Genesis2
1अईसे कर के परमेश्वर आकाश, पृथ्वी आउर धरती के आउर ओकरा में भरल जिन्दा जीव-जन्तुवन के रचलन। 2सतमा दिन ला परमेश्वर सभे कुछ बनावे के काम पूरा कर लेलन, एहिगुने ऊ ओदिनमा से फिनो काम नऽ कईलन। 3परमेश्वर एलान कईलन कि हर सतमा दिन पर उनकर आशीष होत। ऊ ऊ सभे दिन के खास दिन के रूप में अलगे कर देलन काहेकि सतमा दिन परमेश्वर सभे कुछ बनावे के अपन सभे काम के पूरा कईलऽ के बाद आउर काम नऽ कईलन।4अईसे कर के हे कि परमेश्वर आकाश आउर धरती के रचना कईसे कईलन। परमेश्वर जिनकर नाम यहोवा परमेश्वर हे आकाश आउर धरती के बनईलन।5पहिले तो पौधा नऽ जनमल हल, काहेकि यहोवा परमेश्वर अखनी ला धरती पर बरखा नऽ बरखईलन हल। एकर अलावे, फसल रोपे लागी धरती के जोते वाला भी कोई नऽ हल।6बल्कि धरती पर से कुहासा ईहाँ ला उठे लगल कि धरती पर चारो तरफ पानी ही पानी हो गेल। 7तऽ यहोवा परमेश्वर कुछ मट्टी लेके एगो आदमी बनईलन। ऊ आदमी के नाक में अपन साँस फूकलन जे सब चीज के जिन्दा करऽ हे, जेकर फल होल कि आदम एगो पूरा-पूरा जिन्दा आदमी बन गेल। 8यहोवा परमेश्वर अदन नाम के जगह में, जे कनान देश के पूरब में हल, एगो बाग-बगईचा लगईलन। उहाँ ऊ, ऊ आदम के रखलन जेकरा ऊ बनईलन हल।9यहोवा परमेश्वर धरती पर सभे तरह के पेड़ उपजईलन, जे देखे में खूबसूरत आउर जेकर फल खाय में स्वादिष्ट होवऽ हे लगईलन। ऊ बगईचा के बीच में एगो पेड़ भी लगइलन जेकर फल खाय वाला हमेशा जिन्दा रहऽ हल। ऊ उहाँ एगो आउर पेड़ लगइलन जेकर फल खाय वाला के ई जाने के काबिल बनावऽ हल कि कौन सा काम करे में भला हे आउर कौन काम करे में बुरा हे। 10बगईचा के पानी पटावे ला अदन से एगो नदी फूटऽ हल। अदन के बाहर नदी चारगो नदियन में बँट गेल। 11पहिलका नदी के नाम पीसोन हे। ऊ नदी हवीला के सभे जमीन से होके बह हे, जहाँ सोना हे।12ऊ सोना बहुत शुद्ध हे। ओकरा में मीठा महक वाला गोंद भी हे जेकरा गुग्गल के पेड़ भी कहल जा हे आउर गोमेद नामक कीमती पत्थर भी हे।13दोसरका नदी के नाम गीहोन हे। ऊ नदी कूश के सभे देश में बहऽ हे। 14तिसरका नदी के नाम तिग्रिश हे। ई अश्शूर शहर के पूरुब में बहऽ हे। चौठा नदी के नाम फरात हे।15यहोवा परमेश्वर आदम के ले के अदन में काम करे ला आउर ओकर देख-रेख करे ला रखलन।16यहोवा परमेश्वर आदम के ई आज्ञा देलन कि वाटिका के सभे पेड़ के फल सेंतमेंत खा सकलऽ हे17बाकि भला या बुरा के ज्ञान के पेड़ के फल तूँ कहियो भी न खईहऽ, काहेकि जौन दिन तूँ ओकर फल खईबऽ ओही दिन पक्का मरऽ जईबऽ।18फिन यहोवा परमेश्वर कहलन, “ई आदम के अकेले रहे ला निमन नऽ हे? एहिगुने हम कोई अईसन सहायक बनायेम जे ओकर सच्चा साथी होत।” 19यहोवा परमेश्वर कुछ मिट्टी लेके सभे तरह के जानवर आउर चिरईं-चिरगुन्नी के बनईलन, आउर ऊ ओखनी के आदम भीर ले अईलन, कि देखतन कि ऊ ओखनी के कौची-कौची नाम धरऽ हथन। आउर आदम यहोवा के बनावल सभे जिन्दा जनावरवन के नाम रखलन।20तऽ आदम सभे जातियन के पालतु जानवर गाय-बैल, चिरईं-चिरगुन्नी आउर जंगली जनावर के नाम रखलन बाकि ई जीव-जंतुवन में कोई भी प्राणी आदम के लायक साथी नऽ मिलल।21अईसे कर के यहोवा परमेश्वर आदम के गहरा नींद में सुता देलन जखनी ऊ आदम सूतल हल तऽ यहोवा ओकर एगो पसली निकास लेलन। फिन ऊ तुरन्त उनकर देह के छेद के बंद कर के ओकरा ठीक कईलन। 22तऽ यहोवा ऊ पसली से जे ऊ आदम के देह में से निकासलन हल, एगो औरत बनईलन, आउर ओकरा ऊ आदम भीर ले गेलन। 23ऊ आदम कहलन, “आखिरकार, ई सचमुच में हमरे जईसन हे! ओकर हड्डी हमर एगो हड्डी में से एगो निकसल, आउर ओकर मांस हमर मांस से निकसल हे। एहिगुने हम ओकरा नारी कहम, काहेकि ऊ हमरा से माने कि नर में से निकासल गेल हे।”24दुनियाँ के पहिला औरत आदम के देह से निकासल गेल हल, एहिगुने जखनी मरद आउर एक औरत वियाह करऽ हथन, तऽ उनका अपन माय-बाप के छोड़े देऽ हे। ऊ आदमी अपन मेहरारू के बहुत करीब से जूट जा हे, जेकरा से ऊ दूनो एक्के गो देह हो जा हथन। 25बाकि ऊ आदमी आउर उनकर मेहरारू नंगा हलन, तईयो ओखनी शरमा नऽ हलन।
Bridge Connectivity Solutions Pvt. Ltd.