Genesis31
1एक दिन बाद कोई याकूब से कहलन, कि लाबान के बेटा शिकायत कर के कह रहलन हे, कि हमर बाबू जी के सभे कुछ लेके याकूब बड़ी धनमान आउर इज्जतदार हो गेलन हे।2याकूब देखलन कि लाबान उनका परती दोस्ती के व्यवहार नऽ कर रहलन हल जईसन ऊ पहिले कईलन हल।3तऽ यहोवा याकूब से कहलन, अपन देश आउर अपन रिस्तेदरवन भीर चल जा, आउर हम ऊहाँ तोर मदत करम।4तऽ याकूब राहेल आउर लिआ भीर संदेश भेजलन, कि ऊ चारागाह इलाका में से निकल जाय जहाँ उनकर भेड़-बकरियन हल।5जखनी ऊ पहुँचलन, तऽ ऊ उनका से कहलन, हम देखऽ ही, कि तोर बाबू जी पहिले जईसन हमरा जौरे दोस्ती के व्यवहार नऽ करऽ हथन। बाकि परमेश्वर, जिनकर हमर बाबू जी आराधना करऽ हलन, हमर मदत कईलन हे।6तोहनी दूनो जानऽ हऽ कि हम तोर पिता के सेवा बड़ी शक्ति से कईली हे।7ऊ केतना बेरी हमर मजूरी कम कर के हमरा धोखा देलन हे। बाकि परमेश्वर उनका हमरा देह के नुकसान पहुँचावे के आज्ञा नऽ देलन हे।8जखनी लाबान कहलन, कि हम तोर मजूरी ला चितकबरी जनावर देम, तऽ सभे जनावर चितकबरी बच्चा पईदा कईलक। जखनी ऊ अपन मन बदल देलन आउर कहलन, जेकरा पर करिया आउर उज्जर धारी होत ओही तोर बकरी होत, तऽ सभे जनावर धारी वाला बच्चा के जनम देलन।9अईसे परमेश्वर तोर बाबू जी के जानवर लेके हमरा दे देलन हे।10एक बेरी, जखनी जानवर समागम कर रहलन हल, तऽ हम एगो सपना देखली। सपना में हम ऊपर देखली आउर ई देखके चौंक गेली कि जे नर बकरा मादा बकरियन के साथे समागम कर रहल हल ओकरा में से कुछ पर करिया आउर उज्जर धारी वाला हल, कुछ पर धब्बेदार आउर कुछ पर धब्बेदार धारी हल।11सपना में परमेश्वर के एगो दूत आके हमरा से कहलन, हे याकूब! हम जबाब देली, हम हिंयाँ ही!12ऊ हमरा से कहलन, “ऊपर देखऽ आउर तूँ देखबऽ कि जेतना नर बकरा समागम कर रहल हे ओकरा पर करिया आउर उज्जर धारी हे, चाहे धब्बा वाला चाहे दाग वाला हे। अईसन येहिगुने हो रहल हे काहेकि हम ऊ सभे देखली हे जे लाबान तोरा जौरे कईलन हे।13हम ऊ परमेश्वर ही जे बेतेल में तोरा देखाई देली हल, जहाँ तूँ एगो खम्भा खड़ा कईलऽ हल आउर ओकरा पर जैतून के तेल से अभिषेक कईलऽ हल, आउर हमरा से गहिरा मन्नत कईलऽ। येहिगुने अखनी ई देश के तुरन्त छोड़ दऽ आउर पूर्वज के देश में चल जा जहाँ तोर जलम होल हल।” 14राहेल आउर लिआ उनका जबाब देलन, “हमर बाबू जी मरला पर हमनी के आउर कुछ हिस्सा नऽ देतन।15हमर बाबू जी हमनी के जौरे अईसन व्यवहार करऽ हथन मानऽ हम परदेशी ही! एतना बरिस में तूँ जे काम उनका लागी कईलऽ हे ऊ, ऊ दाम हे जे तूँ हमरा लागी देलऽ हे, बाकि जे धन तूँ उनका लागी कमईलऽ हे ओकरा में से हमनी कोई के वारीस नऽ होतन। ऊ ई सभे खर्चा कर देलन हे!16सच में ई सभे धन दौलत जे परमेश्वर हमर बाबू जी से छीन लेलन, ऊ हमर आउर हमर संतान के हे। येहिगुने ओही करऽ जे परमेश्वर तोरा करे ला कहलन हे!”17तऽ याकूब अपन बेटवन के आउर मेहरारूयन के ऊँटवन पर चढ़इलन।18जखनी ऊ चललन, तऽ ऊ अपन सभे जानवरवन के अपना आगे हाक लेलन। ऊ दोसरा सभे धन दौलत आउर समान भी अपना जौरे ले गेलन, जे ऊ पद्दनराम में रह के अपन सम्पति में जोड़लन हल। अईसे ओखनी अपन बाबू जी इसहाक भीर, जे कनान देश में रहऽ हलन, अपन यात्रा शुरू कईलन।19अखनी लाबान अपन भेड़-बकरियन के ऊन कतरेला निकसलन हल। उनका नऽ रहे बखत राहेल लकड़ी के जरीगो कूलदेउता के मूर्ति चोरा लेलन जे उनकर बाबू जी के तम्बू में हल।20एकर अलावे, याकूब अरामी लाबान के ई नऽ बता के धोखा देलन कि ऊ जानतन कि का योजना बना रहलन हल।21तऽ याकूब आउर उनकर परिवार अपन सभे दौलत लेके भाग गेलन। ओखनी परात नदी के पार कईलन आउर फिन गिलाद के क्षेत्र के पहाड़ी परदेस दक्षिण दने शुरू कर देलन।22उनकर जाय के तीसरा दिन के बाद कोई लबान के समाचार देलन, कि याकूब आउर उनकर परिवार चल गेलन हे।23येहिगुने ऊ अपन कुछ रिश्ता नाता के अपना जौरे लेलन आउर याकूब के पीछा करे ला शुरू कर देलन। ऊ सात दिन ला चलते रहलन, आउर गिलाद के पहाड़ी देश में उनका पकड़ लेलन।24तऽ रात के सपना में परमेश्वर अरामी लाबान के दर्शन देलन। ऊ कहलन, “जखनी तूँ याकूब से मिलवऽ, तऽ बहुत होशियार रहिहऽ कि तूँ उनका से बढ़ियाँ चाहे खराब कौची बोलऽ हऽ।” 25दोसरका दिन जखनी लाबान याकूब के पकड़ लेलन, तऽ याकूब आउर उनकर घराना गिलाद के पहाड़ी देश में अपन तम्बू खड़ा कर लेलन। येहिगुने लाबान आउर उनकर परिवार के लोग उहाँ अपन तम्बू खड़ा कईलन।26तऽ लाबान याकूब भीर जा के उनका से कहलन, तूँ अईसन काहे कईलऽ? तूँ हमर बेटियन के ले जा के हमरा धोखा देलऽ हे मानऽ तूँ उनका कोई लड़ाई में तलवार के बल पर बन्दी बना के पकड़ले गेलऽ हे!27तूँ काहे भाग गेलऽ आउर हमरा धोखा देलऽ? तूँ हमरा ई काहे नऽ बतईलऽ कि तूँ जा रहल हे, ताकि जखनी हम तोरा अलविदा कहम तऽ हम खुशी मना सकम आउर गा सकम, जबकि लोग तबूरा आउर बीना बजा रहलन हल?28तूँ हमरा हमर नाती-नतनी आउर हमर बेटियन के उनका जाई से पहिले चूमेला नऽ देलऽ! तूँ जौन कईलऽ ऊ बेबकूफी हल!29हमर परिवार में आउर हमरा भीर तोरा हानि पहुँचावे के शक्ति हे, “बाकि बिहान रात के जौन परमेश्वर के आराधना तोर बाबू जी करऽ हथन, ऊ हमरा से सपना में कहलन, तूँ याकूब से जे भी कहऽ हऽ ओकरा में होशियार रहिहऽ।30अखनी हम जान गेली हे कि तूँ चल गेलऽ हे काहेकि तूँ घरे वापस जाईला चाहऽ हऽ। बाकि तूँ हमर मूर्तियन के काहे चोरइलऽ?”31याकूब लाबान के जबाब देलन, हम तोरा से नऽ कहली कि हमनी जाई के योजना बना रहली हे, काहेकि हम डेरा हली, कि तूँ अपन बेटियन के हमरा से बलजोरी छीन लेवऽ।32बाकि जदि हमरा ईहाँ कोई अईसन मिलतन जिनका भीर तोर मूर्ति होत, “तऽ हम ओकरा मार देम। जखनी हमर रिश्तेदार देख रहलन होत, तऽ तूँ अपने खोज कर लिहऽ कि का कोई अईसन चीज हे जे हिंयाँ हमरा भीर हे। जदि तोरा कुछ मिलत तऽ तूँ ओकरा ले सकलऽ हे!” जखनी याकूब अईसन कहलन, तऽ ऊ नऽ जानऽ हलन कि राहेल पहिलहीं अपन बाबू जी के मूर्तियन चोरा लेलन हल।33तऽ लाबान याकूब के तम्बू में, फिरू लिआ के तम्बू में, आउर फिन दूनो दासियन के तम्बू में गेलन, आउर मूर्ति खोजे लगलन, बाकि ऊ नऽ मिलल। उनकर तम्बू से निकसला के बाद ऊ राहेल के तम्बू में गेलन।34बाकि राहेल पहिले से मूर्ति लेके ऊँट के काठी में रख देलन, आउर काठी पर बैठ गेलन। येहिगुने लाबान उनका राहेल के तम्बू के भीतरे सभे जगह खोजलन, बाकि ऊ नऽ मिलल।35राहेल अपन पिता से कहलन, हे प्रभु, हमरा पर गोस्सा नऽ करऽ, बाकि हम सामने खड़ी होके तोर आदर नऽ कर सकऽ ही, काहेकि हम मासिक धर्म में चल रहली हे। तऽ लाबान के आउर जादे खोजला पर भी उनका अपन घरेलु देउता मूर्ति नऽ मिलल।36तऽ याकूब गोस्सा होलन। ऊ लाबान से कहलन, हम कौची अपराध कईली हे? तूँ कौन पाप के चलते हमर पीछा कईलऽ हे?37अखनी तूँ हमर सभे सम्पति के खोज लेलऽ, बाकि तोर अपन कुछ नऽ मिलल! जदि तोरा कुछ मिलल हे तऽ ओकरा हमर रिश्तेदरवन आउर अपन रिश्तेदरवन के सामने रख दऽ, ताकि ओखनी फैसला कर सकतन कि कौन सही हे, तूँ कि हम!38हम बीस बरस ला तोरा जौरे रहली। एतना समय में तोर भेड़-बकरियन के गर्भपात नऽ होल। हम तोर भेड़-बकरियन में से कोई मेढ़ा के मार के नऽ खइली हे।39जखनी तोर कोई जानवर पर जंगली जानवर हमला कईलक आउर ओकरा मार देलक तऽ हम ओकरा तोरा भीर नऽ लइली। हम मरल जानवर के जगह पर अपन जिन्दा जानवर के रख देली। जखनी भी तोर कोई जानवर दिन में चाहे रात में चोरी हो जा हल, तऽ तूँ हमरा से मांग करऽ हलऽ कि हम ओकर बदला में अपन कोई जानवर रख देऊं।40हम दिन के गर्मी से, आउर रात के सर्दी से दुखी होली। हमरा ज्यादातर नींद नऽ आवऽ हल!41हम तोर घर में बीस बरस ला रहली। हम तोर दूनो बेटियन से बियाह करे लागी चौदह बरस ला तोरा लागी सेवा के काम कईली, आउर तोर कुछ भेड़-बकरियन खरीदे ला छः बरस ला काम कईली। ऊ दौरान तूँ बदल के हमर मजूरी दस गुना कम कर देलऽ।42जदि परमेश्वर, जिनका हमर दादा अब्राहम दण्डवत कईलन हल, आउर जिनका सामने हमर बाबू जी इसहाक डर से काँपऽ हलन जदि ऊ हमरा जौरे नऽ होतन हल, आउर हमर मदत नऽ करतन हल तऽ तूँ हमर हाथ में देले बेगर हमरा जायला कह देतऽ हल! बाकि परमेश्वर देखलन कि हम केतना दुःख सह रहली हे आउर हम केतना कड़ा मेहनत करऽ ही, येहिगुने कल रात ऊ तोरा से कहलन कि तूँ हमरा जौरे जे कईलऽ हे ऊ गलत हल।43लाबान याकूब के जबाब देलन, “ई दूनो औरतियन हमर बेटी हे, आउर ओकर बाल बच्चा हमर नाती-नतनी हे, आउर जानवर हमर जानवर हे। तूँ ईहाँ जे कुछ देख रहलऽ हे ऊ हमरे हे!44हम उनका बनईले रखे लागी कुछ नऽ कर सकली हे, येहिगुने हमनी के तोरा आउर हमरा बिच में एगो वाचा बाँधे के चाही। ई तोर आउर हमर बीच गवाही के रूप में काम करतन।”45येहिगुने याकूब एगो बड़का गो पत्थल लेलन आउर ओकरा ओकर चोटी पर रखलन।46तऽ याकूब अपन रिस्तेदार से कहलन, “कुछ पत्थल जमा करऽ।” येहिगुने ओखनी चट्टान जमा कर के एगो ढेर बना देलन, आउर ओखनी हूँए ढेर भीर कुछ खाना खईलन।47लाबान ढेर के इब्रानी नाम जैगर यज्रसहादुथा रखलन, बाकि याकूब ढेर के इब्रानी नाम गिलियाद रखलन। 48लाबान याकूब से कहलन, ई चट्टानमन के जे ढेर हमनी आज ईहाँ रखली हे, ई हमनी के तोर वादा के याद करे में मदत करतन। येहिगुने याकूब एकर नाम गिलियाद रखलन।49ओखनी ऊ जगह के नाम मिस्पा भी रखलन, जे इब्रानी भाषा के जईसन लगऽ हे जेकर माने हे कि “प्रहरीदुर्ग”, काहेकि लाबान कहलन, “हम यहोवा से प्रार्थना करम कि जहिया ला हमनी एक दोसरा से अलग रहम, तहिया ला तोरा पर आउर हमरा पर नजर रखतन, ताकि हम कोशिश नऽ करम एक दोसरा के नुकसान पहुँचावे के। 50जदि तूँ हमर बेटियन के जौरे दुरवेवहार करबऽ, चाहे दूसरा औरत से बियाह कर लेवऽ, चाहे कोई हमरा एकरा बारे में नऽ बतईतन, तऽ ई नऽ भूलइहऽ कि परमेश्वर देख रहलन हे कि तूँ आउर हम कौची कर रहली हे!”51लाबान याकूब से ई भी कहलन, “तूँ ई बड़का गो पत्थल आउर चट्टान के ई ढेर के देखऽ, जेकरा हमनी अपना बीच में खड़ा कईली हे।52चट्टानमन के ई ढेर आउर ई बड़का गो पत्थल दूनो हमनी के सबूत रहे आउर याद देलावत, कि हम तोरा हानि पहुँचावे लागी ई चट्टान के पार नऽ जाम आउर तूँ हमरा हानि पहुँचावे ला ई चट्टान के पार नऽ अईवऽ53जौन परमेश्वर के अब्राहम आराधना कईलन, जौन परमेश्वर के आराधना नाहोर कईलन आउर जौन देउतबन के आराधना उनकर पूर्वज तेरह कईलन, ऊ हमनी में से कोई एगो के सजा देतन, जदि हमनी में से एक दूसरा के हानि पहुँचायेम।” याकूब परमेश्वर द्वारा गहिड़ाय से वादा कईलन जेकरा से उनकर बाबू जी इसहाक डेरा हलन कि ऊ ओही करतन जे ओखनी अपन शान्ति समझौता में कहलन हल।54आउर याकूब ऊहाँ पहाड़ी देश में परमेश्वर ला बलिदान चढ़इलन, आउर अपन कुटुममन के अपना जौरे खाना खाई लागी बोलईलन। खाना खईला के बाद ऊ, ऊ रात हुंए सूत गेलन।55बिहान होके लाबान अपन नाती-नतनी आउर बेटियन के चूमलन, आउर ऊ परमेश्वर से आशीर्वाद देवे लागी प्रार्थना कईलन। तऽ लाबान आउर उनकर लोग चल गेलन आउर घरे लौट अईलन।
Bridge Connectivity Solutions Pvt. Ltd.