John19
1येहिगुने ऊ घड़ी पिलातुस अपन सिपाहियन के आज्ञा देलन कि यीशु के ले जईतन आउर सोंटा से उनकर पिटाय करतन।2सिपाहियन कुछ डँहुड़ियन भी ले लेलन जेकरा में काँटा हल आउर ओकरा एक जौरे बिन्ह देलन कि कोई मुकुट जईसन बन जाय। फिन ओखनी ओकरा यीशु के माथा पर धर देलन आउर उनका एगो बैंगनी कपड़ा पेहना देलन ताकि उनका मजाक बनईतन।3ऊ लगातार उनका भीर जा-जा के आउर ई कह-कह के उनकर मजाक करते रहलन, “हे यहूदियन के राजा, हम तोरा प्रणाम करऽ ही!” आउर उनकर मुँह पर तमाचा मारे लगलन।4पिलातुस फिन से बाहरसी अईलन आउर यहूदी अगुवन से कहलन, “देखऽ हम उनका तोहनी लागी बाहरसी लावे वाला ही ताकि तूँ जानऽ सकऽ कि हम अईसन के सबूत नऽ पईली कि ई अादमी कोई नियम तोड़लन हे।”5येहिगुने यीशु बाहरसी आ गेलन। ऊ कँटवन वाला डँहुड़ियन से बनल ऊ मुकुट आउर बैंगनी कपड़ा के पेहेनले हलन। पिलातुस यहूदी अगुवन से कहलन, “देखऽ ऊ अादमी ईहाँ हथन!”6जखनी शासकीय याजक आउर मन्दिर के पहरदार लोग यीशु के देखलन, तऽ ओखनी चिकरलन, “उनका क्रूस पर चढ़ाबऽ उनका क्रूस पर चढ़ाबऽ!” पिलातुस ओखनी से कहलन, “तूँ अपनहीं उनका ले जा आउर उनका क्रूस पर चढ़ा दऽ! जहाँ ला हमर बात हे, हम कोई सबूत नऽ पईली कि ई अादमी कोई नियम तोड़लन हे।”7यहूदी अगुवन पिलातुस के जबाब देलन, “हमर पक्का व्यवस्था हे जे कहऽ हे कि उनका मर जाय के चाही, काहेकि ऊ परमेश्वर के बेटा होवे के दावा करलन हल।” 8जखनी पिलातुस ई सुनलन, तऽ ऊ पहिले से भी जादे डेरा गेलन कि ओखनी के जौरे कौची घटित होत जदि ऊ यीशु के मारे के सजा देतन।9ऊ फिनो एक बेरा अपन मुख्यालय में घूँसलन आउर सिपाहियन के यीशु के पिछाड़ी दने से भीतरे ले आवे के आदेश देलन। तऽ ऊ यीशु से पूछलन, “तूँ कहाँ से अईलऽ हे?” जबकि, यीशु उनकर सवाल के जबाब नऽ देलन।10येहिगुने पिलातुस उनका से कहलन, “तोरा हमरा जबाब देवे के चाही! तूँ जरुर में जानऽ हऽ कि हमरा भीर तोरा आजाद करे के अक्तियार हे, आउर हमरा भीर तोरा क्रूस पर चढ़ावहूँ के अधिकार हे!”11यीशु उनका जबाब देलन, “जे एगो अधिकार तोरा भीर हमरा पर हे ऊ ओही अक्तियार हे जे तोरा परमेश्वर देलन हे। येहिगुने जे अादमी हमरा तोरा भीर ले अईलन हे ऊ जौन तूँ कर रहल हे ओकर बराबरी में औरो बुरा पाप के काम करलन हे।”12ओही घड़ी से, पिलातुस यीशु के आजाद करे के कोशिश करते रहलन। जबकि, यहूदी अगुवन हो-हल्ला मचावे लगलन, “जदि तूँ ई आदमी के छोड़ देवऽ, तऽ तूँ कैसर के दोस्त नऽ हऽ! जे कोई भी राजा होवे के दावा करऽ हे ऊ कैसर के विरोध करऽ हे।” 13येहिगुने जखनी पिलातुस ई सुनलन, तऽ ऊ यीशु के बाहरसी लावे लागी अपन सिपाहियन के आज्ञा देलन। फिन पिलातुस फईसला के ऐलान करे लागी ऊ न्याय-आसन पर बईठ गेलन जहाँ से ऊ साधारण तौर पर फईसला के ऐलान करऽ हलन। ई ऊ जगह हल जेकरा लोग “चबूतरा” कहऽ हलन, जे यहूदी लोग के बोलल जाय वाला भाषा में “गब्बता” हल।14अखनी ई फसह के परव से पहिलका दिन हल, जे कि ऊ दिन हल जहिया यहूदी लोग परव लागी तईयारी करऽ हलन। ई करीब लगभग दूपहर के बखत हलक। पिलातुस यहूदी अगुवन से कहलन, “देखऽ तोहनी के राजा ईहाँ हथन!”15ऊ चिकरलन, “ओकरा मार दऽ! ओकरा मार दऽ! ओकरा क्रूस पर चढ़ा दऽ!” पिलातुस ई कह के उनका अपमान करलन, “का तोर राजा के क्रूस पर चढ़ावे लागी हमरा अपन सिपाहियन के आज्ञा देवे के चाही?” शासकीय याजक जबाब देलन, “कैसर हीं हमर खाली एक्केगो राजा हथन!”16फिन, जे ओखनी कहलन हल ओकर चलते, पिलातुस यीशु के क्रूस पर चढ़ावे लागी अपन सिपाहियन के आज्ञा दे देलन। फिन ऊ सिपाहियन यीशु के ले गेलन ताकि उनका क्रूस पर चढ़ा देतन।17यीशु अपन क्रूस के खुद ही उठईले, ऊ जगह जाय लागी बाहरसी निकसलन जेकरा लोग “खोपड़ी के जगह” कहऽ हथन, जे यहूदियन के बोलल जाय वाला भाषा में “गुलगुता” हल।18ऊ जगह पर सिपाहियन उनका क्रूस पर चढ़ा देलन। ओखनी दूगो आउर दोसर आदमी के उनका जौरे क्रूस पर चढ़ईलन। यीशु के दूनो पट्टी एक-एक गो अादमी हल, येहिगुने यीशु ओखनी के बीच में हलन।19पिलातुस एगो सूचनापट्ट लिखे लागी कोई के आज्ञा देलन आउर ओकरा यीशु के क्रूस पर बाँध देलन। ऊ अादमी ओकरा पर लिखलन, “नासरत के यीशु नासरी यहूदियन के राजा।”20बड़ी सा यहूदी ऊ सूचनापट्ट के पढ़लन काहेकि जहाँ सिपाहियन यीशु के क्रूस पर चढ़ईलन हल ऊ जगह यरूशलेम शहर के नजदीक हल आउर काहेकि कोई सूचनापट्ट के तीन गो भाषा में लिखलन हल।21शासकीय यहूदी याजक पिलातुस भीर जा के कहलन, “तोरा ऊ सूचनापट्ट में ई नऽ लिखे के चाहऽ हल, यहूदियन के राजा। एकर जगह पर, तोरा लिखे ला चाहऽ हल, ‘ई आदमी कहलन हल कि ऊ यहूदियन के राजा हथन’।”22पिलातुस जबाब देलन, “जौन हम सूचनापट्ट में लिखे लागी सिपाहियन के आज्ञा देली हल ऊ ओही हे जे ओखनी लिखलन हे। हम एकरा नऽ बदलम।”23सिपाहियन द्वारा यीशु के क्रूस पर चढ़ा देला के बाद, ओखनी उनकर कपड़ा ले लेलन आउर ओकरा चार बराबर भाग में बाँट लेलन, माने कि सभे सिपाही लागी एगो भाग। बाकि, ओखनी उनकर कुरता के अलग रखलन। बिन्हे वाला ऊ कुरता के ऊपर से ले नीचे ला कपड़ा के एगो टुकड़ा से बिन्हलन हल जेकरा में कोई सिलाई नऽ हल।24येहिगुने सिपाहियन एक दोसर से कहलन, “आवऽ हम ई कुरता के नऽ फाड़म। एकरा से अच्छा कि, आवऽ हमनी जुआ खेल के जानम कि एकरा कौन रखतन आउर जीते वाला के एकरा दे देम।” ई येहिगुने होल ताकि पवित्रशास्त्र के ई बात पूरा होवे: “ओखनी हमर कपड़ा के अपने में बाँट लेलन। हमर कपड़ा लागी ओखनी जुआ खेललन।” एकरे चलते सिपाहियन ई काम के करलन। 25यीशु के माय, उनकर माय के बहिन, क्लोपास के मेहरारू मरियम, आउर मरियम मगदलीनी ई सभे ऊ क्रूस भीर खड़ा हलन जेकरा पर ऊ लटकल हलन।26जखनी यीशु अपन माय के ऊहाँ खड़ा होल देखलन आउर चेलवन यूहन्ना के जेकरा से यीशु प्रेम करऽ हलन उनका भीर खड़ा होल देखलन, तऽ ऊ अपन माय से कहलन, “हे माय, ईहाँ ऊ हथन जे तोहर देख-रेख ओईसहीं करतन जईसे कोई अपन बेटा करऽ हथन।”27फिन, ऊ यूहन्ना चेला से कहलन, “ईहाँ ऊ हथन जिनका देख-रेख तोरा अपन माय के जईसन करे ला हे!” ओही घड़ी, यूहन्ना उनका अपन घर में रहे ला ले गेलन।28थोड़ा देर के बाद, काहेकि यीशु जानऽ हलन कि ऊ सभे कुछ पहिलहीं से कर चुकलन हे जेकरा करेलागी परमेश्वर उनका भेजलन हल, आउर पवित्रशास्त्र के एगो आउर भविष्यद्वाणी के पूरा करेलागी ऊ कहलन, “हम पियासल ही!”29कोई ऊहाँ सिरका से भरल बरतन रखल हल आउर यीशु के पियास लगल हल येहिगुने सिपाहियन जूफा के पेड़ से सरकण्डा लेलन आउर ओकरा पर एगो पनसोख्ता रख देलन। तऽ ओखनी ऊ पनसोख्ता के सिरका में डूबईलन आउर ओकरा यीशु के मुँह भीर धर देलन। 30येहिगुने यीशु सिरका के पियलन आउर फिन कहलन, “हम ऊ सभे कुछ जे हम ईहाँ करे ला अईली हल पूरा कर लेली!” आउर ऊ मुड़ी गोतलन आउर अपन मरजी से प्राण देलन।31तऽ यहूदी अगुवन पिलातुस से विनती करलन कि अपन सिपाहियन के आज्ञा दऽ कि क्रूस पर लटकल तीनो आदमियन के गोड़ के तोड़ देऊँ जेकरा से ऊ अादमी आउर जल्दी से मर जईतन आउर उनकर लाश के उतार देतन ताकि यहूदी लोग के सब्त दिन में ऊ लाश क्रूस पर नऽ टंगल रहे। ओखनी ई विनती येहिगुने करलन काहेकि ई ऊ दिन हल जहिया यहूदी लोग फसह के परव लागी आउर विश्रामदिन ला तईयारी करऽ हलन आउर ऊ दिन में मरल देह के क्रूसवन पर छोड़ देवे से यहूदी व्यवस्था के उल्लंघन होवऽ हल बाकि बिहान होके विश्राम के दिन हल, येहिगुने ऊ एगो बड़ी बड़का खास दिन हलक। 32येहिगुने सिपाहियन अईलन आउर ऊ पहिलका अादमी के गोड़ तोड़ देलन, जेकरा यीशु के समय में हीं क्रूस पर चढ़ावल गेल हल। फिन ओखनी दोसरको अादमी के गोड़ के तोड़ देलन।33बाकि, जखनी ऊ यीशु भीर अईलन, तऽ ओखनी देखलन कि ऊ पहिले से ही मर गेलन हे। येहिगुने ओखनी उनकर गोड़ नऽ तोड़लन।34एकर चलते, सिपाहियन में से एगो यीशु के पंजड़ा में भाला भोंक देलन, आउर ओही घड़ी घाव में से लहू आउर पानी निकस पड़ल।35हम, यूहन्ना, ही ऊ अादमी ही जे ई घटना घटते देखली आउर एकर बारे में गवाही देली आउर जौन गवाही हम देली ऊ सच हे। हमरा पक्का लगऽ हे कि जौन हम कह रहली हे ऊ सच हे; हम येहिगुने कहऽ ही ताकि तोहूँ यीशु पर विश्वास करऽ।36यीशु के लाश के जौरे ई बात घटित होल जेकरा से कि पवित्रशास्त्र के ई भविष्यद्वाणी पूरा हो जाय: “कोई भी उनकर हड्डी में से एक्कोगो के नऽ तोड़ पईलन।” 37ओखनियो भी पवित्रशास्त्र के दोसरका भविष्यद्वाणी के पूरा करलन। ई कहऽ हे: “जिनका ओखनी छेदलन ओही अादमी पर ऊ नजर रखतन।” 38ई बात के होला के बाद, यूसुफ, सही रूप में अरमतिया शहर के रहे वाला अादमी हलन, पिलातुस से यीशु के लाश के उनका ले जाय के आज्ञा देवे लागी विनती करलन। ऊ अईसन येहिगुने करलन काहेकि ऊ यीशु के चेला हलन। बाकि, ऊ कोई के ई नऽ बतईलन हल, काहेकि ऊ दोसर यहूदी अगुवन से डेरा हलन। पिलातुस यूसुफ के यीशु के देह के दफनावे लागी ले जाय के आज्ञा दे देलन, येहिगुने यूसुफ जा के ओईसहीं करलन।39निकुदेमुस भी अईलन। ऊ ओही अादमी हलन जौन एक बेरा रात में अईलन हल आउर यीशु से बतियईलन हल। ऊ लोहबान आउर एलवा से बनल तीस किलोग्राम मसाला मिलावल ले अईलन ताकि यीशु के लाश के गाड़े लागी तईयारी करतन ऊ मसलवन के वजन लगभग 33 किलोग्राम हल।40चेलवन यीशु के लाश के ले मखमल के कपड़ा के पट्टी के उनकर चारो बगल लपेट देलन आउर लोहबान आउर एलवा के मसलवन के कपड़ा के पट्टी के तरे लगा देलन। ओखनी अईसन देह के गाड़े के यहूदी लोग के रिवाज के मुताबिक करलन।41जेज्जा सिपाही यीशु के क्रूस पर चढ़ईलन हल ऊहाँ ऊ जगह के बगल में एगो बगईचा हल। ऊ बगईचा में एगो नया बनावल गाड़ेला खोह हल। कोई भी अखनी ला ऊ कब्र में कोई के नऽ गाड़लन हल।42येहिगुने ओखनी यीशु के लाश के ओही कब्र में रख देलन काहेकि ऊ भीर में हल आउर काहेकि ऊ ओही दिन हलक जहिया यहूदी लोग फसह के परव लागी यहूदी लागी तईयारी के दिन हल येहिगुने उनका सूरज डूबे से पहिलहीं लाश के गाड़े पड़ल।
Bridge Connectivity Solutions Pvt. Ltd.