John11
1लाजर नाम के एगो अादमी बड़ी बेमार हो गेल। ऊ बैतनिय्याह के शहर में रहऽ हल जहाँ उनकर बहिन मरियम आउर मार्था भी रहऽ हल।2ई ओही मरियम हे जे बाद में प्रभु पर इत्र डाल के अभिषेक करलन आउर अपन माथा के मुकदमा से उनकर गोड़ के तेल पोछलक। ऊ उनकर भाई लाजर हलन जे बेमार हलन।3येहिगुने ऊ दूनो बहिन कोई के यीशु भीर लाजर के बारे में बतावे ला सन्देश पेठईलन। ऊ कहलन, “हे प्रभु, जिनका से तूँ प्रेम करऽ हऽ ऊ बड़ी बेमार हथन। कृपा कर के आ जईतन!”4जखनी यीशु लाजर के बेमारी के बारे में सुनलन, तऽ ऊ कहलन, “ई बेमारी लाजर के मरला से खतम नऽ होत। बजाय एकर, ई बेमारी के मकसद ई परकट करे ला हे कि परमेश्वर के महिमा ला हे। लाजर ई ला बेमार होलन हल ताकि ई बेमारी परकट करत कि हम, परमेश्वर के बेटा केतना महान ही।”5यीशु मार्था से, ओकर बहिन मरियम से, आउर लाजर से प्रेम करऽ हलन।6येहिगुने जखनी यीशु सुनलन कि लाजर बेमार हथन, तऽ ऊ जानबूझ के दू दिन ला आउर ऊहें रुक गेलन जहाँ ऊ हलन।7फिन ऊ दू दिन के बाद यीशु अपन चेलवन से कहलन, “आवऽ वापस यहूदिया राज में चलम।”8उनकर चेलवन कहलन, “हे गुरु, ई घड़ी यहूदिया में यहूदी अगुवन तोरा पत्थर से जानऽ मारे ला चाहऽ हथन! जरुर तोरा फिन से ऊहाँ नऽ जाय के चाही!”9यीशु जबाब देलन, “तूँ जानऽ हऽ कि दिन के बखत में 12 घंटा होवऽ हे। जौन अादमी दिन में चलऽ हे ऊ ई लागी बच के चलतन काहेकि संसार के इंजोर उनका देख पावे के जोग बनावऽ हे कि ऊ कहाँ जा रहलन हे।10जबकि, जखनी कोई अादमी रात के बखत चलऽ हे, तऽ ऊ येहिगुने ठोकर खईतन काहेकि ऊहाँ इंजोर नऽ हे जे उनका देख पावे के जोग बनईतन कि ऊ कहाँ जा रहलन हे।”11ई बात के कहला के बाद, ऊ उनका से कहलन, “हमर दोस्त लाजर सुतल हे, बाकि हम ऊहाँ उनका जगावेला जायेम।”12येहिगुने उनकर चेलवन उनका से कहलन, “हे प्रभु, जदि ऊ सुतल हे तऽ फिन ऊ चंगा हो जईतन।”13यीशु सचमुच में लाजर के मौत के बारे में कह रहलन हल, बाकि उनकर चेलवन सोचलन कि ऊ सचमुच में नींद के बारे में कह रहलन हे।14येहिगुने यीशु उनका साफ-साफ कह देलन, “लाजर मर गेलन हे।15आउर हम खुश ही कि जहिया ऊ मरलन तऽ हम ऊहाँ पर नऽ हली। हम एकरा ई लागी घटित होवे देली ताकि तूँ हमरा पर विश्वास कर सकऽ। ई तोहनी के फईदे लागी हे। ईहाँ पर रुकल रहे के बजाय, आवऽ ऊहाँ चलम जहाँ ऊ हथन।”16येहिगुने थोमा, जेकरा ऊ जुड़वा कहऽ हलन, बाकि चेलवन से कहलन, “आवऽ हमनियो गुरु जी के साथ चलम ताकि हमनियो उनका जौरे ही मरम।”17येहिगुने जखनी यीशु बैतनिय्याह गाँव में पहुँचलन, तऽ उनका पता चलल कि लोगवन ऊ घड़ी से चार दिन पहिलहीं लाजर के मरल देह के एगो कब्र में रख देलन हल।18बैतनिय्याह गाँव से यरूशलेम खाली करीब तीन किलोमीटर के दूरी पर हल।19बड़ी मनी यहूदी लोगवन मार्था आउर मरियम भीर उनकर भाई लाजर के मौत के बारे में ओखनी दूनो के तसल्ली देवे ला बैतनिय्याह में अईलन हल।20जखनी मार्था कोई के कहते सुनलक कि यीशु आ रहलन हे, तऽ ऊ उनका से मिले लागी बाहरसी निकस गेल। मरियम ओकर जौरे नऽ गेलक बाकि घरे में रह गेलक।21जखनी मार्था यीशु से मिलल, तऽ ऊ उनका से कहलन, “हे प्रभु, जदि तूँ ईहाँ पर तनी आउर जल्दी आ जईतऽ हल, तऽ हमर भाई नऽ मरत हल!22जबकि, अखनियो जबकि ऊ मर गेल हे हमरा लग रहल हे कि जे कुछ भी तूँ ओकरा से करेलागी कहवऽ परमेश्वर ओकर तोरा लागी करतन।”23यीशु उनका से कहलन, “तोर भाई फिन से जिन्दा हो जईतन।”24मार्था उनका से कहलन, “हमरा लगऽ हे कि हमर भाई पुनरुत्थान घड़ी फिन से जिन्दा हो जईतक जहिया परमेश्वर सभे मरलकन लोगवन के अंतिम दिन में जिन्दा करतन जहिया ऊ सभे लोगवन के न्याय करतन।” 25यीशु ओकरा से कहलन, “हमहीं ही जे मरलकन लोगवन के पुनरुत्थान करऽ ही। आउर हमहीं ही जे लोगवन के अनन्त जिनगी दे ही। जे कोई हमरा पर विश्वास करऽ हथन ऊ हमेशा ला जिन्दा रहतन ईहाँ ला कि जदि उनकर देह मर भी जायेत।26ऊ सभे जे अनन्त जिनगी पा ले हथन आउर हमरा पर विश्वास करऽ हथन ऊ जरुर हमेशा ला जिन्दा रहतन। का तूँ विश्वास करऽ हऽ कि ई बात सच हे?”27मार्था उनका से कहलन, “हाँ, हे प्रभु, हम विश्वास करऽ ही! हम सच में विश्वास करऽ ही कि तूँही परमेश्वर के बेटा, मसीह हऽ। तूँ ओही हऽ जिनकर दुनियाँ में आवे के वादा परमेश्वर करलन हल।”28अईसन कहे के बाद, ऊ घरे चल गेल आउर चुप्पे से अपन बहिन मरियम के बोलईलक। ऊ ओकरा से कहलन, “गुरु जी आ गेलन हे, आउर ऊ तोरा बोला रहलन हे।”29जखनी मरियम ई सुनलक जे ओकर बहिन कहलन हल, तऽ ऊ तुरन्त उठलन आउर यीशु से मिले ला बाहरसी चल गेल।30यीशु अभी बैतनिय्याह गाँव में नऽ घूँसलन हल। बजाय एकर, ऊ ओही जगह में हलन जहाँ मार्था उनका से मिलल हल।31ऊ यहूदी लोगवन जे मरियम के उनकर घर में तसल्ली दे रहलन हल उनका तुरन्त उठ के बाहरसी जईते देखलन, तऽ ओखनियो उनकर पीछे-पीछे गेलन। ओखनी सोचलन कि ऊ कब्र पर जा रहलन हे जहाँ ओखनी लाजर के गाड़लन हल कि दुःख मनईतन।32जखनी मरियम ऊ जगह में पहुँचलक जहाँ यीशु मार्था से बात करलन हल आउर उनका देखलन, तऽ ऊ उनकर गोड़तर भुईयाँ में लोट गेल। ऊ उनका से कहलन, “हे प्रभु, जदि तूँ ईहाँ पर तनी आउर जल्दी आ जईतऽ हल तऽ हमर भाई नऽ मरतक हल!”33जखनी यीशु उनका दुःख मनइते देखलन, आउर ऊ यहूदी लोगवनो दुःख मना रहलन हल जे ओकर जौरे हलन, तऽ आत्मा ओखनी बड़ी बेचैन हो गेलन।34ऊ पूछलन, “तूँ उनकर देह के कहाँ गाड़लऽ हे?” ऊ उनका से कहलन, “हे प्रभु, आके देख लऽ कि ऊ कहाँ हे।”35यीशु रोबे लगलन।36येहिगुने ऊ यहूदी लोग जे मरियम के जौरे हलन अपने में एक दोसरा से कहे लगलन, “देखऽ ऊ लाजर से केतना प्रेम करऽ हलन!”37जबकि, उनकर बीच में से दोसर कोई कहलन, “ई आंधर अादमी के देखे के जुकुर बना देलन। बाकि लगऽ हे कि इनका भीर ई अादमी के मरे से रोके ला कोई शक्ति नऽ हल!”38जखनी ऊ कब्र पर पहुँचलन तऽ यीशु फिन से भावनात्मक रूप से बेचैन हो गेलन। ई एगो गुफा हल, आउर एगो बड़का चट्टान से ओकरा में घूँसे वाला दुआरी झाँकल हल।39यीशु कहलन, “खोह के घूँसे वाला दुआरी से चट्टान के हटा दऽ।” बाकि, लाजर के बहिन मार्था उनका से कहलन, “हे प्रभु, ई घड़ी तऽ उनकर देह सड़ाईन्ध बदबू दे रहल होत काहेकि ऊ चार दिन पहिले मरलन हल।”40यीशु उनका से कहलन, “हम सच में तोरा कहली हल कि जदि तूँ हमरा पर विश्वास करवऽ, तऽ तूँ महिमा देखे पईवऽ कि परमेश्वर केतना महान हथन!”41येहिगुने कुछ लोग खोह के घूँसे वाला दुआरी से चट्टान के हटा देलन। यीशु ऊपरे स्वर्ग दने ताकलन आउर प्रार्थना करलन, “हे पिता, हमर सुन लेवेला हम तोर धन्यवाद करऽ ही।42हम जानऽ ही कि तूँ हमेशा हमर सुनऽ हऽ। तईयो, हम ईहाँ खड़ा लोगवन के चलते अईसन कहली। हम ई येहिगुने कहली ताकि ई विश्वास हो जाय कि तूँही हमरा पेठईलऽ हे।”43उनकर ई प्रार्थना करलऽ के बाद, ऊ कस के चिकरलन, “हे लाजर, कब्र में से बाहरसी आ जा!”44ऊ आदमी जे मर गेलन हल कब्र में से बाहरसी आ गेलन जौन लोग उनका गाड़े के तईयारी करलन हल ओखनी उनकर गोड़ आउर हाथ के कपड़ा के पट्टी से लभेर देलन हल आउर उनकर मुँह के चारो बगल एगो कपड़ा लपेट देलन हल। येहिगुने यीशु ऊहाँ खड़ा लोगवन से कहलन, “कपड़ा के ऊ तह के हटा दऽ जेकरा से ऊ बाँधल हे, आउर उनका जाय दऽ।”45एकरा चलते, यहूदी लोग में से ऊ बड़ी मनी उनका पर विश्वास करलन जे मरियम के तसल्ली देवे अईलन हल आउर जे ऊ बात के गवाह हलन जे यीशु करलन हल।46तईयो, ऊहाँ के कुछ लोग फरीसियन भीर चल गेलन आउर जे यीशु करलन हल ओकर उनका खबर देलन।47येहिगुने शासन करे वाला याजकवन आउर फरीसियन ऊँचा पद वाला यहूदी शासन करे वाला सभा के सदस्य के एक जगह कर के जमा करलन। ओखनी एक-दोसर से कह रहलन हल, “हमनी ई अादमी के बारे में कौची करे जा रहली हे? ऊ बड़ी सा चमत्कार के चिन्ह के परकट कर रहलन हे।48जदि हम उनका ई चमत्कारी काम के करते रहे ला इजाजत देली, तऽ सभे लोगवन उनका पर विश्वास कर लेतन आउर उनका अपन देश के राजा बना देतन। फिन रोमी सेना अईतन आउर हमनी के मन्दिर आउर हमनी के लोग दूनो के खतम कर देत!”49कैफा ई यहूदी सभा के एगो सदस्य हलन। ऊ ऊ घड़ी के महायाजक भी हलन। ऊ उनका से कहलन, “तोहनी सभे कुछो नऽ जानऽ हऽ!50तूँ ई नऽ समझऽ हऽ कि रोमियन के द्वारा सभे यहूदी देश के लोगवन के मारे के बराबरी में लोगवन के तरफ से एगो आदमी के मरे ला तोहनी ला जादे अच्छा होत।”51कैफा ई लागी नऽ कहलन काहेकि ई ऊ खुद सोचलन हल बजाय एकर, जबकि ऊ, ऊ साल के महायाजक हलन, येहिगुने ऊ भविष्यद्वाणी कर रहलन हल कि यहूदी देश के लोगवन के तरफ से यीशु मरतन।52ऊ एहु भविष्यद्वाणी कर रहलन हल कि, यीशु नऽ खाली यहूदियन लागी मरतन, बाकि एहु कि परमेश्वर के सभे जाति के एगो प्रजा के रूप में जमा करे लागी, जिनका परमेश्वर पूरा देश भर में पसार देलन हे।53येहिगुने जखनी कैफा भविष्यद्वाणी करलन तऽ ऊ दिन के बाद आवे वाला दिन में, यहूदी सभा यीशु के मारे के योजना बनईलक।54एही चलते, यीशु अपन यहूदी विरोधियन के बीच में सभे के सामने फिन नऽ गेलन। बजाय एकर, ऊ यरूशलेम के छोड़ के एप्रैम नाम एगो शहर में चल गेलन, जे सुनसान इलाका में हल। ऊ ऊहाँ अपन चेलवन के जौरे थोड़ा दिन लागी रहलन।55ऊ घड़ी यहूदियन के फसह के परव आवे वाला हल। ऊ जगह से बड़ी मनी लोग ऊपरे यरूशलेम गेलन। ऊ फसह के परव के शुरु होवे से पहिले परव में हिस्सा लेवे लागी यहूदी नियम के मुताबिक अपने आप के शुद्ध करे लागी अईलन हल। 56जौन लोग फसह के परव लागी यरूशलेम अईलन हल ऊ यीशु के खोज रहलन हल। जखनी ऊ मन्दिर के अँगना में खड़ा हलन, तऽ ओखनी एक-दोसर से पूछलन, “तोरा का लगऽ हे? सचमुच में ऊ फसह के परव में नऽ अईतन!”57कुछ समय पहिलहीं यहूदी शासकीय याजक आउर फरीसी एगो आज्ञा देलन हल कि जे कोई के ई पता लगे कि यीशु कहाँ हथन, ओकरा उनकर जगह के खबर देवे पड़तक जेकरा कि ऊ उनका कैदी बना सकतन।
Bridge Connectivity Solutions Pvt. Ltd.