Genesis22
1केतना बरस के बाद, एक दिन परमेश्वर ई पता लगावे ला अब्राहम के परीक्षा लेलन कि अब्राहम उनकर आज्ञा के मानऽ हथन कि नऽ। ऊ अब्राहम के पुकारलन, आउर अब्राहम जबाब देलन, “हम ईहाँ ही।” 2परमेश्वर कहलन, “तोर बेटा इसहाक, जेकरा तूँ बड़ी प्रीति करऽ हऽ, ओही खाली एगो बेटा हे जेकरा हम तोरा देवे ला वचन देली हल। ओकरा अपना जौरे ले आवऽ आउर मोरिय्याह देश में चल जा, आउर जौन पहाड़ हम तोरा देखायम ओकरा पर चढ़ जा आउर ओकरा होमबलि कर के चढ़ावा।”3येहिगुने अब्राहम दोसरका दिन सकेरे सभे से पहिले उठलन, आउर अपन गधा पर काठी बांधलन, आउर अपन बेटा इसहाक साथे दूगो सेवक के जौरे लेलन। ऊ होमबलि के आग लागी कुछ लकड़ीयनो काटलन। तऽ ऊ ऊ जगह दने चल देलन जेकरा बारे में परमेश्वर उनका बतईलन हल।4तेसरका दिन जखनी ऊ यात्रा कर रहलन हल, अब्राहम आँख उठा के दूर पहाड़ पर ऊ जगह देखलन जहाँ परमेश्वर चाहऽ हलन कि ऊ जईतन।5अब्राहम अपन सेवकवन से कहलन, “तोहनी दूनो गधा के जौरे एज्जे रहऽ, जबकि लईका आउर हम ऊहाँ जा ही। हमनी ऊहाँ परमेश्वर के आराधना करम, आउर फिन तोरा भीर आ जाम।”6तऽ अब्राहम होमबलि लागी आग जरावे ला लकड़ी लेलन, आउर अपन बेटा इसहाक पर धर देलन, कि ऊ ले चलतन। अब्राहम आग जरावे लागी अपन हाथ में कुछ ले लेलन हल।7तऽ इसहाक अपन पिता अब्राहम से कहलन, हे हमर पिता। अब्राहम जबाब देलन, “हाँ, हमर बेटा, हम हिंयां ही!” इसहाक कहलन, “देखऽ आग जरावे ला तो हमनी भीर लकड़ी आउर कोयला हे, बाकि होमबलि लागी मेमना कहाँ हे?”8अब्राहम जबाब देलन, “हे हमर बेटा, परमेश्वर अपने होमबलि लागी मेमना के जोगाड़ करतन।” एहिगुने ओखनी दूनो जौरे-जौरे चलते रहलन।9ऊ, ऊ जगह पर पहुँच गेलन जेकरा बारे में परमेश्वर उनका से कहलन हल। ऊहाँ अब्राहम एगो पत्थल के वेदी बनईलन आउर ओकरा पर लकड़ी के जोगाड़ कईलन। तऽ ऊ अपन बेटा इसहाक के बाँध के वेदी पर लकड़ी के पर सुता देलन। 10तऽ अब्राहम हथियार उठईलन आउर अपन बेटा के बलि करेलागी आगे बढ़लन।11बाकि यहोवा के दूत स्वर्ग से उनका पुकार के कहलन, अब्राहम! अब्राहम! "अब्राहम जबाब देलन, “हम ईहाँ ही!"12स्वर्गदूत कहलन, लड़का के मत मारऽ, काहेकि अखनी हम जानऽ ही, कि तूँ परमेश्वर के आदर करऽ हऽ आउर उनकर कहना मानऽ हऽ। हम ई भी जानऽ ही काहेकि तूँ अपन एकलौता बेटा के बलि देवे से नऽ डेरईलऽ हे।”13तऽ अब्राहम आँख उठा के देखलन, आउर बगले के झाड़ी में एगो मेढा देखलन, जे अपन सींग से झाड़ी में फंसल हल। तऽ अब्राहम जा के मेढ़ा के पकड़ लेलन, आउर ओकरा बलि कईलन, आउर अपन बेटा के बदले में ओकरा होमबलि कर के चढ़इलन।14अब्राहम ऊ जगह के नाम “यहोवा यिरे” रखलन। आज ला लोग कहऽ हथन, “यहोवा के पहाड़ पर, ऊ देतन।” 15यहोवा के दूत अब्राहम के स्वर्ग से दूसरका बेरी पुकारलन।16ऊ कहलन, "हम, यहोवा, तोरा से कहऽ ही कि तूँ ओही कईलऽ हे जे हम तोरा से कहली हल, आउर तूँ अपन एकलौता बेटा के भी बचा के नऽ रख लऽ येहिगुने हम अपने आप के गवाही मान के किरिया खा ही, 17कि कोई दिन तोर वंश आशीष के देम कि गिनती कि आसमान के तरेगन आउर समुद्र के बालू के कण के जईसन होतो। तोर वंश अपन दुश्मन के हरा देतन आउर ओखनी के नगर पर कब्जा कर लेतन। 18तूँ हमर बात मान लऽ हे, येहिगुने धरती भर के सभे जात के लोग तोर बात के चलते आशीष पइतन।19तऽ अब्राहम आउर इसहाक ऊहाँ से लौट गेलन, जहाँ उनकर सेवक आसरा देखते हलन, आउर ऊ बेर्शेबा साथे लौट गेलन, आउर अब्राहम आउर उनकर परजा हुंए रह गेलन।20ई बात के होवे के कुछ दिन के बाद कोई अब्राहम के समाचार देलन, कि तोर भाई नाहोर के मेहरारू मिल्का के भी बच्चा पईदा होल हे।21अखनी सभे से बड़का बेटा ऊस होलन। दोसरका बूज होलन। ओकर बाद अराम के पिता कमूएल होलन।22कमूएल के बाद केसेद, फिन हजो पिलदास, फिन यिदलाफ, फिन बतूएल।23बतूएल रिबका के पिता होलन। ऊ अब्राहम के भाई नाहोर के मेहरारू मिल्का के आठगो बेटा होल।24नाहोर के एगो रखैल भी हल, जेकर नाम रूमा हल। ऊ चारगो बेटा के जनम देलन: तेबह, गहम, तहश आउर माका।
Bridge Connectivity Solutions Pvt. Ltd.