John15
1यीशु अपन चेलवन से कहलन, “हम एगो सच्चा दाखलता के जईसन ही जेकरा में फल लगऽ हे। हमर पिता एगो माली के जईसन हथन जे ओकर देख भाल करऽ हथन।2हमर पिता सभे ऊ डँहुड़ी के काट दे हथन आउर बिग दे हथन जे हमर भाग जईसन जना तऽ हे बाकि फल नऽ फरऽ हे। जहाँ ला ऊ डँहुड़ी के बात हे जे फल फरऽ हे, तऽ ऊ ओकरा छाँट कर के साफ करऽ हथन ताकि ऊ आउर भी जादे फल फरे।3तूँ ऊ डँहुड़ियन के जईसन हऽ जेकरा ऊ शिक्षा के चलते जे हम तोहरा पहिले बतईली हल छँटाई कर के पहिलहीं से शुद्ध कर देवल गेलऽ हे।4हमरा से जुड़ल रहऽ, आउर हम तोहरा से जुड़ल रहम। जईसे डँहुड़ियन जहिया ला कोई फल नऽ फल सकल हे तहिया ला ऊ दाखलता से जुड़ल नऽ रहतक, ओईसहीं तोहूँ तब ला आत्मिक फल नऽ फल सकलऽ हे जब ला कि तूँ हमरा से जुड़ल नऽ रहवऽ।5हम दाखलता के जईसन ही; तूँ डँहुड़ियन के जईसन हऽ। जदि तूँ हमरा से जुड़ल रहवऽ आउर हम तोहरा से जुड़ल रहम, तऽ तूँ ढेरमनी फल फरवऽ ई येहिगुने सच हे काहेकि तूँ हमरा बेगर मदत के कुछो नऽ कर सकलऽ हे।6जहाँ ला उनकर बात हे जे हमरा से जुड़ल नऽ रहतन, ऊ अादमी एगो अईसन डँहुड़ी के जईसन हथन जेकरा माली काट के बिग दे हथन। जखनी अईसन डँहुड़ियन सुख जा हे, तऽ माली के नौकर ओकरा उठ के आग में झोंक दे हथन आउर ओकरा जला दे हथन।7जदि तूँ हमरा से जुड़ल रहवऽ आउर जे वचन हम तोरा सिखईली ओकरा मानवऽ, तऽ तूँ परमेश्वर से कुछो भी माँग सकलऽ हे जे तूँ चाहऽ हऽ, आउर ऊ तोर माँग के मंजूर लेतन।8तूँ बड़ी सा फल पईदा कर के आउर हमर चेला बन के लोगवन के ई देखावऽ हऽ कि हमर पिता केतना महान हथन।9जईसे हमर पिता हमरा से प्रेम करलन ओईसहीं हमहूँ तोहरा से प्रेम करली। अखनी ओईसहीं जिनगी बीतईते रहऽ जे उनका लागी सही हे जिनका से हम प्रेम करऽ ही।10जे आज्ञा हम तोरा देली हे जदि तूँ ओकरा मानवऽ, तऽ तूँ ओईसहीं काम कर रहलऽ हे जे उनका लागी सही हे जिनका से हम प्रेम करऽ ही, जईसे कि हम ओकरा मानली जे हुकूम हमर पिता हमरा देलन हल, आउर हम ओही तरीका से काम करऽ ही जे ऊ अादमी लागी सही हे जेकरा से ऊ प्रेम करऽ हथन।11हम ई बात तोरा से ई लागी कहली कि तोहूँ ओतने खुश हो जा जेतना हम ही आउर जेकरा से कि तूँ जादे से जादे खुश रहऽ।12जे काम करे के आज्ञा हम तोरा दे रहली हे ऊ ई हे: जईसे हम तोरा से प्रेम करली ओईसहीं एक-दोसर से प्रेम करऽ।13ऊ आदमी से बढ़ के प्रेम कोई के नऽ जे अपन दोस्त लागी जिनगी देवे लागी भी तईयार हथन।14जौन बात के हम तोरा आज्ञा देली हे जदि तूँ ओकरा करते रहऽ तऽ तूँ सच में हमर दोस्त हऽ15हम अखनी से तोरा अपन दास नऽ कहम, काहेकि दास नऽ जानऽ हे कि ओकर मालिक कौची कर रहलन हे। अखनी से हम तोहरा दोस्त कहम, काहेकि हम तोरा ऊ सभे समझा देली हे जे हमर पिता हमरा से कहलन हल।16तूँ हमर चेला बने ला नऽ चुन लऽ। बजाय एकर, हम अपन चेला बने लागी तोरा चुनाव करली आउर तोरा ई योगदान लागी नियुक्त करली ताकि तूँ बाहरसी जा आउर आत्मिक फल पईदा करऽ आउर ताकि जे फल तूँ पईदा करऽ ऊ सभे दिन लागी हमर नाम से बनल रहे। हम तोहरा ई लागी भी चुनली हे ताकि हमर पिता तोरा ऊ सभे कुछ देतन जेकरा से तूँ हमर प्रतिनिधियन जईसन विनती करऽ हऽ।17हम तोरा ई बात के करे के आज्ञा येहिगुने दे ही ताकि तोहनी एक-दोसर से प्रेम करऽ।18जबकि ऊ सभे जे संसार में परमेश्वर के विरोध करऽ हथन ऊ तोरा से दुश्मनी भी करऽ हथन, तोरा ई पता होवे के चाही कि ओखनी पहिले हमरा से दुश्मनी करलन हल।19जदि तूँ ऊ लोगवन के तरफ रहतऽ हल जे संसार में परमेश्वर के विरोध करऽ हथन, तऽ ऊ अविश्वासी तोरा से ओईसहीं प्रेम करतन हल जईसे ऊ अपने आप से प्रेम करऽ हथन। जबकि, हम ओखनी के बीच में से निकस आवे लागी तोरा चुनली हे। ऊ लोग जे संसार में परमेश्वर के विरोध करऽ हथन ऊ तोरा से येहिगुने दुश्मनी करऽ हथन काहेकि तूँ उनकर समाज नऽ हऽ।20याद करऽ कि हम तोरा से कहली हल कि अपन मालिक के सामने में दास जादे खास नऽ होवऽ हे। जबकि ओखनी हमरा दुःख देलक, तऽ जरुर ऊ तोरो दुःख देतन। जदि ओखनी में से कोई हमर शिक्षा के मानतन, तऽ ऊ ओकरो मानतन जे तूँ सिखईवऽ।21तईयो ई संसार में रहे वाला अविश्वासी तोरा जौरे ई सभे दोष लगावे वाला बात के येहिगुने करतन काहेकि तूँ हमर नाम के पीछे चले वाला हऽ आउर येहिगुने काहेकि ऊ हमर पिता के नऽ जानऽ हथन जे हमरा ईहाँ भेजलन हे।22जदि हम अईली नऽ होत आउर उनका परमेश्वर के सच सिखईली नऽ होत, तऽ ऊ हमरा आउर हमर समाचार के अस्वीकार करे के दोषी नऽ ठहरतन। बाकि, कि हम अईली आउर उनका सिखईली येहिगुने, अखनी उनका भीर उनकर पाप लागी कोई बहाना नऽ हे।23जे कोई हमरा से दुश्मनी करऽ हथन ऊ हमर पिता से भी दुश्मनी करऽ हथन।24जदि हम उनका बीच में ऊ चमत्कारी काम के देखईती नऽ हल जे कहियो कोई नऽ करलन, तऽ ऊ पाप के दोषी नऽ ठहरतन हल। तईयो, जईसे कि ई हे, ओखनी ऊ काम के देखलन आउर हमरा से दुश्मनी रखलन। ओखनी हमर पिता से भी दुश्मनी रखलन।25बाकि, ई येहिगुने होलक जेकरा से ई व्यवस्था पूरा हो जाय जे भविष्यद्वक्ता उनकर पवित्रशास्त्र में लिखलन हे: ओखनी बेगर कोई वजह के हमरा से घिन करलन। 26जखनी हम अपन पिता भीर से उनका तोरा भीर भेजम जे तोर मदत करतन, तऽ ऊ लोगवन के गवाही देतन कि हम कौन ही। ऊ पवित्र आत्मा हथन, जे कहऽ हथन कि परमेश्वर के बारे में कौची सच हे आउर ऊ हमर पिता के तरफ से निकसऽ हे।27तोहनी सभे के हमरा बारे में येहिगुने गवाही देवे ला हे, काहेकि तूँ ऊ पहिलके दिन से हमरा जौरे रहलऽ हे जहिया हम अपन काम शुरु करली हल।”
Bridge Connectivity Solutions Pvt. Ltd.