Esther3
1ई घटना के कुछ समय बाद, राजा क्षयर्ष अपन अधिकारियन में से एगो हम्मदाता के बेटा, हामान के ऊँचा पद देलन, जे अगागी के खानदान हलन। राजा हामान के एगो बहुत ही खास पद देलन, जे उनकर दोसरा अधिकारियन के तुलना में सभे से उंचा सिहांसन हल। 2राजा ई देखावे लागी चाहऽ हलन कि ऊ हामान के एगो खास पद देलन हल। येहीलागी ऊ अपन सभे दोसरा अधिकारी के आज्ञा देलन, जे राजा के फाटक पर रहऽ हलन कि ऊ हामान के सम्मानित करे लागी धरती पर झुक के चलते जईतन जखनी भी ऊ हूँआ से निकलऽ हथन। बाकि मोर्दकै हामान के सामने झुके से इनकार कर देलन, काहेकि एगो यहूदी के जईसन ऊ यहोवा के अलावे कोई दूसरा कोई के आराधना नऽ करऽ हलन।3राजा के फाटक पर मौजूद दोसरा दास देखलन कि मोर्दकै झुके से मानऽ कर देलन हे, तऽ ओखनी उनका से पूछलन, “तूँ राजा के आज्ञा के उल्लंघन काहे कर रहलऽ हे?”4मोर्दकै उनका बतईलन कि ऊ एगो यहूदी हथिन, आउर यहूदी खाली यहोवा के आराधना करऽ हथिन। दोसरा दास मोर्दकै रोजदिन चेतावनी दे हलन कि जदि ऊ राजा कि आज्ञा के उल्लंघन करते रहथिन आउर उनकर सभे खास अधिकारी के आदर नऽ करतन तऽ उनका कड़ा सजा देबल जायेत। बाकि मोर्दकै तईयो झुके से माना कर देलन। येहिसे ओखनी हामान के एकर बारे में ई देखे लागी बता देलन कि का ऊ मोर्दकै के, काहेकि ऊ एगो यहूदी हलन, नऽ झुके के अनुमति देतन।5जखनी हामान देखलन कि मोर्दकै उनकर सामने नऽ झुकथिन, तऽ ऊ गुस्सा हो गेलन।6दोसरा दास हामान से कहलन कि मोर्दकै उनकर सामने नऽ झुक रहलन हल काहेकि मोर्दकै एगो यहूदी हथिन। येहिसे हामान फैसला लेलन कि खाली मोर्दकै के मारना ही बड़ी नऽ होत। हामान फैसला लेलन ऊ क्षयर्ष के पूरा राजपाट के सभे यहूदियन के मारे के कोशिश करतन।7येहिसे हामान अपन सेवकवन द्वारा एगो पूर, मतलब एगो चिट्ठी डलवईलन, जबकि ऊ यहूदियन के मारे लागी सब से बढ़ियाँ महीना के आउर महीना के सभे से बढ़ियाँ दिन के तय करते देखलन। ओखनी ई पहिला महीना, नीसान के महीना में कईलन, बारहवाँ वरिस में, जखनी क्षयर्ष फारस के राजा के रूप में शासन कईलन हल। चिट्ठी ऊ वरिस के बारहवाँ महीना, अदार के महीना के, हामान लागी अपन योजना के पूरा करे के समय चुनलन। 8तऽ हामान राजा क्षयर्ष भीर गेलन आउर कहलन, महामहिम, तोहर राजपाट में दोसरा लोगवन के बीच में रहे बालन लोग के एगो पक्का झुण्ड हे। ऊ सब प्रान्त में पावल जा हे। उनकर भीर नियम के एगो अपनहीं सूची हे, आउर येहिसे ऊ तोहर कानून के पालन नऽ करऽ हथिन। तोहरा लागी ई बढ़ियाँ नऽ हे कि तूँ उनका अपन राजपाट में रहे दऽ।9“हे राजा, जदि तूँ ई योजना के समर्थन करऽ हऽ, तऽ ई कह के एगो राजाज्ञा लिखऽ कि सभे यहूदियन के मारे पड़त। जखनी ऊ मर जईतन, तऽ हम उनकर सभे सामान ले सकऽ ही, आउर ओकरा से हम तोहर राजकीय खजाना में डाले लागी 300 टन चाँदी तोहर कर्मचारी के देम।”10राजा हामान के कहल गेल बात के पसंद कईलन। येहिसे ऊ हामान के ऊ अंगूठी देलन, जे पहनले हलन, जेकरा पर उनकर आधिकारिक मोहर हल। एकर साथहीं, हामान नियम बना सकऽ हलन जइसे कि ऊ खुद राजा हथिन। हामान, अगागी हम्मदाता के बेटा, यहूदियन के दुश्मन बन गेल हल।11राजा हामान से कहलन, तूँ अपना लागी धन रख सकऽ हऽ आउर तूँ ऊ आदमियन के जौरे जे करेलागी चाहऽ हऽ, ऊ कर सकऽ हऽ।12निसान के पहिला महीना के तेरहमा दिन हामान राजकीय लेखक के बुलईलन, आउर ऊ उनका से एगो चिट्ठी लिखवईलन। ऊ ओकरा राजकीय अधिकारियन, सभे नगर के राज्यपाल आउर सभे आदमियन के झुण्ड के अगुवन के एकर प्रति भेजे लागी कहलन। शास्त्रियन चिट्ठी के अनुवाद कईलन ताकि ई सभे नगर के उनकर अपन भाषा में आउर सभे आदमी के उनकर अपन भाषा के इस्तेमाल कर के भेजल जा सकत। ई देखावे लागी कि ऊ राजा क्षयर्ष के अधिकार के अधीन चिट्ठी भेज रहल हल, हामान चिट्ठी के सभे प्रति के ऊ अंगूठी से मुहरबन्द कर देलन जेकरा में राजा क्षयर्ष के आधिकारिक मुहर हल।13हरकार द्वारा राजा के साम्राज के सभे नगर के अधिकारियन के चिट्ठी पहुँचईलन। चिट्ठी में एगो तय दिन में लईकवन आउर औरतियन सहित सभे यहूदियन के पूरा तरह से खतम करे लागी कहलन। ऊ साल के बारहवाँ महीना के तेरहवाँ दिन, अदार के महीना हल ओही साल में। चिट्ठी में ई कहल गेल कि जे आदमी यहूदियन के मारऽ हथिन, ऊ उनका सभे कुछ ले सकलन हल।14चिट्ठी में अधिकारियन के कहल गेल हल कि ऊ प्रतियन के अईसन जगह पर चिपकाबऽ जहाँ सब कोई ओकरा देख सकतन। ई तरह से सब एगो नगर के सभे के पता चल जायेत कि राजा ई आदेश देलन हल, आउर ऊ तौयार हो जईतन चिट्ठी में कहल के अनुसार करे लागी जखनी ऊ दिन आवत।15राजा जईसन आदेश देलन हल, हरकारवन चिट्ठी के लेके राजपाट के सभे नगर में जल्दी गेलन। एगो अग्रदूत भी शूशन राजगढ़ में ऐलान कईलन कि चिट्ठी में का कहल गेल हल। राजा आउर हामान आराम कईलन आउर एक जौरे दाखमधु पीलन। बाकि शूशन में रहे वालन सब कोई जे होवे वाला हल ओकरा लेके हद से जादे परेशान हलन।
Bridge Connectivity Solutions Pvt. Ltd.