Hebrews10
1काहेकि व्यवस्था, जे आवे वाला अच्छा चिजवन के परछाहीं हे नऽ कि ऊ चिजवन के असली स्वरूप हे ऊ लोगवन के कहियो सिद्ध नऽ कर सकल हे, जे ओही बलिदानमन के साथ आ रहलन हे, जेकरा ऊ लगातार हर साल लावऽ हथन।2नऽ तऽ का उनकर चढ़ावा बंद नऽ हो जायेत, काहेकि सेवा करेवालन के एक बेरा शुद्ध हो गेलऽ के बाद पापवन के समझ नऽ रहऽ हे?3बाकि ऊ बलिदानमन से हर साल पापवन के याद होवऽ हे।4काहेकि ई अनहोना हे कि बैल आउर बकरवन के लहू पापवन के दूर करत।5येहिगुने ई दुनियाँ में आके, ऊ कहऽ हथन “तूँ बलिदान आउर भेंट के इच्छा नऽ करलऽ, बाकि तूँ हमरा लागी एगो देह तईयार करलऽ; 6सभे होमबलियन आउर पाप बलियन के बारे में तूँ उनका से खुश नऽ होलऽ।”7तऽ हम कहली, “हे परमेश्वर देखऽ, जईसन पवित्रशास्त्र के एगो खण्ड में हमर बारे में लिखल हे, हम तोर इच्छा पूरा करे ला आ गेली हे।”8जब ऊ ऊपरे कहऽ हथन कि, “बलिदानमन आउर भेंटवन आउर सभे होमबलियन आउर पाप बलियन के तूँ इच्छा नऽ करल, आउर नऽ ही तूँ ओकरा से खुश होल” जे चिजवन व्यवस्था के मुताबिक चढ़ावल जा हे,9तब ऊ कहलन हल कि, “देखऽ, हम तोर इच्छा पूरा करे लागी आ गेली हे।” तऽ ऊ दोसरका के रखे लागी पहिलका के हटा दे हथन।10ओही इच्छा से हमनी यीशु मसीह के देह के एक बेरा चढ़ावल जाय के माध्यम से पवित्र करल गेली, आउर फिन कहियो नऽ करल गेली। 11आउर सचमुच, हरेक याजक रोजदिन खड़ा होके सेवा करऽ हथन आउर हर बार एक ही तरह के बलिदान चढ़ावा हथन, जे पाप के कहियो भी दूर नऽ कर सकऽ हे। 12बाकि मसीह पापवन के बदला हमेशा लागी एक्केगो गो बलिदान चढ़ा के परमेश्वर के दहिना तरफ बईठ गेलन,13तब से लेके ऊ ऊ घड़ी के इंतजार कर रहलन हे, जहिया उनकर दुश्मन उनकर गोड़ के चौकी बन जईतन। 14काहेकि ऊ उनका जे पवित्र करल जा हथन, एक ही चढ़ावा से हमेशा ला सिद्ध कर देलन हे।15आउर पवित्र आत्मा भी ई कह के गवाही दे हथन कि,16“प्रभु कहऽ हथन कि ई ओही वाचा हे, जेकरा हम ऊ दिन के बाद बाँधम, आउर उनकर मन में व्यवस्था के डालम, आउर हम ओकरा उनकर हृदय पर लिखम।”17आउर “हम फिन जरुर ही उनकर पापवन के आउर उनकर अधर्म काम के याद नऽ करम।” 18अखनी जब ई बात के मांफी मिल गेल हे, तऽ ऊहाँ पाप लागी फिनो कोई बलिदान नऽ रहल।19येहिगुने हे भईवन, यीशु के लहू के द्वारा मृत्यु के द्वारा पवित्रस्थान में प्रवेश करे के भरोसा रखऽ,20जे परदा, मतलब कि अपन देह के द्वारा हमनी लागी एगो नया आउर जिन्दा राह खोल देलन हे,21आउर परमेश्वर के घराना पर एगो महान याजक ठहरलन हे,22तऽ आवऽ हमनी विश्वास के पूरा आश्वासन के साथ सच्चा मन से, अपन हृदय पर छिड़काव कर के विवेक विचार के दूर करीयई, आउर अपन देह के शुद्ध जल से धोलवा के, उनका भीर जायेम। 23आवऽ हमनी बिना डगमगईले अपन आशा के अंगीकार के मजबूती से थामले रहम, काहेकि जे प्रतिज्ञा करलन हे ऊ विश्वासयोग्य हथन।24आउर प्रेम आउर भलाई के काम के बढ़ावा देवे लागी हमनी एक दोसर के खयाल रखऽ,25आउर एक जौरे मिले-जुले ला नऽ छोड़िहऽ, जईसे कुछ लोगवन के ई आदत हे, जबकि एक दोसर के समझईते रहिहऽ, आउर जईसे-जईसे ऊ दिन के तूँ नजदीक अईते देखिहऽ, ओईसे-ओईसे अईसन आउर भी जादे करते रहिहऽ।26काहेकि सच के पूरा पछान करलऽ के बाद भी जदि हमनी जान बुझ के पाप करते रहम, तऽ पापवन लागी कोई आउर बलिदान बचल नऽ रहल,27बाकि दण्ड के एगो पक्का भयंकर उम्मीद आउर जलन के आग बचल रहल जे विरोधियन के भसम कर देत। 28जे कोई मूसा के व्यवस्था के नकार दे हथन ऊ दूगो चाहे तीनगो गवाहवन के गवाही पर बिन दया के मर जा हथन। 29तूँ का सोच हऽ कि ऊ आदमी केतना आउर भी भारी सजा के लायक ठहरतन जे परमेश्वर के बेटा के गोड़वन से धाँगलन आउर वाचा के लहू के-जेकरा से ऊ पवित्र करल गेल हल-अपवित्र मानलक आउर अनुग्रह के आत्मा के अपमान करलन! 30काहेकि हम उनका जानऽ ही जे कहऽ हथन कि, “बदला लेवे ला हमर काम हे; हमहीं बदला देम।” आउर फिन ई कहऽ हे कि “प्रभु अपन लोगवन के न्याय करतन।” 31जिन्दा परमेश्वर के हाथ में पड़ेला भयानक बात हे!32बाकि ऊ पहिले के दिन के याद करऽ, जेकरा में तूँ ज्योति पाके, दुःख के भारी संघर्ष के सह लेलऽ,33कभी-कभी तऽ सचमुच तूँ निन्दा आउर दुःख सहते-सहते सभे के सामने तमाशा बनलन, बाकि दोसरा घड़ी में तूँ ऊ लोगवन के साथी बन गेलऽ, जेकरा साथ ई रीति से बर्ताव करल जा हल।34काहेकि तोहूँ भी ऊ कैदियन के प्रति हमदर्दी देखईलऽ, आउर अपन दौलत से छिनल जाय के खुशी से स्वागत करलऽ, ई जानते भर में कि तोहनी भीर एगो बढ़ियाँ आउर टिकाऊ सम्पति हे।35येहिगुने तूँ अपन भरोसा मत गबईहऽ, काहेकि ओकर प्रतिफल बड़ा हे।36काहेकि तोरा धीरज के जरुरत येहिगुने हे, ताकि परमेश्वर के इच्छा पूरा कर के, तूँ प्रतिज्ञा के प्राप्त कर सकऽ।37“काहेकि अखनी थोड़ा ही समय में, जे आवे वाला हथन ऊ अईतन आउर देर नऽ करतन।38जेकरा से हमर धर्मी जन विश्वास से जिन्दा रहतन, आउर जदि ऊ पीछे हट जईतन, तऽ हमर प्राण ओकरा से खुश नऽ होत।” 39बाकि हम नाश होवे लागी खुद ही पीछे हटेवाला नऽ, बाकि प्राण के सुरक्षा लागी विश्वास करे वाला ही।
Bridge Connectivity Solutions Pvt. Ltd.