John18
1जब यीशु प्रार्थना करे ला खतम करलऽ के बाद, ऊ अपन चेलवन के जौरे किद्रोन पईन के पार चल गेलन। पईन के दोसर पट्टी ओखनी जैतून के पेड़वन के एगो बगईचा में घूँसलन।2ऊ यहूदा ही हल जे यीशु के विरोधियन के कैद करे में मदत करे वाला हल। ऊ, ऊ जगह के विरोधियन के उनका कैदी बनावे में मदत करे वाला हल। जहाँ यीशु हलन ऊ, ऊ जगह के जानऽ हल काहेकि यीशु अपन चेलवन के जौरे ऊहाँ जादेतर जा हलन।3येहिगुने रोमी सिपाहियन आउर मन्दिर के कुछ पहरदार लोग के झुण्ड के जेकरा शासन करे वाला याजकवन आउर फरीसियन के तरफ से भेजल गेल हल यहूदा बगईचा में ले अईलक। ओखनी भीर धधकल आग वाला मशाल, दीया आउर हथियार हल।4काहेकि यीशु जानऽ हलन कि उनका जौरे कौची घटित होवे जा रहल हे, येहिगुने ऊ आगे बढ़लन आउर सिपाहियन आउर मन्दिर के पहरदार लोग से पूछलन, “तूँ केकरा खोज रहलऽ हे?”5ओखनी उनका जबाब देलन, “नासरत के यीशु नासरी के।” यीशु ओखनी से बोललन, “हम ओही अादमी ही।” यहूदा उनका जौरहीं खड़ा हल। ओही हलक जे यीशु के विरोधियन के उनका कैद करवावे में मदत कर रहल हल।6जखनी यीशु उनका से कहलन, “हम ओही अादमी ही,” तऽ ऊ पीछे हट गेल आउर तुरन्त जमीन पर गिर गेल।7तऽ यीशु उनका से फिन से पूछलन, “तूँ केकरा खोज रहलऽ हे?” ओखनी जबाब देलन, “नासरत के यीशु नासरी के।”8यीशु जबाब देलन, “हम तोरा से कह देली कि हम ओही अादमी ही। जबकि हम ओही ही जेकरा तूँ खोज रहलऽ हे, तऽ ई आदमियन के जाय दऽ।”9ई येहिगुने घटित होल ताकि ऊ बात जे ऊ पिता से कहलन हल ऊ पूरा हो जाय: “जेकरा तूँ हमरा देलऽ हल ओकरा में से हम एक्कोगो के नऽ भूलईली।” 10शमौन पतरस भीर एगो तनिगो तलवार हल। ओकरा मियान में से ऊ ओकरा बाहरी निकासलन आउर ओकरा से महायाजक के सेवक पर चला देलन, आउर उनकर दहिना कान काट देलन। ऊ सेवक के नाम मलखुस हल।11तऽ यीशु पतरस से कहलन, “अपन तलवार के ओकर मियान में वापस रखऽ! हमरा पक्का ओईसहीं दुःख झेले ला जरुरी हे जेकरा से दुःख के प्याला झेले ला हमर पिता हमरा लागी योजना बनईलन हे!”12रोमी सिपाहियन के झुण्ड, यहूदी अगुवन के तरफ से आयेल उनकर अगुवन आउर मन्दिर के कुछ पहरदार लोग के साथे, यीशु के पकड़ लेलन आउर उनकर हाथ के बाँध देलन।13तऽ ऊ पहिले उनका हन्ना भीर ले गेलन, काहेकि ऊ कैफा के ससुर हलन, आउर कैफा ऊ साल के महायाजक हलन।14ऊ कैफा ही हलन जे दोसरा यहूदी अगुवन के सलाह देलन हल कि ई रोमियन के उनका मार देवे के बराबरी में लोगवन तरफ से एगो अादमी के मरे ला बड़ी बढ़ियाँ होत।15शमौन पतरस यीशु के पीछे-पीछे गेलन, आउर ओईसहीं एगो दोसरका चेला भी करलन। हन्ना महायाजक दोसरका चेला लोग के जानऽ हलन, येहिगुने जखनी सिपाहियन आउर पहरदारवन यीशु के ऊहाँ ले अईलन तऽ उनका महायाजक के अँगना में घूँसे देवल गेल।16जबकि, पतरस के बाहरसिये दुआरी भीर रुके पड़ल। येहिगुने, ऊ चेला जे महायाजक के जानऽ हलन फिन से बाहरसी गेलन आउर उदासी से बात करलन जे दुआरी के रखवाली कर रहलन हल। तऽ ओकरा पतरस के ले अँगना में आवे देवल गेल।17ऊ दासी जे दुआरी के रखवाली कर रहलन हल फिनो पतरस से कहलन, “तूँ जरुर ऊ अादमी के चेलवन में से एगो हऽ जेकरा ओखनी कैदी बनईलन हे!” ऊ जबाब देलन, “नऽ, हम नऽ ही!”18ई जाड़ा के बखत हल, येहिगुने महायाजक के सेवकवन आउर मन्दिर के पहरा देवेवालन आग लहकईले हलन आउर ओकर चारो बगल खड़ा होके अपने आप के गरम कर रहलन हल। पतरस ऊहाँ ओखनी जौरे खाड़ा होके अपने आप के गरम कर रहलन हल।19तऽ महायाजक यीशु से उनकर चेलवन के आउर ऊ उनका कौची उपदेश दे रहलन हल एकरा बारे में सवाल पूछलन।20यीशु उनका जबाब देलन, “हम संसार में सभे के सामने सभे अादमी से बात करली जौन सुनतन। हम हमेशा यहूदी आराधनालय आउर मन्दिर में उपदेश देली। हम ऊ जगहवनो में उपदेश देली जहाँ बड़ी मनी यहूदी जमा होवऽ हथन। हम कहियो कुछो भी लुका-छिपा के बात नऽ कहली।21तोरा हमरा से नऽ पूछे के चाही! ऊ लोगवन से पूछऽ जे ऊ सुनलन जे हम उनका सिखईली। ऊ सही में जानऽ हथन कि हम कौची कहली हल।”22यीशु के ई कहला के बाद, मन्दिर के पहरा देवेवालन में से एगो जे उनकरे भीर खड़ा हलन उनका थप्पड़ मारलन। ऊ कहलन, “तोरा महायाजक के अईसन जबाब नऽ देवे के चाही!” 23यीशु उनका जबाब देलन, “जदि जे हम कहली ऊ गलत हल तऽ हमरा गवाही दऽ कि ऊ का हल। जबकि, जदि जे हम कहली ऊ सही हल, तऽ तोरा हमरा थप्पड़ नऽ मारे के चाहऽ हल।”24तऽ हन्ना यीशु के कैफा, माने कि दोसरा महायाजक भीर भेज देलन, बाकि यीशु के हाथ अखनियो भी बाँधले हल।25एही बीच, शमौन पतरस अखनियो अँगना में खड़ा हलन आउर अपने आप के गरम कर रहलन हलन, तऽ कोई उनका से कहलन, “तोहूँ सच में ऊ अादमी के चेलवन में से एगो हऽ जेकरा ओखनी कैदी बनईलन हे!” पतरस नकार के कहलन, “नऽ हम नऽ ही!”26महायाजक के सेवकवन में से एगो ऊ अादमी के रिश्तेदार हल जेकरा पतरस कान काट देलन हल। ऊ पतरस से कहलन, “जरुर में हम तोरा जैतून के बगईचा में ऊ अादमी के जौरे देखली हल जेकरा ओखनी कैदी बनईलन हे!”27तऽ पतरस फिन से नकार देलन कि ऊ यीशु के साथे हलन उनका अईसन करलऽ के बाद तुरन्त एगो मुर्गा बाँग देलक।28तऽ यहूदी अगुवन यीशु के कैफा के घर से रोमी राजपाल, पिलातुस के महल में ले अईलन। ई बिहने भोर के बखत हल। यहूदी अगुवन पिलातुस के महल में नऽ घूँसलन काहेकि पिलातुस यहूदी नऽ हलन। ऊ सोचऽ हलन कि जदि ओखनी कोई गैर-यहूदी के घर में घूँस जईतन, तऽ ऊ खुद के असुद्ध हो जईतन आउर फसह के परव में भोज खाय के काबिल नऽ रहतन।29येहिगुने उनका से बात करे लागी पिलातुस बाहरसी अईलन। ऊ उनका से पूछलन, “तूँ ई अादमी पर कौची करे के इजलेम लगा रहलऽ हे?”30यहूदी अगुवन जबाब देलन, “जदि ई अादमी एगो अपराधी नऽ होत हल, तऽ हम उनका तोरा भीर ले नऽ अईती हल!”31येहिगुने पिलातुस उनका से बोललन, “तूँ अपनहीं उनका ले जा आउर अपन व्यवस्था से उनकर न्याय करऽ।” यहूदी अगुवन जबाब देलन, “हमनी उनका मार देवे ला चाहऽ ही, बाकि तोर रोमी नियम हमरा अईसन करे से रोकऽ हे काहेकि ई सही नऽ हे।”32अईसन येहिगुने घटना होल जेकरा से कि जे यीशु कहलन हल ऊ पूरा होवे कि ऊ जल्दिये कईसे मरतन।33तऽ पिलातुस अपन मुख्यालय में भीतरे चल गेलन। ऊ सिपाहियन के यीशु के उनका भीर लेके आवे के आज्ञा देलन, आउर ऊ उनका से पूछलन, “का तूँ यहूदियन के राजा हऽ?”34यीशु जबाब देलन, “का तूँ ई सवाल हमरा से येहिगुने लागी पूछ रहल हे काहेकि तूँ अपनहीं अईसन सोचऽ हऽ, कि दोसरा तोरा हमरा बारे में अईसन कहलन हे?”35पिलातुस जबाब देलन, “हम कोई यहूदी नऽ ही! तोरे देश में रहे वाला लोग आउर शासन करे वाला याजक तोरा हमरा भीर ले अईलन हे। तूँ कौची गलती करलऽ हे?”36यीशु जबाब देलन, “जौन राज पर हम शासन करऽ ही ऊ ई पापी संसार के नऽ हे। जदि अईसन होत हल, तऽ यहूदी अगुवन के हमरा कैदी बनावे से रोके लागी हमर सेवक झगड़तन हल। बाकि, जईसन कि ई हे, जौन राज पर हम शासन करऽ ही ऊ ई पापी संसार के नऽ हे।”37तऽ पिलातुस उनका से पूछलन, “तऽ तूँ एगो राजा हऽ?” यीशु जबाब देलन, “तूँ खुद ही अईसन कहलऽ हे, हम ई दुनियाँ में ई ला पईदा लेली: आउर हम येहिगुने अईली ताकि लोगवन के गवाही जे परमेश्वर के बारे में सच हे। सभे कोई जे उनका पर विश्वास करऽ हथन जे परमेश्वर के बारे में सच हे ऊ जे हम कहऽ ही ओकरा मान हथन आउर ओकरा पालन भी करऽ हथन।”38पिलातुस उनका से कहलन, “कोई नऽ जानऽ हथन कि हकीकत में सच कौची हे!” पिलातुस के अईसन कहला के बाद, ऊ बाहरसी चल गेलन आउर फिन से यहूदी अगुवन से बात करलन। ऊ उनका से कहलन, “हम अईसन कोई सबूत नऽ पईली कि ई अादमी कोई नियम तोड़लन हे।”39बाकि, तोहनी यहूदियन के एगो रिवाज के मुताबिक फसह के परव में हर साल तूँ हमरा से कहऽ, आउर हम तोहनी लागी कोई के आजाद कर देम जे जेल में हे। येहिगुने का तूँ हमरा से चाहऽ हऽ कि तोहनी लागी तोर राजा के आजाद कर देऊँ?40तऽ यहूदी अगुवन फिन हो-हल्ला करे लगलन, “नऽ ई अादमी के आजाद नऽ करऽ, बाकि बरअब्बा के आजाद करऽ!” बरअब्बा एगो क्रान्तिकारी हलन।
Bridge Connectivity Solutions Pvt. Ltd.