Genesis26
1कुछ समय बाद देश में भयंकर अकाल पड़ल। ऊ ऊ अकाल से अलग हल जे अब्राहम के जिन्दा रहे बखत पड़ल हल। येहिगुने इसहाक पलिश्ती लोगवन के राजा अबीमेलेक से बात करे ला दक्षिण पूरुब में गरार शहर में गेलन।2उहाँ यहोवा उनका दर्शन दे के कहलन, मिस्र में मत जा! ऊ देश में रहऽ जे हम तोरा से बतावऽ ही!3ई देश में रहऽ, आउर हम तोर मदत करम आउर तोरा आशीर्वाद देम, काहेकि ई तोर आउर तोर वंशज के हे कि हम ई सभे जमीन देम, आउर हम ओही करम जे हम अब्राहम से गहराई से किरिया खईलन हल।4हम तोर वंश के आकाश के तरेगन के जईसन अनगिनती करम। हम ई सभे जमीन तोर वंश के देम, आउर हम तोर वंश के धरती के सभे जाति लागी आशीष के कारण बनायेम। 5हम अईसन करम काहेकि अब्राहम हमर बात मानलन हे। ऊ, ऊ सभे के मानलन जे हम उनका करे ला कहली हल, ऊ सभे जे हम उनका करे के आज्ञा देली हल, ऊ सभे जे हम एलान कईली हल आउर सभे नियम जे हम उनका देली हल।6येहिगुने इसहाक अपन मेहरारू आउर बेटवन के जौरे गरार में रहलन।7जब एक दिन गरार के लोग पूछलन, ऊ औरत कौन हे, तऽ इसहाक जबाब देलन, “ऊ हमर बहिन हे।” इसहाक अईसन येहिगुने कहलन काहेकि ऊ ई कहे से डेरा हलन, कि “ऊ हमर मेहरारू हे।” ऊ सोंचलन, “रिबका बड़ी सुन्दर हे, येहिगुने ऊ उनका चाहतन। ऊ उनका पावे ला हमरा मार देतन।”8जखनी इसहाक के ऊहाँ ढेर समय हो गेल, तऽ एक दिन पलिश्ती लोग के राजा अबीमेलेक अपन महल के खिड़की से नीचे देखलन आउर इसहाक के अपन मेहरारू रिबका के दुलारते देख के चौंक गेलन।9अब अबीमेलेक इसहाक के बोला के उनका से कहलन, अखनी हम जानऽ गेली कि ऊ सच में तोर मेहरारू हे! तऽ तूँ ई काहे कहलऽ, कि 'ऊ हमर बहिन हे? इसहाक जबाब देलन, “हम अईसन येहिगुने कहली काहेकि हम सोंचली हल कि ईहाँ कोई उनका पावे ला हमरा मार सकलन हे।”10अबीमेलेक कहलन, “तोरा हमरा जौरे अईसन नऽ करे के चाहऽ हल! हो सकऽ हे कि हमनी में से कोई तोर मेहरारू के जौरे रहलन होत, आउर तूँ हमनी के बड़का पाप के दोषी ठहरईलऽ होत!”11तऽ अबीमेलेक अपन सभे प्रजा से कहलन, “कि ई अादमी चाहे इनकर मेहरारू के हानि नऽ पहुँचइहऽ! जे कोई अईसन करत ओकरा जरुर फाँसी दे देवल जायेत!”12ऊ साल इसहाक ऊ देश में अनाज बुनलन, आउर ढेर मनी उपज होल, काहेकि यहोवा उनका आशीष देलन हल।13इसहाक अपन हक के संपत्ति हासिल करते गेलन, ईहाँ ला कि अन्त में ऊ बड़ी धनवान हो गेलन।14उनका भीर भेड़ी-बकरियन, गाय-बैलवन, के बड़का-बड़का झुंड आउर ढेर मनी दास हल। येहिगुने पलिश्ती लोग उनका से डाह करे लगलन।15येहिगुने जेतना कुईयाँ उनकर बाबू जी अब्राहम के सेवक खनलन हल, ऊ सभे के पलिश्तियन मट्टी से भर देलन।16तऽ अबीमेलेक इसहाक से कहलन, तूँ हमरा से ढेर बढ़ गेलऽ हे, येहिगुने हम चाहऽ ही, कि तूँ हमर देश से चल जा।17तऽ इसहाक आउर उनकर परिवार ऊहाँ से चल गेलन। ओखनी जा के गरार के तराई में अपन तम्बू खड़ा कईलन, आउर उहाँ बस गेलन।18ऊ जगह में बड़ी सा कुईयाँ हल जे इसहाक के पिता अब्राहम के रहते खनदल गेल हल, बाकि अब्राहम के मरला के बाद पलिश्ती लोग ओकरा मट्टी से भर देलन। बाकि इसहाक आउर उनकर सेवक फिन से कुईयाँ खनलन, आउर इसहाक सभे कुईयाँ के ओही नाम रखलन जे उनकर बाबू जी रखलन हल।19इसहाक के सेवकवन घाटी में खोदाई कईलन आउर बहित पानी के एगो सोता खोजलन।20बाकि जे अादमी गरार के तराई में जानवर चरावऽ हलन, ओखनी इसहाक के जानवरवन के देख भाल करे वाला लोगवन से बहस कईलन। ओखनी कहलन, "ई कुईयाँ के पानी हमर हे!" येहिगुने इसहाक कुईयाँ के नाम एशेक रखलन, जेकर माने "विवाद", हे काहेकि ओखनी ई बात पर विवाद करऽ हलन कि एकर मालिक कौन हे। 21तऽ इसहाक के सेवकवन एगो आउर कुईयाँ खनलन, बाकि ओखनी ई बात पर झगड़े लगलन कि ऊ भी केकर हे। येहिगुने इसहाक एकर नाम सित्ना रखलन, जेकर माने कि “विरोध हे।”22ओखनी ऊहाँ से आगे बढ़लन आउर एगो आउर कुईयाँ खनलन, बाकि अबकी बेरी कोई एकरा ला लड़ाई नऽ कईलन कि ओकर मालिक कौन हथन। येहिगुने ऊ ओकर नाम रहोबोत रखलन, जेकर माने हे कि “खाली जगह”, ई कह के, “यहोवा हमरा रहे लागी एगो खाली जगह देलन हे, एगो अईसन जगह जेकरा दोसरा लोग नऽ चाहऽ हथन, आउर हम ईहाँ बहुत खुसहाल हो जाम।” 23हूँआँ से इसहाक बेर्शेबा गेलन।24पहिलका रात जखनी ऊ ऊहाँ हलन, यहोवा उनका दर्शन दे के कहलन, "हम ऊ परमेश्वर ही जिनकर आराधना तोर बाबू जी अब्राहम कईलन हल। कोई चीज से नऽ डेरा। हम तोर सहायता करम, आउर तोरा आशीष देम, आउर जे वचन हम अपन दास के अब्राहम से देली हे, ओकरा चलते हम तोर वंश के गिनती बहुत बढ़ायेम।25येहिगुने इसहाक ऊहाँ एगो वेदी बनईलन, आउर यहोवा के दण्डवत करे ला बलिदान चढ़इलन। ऊ ऊहाँ अपन तम्बू बनईलन, आउर उनकर सेवकवन एगो कुईयाँ खनदेला शुरू कर देलन।26जखनी ऊ कुईयाँ खनदते हलन, तऽ राजा अबीमेलेक अपन सलाहकार अहुज्जत आउर अपन सेनापति पीकोल के जौरे लेके गरार से इसहाक भीर अईलन।27इसहाक उनका से पूछलन, "तूँ फिर हमरा प्रति दुश्मन जईसन व्यवहार कईलऽ आउर हमरा निकास देलऽ। तऽ अखनी तूँ हमरा भीर काहे अईलऽ हे?"28ओकरा में से एगो जबाब देलन, “हम देखली हे, कि यहोवा तोर मदत करऽ हथन। येहिगुने हम एक दोसर से कहली, 'हमरा अपना आउर इसहाक के बीच एगो शपथ करे के चाही। येहिगुने हमनी के तोरा जौरे शांति के वाचा बाँँधे के चाही,29जेकरा में कहल गेल हे कि तूँ हमनी के कोई नुकसान नऽ करबऽ, ओईसहीं जईसे हमनी तोरा परेशान नऽ कईली। हमनी सभे तोहनी जौरे निमन बर्ताव कईली आउर तोरा शांति के साथे विदा कईली। आउर अखनी यहोवा तोरा आशीर्वाद दे रहलन हे।”30येहिगुने इसहाक एबिमेलेक आउर उनकर लोग लागी भोज कईलन, आउर सभे कोई खईलन पीलन।31बिहान होके सवेरे ऊ सभे कोई एक दोसरा से वादा कईलन कि ऊ जे वादा कईलन हे ओकरा पूरा करतन। तऽ इसहाक ओखनी के शान्ति से घरे भेज देलन।32ऊ दिन इसहाक के सेवक उनका भीर अईलन आउर उनका से कहलन, कि हम कुईयाँ खन लेली हे। ओखनी कहलन, “हमनी के कुईयाँ में पानी मिलल!”33इसहाक कुईयाँ के नाम शिबा रखलन, जे सुने में इब्रानी सब्द जईसन लगऽ हे जेकर माने कि “सपथ” हे। अखनी के समय में ऊहाँ के शहर के नाम बेर्शेबा हे जेकर माने कि “शान्ति समझौता हे।” 34जहिया एसाव चालीस साल के होलन, तऽ ऊ बेरी के बेटी यूदित आउर एलोन के बेटी बासमत से बियाह कईलन। ऊ दुन्नो औरतियन हित्ती के वंशज हलन, इसहाक के वंशज से नऽ।35एसाव के दूनो मेहररुअन इसहाक आउर रिबका के नाराज कर देलन।
Bridge Connectivity Solutions Pvt. Ltd.