Genesis45
1यहूदा के शब्द के सुनते ही यूसुफ अखनी अपन भावना के ऊपर काबू नऽ कर पा रहलन हल। ऊ अपन नौकरवन के सामने रोवे ला नऽ चाहऽ हलन, एहिसे ऊ ओखनी से तेज आवाज में कहलन, “तोहनी सभे बहारसी जा!” जखनी ओखनी सभे बहारसी गेलन, तऽ यूसुफ अपन भईवन के बतईलन कि ऊ कौन हथिन, तखनी ओकरा भीर कोई मिस्री नऽ हल।2तब ऊ एतना तेज आवाज में चिकरलन कि मिस्रियन लोग भी सुन गेलन, आउर राजा के महल के लोगवन भी सुनलन।3यूसुफ अपन भईवन से कहलन, “हम यूसुफ ही! का हमर बाबू जी अखनी ला जिन्दा हथन?” बाकि ओकर भाई जबाब नऽ दे सकलन, काहेकि ऊ जे कहलन हल ओकरा से ओखनी सभे डेरा गेलन हल।4तऽ यूसुफ अपन भईवन से कहलन, हमरा भीर आवऽ! जखनी ओखनी सभे उनकर भीर अईलन, तऽ ऊ कहलन हम तोर भाई यूसुफ ही! हम ओही ही जेकरा तोहनी ऊ व्यापारियन के हाथ में बेच देलऽ हल जे हमरा हियाँ मिस्र ले अईलन हल! 5बाकि अखनी तोहनी परेशान नऽ होवऽ, आउर खुद पर गुस्सा मत करऽ, कि तोहनी हमरा दास होवे लागी बेच देलऽ हल। ऊ परमेश्वर ही हलन जे तोहनी के अकाल में मरे से बचावे लागी हमरा तोरा से पहिले ईहाँ भेजलन हल।6ई देश में दू साल से अकाल पड़ल हल आउर ई अगला पाँच साल तक चलते रहत। ई समय के दौरान, कोई भी जमीन नऽ जोततन, आउर कटाई लागी कोई फसल नऽ होत। 7परमेश्वर हमरा तोरा से पहिलही ईहाँ भेज देलन हे जेकरा से तोहनी भूखल नऽ मरवऽ आउर ई तय हे कि तोर वंशज जिन्दा रहतन।8एहिसे, ऊ तूँ नऽ हलऽ, जे हमरा ईहाँ भेजलऽ हल; ई परमेश्वर ही हलन जे हमरा ईहाँ भेजलन! ऊ हमरा राजा के बाबू जी के जईसन बना देलन हे। हम उनकर महल के सभे चीज के स्वामी आउर मिस्र में सभे के राज्यपाल ही!9अखनी जल्दी से हमरा बाबू जी भीर लौट जा आउर उनका से कहऽ, तोर बेटा यूसुफ ई कहऽ हथन: “परमेश्वर हमरा मिस्र के समूचे भूमि पर स्वामी ठहरइलन हे। तूँ तुरते हमरा भीर आवऽ! 10तूँ गोशेन क्षेत्र में रह सकलऽ हे। तूँ आउर तोर लइकन आउर तोर पर-पोतियन, तोर भेड़-बकरियन आउर गाय-बैल, आउर जे कुछ तोर हे, ऊ सभे हमरा भीर रहत।11काहेकि पाँच साल आउर अकाल पड़त, एहिसे हम ई तय करम कि तोरा भीर भोजन रहत। जदि तूँ ईहाँ नऽ अईवऽ तऽ तूँ, अपन परिवार आउर अपन सभे सेवक भूखे मर जईतन।” 12जदि तूँ-आउर बिन्यामीन भी हमरा धियान से देखवऽ, तऽ तोहनी सभे देखवऽ कि सच में हम, यूसुफ तोरा से बात कर रहली हे13जा आउर हमर बाबू जी से कह दऽ कि मिस्र में हमर केतना इज्जत हे। आउर उनका सभे चीज के बारे में बतावऽ जे तूँ देख लऽ हे। “हमर बाबू जी के इहाँ जल्दी से ले आवऽ!”14तऽ ऊ अपन छोटका भाई बिन्यामीन के गला में हाथ डाल के चीकर के रोलन। आउर बिन्यामीन उनका गला लगईलन आउर रोलन।15फिन ऊ अपन बड़का भईवन के गला लगा के चूम लेलन आउर रोवे लगलन। ओकर बाद उनकर भाई उनका से बात करे लगलन।16कोई महल में जा के समाचार देलन कि यूसुफ के भाई अईलन हे। राजा आउर उनकर सभे अधिकारियन खुश होलन। 17राजा यूसुफ से कहलन, “अपन भईवन से ई कहऽ दऽ: अपन जानवर पर अनाज के बोरा के रखतन आउर कनान देश लौट जईतन।18फिन अपन बाबू जी आउर अपन परिवारवन के ईहाँ वापस ले आवऽ। हम तोरा मिस्र में सभे से अच्छा जमीन देम, आउर तोरा ऊ देश में खाई लागी सभे से जादे भोज मिलत।19आउर अपन भईवन से ई भी कहलन, कि तोर लईकमन आउर औरतियन के ले जाय लागी मिस्र से कुछ गाड़ियन ले जा, आउर उनका आउर अपन बाबू जी के भी ले आवऽ, आउर जल्दिये ही ईहाँ लौट आवऽ।20अपन संपति लावे के बारे में चिंता मत करिहऽ, काहेकि मिस्र में सभे से जादे चीज तोर होत। एकर वजह से तोरा कनान से कोई चीज लावे के जरुरत नऽ पड़त।”21याकूब के बेटवन ओईसहीं कईलन जईसन राजा आदेश देलन हल। यूसुफ ओखनी के राजा के आज्ञा के मुताबिक राह में खाय लागी खाना आउर गाड़ी देलन।22ऊ ओखनी में से सभे के नया कपड़ा देलन, बाकि बिन्यामीन के तीन सौ चाँदी के टुकड़ा आउर पाँच जोड़ा नया कपड़ा देलन! 23ऊ अपन पिता भीर ई भेजलन: मिस्र से आवे वाला सभे से बढ़ियाँ चीजवन से लादल दसगो नर गदहवन, आउर उनकर पिता के मिस्र यात्रा लागी अनाज, रोटी आउर दोसर भोजन से लादल दसगो गदहियन।24तऽ ऊ अपन भईवन के ई कहऽ के विदा कईलन, कि राह में झगड़ा नऽ करिहऽ।25एहिसे भईवन मिस्र छोड़ के कनान देश में अपन बाबू जी याकूब भीर अईलन।26ओकरा में से एगो कहलन, “यूसुफ अखनी ला जिन्दा हथन! सच में, ऊ पूरा मिस्र देश के राज्यपाल हथन!” याकूब बड़ी जादे हैरान होलन; उनका विश्वास ही नऽ हो रहल हल कि ई सच हे।27बाकि ओखनी उनका सभे कुछ बता देलन जे यूसुफ उनका से कहलन हल, आउर याकूब ऊ सभे गाड़ियन के देखलन जेकरा यूसुफ उनका आउर उनकर परिवार आउर संपत्ति के मिस्र ले जाय लागी भेजलन हल। तऽ याकूब के सदमा खतम होल।28ऊ कहलन, “तूँ जे कहलऽ हे ऊ हमरा विश्वास दिलावे लागी बड़ी हे! हमर बेटा यूसुफ आज भी जिन्दा हे, आउर हम मरे से पहिले जा के ओकरा से मिलम!”
Bridge Connectivity Solutions Pvt. Ltd.