Genesis24
1कुछ साल बाद अब्राहम अखनी बड़ी बूढ़ा हो गेलन हल। यहोवा अब्राहम के बड़ी किसीम के आशीर्वाद देलन हल।2एक दिन अब्राहम अपन घर के प्रधान सेवक से, जे अब्राहम के सभे धन के अधिकारी हलन, कहलन, “अपन हाथ हमर जांघ तर रख के वादा करऽ कि जे हम तोरा कहम तूँ ओही करबऽ।3ई जानते भर में कि आसमान आउर धरती के बनावे वाला यहोवा सुन रहलन हे, वादा करऽ कि तूँ हमर बेटा इसहाक ला कनान लोगवन के लड़कीयन में से, जिनका बीच हम अखनी रह रहली हे, कोई लईकी नऽ लइबऽ।4एकर बदले, हमर देश आउर हमर रिस्तेदार भीर जा। ओखनी में से हमर बेटा इसहाक ला एगो मेहरारू ले आवऽ।” 5सेवक उनका से पूछलन, जदि अपने के रिस्तेदार में से हमरा कोई औरत नऽ मिलतक, आउर ऊ हमरा जौरे ई कनान देश में आवेला नऽ चाहतन, तऽ का करम? का अपने के बेटा के मेसोपोटामिया में ले जाय के चाही जहाँ से अपने अईलन हे, ताकि ऊ एगो मेहरारू खोज सकतन आउर ऊहाँ रह सकतन?6अब्राहम जबाब देलन, “नऽ, बेफिकीर रहऽ कि तूँ हमर बेटा के ऊहाँ नऽ ले जइबऽ!7स्वर्ग के बनावे वाला परमेश्वर यहोवा हमरा ईहाँ ले अईलन। ऊ हमरा हमर पिता के घरे से आउर ऊ देश से जहाँ हमर रिश्तेदरवन रहऽ हलन, ले अईलन। ऊ हमरा से बात कईलन आउर हमरा से एगो बड़का वादा कईलन। ऊ कहलन, हम कनान देश तोर वंशज के देम। ऊ दूत के तोर आगे आगे भेजतन 8बाकि जदि जौन औरत तोरा मिलत ऊ तोरा जौरे नऽ आवत, तऽ तूँ जे वचन दे रहलऽ हे ओकरा तोड़ेला आजाद हऽ। खाली एक चीज जे तोरा नऽ करे के चाही ऊ ई हे कि हमर बेटा के ऊहाँ रहे ला नऽ ले जइहऽ।”9तऽ सेवक अब्राहम के जांघ के बीच में अपन हाथ रखलन आउर एकरा ला बड़का वादा कईलन।10तऽ सेवक अपन मालिक के दसगो ऊँट के लेलन, आउर ओकरा पर सभे रगन के समान लाद लेलन, जेकरा उनकर मालिक ले जाय ला देलन हल। फिन ऊ अराम नहरैम जाय लागी निकल गेलन, जे उत्तर मेसोपोटामिया में हे। ऊ नाहोर नगर में पहुँचलन। 11जखनी दास नाहोर पहुँचलन, तऽ दुपहर के समय हल, जौन घड़ी औरतियन पानी लेवे ला कुईयाँ पर जा रहल हल। ऊ ऊँटवन के ऊ कुईयाँ भीर ठेहुनियाँ मार के बैठइलन, जे नगर के बहारसी हल।12सेवक अपन मन में प्रार्थना कईलन, “हे यहोवा, हे परमेश्वर जिनकर उपासना हमर स्वामी अब्राहम करऽ हथन उनका पर करुणा करऽ, आज हमरा कामयाब कर दऽ! हमर स्वामी अब्राहम पर विश्वास करऽ!13हमर बात सुनऽ। हम पानी के एगो कुईयाँ भीर ठाड़ा ही, आउर नगर के बेटियन पानी लेवे ला आ रहल हे।14हम तोरा से ई पूछऽ ही: हम लईकियन में से एगो के कहम, 'कृपा कर के अपन घईला नीचे धरऽ कि हम तनी सा पानी पी सकम। जदि ऊ कहतन, 'तनी सा पानी पी लऽ, आउर हम तोर ऊँट ला पानी भर देम, तऽ हम जानऽ लेम कि ई ओही लईकी हे, जिनका तूँ अपन दास इसहाक लागी बियाह करे ला चुन लऽ हे, आउर हम जान लेम कि तूँ हमर स्वामी पर करुणा कईलऽ हे।”15उनका प्रार्थना करे से पहिलही रिबका नाम के एगो लड़की कन्धा पर घईला धईले ऊहाँ अईलन। ऊ अब्राहम के छोटका भाई नाहोर के मेहरारू मिल्का के बेटा बतूएल के बेटी हलन।16ऊ बड़ी सुन्दर आउर कुमारी हलन। कोई अादमी ओकरा जौरे कहियो नऽ सूतल हल। ऊ कुईयाँ के किनारे गेलन, अपन घईला में पानी भर लेलन आउर फिन उपरे आ गेलन।17अब्राहम के दास तुरन्त ओकरा से भेंट करे ला दौगलन, आउर कहलन अपन घईला में से हमरा तनी पानी दऽ।18ऊ जबाब देलन, “तनी पी लऽ स्वामी!” ऊ अपन घईला कन्धा से उतारलन, आउर उनका पानी पीयइलन।19जखनी ऊ उनका पानी पिया देलन, तऽ ऊ कहलन, हम तोर ऊँट लागी भी तनी पानी ला रहली हे, जब ला ऊ छक नऽ जायेत।20ऊ तुरन्त अपन घईला के पानी जनाबर के पानी के नाद में उण्डेल देलन। तऽ ऊ फिन से कुईयाँ भीर अईलन, आउर सभे ऊँटवन ला पानी भरते रहल।21दास बेगर कुछ कहलऽ वश देखते रहलन। ऊ जानऽ हलन कि का यहोवा उनका यात्रा के सफल बनईलन हे कि नऽ।22आखिरकार ऊँट पानी पी लेलक, तऽ दास एगो सोना के नथुनी, जेकर वजन छऊ गराम हल, आउर ओकर हाथ लागी दूगो सोना के कंगन, जे लगभग एक-एकगो दस गराम के हल, निकास के रिबका के देलन, आउर कहलन, कि एकरा पेहेन लऽ। 23तऽ ऊ कहलन, “हमरा बतावऽ कि तूँ केकर बेटी हऽ? ई भी बतावऽ का तोर पिता के घर में हमरा आउर हमर आदमियन ला आज रात ठहरेला ला जगह हे?”24ऊ जबाब देलन, “हमर पिता के नाम बतूएल हे। ऊ नाहोर आउर उनकर मेहरारू मिल्का के बेटा हथन।25हाँ हमरा भीर जगह हे जहाँ तूँ आज रात में सूत सकलऽ हे, आउर हमरा भीर ऊँटवन के खियावे लागी भूसा आउर ढेर मनी अनाज हे।”26उदास झुक के यहोवा के दण्डवत कईलन।27ऊ कहलन, “धन्य हऽ हमर स्वामी अब्राहम के परमेश्वर यहोवा जिनकर आराधना हमर स्वामी अब्राहम करऽ हथन। ऊ अपन करुणा आउर सच्चाई ई देखावे ला शुरू कईलन हे कि हमर स्वामी के परति वफादार आउर विश्वासयोग्य हथन। यहोवा हमरा ई यात्रा में सीधे हमर स्वामी के रिश्तेदरबन के घर ला पहुँचईलन हे!”28तऽ लईकी दौग के अपन माय के परिवार में सभे के जे कुछ होल हल, बता देलन।29रिबका के बड़का भईया जिनकर नाम लाबान हल तुरन्त दास भीर गेलन, जे बहारसी कुईयाँ भीर हलन।30ऊ अपन छोटकी बहिन के नाक के नथुनी आउर हाथ में कंगन देख के चौंक गेलन आउर ऊ रिबका के ई कहते सुनलन स्वामी कि ऊ अादमी उनका से कौची कहलन हल। येहिगुने ऊ बहारसी गेलन आउर ऊ अादमी के कुईयाँ के नजदीक ऊँट भीर खड़ा देखलन।31ऊ, ऊ अादमी से कहलन, हे यहोवा के धन्य लोग, आवऽ! तूँ ईहाँ बहारसी काहे खड़ा हऽ? हम घर में तोर ला एगो कोठरी आउर ऊँटवन के रहे लागी भी जगह तइयार कईली हे।32एहिसे सेवक घर में गेलन, आउर लावान के सेवकवन के ऊँटवन के उतार देलन। ऊ ऊँटवन लागी भूसा आउर अनाज, आउर उनकर सेवक आउर उनकर साथियन लागी गोड़ धोवे ला पानी ले अईलन।33आउर ऊ उनका खाय ला उनका भीर खाना लइलन, बाकि ऊ कहलन, जखनी ला हम जे कुछ तोरा से कहेला हे ऊ नऽ कह देम, तखनी ला हम नऽ खायेम। तऽ लाबान कहलन “हमरा कह दऽ!”34तऽ दास कहलन, “हम अब्राहम के दास ही।”35यहोवा हमर स्वामी के बड़ी आशीष देलन हे, ईहाँ ला कि ऊ बड़ी धनमान हो गेलन हे। यहोवा उनका ढेर मनी भेड़-बकरी, गाय-बैल, ढेर मनी सोना, चाँदि, दास-दासी, ऊँट आउर गधा देलन हे।36हमर स्वामी के मेहरारू सारा जहिया बड़ी बूढी हो गेलन, तऽ उनका एगो बेटा पईदा होल, आउर हमर मालिक अपन सभे कुछ अपन बेटा के दे देलन हे।37हमर स्वामी हमरा से पक्का वादा कर के कहलन, कि जौन कनान देश में हम रहऽ ही, ओकर लड़कियन में से हमर बेटा ला औरत नऽ लइहऽ।38एकर जगह पर, हमर बाबू जी के परिवार में, हमर अपन कुल में जा, आउर ओखनी में से हमर बेटा लागी एगो मेहरारू ले आवऽ।39तऽ हम अपन स्वामी से पूछली, जदि ऊ औरत जिनका ऊ हमरा दे हथन ऊ हमरा जौरे नऽ अईतन, तऽ हम कौची करम?40ऊ जबाब देलन, यहोवा, जिनकर हम हमेशा आज्ञा मानते अईली हे, अपन दूत तोरा जौरे भेजतन, आउर ऊ तोर यात्रा सफल करतन। ऊ तोरा हमर कुल में से, हमर बाबू जी के परिवार में से हमर बेटा ला एगो लईकी खोजे में सक्षम बनइतन।41बाकि जदि हमर वंश उनका तोरा जौरे आवे से मानऽ करतन, तऽ तूँ शपथ से बच जइबऽ काहेकि तूँ हमर आज्ञा के मान लऽ हे।42आज जखनी हम कुईयाँ भीर अईली, तऽ हम प्रार्थना कईली कि, हे यहोवा, जौन परमेश्वर के उपासना हमर स्वामी अब्राहम करऽ हथन, जदि तूँ हमरा ई यात्रा में सफल करे ला चाहऽ हऽ, तऽ कृपा कर के हमरा लागी ई करऽ:43हम एगो कुईयाँ के किनारे खड़ा ही, जहाँ लड़कीयन पानी भरे ला अइते रहऽ हथन। हम तोरा से ई पूछऽ ही, कि जदि हम कोई लईकी से कहम, कि “हमरा अपन घईला में से थोड़ा पानी पिया दऽ”44आउर जदि ऊ हमरा से कहतन, कि “जरुर तनी सा पानी पी लऽ, आउर हम तनी सा पानी निकास लेम। तोर ऊँटवन लागी” तऽ ओही औरत होत जिनका तूँ हमर स्वामी के बेटा ला चुन लऽ हे!45एकरा से पहिले कि हम प्रार्थना कर लेली, रिबका अपन कन्धा पर पानी के घईला उठईले हमरा भीर अईलन। ऊ कुईयाँ भीर अईलन आउर पानी ले अईलन। हम उनका से कहली, कृपा कर के हमरा पिया दऽ46ऊ तुरन्त अपन घईला नीचे धर देलन आउर कहलन, तनी सा पीयली! आउर हम तोर ऊँटवनो ला पानी भर देम। येहिगुने हम तनी सा पानी पीयली, आउर ऊ ऊँटवनो लागी पानी ले अईलन।47तऽ हम उनका से पूछली, तूँ किनखर बेटी हऽ? ऊ कहलन, 'नाहोर आउर उनकर मेहरारू मिल्का के बेटा बतूएल के बेटी। हम उनकर नाक में नथुनी पेहनइली आउर उनका हाथ में कंगन पेहनइली।48तऽ हम झुक के यहोवा के दण्डवत कईली, आउर यहोवा परमेश्वर के धन्य कहलन, जिनकर हमर स्वामी अब्राहम आराधना करऽ हथन, जौन हमरा सच्चा राह पर चलइलन हे कि हमर मालिक के भाई के पोती के हमर मालिक के बेटा लागी मेहरारू बना देतन।49जदि तूँ हमर स्वामी के बड़का कुल-वंश में होके उनका परति कृपा आउर ईमानदारी से काम करऽ हऽ, तऽ हमरा से बोलऽ, कि हम जे मांग रहली हे, तूँ ओही करबऽ, तऽ ओही हमरा बतावऽ, ताकि हम जान सकम कि कौची करे ला हे।50लाबान आउर बतूएल जबाब देलन, “ई यहोवा दने से साफ तोर से आयेल हे। येहिगुने हमनी दूनो ई नऽ कह सकली हे कि ई काम सही हे कि गलत।51रिबका ईहाँ तोर सामने हे। ओकरा ले जा, आउर ऊ तोर मालिक के बेटा के मेहरारू होतन, जईसे यहोवा बतईलन हे।”52जखनी अब्राहम के दास ई बात सुनलन, तऽ धरती पर गिर के यहोवा के दण्डवत कईलन।53तऽ दास चाँदी, सोना के जेबर, आउर कपड़ा निकास के रिबका के देलन। आउर ऊ उनकर भाई लाबान आउर उनकर माय के भेंट देलन।54तऽ ऊ खाना खईलन आउर पीलन। अब्राहम के दास के जौरे जौन लोग हलन ऊ भी ऊ रात हूँए सूतलन। फिन बिहान होके दास कहलन, “अखनी हमरा अपन स्वामी भीर जाय ला इजाजत दे दऽ।”55बाकि उनकर भईया आउर उनकर माय जबाब देलन, कि “लईकी के लगभग दस दिन ला हमरे भीर रहे दऽ। ओकर बाद तूँ उनका ले जा सकलऽ हे।”56बाकि ऊ उनका जबाब देलन, “यहोवा हमर यात्रा सफल कईलन हे, येहिगुने हमरा देरी मत करऽ अखनी हमरा अपन स्वामी भीर लौट जाय दऽ!”57ऊ कहलन, “आवऽ हम लईकी के बोलाम आउर पूछम कि ऊ कौची करे ला चाहऽ हे।”58तऽ ऊ रिबका के बोला के ओकरा से पूछलन, का तूँ अखनी ई अादमी के जौरे जइबऽ? ऊ जबाब देलन, “हाँ, हम जाम।”59येहिगुने ऊ रिबका के ओकर दासी जौरे, जे जिंदगी भर ओकर देख भाल करते अईलन हल, अब्राहम के दास आउर उनका जौरे आयेल लोगन के जौरे जाय ला भेजलन।60तऽ ओखनी परमेश्वर से रिबका के आशीष देवे लागी कहलन, आउर ऊ कहलन, “हमर बहिन, हम प्रार्थना करऽ ही कि यहोवा तोर लाखो वंश पईदा करतन, आउर उनका ऊ सभे के पूरा तोर से हरावे के आज्ञा देतन जे उनका से बैर करऽ हथन, पूरा तरह से बैरियन के नगर के अधिकारी हो जा।”61तऽ रिबका आउर उनकर दासियन तैयार होलन। ऊ अपन ऊँट पर चढ़लन आउर अब्राहम के दास जौरे चल देलन। ऊ रिबका के लेके चल गेलन।62ओही घड़ी इसहाक यहूदिया के नेगेव दक्खिनबारी मरुभूमि में रहऽ हलन। ऊ बीर लहैरोई से अईलन हल।63एक दिन साँझ के इसहाक टहले ला धियान करे लागी मैदान में गेलन। ऊ ऊपरे ताकलन आउर कुछ ऊँटवन के अइते देख के चौंक गेलन। 64रिबका भी आँख उठा के इसहाक के देखलन। ऊ ऊँट से उतरल65ऊ ऊँट से उतरलन आउर सेवक से पूछलन, “ऊ कौन अादमी हथन जे आ रहलन हे?” दास जबाब देलन, “ऊ हमर स्वामी इसहाक हथन।” येहिगुने ऊ उनकर सामने से अपन घूँघटा तान लेलन आउर अपन मुँह झाँक लेलन।66दास इसहाक के जे कुछ होल हल सभे बता देलन।67तऽ इसहाक रिबका के ऊ तम्बू में ले गेलन जे उनकर माय सारा के हल, आउर ऊ उनकर मेहरारू हो गेलन। ऊ उनका से प्रेम करऽ हलन। अईसे कर के इसहाक के अपन माय के मर गेलऽ के बाद शांति मिलल।
Bridge Connectivity Solutions Pvt. Ltd.