़ हल।13ओखनी उनका से पूछलन, “हे महोदया, तूँ कहेला रो रहलऽ हे?” ऊ उनका से कहलन, “हम एही ला रो रहली हे काहेकि कुछ लोग हमर प्रभु यीशु के लाश के ई कब्र से हटा देलन हे, आउर हम नऽ जानऽ ही कि ओखनी उनका कहाँ रखलन हे!”14उनकर अईसन कहेला के बाद, ऊ घूम के कोई के ऊहाँ खड़ा देखलन। ऊ यीशु हलन, बाकि ऊ उनका पछान नऽ पईलन।15यीशु उनका से पूछलन, “हे नारी, तूँ काहे रो रहलऽ हे? तूँ केकरा खोज रहलऽ हे?” ऊ सोचलन कि जौन अादमी उनका से बात कर रहलन हे ऊ माली हे, येहिगुने ऊ उनका से बोललन, “हे महोदय, जदि तूँही यीशु के लाश के उठ के ले गेलऽ हे, तऽ हमरा बता दऽ कि तूँ उनका कहाँ रख लऽ हे। हम उनका ले जायेम आउर उनका फिन से गाड़ देम।”16यीशु ई कह के उनका उनकर नाम से पुकारलन, “हे मरियम!” ऊ फिन से उनका दने घूमलन आउर उनका से कहलन, “रब्बुनी!” जेकर मतलब यहूदी लोग के बोलल जाय वाला भाषा में “गुरु” होवऽ हे।17यीशु उनका से कहलन, “हमरा भीर आवे से रुक जा, काहेकि हम अखनी ला हमर पिता के साथे रहे लागी स्वर्ग नऽ गेली हे। हमर चेलवन भीर, आउर हमर भईवन भीर जा, आउर ओखनी के बतावऽ कि हमर परमेश्वर आउर पिता के जौरे रहे लागी स्वर्ग जाय वाला ही, जे तोहनियो के परमेश्वर आउर पिता हथन।”18मरियम मगदलीनी यीशु के चेलवन भीर गेलन आउर उनका बतईलन, “हम प्रभु यीशु के देखली हे!” ऊ उनका ओहू बतईलन जे यीशु उनका से बोललन हल।19ओही एतवार के दिन साँझ के, चेलवन ऊ जगह के दुआरी के बंद कईले हलन जहाँ ऊ रह रहलन हल, काहेकि ऊ यहूदी अगुवन से डेरायेल हलन। अचानक यीशु आ गेलन आउर उनकर बीच में खड़ा हो गेलन। ऊ उनका से कहलन, “परमेश्वर तोरा शान्ति देतन!” 20उनकर अईसन कहला के बाद, ऊ अपन चेलवन के ऊ घाव देखईलन जे उनकर दूनो हाथ में आउर पंजड़ा में हल। जखनी ओखनी प्रभु यीशु के देखलन तऽ ऊ बड़ी जादे खुश हो गेलन!21तऽ यीशु दोसरका बेरा उनका से बोललन, “परमेश्वर तोरा शान्ति देतन! हम तोरा संसार में भेज रहली हे जईसे हमर पिता हमरा भेजलन हल।”22उनकर अईसन कहला के बाद, यीशु उनका पर फूँकलन आउर कहलन, “पवित्र आत्मा लेलऽ।23जदि तूँ कोई के पाप के मांफ करवऽ, तऽ परमेश्वर भी ऊ अादमी के ऊ पापवन लागी मांफ कर देतन। जदि तूँ कोई के पापवन के मांफ नऽ करवऽ, तऽ परमेश्वर भी ऊ अादमी के ऊ पाप के मांफ नऽ करतन।”24बारहो चेला में से एगो, थोमा, जेकरा ओखनी जुड़वा कहऽ हलन, उनकर दोसरा चेलवन के बीच में जखनी ऊहाँ नऽ हलन जखनी यीशु उनकर बीच में हलन।25दोसरकन चेलवन थोमा के बतईलन, “कि हम प्रभु के देखली हे!” बाकि, ऊ उनका से कहलन, “हम तोरा पर तबहिये विश्वास करम जदि हम उनकर दूनो हाथ में छेद के देखम जौन काँटी से होल हल आउर अपन अँगुली ओकरा में डालम आउर जदि हम अपन हाथ उनकर बगल के घाव में डालम जे भाला से करल गेल हल।”26आठ दिन के बाद, यीशु के चेलवन फिन से घर के भीतरे हलन, आउर ई घड़ी थोमा उनकर जौरे हलन। बाकि ओखनी दुआरी के बंद कईले हलन, यीशु अईलन आउर उनकर बीच में खड़ा हो गेलन। आउर कहलन, “परमेश्वर तोहनी के शान्ति देतन!”27फिन ऊ थोमा से कहलन, “अपन अँगुली के ईहाँ ई छेद में डालऽ, आउर हमर हाथ के छेद के देखऽ, आउर अपन हाथ ईहाँ लाके हमर पंजड़ा के घाव में डालऽ! शंका करे ला बंद करऽ कि हम फिन से जिन्दा हो गेली हे एकर जगह पर अविश्वासी नऽ विश्वास करऽ कि ई सच हे!”28थोमा जबाब देलन, “तूँही हमर प्रभु, आउर हमर परमेश्वर हऽ!”29यीशु उनका से कहलन, “अखनी तूँ विश्वास करऽ हऽ कि हम फिन से जिन्दा हो गेली हे काहेकि तूँ हमरा देख लऽ हे। परमेश्वर सच में उनका आशीष देतन जे हमरा नऽ देखलन हे बाकि तईयो विश्वास करऽ हथन कि हम फिन से जिन्दा हो गेली हे”30ऊ घड़ी यीशु आउर भी बड़ी सा चिन्ह-चमत्कार के देखईलन जौन घड़ी उनकर चेलवन उनकर जौरे हलन, बाकि हम ओकर बारे में ई किताब में नऽ लिखली।31तईयो हम ई किताब में ऊ चिन्हमन के बारे में लिखली हे जेकरा से कि तूँ विश्वास करवऽ कि यीशु ही मसीह, माने कि परमेश्वर के बेटा हथन। हम ऊ बात के बारे में भी लिखली हे ताकि, यीशु ही मसीह हथन इनका पर विश्वास कर के, तोरा उनकर नाम के जरिये अनन्त जिनगी मिलत।
Bridge Connectivity Solutions Pvt. Ltd.