Galatians4
1अखनी हम कहऽ ही, कि जौन घड़ी तक वारिस लईका हे, ऊ घड़ी तक ऊ सभे के मालिक होला पर भी, दास से अलग नऽ हे।2बाकि ऊ अपन पिता के ठहरावल गेल दिन तक संरक्षक आउर भण्डरियन के अधीन रहऽ हे।3अईसे कर के, जखनी हम बालक हली, तखनी हम संसार के मुख्य सिद्धान्तवन के अधीन दास बनल हली।4बाकि जखनी समय पूरा होल, तऽ परमेश्वर अपन बेटा के भेजलन, जे औरत से पैदा लेलन, आउर व्यवस्था के अधीन पैदा होलन,5ताकि ऊ ओखनी सभे के छुड़ा सकतन जे व्यवस्था के अधीन हथन, ताकि हमनी के बेटा के रूप में गोदी लेवे जाय के अधिकार मिल सकत।6आउर काहेकि तोहनी बेटा हऽ, येहिगुने परमेश्वर अपन बेटा के आत्मा के हमनी सभे के हृदय में भेजलन, जे “हे अब्बा, हे पिता” कह के पुकारऽ हे।7येहिगुने अखनी तूँ दास नऽ रहलऽ, बलुक बेटा हऽ, आउर जदि बेटा हऽ, तऽ परमेश्वर के द्वारा वारिस भी हऽ।8बाकि ऊ बखत, तूँ परमेश्वर के नऽ जान के, ऊ लोग के दास बन गेलऽ जे स्वभाव से ही देऊता नऽ हलन। 9बाकि अखनी, परमेश्वर के जान गेलऽ के बाद, चाहे अईसे कहऽ कि, परमेश्वर के द्वारा तोरा जान लेला के बाद, तूँ दूबारा से कमजोर आउर बेकार के मौलिक सिद्धान्तवन के तरफ कईसे लौट रहलऽ हे, जेकर तूँ एक बार फिनो से दास बने ला चाहऽ हऽ?10तूँ दिन आउर महीना आउर ऋतुवन आउर बरस के मानऽ हऽ!11हम तोहनी लागी डरऽ ही कि कहीं अईसन नऽ होवे कि हमर तोहनी बीच में बेकार मेहनत करली।12हे भईवन, हम तोरा से विनती करऽ ही कि जईसन हम ही ओईसहीं बन जा, काहेकि हमहूँ तोहनिये के जईसन बन गेली हे। तोहनी हमरा कोई क्षति नऽ पहुँचईलऽ।13अखनी तूँ जानऽ हऽ कि हम पहिले देह के कमजोरी के कारण तोरा सुसमाचार सुनईली।14आउर तूँ हमर देह में अपन परीक्षा के तुच्छ नऽ जानलऽ, आउर नऽ ही हमरा ठुकरईलऽ, बाकि परमेश्वर के दूत, मतलब कि मसीह यीशु के जईसन हमरा स्वागत करलऽ।15तऽ फिनो तोर खुशी कहाँ हे? काहेकि हम तोर गवाह ही कि जदि हो सकऽ हे, तऽ तूँ अपन आँख निकास के भी ओकरा हमरा दे देतऽ हल।16तऽ फिनो, जे हम तोरा सच कहऽ ही, तऽ का हम तोर दुश्मन बन गेली हे? 17ओखनी तोरा लागी जलन रखऽ हे, बाकि ठीक रीति से नऽ, बाकि ओखनी तोरा अलग करे ला चाहऽ हे, कि तूँ ओखनी ला जलन रखऽ।18बाकि भलाई लागी हर बखत हौसला रखना बढ़ियाँ हे, नऽ कि खाली ऊ बखत जखनी हम तोरा जौरे मौजूद ही।19हे हमर बालकवन, जब तक तोहनी मसीह के स्वरूप में नऽ बन जा, तब तक हम तोरा जौरे फिनो से प्रसव पीड़ा में रहम20बाकि हम चाहऽ ही, कि अखनी तोरा बीच में मौजूद रहम, आउर अपन आवाज बदलूँ, काहेकि हम तोरा चलते उलझन में ही।21तूँ जे व्यवस्था के अधीन रहे ला चाहऽ हऽ, हमरा से कह दऽ, कि का तूँ व्यवस्था के बात नऽ सुनऽ हऽ?22काहेकि अईसन पवित्रशास्त्र में लिखल हे कि अब्राहम के दूगो बेटा हल, एगो दासी से एगो स्वतंत्र मेहरारू से। 23आउर एगो तऽ देह के मुताबिक दासी से पैदा होल, बाकि दोसरका, प्रतिज्ञा के द्वारा, स्वतंत्र औरत से पैदा होल।24ई बात दृष्टान्त के रूप में येहिगुने कहल जा रहल हे, काहेकि ओखनी औरतियन दूगो वाचा हे। एगो सीनै पहाड़ के हे, जे गुलामी के जनम देलन हे; आउर ऊ हाजिरा हे।25अखनी हाजिरा तऽ अरब के सीनै पहाड़ हे, आउर वर्तमान यरूशलेम से मेल खा हे, काहेकि ऊ अपन लईकवन समेत दासत्व में हे।26बाकि ऊपर के यरूशलेम स्वतंत्र हे, जे हमनी के माता हे।27काहेकि अईसन पवित्रशास्त्र में लिखल हे, कि “हे बाँझ औरत, जे जनम नऽ दे हऽ, आनन्द करऽ; तोहूँ जेकरा प्रसव के दरद नऽ उठऽ हे, गला खोल के जय-जयकार करऽ; काहेकि छोड़ल गेल के संतान ओकर तुलना बड़ी जादे हे जेकरा भीर पति हे।” 28अखनी हे भईवन, तूँ इसहाक के जईसन, प्रतिज्ञा के संतान हऽ।29बाकि जईसे ऊ घड़ी, जे देह के मुताबिक पैदा होल हल, ऊ परमेश्वर के आत्मा के मुताबिक पैदा होल के सतावऽ हल, ओईसहीं अखनियो हे। 30बाकि पवित्रशास्त्र का कहऽ हे? “दासी आउर ओकर बेटा के बाहर निकास दऽ। काहेकि दासी के बेटा स्वतंत्र औरत के बेटा के जौरे उत्तराधिकारी नऽ होतन।” 31येहिगुने हे भईवन, हमनी दासी के नऽ, बाकि स्वतंत्र औरत के संतान ही।
Bridge Connectivity Solutions Pvt. Ltd.