Genesis25
1सारा के मरला के कुछ समय बाद, अब्राहम दोसर औरत से बियाह कईलन जेकर नाम कतूरा हल।2बाद में ऊ छःगो बेटा के जलम देलन: जिम्रान, योक्षान, मदना, मिद्यान, इशबाक आउर शूह।3योक्षान दूगो बेटा, शेबा आउर ददान के पिता बनलन। ददान के वंशज असीरिया, लतुश आउर लुम्म लोग के समाज होलन।4मिद्यान के बेटा एपा, एपेर, हनोक, अबीदा आउर एल्दा होलन। ओखनी सभे कतूरा के वंशज हलन।5अब्राहम एलान कईलन कि हमर मरला के बाद, इसहाक के हमर सभे धन-दौलत पर मालिक रहत।6बाकि जहिया अब्राहम जिन्दा हलन, तऽ ऊ अपन रखैलियन के बेटवन के दान देलन, आउर ओखनी कनान के पूरुब दने कोई देश में रहे लागी भेज देलन, कि ओखनी उनकर बेटा इसहाक से दूर रहतन।7अब्राहम एक सौ पचहत्तर बरस के उमर ला जिन्दा रहलन।8ऊ बड़ी बूढ़ा होके मर गेलन आउर अपन ऊ पूरखन में मिल गेलन जे पहिले मर गेलन हल।9आउर उनकर बेटा इसहाक आउर इश्माएल उनकर मरल देह मम्रे भीर मकपेला जगह के गुफा में, ऊ खेत में गाड़ देलन, जेकरा अब्राहम सोहर के बेटा हित्ती वंश के एप्रोन से मोल लेलन हल। 10ई खेत अब्राहम हित्ति से मोल लेलन हल। अब्राहम के ओकर मेहरारू सारा के साथे ऊहें दफनावल गेल हल। 11अब्राहम के मरला के बाद, परमेश्वर उनकर बेटा इसहाक के आशीर्वाद देलन। इसहाक बियर लहैरोई भीर रह रहलन हल।12ई ऊ हथन जे अब्राहम के बेटा इश्माएल के वंशज हलन, जिनका सारा के दासी मिस्र के हाजिरा जलम देलन हल।13उनकर जलम के अनुसार ओखनी के नाम ई हल: इश्माएल के सभे से बड़का बेटा के नाम नबायोत हल। ओकर बाद केदार, अदबेल, मिबसाम,14मिश्मा, दूमा, मस्सा,15हदर, तेमा, यतूर, नापीश आउर केदमा पईदा होलन।16इश्माएल के बारह बेटा ऊ गोतरवन के मुखिया बन गेलन जिनकर ई नाम हल। ओखनी में से सभे के अपन-अपन गाँव आउर सिविर जगह हल,17इश्माएल एक सौ सैंतीस बरस ला जिन्दा रहलन। फिन ऊ मर गेलन आउर अपन पूरखन में मिल गेलन जे पहिले मर गेलन हल।18अब्राहम वंश के लोग शूर आउर हवीला के बीच के जगह में, जे मिस्र के सीमा भीर हल, जेकरा से अश्शूर दने यात्रा करऽ हलन, वश गेलन। बाकि अब्राहम के दूसरा वंश के एक जौरे शान्ति से नऽ रह पईलन। 19अब्राहम के बेटा इसहाक के वंश ई सभे होलन। अब्राहम इसहाक के बेटा होलन।20जहिया इसहाक चालीस बरस के होलन, तऽ ऊ बतूएल के बेटी रिबका से बियाह कईलन। बतूएल पद्दनराम के अराम के वंशज में से एगो हलन। रिबका लाबान के छोटकी बहिन हल, जे अराम लोगवन से हलन।21बियाह के बड़ी बाद ला रिबका के कोई बाल-बच्चा नऽ हल। येहिगुने इसहाक अपन मेहरारू के बारे में यहोवा से प्रार्थना कईलन, आउर यहोवा उनकर प्रार्थना सुन लेलन। उनकर मेहरारू रिबका गर्भवती हो गेल।22ओकर पेट में दूगो बच्चा हल, आउर ऊ एक दूसरा के धक्का देते रहऽ हल। तऽ ऊ कहलन, "हमरा जौरे अईसन काहे हो रहल हे?" येहिगुने ऊ यहोवा से एकर बारे में पूछलन।23यहोवा उनका से कहलन, “तोर जुड़वा से दूगो देश पईदा होत। आउर ऊ दूनो देश एक दोसरा से अलगे हो जायेत, आउर एक दूसरा से जादे तागतबर हो जायेत। आउर बड़का छोटका के सेवा करतन।”24जहिया रिबका पेट से होलन, तऽ ई सच होल! जुड़वा लईका के जलम होल!25जे पहिले जलम लेलक ऊ लाल हल, आउर ओकर समूचे देह में नालिश से बनल कपड़ा के जईसन रोमा हल। येहिगुने ओखनी ओकर नाम एसाव रखलन।26तऽ एसाव के एड़ी पकड़ के ओकर भाई जलम लेलक। येहिगुने ओखनी ओकर नाम याकूब रखलन। जखनी जुड़वा बच्चा के जनम होल तऽ इसहाक साठ बरस के हलन।27जखनी लईका बड़का होल, तऽ एसाव जंगली जनावरवन के बड़ी बढ़ियाँ सिकारी बन गेलन। ऊ ढेर समय बहारसी खेत में गुजारलन। बाकि, याकूब एगो संत अादमी हलन जे तम्बू में रह रहलन हल।28इसहाक के एसाव जादे प्रेम कईलन, काहेकि एसाव के जरिये मारल गेल जनावर के माँस के स्वाद उनका बड़ी बढ़ियाँ लगऽ हल। बाकि रिबका के याकूब जादे पसंद अईलन।29एक दिन जखनी याकूब खायला पक्का रहलन हल, तऽ एसाव बड़ी भूखाल खेत से घरे अईलन।30ऊ याकूब से कहलन, “हमरा ऊ लाल चीज में से कुछ खायला दऽ, काहेकि हम भूखल मर रहली हे!” येहिगुने एसाव के दोसरका नाम एदोम हल।31याकूब कहलन, “जदि तूँ हमर पिता के धन-दौलत के जादे हिस्सा पावे ला अपन पहिलौठा अधिकार हमरा बेच देवऽ, तऽ हम तोरा कुछ देम।”32एसाव जबाब देलन, “देख अखनी हम भूखल मरल जा रहली हे। जदि अखनी हम मर जाम तऽ हमर अधिकार हमरा मदत नऽ करत।”33याकूब कहलन, हमरा से किरिया खा, कि तूँ हमरा पहिलौठा के अधिकार दे रहलऽ हे। एसाव ओईसहीं कईलन। ऊ अपन पहिले जलमे के अधिकार याकूब के बेच देलन।34तऽ याकूब एसाव के कुछ रोटी आउर मसूरी के दाल के कुछ सब्जी देलन। एसाव खईलन पीलन, आउर उठ के चल देलन। अईसन कर के, एसाव देखइलन कि उनका पहिलौठा के रूप में अपन अधिकार में कोई दिलचस्पी नऽ हल।
Bridge Connectivity Solutions Pvt. Ltd.