Genesis35
1कुछ समय बाद परमेश्वर याकूब से कहलन, “बेतेल नगर में जा आउर उहाँ रहऽ। ओही परमेश्वर, जे तोरा ऊ घड़ी दर्शन देलन हल जखनी तूँ अपन बड़का भाई एसाव के सामने से भाग रहलऽ हल, हमर आराधना लागी एगो वेदी बनावऽ।” 2तऽ याकूब अपन घराना से, आउर अपन सभे सथियन से कहलन, “जौन पराया देऊता तूँ मेसोपोटामिया देश से ले अईलऽ हे, ओकरा से दूर हो जा। साथे-साथे नहा धोके साफ कपड़ा पहिनऽ।3तऽ हम तइयार होके बेतेल जाम। उहाँ हम परमेश्वर के आराधना लागी एगो वेदी बनायेम। ऊ ओही हथन जे हमरा ऊ घड़ी मदत कईलन जखनी हम बड़ी परेशान आउर डेराल हली, आउर हम जहाँ भी गेली हे ऊ हमर साथे रहलन हे।”4एहिगुने ऊ जेतना मूर्ति पराया देउता के लइलन हल, आउर अपन सभे कनबाली याकूब के दे देलन। याकूब ओकरा शकेम नगर के नजदीक बड़का बांज पेड़ के तरे धरती में गाड़ देलन।5जखनी ऊ सभे उहाँ से निकसे ला तइयारी कर रहलन हल, तऽ परमेश्वर उनकर अगल-बगल के नगरवन में रहेवालन के याकूब के घराना से बड़ी डरा देलन, आउर ऊ उनकर पीछा नऽ कईलन।6"बाद में" याकूब आउर उनकर सभे सथियन लूज के, जे कनान देश में जे अखनी बेतेल कहऽ हे, गेलन।7उहाँ ऊ एगो वेदी बनईलन। ऊ, ऊ जगह के नाम एल बेतेल रखलन, जेकर माने हे कि "बेतेल के परमेश्वर" काहेकि हिंयाँ पर परमेश्वर खुद के याकूब के सामने प्रकट कईलन हल जखनी ऊ अपन बड़का भाई एसाव से भाग रहलन हल। 8दबोरा, जे इसहाक के मेहरारू रिबका के देख भाल तऽ करऽ हल, जखनी रिबका जरीगो लईकी हल, अखनी बड़ी बूढ़ी हो गेल हल। ओकर मौत हो गेल आउर उनका बेतेल के दक्षिण में एक ओक के पेड़ के तरे दफनावल गेल। एहिगुने ऊ जगह के नाम “अल्लोन बकुथ” रखलन, जेकर माने कि हे “रोवे के ओक”।9जखनी याकूब आउर उनकर परिवार पद्दनराम से लौट अईलन, आउर ऊ बेतेल में ही हलन, तऽ परमेश्वर याकूब के फिनो दर्शन देलन, आउर उनका आशीर्वाद देलन।10परमेश्वर उनका से फिनो कहलन, “तोर नाम अब याकूब नऽ रहत। ई अब इस्राएल रहत।” एहिसे याकूब के तो “इस्राएल” कहल गेल।11तऽ परमेश्वर उनका से कहलन, हम सर्वशक्तिमान एलशदाई परमेश्वर ही। ढेर मनी लईकन पईदा करऽ। तोर वंशज केतना देश बनतन, आउर तोर वंसजवन में से कुछ राजा भी होतन।12जौन देश हम अब्राहम आउर इसहाक देवे लागी वचन देली हे, ऊ हम तोरा देम। हम ई तोर वंसजवन के भी देम।13जखनी परमेश्वर उहाँ याकूब से बतिया लेलन, तऽ ऊ उनका भीर से चल गेलन।14याकूब ऊ जगह पर एगो बड़कागो पत्थल खड़ा कईलन जहाँ परमेश्वर उनका से बात कईलन हल। ऊ एकरा परमेश्वर के समर्पित करे लागी ओकरा पर कुछ दाखरस आउर थोड़ा जैतून के तेल डाललन। 15याकूब ऊ जगह के नाम बेतेल रखलन, माने कि परमेश्वर के भवन, काहेकि परमेश्वर उहाँ उनका से बात कईलन हल।16याकूब आउर उनकर परिवार बेतेल छोड़ देलन आउर दक्षिण के तरप एप्राता नगर दने कूच कईलन। जखनी ओखनी सभे एप्राता से कुछ ही दूर पर हलन, तऽ राहेल के प्रसव पीड़ा बड़ी जोर से होवे लगल।17जखनी ओकर दर्द बड़ी जादे बढ़ गेल, तऽ दाई राहेल से कहलन, “डरऽ मत, काहेकि अखनी तूँ एगो आउर बेटा के जनम देलऽ हे!”18बाकि ऊ मर रहल हल, आउर अपन अंतिम साँस में ऊ कहलन, “ओकर नाम बेनोनी” रखिहऽ, जेकर माने हे “हमर दुःख के बेटा” बाकि उनकर बाबूजी ओकरा नाम बिन्यामीन रखलन, जेकर माने कि हे “हमर दहिना हाथ के बेटा।” 19राहेल के मरला के बाद ओकरा एप्राता के राह के किनारे, जे अखनी बैतलहम कहऽ हे, मट्टी देवल गेल।20याकूब उनकर कब्र पर एगो बड़का गो पत्थर खड़ा कईलन, आउर ऊ अखनियो उहाँ हे, आउर दिखावऽ हे कि राहेल के कब्र के खम्भा हे।21याकूब, जेकर नया नाम इस्राएल हल, अपन परिवार साथे यात्रा कर रहलन हल, आउर एदेर के पहरदार गुम्मट के दक्षिण तरप अपन तम्बू खड़ा कईलन। 22जखनी ओखनी सभे ऊ इलाका में रह रहलन हल, याकूब के बेटा रूबेन अपन बाबू जी के रखैलियन में से एगो बिल्हा के साथे सूतलन। कोई याकूब के एकरा बारे में बतईलन, आउर एकरा से ऊ बड़ी गोस्सा गेलन। अब याकूब के बारह बेटा हलन।23लिआ के बेटा रूबेन, जे याकूब के सभे से बड़का बेटा हलन, शिमोन, लेवी, यहूदा, इस्साकार आउर जबूलून हलन।24राहेल के बेटा यूसुफ आउर बिन्यामीन हल।25राहेल के दासी बिल्हा के बेटा दान आउर नप्ताली हल।26लिआ के दासी जिल्पा के बेटा गाद आउर आसेर हलन। बिन्यामीन के छोड़ के याकूब के सभे बेटा के तब जनम होल जहिया ऊ पद्दनराम में रह रहलन हल। 27याकूब अपन बाबू जी इसहाक से मिले लागी मम्रे में, जिनकर नाम किर्यतअर्बा भी हे, आउर जे अखनी हेब्रोन कहऽ हे, अपन घरे लौट गेलन। इसहाक के बाबू जी अब्राहम भी हुंए रहऽ हलन। 28इसहाक 180 बरस के उमर ला जिन्दा रहलन।29जहिया इसहाक मरलन तहिया ऊ बड़ी बूढ़ा हलन आउर अपन ऊ पूरखन से मिले चल गेलन जे पहिले मर गेलन हल। उनकर बेटा एसाव आउर याकूब उनकर देह के दफनइलन।
Bridge Connectivity Solutions Pvt. Ltd.