Genesis19
1ऊ रात, दूगो स्वर्गदूत सदोम में अईलन। लूत नगर के घूसे वाला दुआरी पर बैठल हलन। जखनी ऊ उनका देखलन, तऽ ऊ उनकर स्वागत करेलागी उठलन आउर प्रणाम कईलन।2ऊ उनका से कहलन, हे भला अादमी कृपा कर के आज रात हमर घर में रुकऽ। अपने अपन गोड़-हाथ धो सकलऽ हे, आउर बिहान सवेरे अपन यात्रा शुरू करल जारी रख सकलऽ हे। बाकि ओखनी कहलन “नऽ, हमनी बस शहर के चौराहा पर सूत रहम।”3बाकि लूत जोड़ दे के कहलन कि ओखनी उनकरे घर में रहतन। एहिगुने ओखनी उनका जौरे उनकर घर में अईलन, आउर ऊ ओखनी लागी खाना बनईलन। ऊ कुछ रोटी बेगर खमीर के पकइलन, आउर ओखनी ओकरा खईलन।4जखनी ऊ खाना खा लेलन, तऽ सुत्ते से पहिले, सदोम के नगर के लोग जमनकन से लेके बुढ़वन ला, सभे कोई घर के घेर लेलन।5ओखनी लूत के पुकार के कहलन, जौन अादमी आज रात में तोर घरे अईलन हे ओखनी कहाँ हथन? उनका बहारसी ले आवऽ, ताकि हमनी उनका जौरे गलत काम कर!"6लूत घर के बहारसी गेलन, आउर पीछे वाला दुआरी बंद कर लेलन, कि ओखनी भीतरी नऽ जा सकतन।7ऊ ओखनी से कहलन, हे हमर साथी, अईसन गलत काम मत करऽ!8हमर बात सुनऽ। हमर दूगो बेटी हे जे कहियो कोई मरद के मुँह नऽ देखलक हे। अखनी हम ओखनी के बहारसी तोरा भीर ले आवऽ ही, आउर जे कुछ तोरा निमन लगे, तूँ ओकरा जौरे कर सकलऽ हे। बाकि ई आदमी के जौरे कुछ मत करिहऽ काहेकि ई हमर घर के मेहमान हथन, एहिगुने हमरा उनकर हिफाजत करे ला हे!"9बाकि ओखनी जबाब देलन, “हमर राह से हट जा! तूँ तो परदेशी के साथे में रखले हऽ; एहिगुने तोरा हमरा ई कहे के कोई हक नऽ हे कि कौची सही हे! हम ओखनी के जौरे जेतना गलत करम, ओकरो से जादे गलत तोरा जौरे करम!” तऽ ओखनी लूत पर झपटल, आउर बलजोरी केमाड़ी तोड़े के कोशिश करे लगल।10बाकि दूनो स्वर्गदूतवन बड़ी होसियारी से केमाड़ी खोललन, आउर हाथ बढ़ा के लूत के घर के भीतरे तीर लेलन। फिन ओखनी हाली से केमाड़ी बंद कर देलन।11तऽ ओखनी का जवान, का बूढ़ा, सभे लोग के, जे घर के दुआरी के बहारसी हलन, आंधर कर देलन, ईहाँ ला कि ओखनी दुआरी नऽ खोज पइलन।12तऽ ओखनी दूनो स्वर्गदूतवन लूत से कहलन, “ईहाँ तोरा जौरे आउर कौन हथन? जदि नगर में तोर बेटा चाहे दमाद चाहे बेटी चाहे आउर कोई रिस्तेदार हथन, तऽ उनका नगर से बहारसी निकास लऽ,13काहेकि हम नगर के खतम करे वाला ही। यहोवा सुनलन हे कि कुछ लोग ई नगर के बारे में बड़ी मनी डेरावना बात कहलन हे, आउर ऊ हमरा नाश करे ला भेजलन हे।”14तऽ लूत जा के ऊ लोगन से बात कईलन, जे उनकर बेटी से बियाह करे के वादा कईलन हल। ऊ उनका से कहलन, "जल्दी करऽ! ई नगर से बहारसी निकल जा, काहेकि यहोवा एकरा नाश करे वाला हथन!" बाकि उनकर होवे वाला दमाद के लगल कि ऊ मजाक कर रहलन हे। 15जखनी दोसरका दिन भोर होवे वाला हल, तऽ दूनो स्वर्गदूत लूत के कहलन, "जल्दी उठऽ! आउर अपन मेहरारू आउर अपन बेटी के, जौन ईहाँ तोरा जौरे हे लेलऽ आउर चल दऽ! जदि तूँ अईसन नऽ करबऽ, तऽ जखनी हम नगर के अधर्म के चलते नाश करम तऽ तूँ खतम हो जइबऽ!"16जखनी लूत झिझकलन, तऽ स्वर्गदूत, उनकर मेहरारू के आउर उनकर दूनो बेटियन के हाथ पकड़ लेलन। कि ऊ ओखनी के सुरक्षित शहर से बहारसी ले जईतन। स्वर्गदूत अईसन एहिगुने कईलन काहेकि यहोवा उनका परती दया देखईलन। 17जखनी ऊ बहारसी गेलन, तऽ स्वर्गदूतवन में से एगो कहलन, जदि तोहनी जिन्दा रहे ला चाहऽ हऽ, तऽ जल्दी नगर से भाग जा! पीछे घूम के मत देखिहऽ! घाटी में कहूँ मत रुकिहऽ! पहाड़ के उपरे भाग जा! जदि तोहनी अईसन नऽ करबऽ, तऽ तोहनी मर जइबऽ!"18बाकि लूत ओखनी में से एगो से कहलन, “नऽ, श्रीमान, हमरा से अईसन नऽ करबावऽ!19कृपा कर के सुनऽ। तूँ हमरा पर खुश होलऽ आउर हमरा पर बड़का अनुग्रह कर के हमर जानऽ बचईलऽ। बाकि हम पहाड़ पर नऽ भाग सकली हे। जदि हम अईसन करे ला कोशिश करम तऽ हमनी आफत में फंस जाम।20हमर बात सुनऽ। बगले में एगो शहर हे, अखनी हमरा हिआँ से जाय दऽ। ऊ तो एगो छोटा शहर हे, आउर जदि तूँ ओकरा खतम नऽ करबऽ तऽ हूँआँ जा के अपन जानऽ बचा लेम।”21स्वर्गदूतन में से एगो लूत से कहलन, “तूँ जे हमरा से विनती कईलऽ हे हम तोरा ऊ करे देम। आउर हम ऊ नगर के खतम नऽ करम जेकरा बारे में तूँ बात कर रहलऽ हे।22बाकि जल्दी करऽ! हूँआँ भाग जा, काहेकि तोरा जाय बखत ला हम कुच्छो नाश नऽ करम।” लोग बाद में ऊ शहर के नाम सोअर रखलन जेकर मतलब ई खास नऽ हे', काहेकि लूत कहलन कि ई एगो जरीगो गाँव हे। 23जखनी सूरज उग रहल हल, तऽ लूत आउर उनकर परिवार ऊ शहर में पहुँचलन, जे अखनी सोअर कहलावऽ हे।24तऽ यहोवा सदोम आउर अमोरा पर आग आउर जरते गंधक के आसमान से बरखा जईसन बरखइलन। 25अईसे कर के ओखनी ऊ नगर के आउर ऊ नगर के रहे वाला के भी खतम कर देलन। ऊ घाटी में सभे पेड़ के जौरे सभे चीज के खतम कर देलन।26बाकि लूत के मेहरारू रुक गेल, आउर पीछे घूम के देखे लगलक कि कौची हो रहल हे, आउर ऊ मर गेलन ओकर देह बाद में निमक के खंभा बन गेल।27दूसरा दिन भोरिये अब्राहम उठ के ऊ जगह पर गेलन, जहाँ ऊ यहोवा के सामने खड़ा हलन।28आउर ऊ सदोम आउर अमोरा शहर दने आँख उठ के देखलन आउर ई देख के चौंक गेलन कि सभे घाटी में बड़का गो चिमनीभट्ठा के जईसन धूंआँ हो रहल हल।29येहिगुने जखनी परमेश्वर घाटी के ऊ नगरवन के खतम कईलन, तऽ ऊ अब्राहम के मदत करे लागी नऽ भूलइलन, आउर जौन नगर में लूत रह रहलन हल, ऊ विपत्ति से लूत के बचईलन।30लूत सोअर में रहे से डेरा रहलन हल, येहिगुने ऊ हूँआँ से चल गेलन, आउर अपन दूनो बेटियन के साथे पहाड़ पर चल गेलन, आउर ऊ एगो खोह में रहे लगलन।31एक दिन बड़की बेटी छोटकी से कहलन, “हमनी के बाबूजी बूढ़ा हथन, आउर ई जगह में कोई अादमी नऽ हे, जे दुनियादारी के लोग के जईसन हमनी साथे शारीरिक सम्बन्ध करतन।32आवऽ हमनी अपन बाबूजी के तब ला दाखमधु पियायेम जखनी ला ऊ बेहोस नऽ हो जईतन। तऽ हमनी उनका पता लगले बेगर उनका भीर जा सकली हे। अईसे ऊ हमनी के गर्भवती करतन आउर फिन हमनी बाल-बच्चा के पईदा कर सकली हे जे हमनी के पिता के चलईतन। चलइतन।”33येहिगुने ऊ रात ओखनी अपन पिता के बेहोस कर देलन। आउर बड़की बेटी भीतरे जा के अपन बाबूजी भीर चल गेल, बाकि ऊ एतना नशा में हलन कि उनका पता नऽ चलल कि ऊ कखनी सूतलन आउर कखनी उठलन।34दोसरका दिन उनकर बड़की बेटी छोटकी बेटी से कहलन, “हमर बात सुनऽ। कल रात हम अपन पिता भीर गेली हल। आवऽ आज रात के उनका फिन से नशा में धुत्त कर देम! अबकी बेरा तूँ उनका भीर जा सकलऽ हे जदि ऊ तोरा भीर रहतन, तऽ तूँ गर्भवती हो सकलऽ हे, आउर अईसे तोरा भी बाल-बच्चा हो सकल हे।”35येहिगुने ऊ रात ऊ भी अपन बाबू जी के फिन से दाखमधु पिया के बेहोस कईलक, आउर फिन उनकर छोटकी बेटी जा के उनका भीर गेल। बाकि फिन ऊ एतना नशा में हलन कि उनका पते नऽ चलल कि ऊ कखनी उनका सुतलन आउर कखनी उठलन।36अईसे लूत अपन दूनो बेटी के गर्भवती कर देलन37बाद में बड़की एगो बेटा के जनम देलन, जेकर नाम ऊ मोआब रखलक। ऊ मोआबी लोग के समाज के पूरखा बन गेल। 38छोटकियो एगो बेटा के जनम देलन, जेकर नाम ऊ बेन-अम्मी रखलक। ऊ, ऊ लोग के पूरखा बन गेल जेकरा अखनी अम्मोन लोगन के समाज कहल जा हे।
Bridge Connectivity Solutions Pvt. Ltd.