Genesis16
1ऊ बखत ला अब्राम के मेहरारू सारै अब्राम ला कोई बाल-बच्चा के जलम नऽ देलन हल। बाकि उनका भीर मिस्र के एगो दासी हल, जेकर नाम हाजिरा हल। 2सारै अब्राम से एक दिन कहलन, “हमर बात सुनऽ! यहोवा हमरा गर्भवती नऽ होवे देलन हे। येहिगुने तूँ हमर दासी हाजिरा भीर जा। हो सकल हे ऊ लईका के जलम देत जेकरा हम अपना मान सकम।” अब्राम से सारै जे कहलन हल ओकरा करे ला तैयार हो गेलन।3ई अब्राम आउर सारै के कनान देश में बसला के दस बरस के बाद होल। अईसे अब्राम मिस्र से सारै के दासी हाजिरा के अपन दोसरकी मेहरारू बना लेलन।4तऽ ऊ हाजिरा भीर गेलन, आउर ऊ पेट से रहलन। जहिया उनका पता लगल कि ऊ पेट से हथन, तऽ ऊ अपन मलकिनी सारै से घिरना माने लगल।5तऽ सारै अब्राम से कहलन, “ई तोर गलती हे! हम अपन नौकरानी के तोर हाथ में दे देली जेकरा से तूँ ओकरा भीर जा सकलऽ हे। अखनी ऊ पेट से हे, आउर हमर कोई बाल-बच्चा नऽ होवे के कारण हमरा से घिरना मानऽ हे। हमरा जौरे अईसन करे लागी यहोवा फैसला करतन आउर तोरा गलत पइतन!”6तऽ अब्राम सारै से कहलन, “हमर बात सुनऽ! ऊ तोर दासी हे, तऽ ओकरा प्रति ओही व्यवहार करऽ जे तूँ निमन समझऽ हऽ।” तऽ सारै ओकरा जौरे दुर्व्यवहार करे ला शुरू कर देलन, एहिगुने हाजिरा भाग गेल।7जखनी ऊ जंगल में पानी के सोता भीर पहुँचल, तऽ यहोवा के दूत ओकरा भीर गेलन। ई ऊ झरना हल जे शूर के सड़क के किनारे हल।8ऊ ओकरा से कहलन, हे सारै के दासी हाजिरा, तूँ कहाँ से अईलऽ हे, आउर कहाँ जा रहलऽ हे? ऊ जबाब देलन, “हम अपन मलकिनी सारै भीर से भाग के अईली हे।”9यहोवा के दूत कहलन, अपन मलकिनी भीर लौट जा, आउर उनकर बात मानते रहऽ।10यहोवा के दूत ओकरा से ई भी कहलन, हम तोरा एतना वंश पईदा करे के शक्ति देम कि कोई ओकरा गिन नऽ सकतन!11यहोवा के दूत ओकरा से ई भी कहलन, “सुनऽ! तूँ पेट से हऽ। तूँ एगो बेटा के जनम देवऽ। तोरा ओकर नाम इश्माएल रखे ला हे जेकर मतलब ई हे कि 'परमेश्वर सुनऽ हथन', काहेकि यहोवा तोर रोवाई सुनलन हे काहेकि तूँ बड़ी दुःख झेल कर रहलऽ हे। 12बाकि ऊ आदमी जंगली गधा जईसन बेकाबू हो जईतन। ऊ सब कोई के विरोध करतन आउर सब कोई ओकर विरोध करतन। ऊ अपन रिस्तेदार से बड़ी दूर रहतक।” 13हाजिरा मन में कहलन, काहेकि यहोवा हमरा देखलन हे तईयो हम जिन्दा ही। एहिगुने ऊ यहोवा के पुकारलन, “हे परमेश्वर, जौन हमरा देखऽ हथन।” 14एहिगुने लोग ऊ “कुंईयाँ के नाम लहैरोई रखलन" जेकर मतलब ई हे कि, जिन्दा के कुंईयाँ जौन हमरा देखऽ हथन!” ई अखनियो कादेश आउर बेरेद के बीच में हे।15अईसे कर के बाद में हाजिरा अब्राम ला एगो बेटा के जलम देलन, आउर ऊ ओकर नाम इश्माएल रखलन। 16जहिया हाजिरा अब्राम के बेटा इस्माएल के जलम देलन तऽ अब्राम छियासी साल के हलन।
Bridge Connectivity Solutions Pvt. Ltd.