John13
1फसह के परव शुरु होवे के एक दिन पहिले, यीशु जानऽ हलन कि ई उनका लागी ई संसार के छोड़े आउर अपन पिता भीर लौटे के घड़ी हे। ऊ हमेशा अपन चेला से प्रेम करलन जे ई संसार में उनका जौरे हलन, आउर ऊ उनका से पूरा तरह से प्रेम करलन हल।2जौन घड़ी यीशु आउर उनकर चेला अपन साँझ के खाना खा रहलन हल, तऽ शमौन इस्करियोती के बेटा, यहूदा के मन में शैतान पहिलहीं ई सोचे लागी प्रेरित कर देलक हल कि उनका यीशु के कैदी बनावे में यहूदी अगुवन के मदत करे के चाही।3यीशु जानऽ हलन कि उनकर पिता उनका सभे चीज पर पूरा शक्ति आउर हक दे देलन हे, आउर ऊ एहु जानऽ हलन कि ऊ परमेश्वर भीर से अईलन हल आउर जल्दीये परमेश्वर भीर लौट जईतन।4काहेकि यीशु, ऊ बात के जानऽ हलन येहिगुने, यीशु ऊ मेज से उठलन जहाँ साँझ के ओखनी खाना खा रहलन हल, ऊ अपन ऊपरे के कपड़ा के खोल देलन, आउर अपन कमर के चारो बगल एगो गमछा लपेट लेलन।5ऊ एगो बड़का कटोरा में तनी सा पानी भरलन आउर अपन चेलवन के गोड़ के धोवे ला शुरु कर देलन आउर उनका ऊ गमछा से पोछ के सुखावे लगलन जेकरा ऊ अपन कमर के चारो बगल लपेटले हलन।6जखनी ऊ शमौन पतरस भीर उनकर गोड़ के धोवे लागी अईलन, तऽ पतरस उनका से कहलन “हे प्रभु, तोरा हमर गोड़ नऽ धोवे के चाही!”7यीशु उनका जबाब देलन, “ई घड़ी तऽ तूँ नऽ समझवऽ कि हम कौची कर रहली हे, बाकि बाद में तूँ समझवऽ।”8पतरस कहलन, “तूँ सच में हमर गोड़ के अनन्तकाल नऽ धो पईवऽ!” यीशु जबाब देलन, “जदि हम तोरा नऽ धोयेम, तऽ तूँ हमरा जौरे परमेश्वर के आशीष के हकदार नऽ होवऽ।”9शमौन पतरस उनका से कहलन, “हे प्रभु, खाली हमर गोड़ के नऽ धोवऽ! हमर हाथ आउर हमर मुड़ी के भी धो दऽ!”10यीशु उनका से कहलन, “जिनका कोई धो देलन हे उनका खाली गोड़ के धोवे के जरुरत हे। उनकर बाकि देह शुद्ध हे। तूँ चेला सभे शुद्ध हऽ, बाकि तोहनी सभे शुद्ध नऽ हऽ।”11यीशु ई बात आत्मिक रूप से शुद्ध होवे के बारे में कहलन, काहेकि ऊ जानऽ हलन कि कौन उनका कैदी बनावे लागी यहूदी अगुवन के मदत करे ला जा रहलन हल। एही चलते ऊ कहलन, “तोहनी में से सभे कोई शुद्ध नऽ हथन।”12जखनी ऊ ओखनी के गोड़ के धोवे ला खतम कर लेलन तऽ ऊ अपन ऊपरे के कपड़ा के पेहेन लेलन। तऽ ऊ फिन से मेज पर बईठ गेलन आउर ऊ कहलन, “तोरा जरुर समझ लेवे के चाही कि हम अखनी तोहनी लागी कौची करली हे!13तूँ हमरा 'गुरु' आउर ‘प्रभु’ एकदम ठीके कहऽ हऽ, काहेकि हम ओही ही।14जबकि हम तोर गुरु आउर प्रभु, तोहनी के गोड़ के धोवे से नरम होके तोहनी के सेवा करली, येहिगुने तोहनियो के एक-दोसर के गोड़ के धोके एकदम से नम्र एक-दोसर के सेवा करे के चाही।15तोहनी के गोड़ धोके हम तोरा अपनावे लागी एगो उदाहरण देली हे जेकरा से कि तोरा एकदम नम्र होके एक दोसर के सेवा करे के चाही जईसे हम एकदम नम्र होके तोहनी के सेवा करली।16हम तोरा से सच कह रहली हे: जईसे एगो सेवक अपन मालिक के बराबरी में जादे जरुरी नऽ हे, आउर नऽ सन्देशवाहक ऊ आदमी के बराबरी में जादे खास हे जौन उनका भेजलन हे, ओईसहीं तूँ हमरा से जादे खास नऽ हऽ।17कि अखनी तूँ जानऽ हऽ कि तोरा एकदम नम्र होके एक-दोसरा के सेवा करे के चाही, येहिगुने जदि तूँ अईसन करऽ हऽ तऽ परमेश्वर तोरा आशीष देतन।18हम ई नऽ कह रहली हे कि तोहनी में से सभे के सभे आशीषित होवऽ। हम ऊ लोगवन के बढ़ियाँ से जानऽ ही जिनका हम अपन चेला होवे लागी चुनली हे। बाकि, जौन घटना होवे वाला हे ओकरा घटे के चाही ताकि भविष्यद्वक्ता पवित्रशास्त्र में जे बात लिखलन ऊ पूरा होवे सकऽ: जे हमरा जौरे एगो दोष के जईसन खाना खईलन ओही हमर विरोध करलन। 19अखनी से हम तोरा ओकरा घटित होला से पहिलहीं बता रहली हे कि कौची होवे वाला हे जेकरा से कि, जखनी ऊ घटना होवे, तऽ तूँ विश्वास करवऽ कि हमहीं परमेश्वर ही। 20हम तोरा से सच कह रहली हे: जे कोई उनका सकार करऽ हथन जिनका हम बाहरे भेजऽ ही ऊ हमरो सकार करऽ हथन आउर जे कोई भी हमरा सकार करऽ हथन ऊ हमर पिता के भी सकार करऽ हथन जे हमरा भेजलन हे।”21जखनी यीशु अईसन कहलन, तऽ ऊ आत्मा बेचैनी महसूस करलन। ऊ शान्त होके गवाही देलन, “हम तोरा से सच कह रहली हे: तोहनी में से एगो हमरा हमर विरोधियन के सौंपे जा रहलन हे।”22उनकर चेलवन एक-दोसर के देखे लगलन आउर चौंके लगलन कि उनकर बीच में कौन हथन जिनका बारे में ऊ बोल रहलन हल।23उनकर चेलवन में से एगो, यूहन्ना जिनका से यीशु प्रेम करऽ हलन, मेज पर यीशु के बगल में बईठल हलन।24शमौन पतरस उनका ई कहेला इशारा करलन कि ऊ यीशु से पूछतन कि ऊ कौन चेला के बारे में कह रहलन हल।25येहिगुने यूहन्ना यीशु तरफ झुकलन आउर तुरन्त ऊ पूछलन, “हे प्रभु, ऊ के हे जे तोरा धोखा देत?”26यीशु जबाब देलन, “ई ओही अादमी हे जेकरा हम रोटी के टुकड़ा कटोरा में डूबईला के बाद देम।” फिन ऊ रोटी के कटोरा में डूबईलन आउर ओकरा शमौन इस्करियोती के बेटा, यहूदा के दे देलन।27जईसहीं यहूदा यीशु से ऊ रोटी के टुकड़ा लेलक, ओईसहीं शैतान ओकरा सवार हो गेल। तऽ यीशु ओकरा से कहलन, “जे करे ला योजना तूँ बनईलऽ हे ओकरा तुरन्त करऽ।”28मेज पर बईठलकन में से दोसरा कोई भी नऽ जानऽ हल कि यीशु यहूदा से अईसन काहे कहलन हल।29ओखनी में कुछ लोग अईसन सोचलन कि यीशु उनका से जा के कुछ समान कीने ला जेकर उनका फसह के परव मनावे लागी जरुरत हल चाहे गरीबवन के कुछ धन पईसा-कौड़ी देवे ला कह रहलन हल। ओखनी अईसन येहिगुने सोचलन काहेकि यहूदा भीर ऊ झोली रहऽ हल। जेकरा में उनकर पईसा-कौड़ी रखल रहऽ हल।30येहिगुने यीशु से यहूदा रोटी ले लेवे के बाद, ऊ तुरन्त बाहरसी निकस गेल। ई रात के बखत हल।31फिन यहूदा के चल गेल के बाद, यीशु कहलन, “अखनी परमेश्वर लोगवन पर परकट करलन हे कि हम, आदमी के बेटा, केतना महान ही। हमहूँ लोगवन पर परकट करली हल कि परमेश्वर केतना महान हथन।32परमेश्वर अपनहीं लोगवन पर परकट करतन कि हम, अादमी के बेटा, केतना महान ही, आउर ऊ एकरा अखनी करतन।33तूँ जिनका हम अईसन प्रेम करली जईसे कि तूँ हमरे संतान हऽ, हम खाली तनी सा आउर देर ला तोहनी के जौरे रहम। फिन तूँ हमरा खोजवऽ, बाकि ई एकदम ओईसहीं होत जईसे हम यहूदी अगुवन से बोलली हल आउर अखनी हम तोरा से कह रहली हे: जहाँ हम जा रहली हे तूँ ऊ जगह में आवे जुकुर नऽ हो पईवऽ34अखनी हम तोरा ई नया आज्ञा दे रहली हे कि तूँ एक-दोसर से प्रेम करऽ: तोरा एक-दोसर से ओईसहीं प्रेम करे के चाही जईसे हम तोरा से प्रेम करली हल।35जदि तूँ एक-दोसर से प्रेम करवऽ तऽ सभे लोग जौन ऊ प्रेम के देखतन ऊ जानऽ जईतन कि तूँ हमरे चेला हऽ।”36शमौन पतरस उनका से कहलन, “हे प्रभु, तूँ कहाँ जा रहलऽ हे?” यीशु जबाब देलन, “जहाँ हम जा रहली हे तूँ हमरा जौरे ऊ जगह में अखनी तऽ नऽ जा सकल हे, बाकि बाद में तूँ ऊहाँ जईवऽ।”37पतरस उनका से कहलन, “हे प्रभु, हम तोरा जौरे अखनी काहे नऽ जा सकली हे? हम तऽ तोरा लागी जिनगी देवे ला भी तईयार ही!”38यीशु जबाब देलन, “तूँ सचमुच में हमरा लागी प्राण देवे ला तईयार नऽ हऽ! हम तोरा से सच कह रहली हे: तूँ सच में तीन बेरा कहवऽ कि तूँ हमरा नऽ जानऽ हऽ एकरा से पहिले कि बिहने होला पर मुर्गा बाँग देतऽ!”
Bridge Connectivity Solutions Pvt. Ltd.