Genesis18
1ऊ साल एक दिन, दिन में जखनी गरमी हल, यहोवा मम्रे के बड़का बांजवृक्ष भीर अब्राहम के फिन दर्शन देलन। अब्राहम अपन तम्बू के दुआरी पर बैठल हलन।2अब्राहम नजर उठईलन आउर तीनगो आदमी के अपना भीर खड़ी देख के चौंक गेलन। जखनी ऊ ओखनी के देखलन तऽ ऊ ओखनी से मिले लागी दौड़लन। ऊ सम्मान कर के अपन चेहरा जमीन पर झुका के सूत के प्रणाम कईलन।3ऊ ओखनी में से एगो से कहलन, हे प्रभु, जदि तोर अनुग्रह हमरा से खुश हऽ, तऽ तनी देर ईहाँ रुकऽ।4हमर सेवक के तनी पानी लाके तोर गोड़ धोवे के आज्ञा दऽ आउर फिन ई पेड़ के तरे अराम करिहऽ। 5कि अपने ईहाँ हमरा भीर अईलऽ हे, तऽ हमरा अपने कुछ खायला लावे के इजाजत दऽ ताकि तोहनी जाय से पहिले तागत पा सकऽ। ओखनी जबाब देलन, “जे निमन लगे, जईसन तूँ कहलऽ हे ओईसहीं करऽ।”6तऽ अब्राहम तम्बू में हाली से सारा भीर गेलन, आउर सभे से कहलन, “जल्दी करऽ बीस किलो बढ़ियाँ आटा ले आवऽ, आउर कुछ रोटी बनावऽ।”7तऽ ऊ जानवरवन के झुण्ड भीर दौड़ के गेलन, आउर एगो बछड़ा चुन लेलन, जेकर मांस नरम आउर सबदगर हे। ऊ ओकरा अपन एगो नौकर के दे देलन, जेकरा ओकरा मारतन आउर हाली से पकइतन।8जखनी मांस पक गेल, तऽ अब्राहम तनी सा दही, आउर दूध आउर ऊ बछड़ा मांस ले अईलन जे दास पकइलन हल। ऊ ओकरा उनका सामने रख देलन। तऽ ऊ उनका भीर सेवा करे लागी एगो पेड़ के तरे खड़ा रहलन, आउर ऊ खाना खा रहलन हल।9ऊ खाना खईला के बाद उनका से पूछलन, तोर मेहरारू सारा कहाँ हथन? ऊ जबाब देलन, “ऊ तम्बू में हे।”10तऽ मण्डली के परधान कहलन, हम अगला साल बसंत के महीना में तोरा भीर फिन आयेम, आउर सुनऽ, तोर मेहरारू सारा के एगो बेटा जलम होत। अईसन होल कि सारा तम्बू के दुआरी पर, जे बोले वाला के पीछे हलन, सुन रहलन हल।11अब्राहम आउर सारा तो बड़ी बूढ़ा-बूढ़ी हो गेलन हल, आउर दुन्नो के बच्चा जलम देवे के समय भी खतम हो गेल।12तऽ सारा मन में ई सोंच के हंसलन, हमर देह से तो बड़ी बूढ़ा हो गेली हे, आउर हमर स्वामी भी बूढ़ा हो गेलन हे। तऽ “हम बच्चा पईदा करे के सुख कईसे पा सकली हे?”13यहोवा अब्राहम से कहलन, “सारा काहे हंसलन? ऊ काहे सोंच रहलन हल, कि हम बड़ी बूढ़ी ही, एहिगुने हम बच्चा के कईसे पईदा करम?14का यहोवा लागी कुच्छो मुश्किल हे? हम अगला साल बसंत के महीना में, जौन समय हम रखली हे, लगभग ओही घड़ी आयेम, आउर सारा के एगो नवजात बेटा होत।”15तऽ सारा डेरा गेलन, एहिगुने ऊ झूठ बोललन, आउर कहलन, हम “नऽ हंसली हे। बाकि यहोवा कहलन, नऽ मत कहऽ तूँ हंसलऽ हे।” 16तऽ ओखनी तीनो अादमी जाय ला उठलन, सदोम नगर के तराई दने आँख उठा के देखलन। अब्राहम उनका “विदाई” करे लागी उनका जौरे चल देलन हल।17यहोवा मनेमन कहलन, “ई हमरा लागी ठीक नऽ हे कि हम अब्राहम के ई जाने से रोकम कि हम कौची करे ला योजना बना रहली हे।18अब्राहम के वंश महान आउर एगो शक्तिशाली लोगवन के समाज बन जईतन। आउर उनका लागी जे कुछ करम ओकरा चलते सभे समाज के लोग आशीष पइतन। 19हम उनका एहिगुने चुनली हे कि ऊ अपन बाल बच्चा आउर परिवार के हुकुम देतन कि यहोवा के राह पर चले जेकरा से कि ऊ हमर आज्ञा मानतन आउर जे निमन आउर सही हे ओही करतन ताकि हम अब्राहम लागी ओही करम जे हम उनका ला करे के वादा कईली हे।”20एहिगुने यहोवा अब्राहम से कहलन, “हम सुनली हे कि कुछ लोग सदोम आउर अमोरा के लोग के बारे में केतना डेरावना बात कह रहलन हे। ओखनी के पाप बड़ी बड़का गो हे।21एहिगुने अखनी हम नीचे उतरम, आउर देखम कि जेतना बड़का बात हम सुनली हे ऊ सभे सच हे कि झूठ।” 22तऽ ओखनी दूनो अादमी घूम के सदोम दने चल गेलन। बाकि अब्राहम यहोवा के सामने खड़ा रहलन।23अब्राहम उनका भीर अईलन आउर कहलन, “का तूँ सच में अधर्मी लोग के जौरे धर्मी लोगन के भी खतम कर देबऽ जे कुच्छो गलती नऽ कईलन हे?24जदि नगर में पचासगो अादमी होतन जे कोई पाप नऽ कईलन होत तऽ तूँ कौची करबऽ? का तूँ सच में ओखनी सभे के खतम कर देबऽ, आउर ऊ पचासगो धर्मी लोग के चलते ऊ लोगन के नऽ छोड़बऽ जे कुच्छो गलती नऽ कईलन हे?25एकरा में सक नऽ हे कि तूँ अईसन काम नऽ करबऽ कि अच्छा अादमी के दुष्ट के जौरे खतम कर देबऽ, आउर अच्छा अादमी आउर बदमास अादमी के जौरे एक्के रगन व्यवहार करबऽ। तूँ अईसन नऽ कर सकलऽ हे, काहेकि तूँ जे धरती पर न्याय करे वाला हऽ, सदोम के लोगवन के बारे में जरुर ओही करबऽ जे सही हे!”26यहोवा जबाब देलन, जदि हमरा सदोम में पचासगो अईसन धर्मी मिलतन जे कोई गलत काम नऽ कईलन होत, तऽ हम ओखनी के चलते ऊ सभे जगह के छोड़ देम।27अब्राहम जबाब देलन, जदि हे हमर प्रभु हमरा अईसे ढीठ बन के अपने से बात नऽ करे के चाही, काहेकि हम धूरी-गर्दा आउर राख नियर बेकार ही।28बाकि जदि खाली पैंतालिस धर्मी आदमी रहतन जे कुच्छो पाप नऽ कईलन हे तऽ अपने कौची करतन? का अपने सभे नगर के खतम कर देथिन जबकि ऊहाँ खाली पैंतालिसेगो अच्छा हथिन, यहोवा जबाब देलन, “जदि हमरा पता चलत कि ऊहाँ पैंतालिस लोग निमन हे तऽ हम ओकरा खतम नऽ करम।”29अब्राहम उनका से अईसहीं बात करते गेलन, आउर कहलन, जदि अपने पइथिन कि ऊहाँ खाली चालिसगो अच्छा हथिन, तऽ अपने कौची करतन? यहोवा जबाब देलन, “हम ऊ चालीसो के चलते ओखनी सभे के खतम नऽ करम।”30अब्राहम कहलन, “कृपा कर के हे प्रभु अब गोस्सा मत होबऽ। हमरा फिन से बोले देथिन। जदि खाली तीस लोग अच्छा होतन तऽ अपने कौची करतन?” ऊ जबाब देलन, “जदि हमरा पता चलत कि ऊहाँ तीस लोग हथन तईयो हम अईसन नऽ करम।”31अब्राहम कहलन, हे हमर प्रभु, “हमरा ढीठ बन के अपने से अईसे बात नऽ करे के चाही। बाकि जदि अपने के पता चलत कि ऊहाँ खाली बीसगो अच्छा लोग हथन तऽ अपने कौची करतन?” ऊ जबाब देलन, “हम ओखनी बीस लोग के चलते भी सभे नगर के खतम नऽ करम।”32आखिरी में अब्राहम कहल, “हे हमर प्रभु, अखनी गोस्सा मत करऽ। बस हमरा एक बेरा आउर बोल लेवे देथिन जदि अपने के पता लगत कि ऊहाँ खाली दसगो अच्छा लोग हथन तऽ अपने कौची करतन?” यहोवा जबाब देलन, “हम ओखनी दसो के चलते नगर के खतम नऽ करम।”33अब्राहम आउर कुछ नऽ कहलन। जईसहीं यहोवा अब्राहम से बात करे ला खतम कईलन, तऽ ऊ चल गेलन, आउर अब्राहम अपन घरे चल गेलन।
Bridge Connectivity Solutions Pvt. Ltd.