Genesis20
1कुछ समय बाद अब्राहम मम्रे के छोड़ के चल देलन आउर दक्षिण पच्छिम नेगेव रेगिस्तान में चल गेलन। हूँआँ ऊ कादेश आउर शूर के बीच में रहे लगलन। गरार शहर में एगो विदेसी के रूप में रहे लगलन।2जखनी ऊ ऊहाँ हलन, तऽ ऊ लोगन से कहलन कि सारा उनकर मेहरारू नऽ हथन, बाकि उनकर बहिन हथन। तऽ गरार के राजा अबीमेलेक अपन कुछ सिपाहियन के सभे के लावे ला भेजलन, आउर ऊ उनका अपन मेहरारू बनावे ला उनका भीर ले अईलन।3बाकि परमेश्वर रात में सपना में अबीमेलेक के दर्शन दे के कहलन, “हमर बात सुनऽ! तूँ मरे वाला हऽ काहेकि जे औरत के तूँ अपना जौरे रख लऽ हे ऊ दोसर मरद के मेहरारू हे।”4बाकि अबीमेलेक उनका जौरे नऽ सूतलन हल, येहिगुने ऊ पूछलन, “हे प्रभु, हम आउर हमर देश के लोग बेकसूर ही, का अपने हमरा मार देथिन?5अब्राहम हमरा से कहलन, 'ऊ हमर बहिन हे', आउर ई भी कहलन, 'ऊ हमर भाई हे। हम ई काम मन के खराई आउर सभे काम निष्कपट भरल हाथ से कईली हे।”6परमेश्वर उनका से कहलन, “हाँ, हम जानऽ ही कि तूँ कुच्छो गलत नऽ करे ला चाहऽ हल। येहिगुने हम तोरा अपन खिलाफ में पाप करे से रोकली हे। हम तोरा उनका छूए के इजाजत नऽ देली हे।7येहिगुने ई मेहरारू के उनकर मरद भीर भेज दऽ, काहेकि ऊ भविष्यद्वक्ता हथन। ऊ तोरा लागी प्रार्थना करतन जेकरा से तूँ जिन्दा रहबऽ। बाकि जदि तूँ ओकरा, उनका भीर नऽ पेठइबऽ, तऽ तूँ सच में मर जइबऽ, आउर तोर घराना के सभे सदस्यवन सच में मर जईतन।”8दोसरका दिन भोर में अबीमेलेक अपन सभे हाकिम के बोलईलन, आउर जे कुछ होल हल उनका सभे बता देलन। जखनी ऊ ई सुनलन, तऽ उनकर अादमी बड़ी डेरा गेलन कि परमेश्वर उनका सजा देतन।9तऽ अबीमेलेक अब्राहम के बोलईलन, आउर उनका से कहलन, “तोरा हमरा जौरे अईसन नऽ करे के चाहऽ हल कि हम आउर हमर परजा एगो बड़का पाप के दोषी बनती हल? तूँ हमरा जौरे ऊ कईलऽ हे जे तोरा नऽ करे ला चाहऽ हल!10अबीमेलेक अब्राहम से कहलन, तूँ अईसन काहे कईलऽ?”11अब्राहम जबाब देलन, “हम कहली कि ऊ हमर बहिन हे काहेकि हम सोंचली हल, 'ईहाँ के लोग सच में परमेश्वर के भय नऽ करऽ होतन। सच में ऊ जे चाहऽ होतन ऊ गलत काम करऽ होतन। येहिगुने ऊ हमर मेहरारू के पावे लागी हमरा मार देतन।12एकर अलावे, सारा सच में हमर बहिन मानल जा सकल हे, काहेकि ऊ हमर बाबू जी के बेटी हे, बाकि ऊ हमर माय के बेटी नऽ हे। ऊ दोसरा औरत के बेटी हे, आउर हम ओकरा से वियाह कईली हे।13बाद में जखनी परमेश्वर हमरा से कहलन, कि हम अपन बाबू जी के घराना के छोड़ देऊं, तऽ हम उनका से कहली, तूँ अईसे कह सकलऽ हे कि एतना कृपा हमरा पर करऽ: जहाँ कहूँ हम जाम, हमरा बारे में कहिहऽ, ई हमर भाई हथन।”14तऽ अबीमेलेक कुछ भेड़ी-बकरी आउर गाय-बैल लाके अब्राहम के देलन। ऊ उनका कुछ दास-दासी भी देलन। तऽ ऊ अब्राहम के मेहरारू सारा के उनका भीर लौटा देलन।15आउर अबीमेलेक उनका से कहलन, देखऽ! हमर जमीन तोर सामने हे। जहाँ चाहऽ रहऽ!16आउर ऊ सारा से कहलन, देखऽ! हम तोर भाई के चाँदी के एक हजार सिक्का दे रहली हे। ई तय करे ला हे कि कोई भी ई मामला के दोबारा नऽ उठईतन आउर कहतन कि तूँ कुछ गलती कईली हे। 17तऽ अब्राहम परमेश्वर से प्रार्थना कईलन, आउर परमेश्वर अबीमेलेक के मेहरारू आउर उनकर दासियन के चंगा कईलन, कि ऊ संतान पईदा करतन।18येहिगुने अईसन होल हल कि यहोवा अबीमेलेक के घर भर के कोई भी औरत लगी बाल बच्चा पईदा करे ला असंभव कर देलन हल, काहेकि अबिमेलेक अब्राहम के मेहरारू सारा से बियाह कर लेलन हल।
Bridge Connectivity Solutions Pvt. Ltd.