Ephesians6
1जहाँ तक तोहनी के बात हे जौन लईकन हऽ, अपन माय-बाप के आज्ञा पालन अईसे करऽ कि जईसे प्रभु यीशु के सेवा कर रहलऽ हे काहेकि अईसन करे ला तोरा ला सही हे।2परमेश्वर पवित्रशास्त्र में आज्ञा देलन हे, "अपन माय आउर बाप के बड़ी जादे आदर करऽ।" ई पहिला नियम हे, जेकर आज्ञा परमेश्वर देलन हल जेकरा में ऊ कुछ वादा भी करलन हे। ऊ प्रतिज्ञा करलन हे, 3"जदि तूँ अईसन करऽ हऽ, तऽ तूँ तरक्की करवऽ, आउर धरती पर ढेर दिन तक जिन्दा रहवऽ। 4जहाँ तक तूँ जौन माय-बाप हऽ, अपन लईकवन के साथे अईसन वर्ताव नऽ करऽ जेकरा वजह से ऊ गोस्सा हो जाय। एकर बदले, उनका बढ़ियाँ तरह से समझा के आउर उनका ऊ ढंग से अनुशासित करऽ, जे प्रभु यीशु तोरा से चाहऽ हथन। 5जहाँ तक तूँ जौन दास हऽ, बड़ी डरते आउर मन से ओखनी सभे के आज्ञा के मानिहऽ जौन धरती पर तोरा ऊपर देह के मुताबिक मालिक हथन, ठीक ओईसहीं जईसे तूँ मसीह के आज्ञा के पालन करऽ हऽ। 6उनकर हुकूम खाली तखनिये नऽ मानिहऽ जखनी ऊ तोरा देख रहलन हे, जईसन कि ऊ लोग करऽ हथन जौन खाली दिखावा करऽ हथन, कि जईसे ऊ कड़ा मेहनत कर रहलन हे। एकर बदले, अईसे काम करऽ जईसे कि तूँ मसीह के दास हऽ, पूरा मन से करते रहऽ कि परमेश्वर तोरा से का करे ला चाहऽ हथन।7अपन स्वामी लोग के सेवा अपन इच्छा से करऽ, अईसे कि जईसे तूँ लोग के बदले प्रभु यीशु के सेवा कर रहलऽ हे।8अईसन येहिसे करऽ काहेकि तूँ जानऽ हऽ कि प्रभु यीशु सभे आदमी के ऊ अच्छा काम लागी इनाम देतन जौन ऊ आदमी करलन हे। ई बात कोई मतलब नऽ रखऽ हे कि ऊ आदमी दास हल कि एगो स्वतंत्र आदमी।9जहाँ तक तूँ जौन स्वामी हऽ, तोर बात हे, ठीक ओईसहीं जईसे तोर दास लोग के तोर सेवा अच्छा रीति से करे के चाही। ओखनी के धमकी देवे ला बंद करऽ। ई मत भूलईहऽ कि जे दूनो उनकर प्रभु आउर तोर प्रभु हथन ओही जौन स्वर्ग में हथन आउर ओखनी के साथे कोई पक्षपात नऽ करऽ हथन चाहे उनकर पद ऊँचा चाहे नीचा काहे नऽ होवे। 10अंतिम में, आत्मिक रूप से खुद के मजबूत बनावे लागी पूरा रीति से प्रभु यीशु पर भरोसा करऽ काहेकि ऊ बड़ी शक्तिशाली हथन।11ठीक ओईसहीं जईसे एगो सिपाही अपन दुश्मन से लड़े लागी तईयार होवे लागी अपन सभे हथियार के उठा ले हे, तोरा सभे आत्मिक हथियार के इस्तेमाल करे के चाही जौन परमेश्वर तोरा परदान करलन हे जेकरा से कि तूँ शैतान के खिलाफ विजय हो सकऽ जखनी ऊ तोर विरोध में चलाकी से योजना बनावऽ हे।12याद रखऽ कि हम दोसर लहू आउर मांस से नऽ लड़ रहली हे। एकर बदले, हम ऊ संसार के दुष्ट लोग के खिलाफ लड़ रहली हे, जेकरा भीर ई बुरा समय में बुरा काम करे वाला लोग पर शासन करे के अधिकार हे, मतलब कि ऊ दुष्ट आत्मिकता के खिलाफ जे आकाश में रहऽ हे। 13येहिसे तोरा ऊ सभे आत्मिक संसाधन के बढ़ियाँ ढंग से इस्तेमाल करे के चाही जौन परमेश्वर तोरा देलन हे, एगो सिपाही के जईसन जौन अपन समूचे हथियार के धारण करऽ हे। जदि तूँ अईसन करऽ हऽ, तऽ तूँ दुष्टात्मावन के विरोध करे के काबिल हो सकऽ हऽ जखनी ऊ तोरा पर हमला करतन। तूँ तखनियो तईयार रहिहऽ जखनी ऊ फिन से तोरा पर हमला करतन आउर परमेश्वर लागी बढ़ियाँ जिनगी जिये के लायक हो जईवऽ।14तोरा शैतान आउर ओकर दुष्टात्मा के विरोध करे लागी तईयार रहे के चाही, जईसे कि सिपाही के दुश्मन के विरोध करे लागी हमेशा तईयार रहऽ हे। अईसन करे लागी, ऊ सच्चाई बात के बारे में सोचते रहऽ, जौन परमेश्वर तोरा देखईलन हे। एकर अलावे, धार्मिकता से भरल बर्ताव के करते रहिहऽ। ई तोरा रक्षा एगो अईसन सिपाही के रूप में करतन जौन ओकर छाती के रक्षा करऽ हे। 15एगो सिपाही के जईसन जौन अपन जूता पेहेनले रहऽ हे, जदि जरुरी हे तऽ शुभ समाचार लागी कहीं भी जाय लागी तईयार रहऽ, जौन लोग के बतावऽ हे कि कईसे परमेश्वर के साथे शान्ति से रहे ला हे। 16जईसे एगो सिपाही अपन दुश्मन दने से आवे वाला जलते तीर के रोके लागी ढाल के पकड़ले रहऽ हे जौन ओकर दुश्मन ओकरा पर चलावऽ हे, ओईसहीं तोरा हर घड़ी प्रभु पर मजबूती से विश्वास बनईले रखे के चाही। ई तोरा ऊ सभे चीज से बचईतक, जे तोर दुश्मन, शैतान, दुष्ट, तोरा आत्मिक रूप से नुकसान पहुँचावे के कोशिश करत।17एकर अलावे, एगो सिपाही अपन माथा के उद्धार लागी एगो टोप के पेहेनले रहऽ हे, ई बात पर भरोसा करऽ कि परमेश्वर तोरा बचईलन हे। आउर जईसे एगो सिपाही अपन दुश्मन के हरावे लागी एगो तलवार के इस्तेमाल करऽ हे, ऊ हथियार के इस्तेमाल करिहऽ जेकरा परमेश्वर के आत्मा तोरा देलन हे, ई ऊ सुसमाचार हे जौन परमेश्वर दने से आवऽ हे। 18जखनी तूँ परमेश्वर से प्रार्थना करऽ हऽ आउर उनका से कोई चीज ला निवेदन करऽ हऽ, तऽ हमेशा परमेश्वर के पवित्र आत्मा के अगुवाई करे दिहऽ कि तोरा कईसे प्रार्थना करे ला हे। जादे असरदार होवे लागी, ई देखऽ कि परमेश्वर का कर रहलन हे, आउर धीरज धरले रहिहऽ जखनी तूँ परमेश्वर के सभे लोग लागी लगातार प्रार्थना में लगल रहिहऽ।19हमरा लागी भी प्रार्थना करिहऽ, कि परमेश्वर हमरा बतईतन कि जखनी हम बोलम, तऽ हमरा का बोले ला हे, ताकि हम दोसरा के मसीह के शुभ समाचार सुना सकम, जेकरा लोग पहिले नऽ जानऽ हलन।20अईसन येहिसे हे काहेकि हम लोग के मसीह के बारे में बतईते अईली हे कि हम अब हम ईहाँ सिकड़ कैद में उनकर अगुवाई कर रहली हे। प्रार्थना करऽ कि जखनी हम दोसरा के मसीह के बारे में बतायेम, तऽ हम हिम्मत से बोल सकली हे, काहेकि अईसने हमरा बोले के चाही।21अब येही कतार में कि तूँ जान सकलऽ हे कि हमरा साथे का हो रहल हे, आउर हम का कर रहली हे, तुखिकुस तोरा ईहाँ पर घटित होवे वाला सभे बात के बारे में बतईतन। ऊ एगो अईसन साथी विश्वासी हे, जिनका हमनी सभे बड़ी प्रेम करऽ ही, आउर ऊ प्रभु यीशु के विश्वासयोग्य सेवक हथन।22येही ऊ कारण हे कि हम उनका तोरा भीर ई चिट्ठी भेज रहली हे; हम चाहऽ ही कि तूँ ई जान लऽ कि हम कईसन ही, आउर हम चाहऽ ही कि ऊ तोर मन के शान्ति आउर हौसला देतन।23हम प्रार्थना करऽ ही कि परमेश्वर हमर पिता आउर प्रभु यीशु मसीह तोहनी सभे साथी विश्वासियन के एगो शान्ति से आत्मा देतन, आउर तोहनी एक दोसरा के साथे प्रेम करे आउर लगातार परमेश्वर पर भरोसा रखे के लायक बनईतन।24हम प्रार्थना करऽ ही परमेश्वर हमर पिता लगातार ऊ सभे लोग के बीच में अनुग्रह से भर के काम करते रहतन, जौन हमर प्रभु यीशु मसीह के प्रति मजबूत प्रेम रखऽ हथन।
Bridge Connectivity Solutions Pvt. Ltd.