Exodus10
1फिरू ओकर बाद यहोवा मूसा से कहलन, “फिरौन भीर जा, काहेकि हमही उनका आउर उनकर काम करे वालन अधिकारियन के मन येहिगुने कठोर कर देली हे। हम अईसन येहिसे कईली हे जेकरा से उनकर बीच में चमत्कार करे के एगो बढ़ियाँ कारण रहे,2हम अईसन येहिगुने कईली, आउर तूँ लोग अपन बेटवन आउर पोतवन से एकरा बतावऽ कि यहोवा मिस्रियन के कईसन मजाक में उड़ईलन आउर अपन का-का चिन्हासी ओकर बीच में देखईलन हे, जेकरा से तूँ ई जानऽ लेवऽ कि हम ही यहोवा ही।”3तऽ मूसा आउर हारून फिरौन के नजदीक जा के कहलन, “हम इब्रियन के परमेश्वर यहोवा तोरा से अईसे कहऽ हथन, कि कखनी तक हमरा सामने झुके में देर करत रहवऽ? हमर प्रजा के लोगवन के जाय दऽ, कि ऊ हमर उपासना कर सकतन।4जदि तूँ हमर प्रजा के नऽ जाय देवऽ तऽ सुन लऽ, कल से हम तोर देश में टिड्डियन के ले आयेम।5आउर ऊ धरती के अईसन झाँक लेत कि देखाई भी नऽ पड़त। आउर जे भी कुछ ओलवन से बचऽ हल, ओकरा भी ऊ खा जाय आउर तोर जेतना पेड़वन मैदान में लगल हे ओकरो भी ऊ खा के खतम कर देत।6ओखनी तोर आउर तोर सभे अधिकारियन के, आउर सभे मिस्रियन के घर के भर देतन जब से तोर पुरखा पहिला बार ई देश में अईलन हल तब से अब तक जितना टिड्डियन तोर माय-बाप चाहे तोर दादा-दादी देखलन होत, ओकरा से कहीं जादे टिड्डी होत!” तऽ मूसा आउर हारून मुड़ के राजा भीर से चल गेलन।7तऽ फिरौन के अधिकारियन ओकरा से कहे लगल कि, “ई लोग कखनी तक हमनी ला फंदा बनल रहतन? ओखनी के जाय दऽ कि ऊ अपन परमेश्वर यहोवा के उपासना कर सकतन: का तूँ अखनी तक नऽ जानल हे कि समूचे मिस्र नाश हो गेल हे।”8तऽ मूसा आउर हारून फिरौन के भीर फिरू बुलाबल गेलन, आउर ऊ ओखनी से कहलन, “जा, आउर अपन परमेश्वर के उपासना करऽ हथन। ऊ जाय वाला कौन-कौन हथन?”9मूसा कहलन, “हमनी तऽ सभे बेटा-बेटी, भेड़-बकरी, गाय-बैल के साथे-साथे बच्चा से बूढ़ा ला सभे जायेम। काहेकि हमनी के यहोवा ला परव करे ला हे।”10तऽ राजा कहलन, “हम तोरा औरतियन के साथे नऽ जाय देम काहेकि हम सोच ही कि यहोवा तोरा से ई बात कहलन हे, देखऽ तोर मन में बुराई हे।11कि तूँ पूछते हीं रहऽ हऽ, एहिगुने खाली अपन लोग के साथे जा के यहोवा के आराधना करऽ!” बाकि कोई आउर नऽ जा सकल हे। तऽ राजा मूसा आउर हारून के निकास देलन।12तब यहोवा मूसा से कहलन, “मिस्र देश के ऊपर अपन हाथ बढ़ावऽ कि टिड्डियन मिस्र देश पर चढ़ के धरती के जेतना अनाज ओलवन से बच गेल हे, सभे के खा जाय।”13येहिगुने मूसा अपन लाठी मिस्र देश के उपरे बढ़ईलन। तब यहोवा दिनों भर आउर रातो भर देश में पुरबईया हवा बहईलन; आउर जखनी भोरे होल तऽ पुरबईया में टिड्डियन आ गेल।14आउर टिड्डियन मिस्र देश के सभे जगह में आके बसेरा कर लेलक, ओकर जमात बहुत भारी हल, अईसन जमात कहिनो नऽ आयेल हल, आउर नऽ ओकरा बाद कहियो आवत।15ऊ तऽ समूचे धरती पर भर गेल, ईहाँ तक कि देश में अँधार जईसन हो गेल आउर समूचे अनाज आउर पेड़वन के सभे फलवन, माने कि जे कुछ ओलवन से बच गेल हल, ऊ सभे के ऊ खा गेल, ईहाँ तक कि मिस्र देश भर में नऽ तऽ पेड़वन में हरियाली रह गेल आउर नऽ खेतवन में अनाज रह गेल।16तऽ फिरौन तुरते मूसा आउर हारून के बोल के कहलन, “हम तऽ तोर यहोवा परमेश्वर के आउर तोहनी के साथे पाप कईली हे।17येहिगुने अबकी बार हमर पाप मांफ कर दऽ, आउर अपन परमेश्वर यहोवा से प्रार्थना करऽ कि ऊ कईसहूँ हमरा ऊपर से ई मौत दूर हो जाय।”18तब मूसा फिरौन के भीर से निकल के यहोवा से प्रार्थना कईलन।19तब यहोवा खूब जोड़ से पछिया हवा चला के टिड्डी के उड़ा के समुद्र में डाल देलन आउर मिस्र के कोई जगह पर टिड्डियन नऽ रह गेल।20तईयो यहोवा फिरौन के मन कठोर कर देलन, जेकरा से कि ऊ इस्राएलियन के नऽ जाय देलक।21फिरू यहोवा मूसा से कहलन “अपन हाथ आसमान के तरप बढावऽ कि मिस्र देश के ऊपर अंधकार होवे, अईसन अंधकार जेकरा से कुछ नऽ सूझल आउर समूचे मिस्र देश में तीनो दिन तक घर अँधार छायल रहलऽ।”22तऽ मूसा अपन हाथ आसमान के तरप बढ़ईलन आउर समूचे मिस्र देश में तीनो दिन तक घोर अँधार छायल रहलऽ।23तीन दिन तक नऽ तऽ कोई केकरो देख के आउर नऽ अपन जगह से उठलन, बाकि समूचे इस्राएलियन के घर में इंजोर रहल।24तऽ फिरौन मूसा के बोल के कहलन, “तूँ लोग जा, यहोवा के उपासना करऽ अपन लईकन के भी साथे ले जा, केवल अपन भेड़-बकरी, आउर गाय-बैल के छोड़ दऽ।”25तऽ मूसा कहलन “तोरा हमर हाथ में मेलबलि आउर होमबलि के जानवर भी देवे पड़त, जेकरा से हमनी अपन परमेश्वर यहोवा ला बलि चढ़ायम।26येहिगुने हमर जानवर भी हमरा साथे जाय, ओकरा एगो खूँर तक नऽ रह जाय। काहेकि ओकरा में से हमनी के अपन परमेश्वर यहोवा के उपासना के समान लेवे ला होत आउर हम जखनी तक उहाँ नऽ पहुँचम तब तक नऽ जानम कि कौची-कौची ले यहोवा के उपासना करे ला हे।”27बाकि यहोवा फिरौन के मन कठोर कर देलन जेकरा से ऊ ओकरा नऽ जाय देलन।28तऽ फिरौन ओकरा से कहलन “हमरा सामने से निकल जा आउर सचेत रहऽ, अपन मुँह हमरा कहिनो नऽ देखावे के हे। काहेकि जौन दिन हमरा मुँह देखईवऽ ओही दिन तूँ मारल जईबऽ।”29मूसा कहलन, “तूँ ठीके कहऽ हऽ हमनी तोर मुँह के फिरू नऽ देखम!”
Bridge Connectivity Solutions Pvt. Ltd.