Esther5
1उनकर उपवास के तीन दिन के बाद, एस्तेर आउर उनकर सेवकवन एगो बड़का भोज तैयार कईलन। फिन ऊ अपन राजकीय पोशाक पेहेनलन, आउर ऊ चल गेलन आउर राजा के घर के सामने, राजमहल के भीतरी अँगना में जा के खड़ी हो गेलन। राजा राजकीय महल में, राजकीय सिंहासन पर बैठल हलन, आउर कमरा के भीतर जाय वाला दुआरी के तरफ मुँह कईले हलन।2जईसे ही राजा रानी एस्तेर के हूँआ अँगना में खड़ा देखलन, ऊ उनका देख के बड़ी जादे खुश होलन। येहिसे ऊ अपन सोना वाला राजदण्ड के उनका तरप बढ़ईलन, ई देखावे लागी कि ऊ सुरक्षित जईसन उनका से मिल सकऽ हलन। येहिसे एस्तेर सिंहासन भीर अईलन आउर राजदण्ड के नोक के छूलन।3तऽ राजा उनका से पूछलन, “हे रानी एस्तेर, तूँ हिंयाँ काहे लागी अईलऽ हे? तूँ का चाहऽ हऽ? हमरा बतावऽ, आउर हम तोरा कुछ भी देम जे तूँ माँगऽ हऽ, चाहे ऊ केतना भी बड़ा काहे नऽ रहे।”4एस्तेर जबाब देलन, “हे राजा, जदि ई तोरा खुश करऽ हे, तऽ हामान के जौरे आज ऊ भोज लागी आवऽ जे हम तोरा लागी तईयार कईली हे।”5राजा अपन सेवकवन से कहलन, “जा आउर हामान के ले आवऽ आउर जल्दी से ले आवऽ जेकरा से हम ऊ कर सकऽ ही जेकरा एस्तेर हमरा करे लागी कहलन हे!” येहिसे राजा आउर हामान ऊ भोज में गेलन, जेकरा एस्तेर आउर उनकर दासवन उनका लागी तईयार कईलन हल।6जखनी दाखमधु पी रहलन हल, तऽ राजा एस्तेर से कहलन, “अखनी तूँ कृपा कर के हमरा बतावऽ कि तूँ सच में का चाहऽ हऽ। हम तोरा कुछ भी देवो जेकरा तूँ माँगऽ हऽ, चाहे ऊ केतनो भी बड़ा काहे नऽ हो। हम जे कहऽ रहलीयो हे ओही हमर मतलब हे।”7एस्तेर जबाब देलन, “हम सच में ई चाहऽ ही:8जदि तूँ हमरा से प्रसन्न हऽ, आउर जदि तूँ हमर सुनऽ हऽ, तऽ हे राजा, जे हम चाहऽ ही, ओकरा देवे लागी, कृपा कर के हामान के साथे एगो आउर भोज में आवऽ, जेकरा हम बिहान तोरा लागी तैयार करम। ऊ घड़ी हम तोरा बतायेम कि हम का चाहऽ ही।”9हामान ऊ दिन बहुत जादे खुशी के महसूस कर रहलन हल जब ऊ हूँआ ऊ दिन भोज पर से गेलन। बाकि फिन ऊ मोर्दकै के राजा के फाटक पर बैठल देखलन। मोर्दकै हामान लागी आदर दिखावे आउर उनकर सामने डर से काँपे लागी खड़ा नऽ होलन। ई बात हामान के मोर्दकै के प्रति गोस्सा कर देलक।10बाकि येहिसे हामान बहुत जादे गोस्साल हलन, ऊ खुद के एकरा देखावे से रोक देलन कि ऊ गोस्साल हथिन। एकर बदले, ऊ प्यार से घर गेलन आउर अपन मेहरारू जेरेश के साथे अपन दोस्तवन के जमा कईलन,11तऽ हमाम उनका अपन धन के महिमा के विवरण देलन, आउर उनकर केतना बेटा हे ऊ साथहीं ई घमण्ड भी कईलन कि कईसे राजा उनका केतना बार पदवी बढ़ईलन हल आउर ऊ अपन सभे दोसरा अधिकारियन आउर कर्मचारियन से ऊपरे वाला पद देलन।12तऽ हामान आउर जादे जोड़ के कहलन, “आउर एतना ही काफी नऽ हे! हम ही खाली एगो आदमी हली जेकरा राजा के साथे ऊ भोज में जाय लागी नेउता मिलल हल जेकरा रानी एस्तेर हमरा लागी आज तईयार कईलन हे। आउर ऊ बिहान हमरा खाली राजा के साथे एगो आउर भोज में सामिल होवे लागी नेउता देलन हे।”13तऽ हामान कहलन, “बाकि हम तखनी तक खुश नऽ रह सकऽ ही जखनी तक कि हम ऊ यहूदी, मोर्दकै के राजा के फाटक पर बैठल देखते रहम आउर ऊ हमरा आदर देवे से इनकार करते रहे।”14येहिसे हामान के मेहरारू जेरेश आउर उनकर दोस्तवन जे ओज्जा हलन, सलाह देलन कि, “तोहर दास 25 मीटर ऊँचा खम्भा खड़ा करतन। तऽ बिहान सवेरे राजा से बोलऽ आउर उनका से कहऽ कि तूँ मोर्दकै के एकरा पर लटकावे लागी चाहऽ हऽ। तऽ फिन मोर्दकै के फांसी देवे के बाद तूँ बढ़ियाँ खुश मन के साथ भोज में जा सकऽ हऽ।” हामान सोंचलन कि ई एगो बढ़ियाँ योजना हे, येहिलागी ऊ अपन सेवकवन के खम्भा गाड़े लागी कहलन।
Bridge Connectivity Solutions Pvt. Ltd.