Ephesians5
1परमेश्वर जे कुछ तोरा ला करलन हे, ओकर चलते उनकर पीछा ओईसहीं करऽ जईसे बच्चा ऊ पिता के पीछा करऽ हे जौन ओकरा जादे प्रेम करऽ हथन।2सभे कुछ ई तरह से करऽ जेकरा से ई पता चले कि तूँ दोसरा से प्रेम करऽ हऽ। मसीह के जईसन बनऽ, जौन हमरा एतना जादे प्रेम करऽ हलन कि ऊ अपने से क्रूस पर हमरा ला मर गेलन आउर हमर जगह पर परमेश्वर भेंट आउर बलिदान बन गेलन। एही बलिदान परमेश्वर के बड़ी जादे खुश करलन। 3बाकि कोई भीर ई सुझाव देवे के कोई कारण नऽ होवे के चाही कि तोहनी में से कोई भी व्यभिचार के पाप चाहे कोई तरह के गलत काम चाहे वासना से भरल यौन व्यवहार में शामिल हे। अईसन पाप परमेश्वर के पवित्र लोग से जुड़ल नऽ हे।4जखनी तूँ एक दोसरा से बात करऽ हऽ, तऽ गन्दा कहानी नऽ कहिहऽ, चाहे मूर्खता से भरल बात नऽ बोलिहऽ, चाहे पाप के बारे में मजाक नऽ करिहऽ। ई सभे अईसन बात नऽ हे जौन लोग परमेश्वर के निकट हथन जेकर बारे में बात करल जाय। एकर बदले, ऊ सभे बात के बोलिहऽ, जेकरा लागी तोरा एहसानमंद होवे के चाही।5ई एगो बड़ी बड़का सच्चाई हे कि ई लोग के मसीह के राज से बाहरसी रखल जायेत जौन परमेश्वर हे: सभे कोई जौन यौनाचार के रूप में अशुद्ध काम चाहे जे शोभा नऽ दे हे, चाहे जौन लोभ में पड़ल हे, जौन मूर्तिपूजा करे के बराबर हे।6कोई तोरा बेकार बता के धोखा नऽ देवे कि परमेश्वर अईसन लोग के सजा नऽ देतन जौन ई सभे काम करऽ हे। येही सभे बात के चलते परमेश्वर ऊ लोग के सजा देतन जौन उनकर आज्ञा के नऽ मानऽ हे।7येहिगुने अईसन पाप करे में ओखनी के साथे शामिल नऽ रहिहऽ।8याद रखऽ कि एकरा से पहिले तूँ प्रभु यीशु पर विश्वास करते हल, तूँ नऽ जानऽ हलऽ कि सच्चाई का हल, ठीक ओईसहीं जैसे कि एगो अंधार जगह में रहे वाला आदमी नऽ जानऽ हे कि उनकर चारो दने का हे। बाकि अब ई अईसन हे कि जैसे तूँ इंजोर में आ गेलऽ हे, काहेकि प्रभु तोरा देखईलन हे कि सच का हे। येहिसे ऊ ढंग से जियऽ, जईसे प्रभु तोरा जी के देखईलन हे। 9काहेकि जौन लोग भीर इंजोर हे ओखनी सभे सही ढंग से चलतन, काहेकि यीशु के जानला के नतीजा तूँ हमेशा अईसन तरीका से जिनगी जी सकलऽ हे जौन अच्छा, सही आउर धार्मिकता से सच्चा रहे।10धियान से जाँच करऽ कि प्रभु के का अच्छा लगऽ हे। 11येहिसे ओखनी के साथे सहभागी नऽ बनऽ जौन बेकार के काम कर रहलन हे जौन ऊ आत्मिक अंधार में करऽ हथन। एकर बदले, सभे के देखावऽ कि उनकर काम केतना जादे बेकार हे।12एकरा में कोई शंका नऽ हे कि परमेश्वर के लोग ला ईहाँ तक कि गन्दा काम के बारे में चर्चा करे ला शर्मनाक बात हे, जेकरा ऊ सभे लोग छिप के करऽ हथन,13बाकि ई हमरा ला जरुरी हे कि हम ओकरा देखायेम ताकि लोग जान सकतन आउर समझ सकतन कि ई सभे काम गलत हे। ई अईसन होवऽ हे जब हम कोई चीज के इंजोर में लावऽ ही, ताकि सभे के पता चल सकत कि ई सचमुच में का हे, तब लोग ऊ चीज के जाँच आउर इंसाफ कर सकलन हे जेकरा इंजोर देखा देलक हे।14एकरा से पहिले कि तूँ परमेश्वर के जानते भर में तूँ अईसन हलऽ कि समझऽ कोई सुतल हे, चाहे कोई अंधार जगह में मरल पड़ल हे। येही तऽ विश्वासी बात करऽ हथन जखनी ऊ कहऽ हथन, “तोहनी जौन सूत गेलऽ हे, जागऽ! तोहनी जे मर गेल हे, अंधार से बाहरे आवऽ आउर जी उठऽ! मसीह तोरा देखईतन कि सच का हे, ठीक ओईसहीं जईसे इंजोर लोगवन के देखावऽ हे कि अंधार में कौची हल।” 15येहिसे बड़ी जादे होशियार रहिहऽ कि तूँ कईसे जियऽ हऽ। मूरख लोग जईसन वर्ताव नऽ करिहऽ जईसे ओखनी करऽ हथन। एकर बदले, बुद्धिमान लोग जईसन वर्ताव करिहऽ।16अपना तरफ से सभे से बढ़ियाँ करिहऽ जे तूँ ऊ घड़ी कर सकलऽ हे जौन तोरा भीर हे, काहेकि लोग रोजदिन जादे से जादे गलत काम कर रहलन हे। 17येहिसे समझदार बनऽ, अच्छा से समझलऽ कि ऊ का हे जौन प्रभु यीशु मसीह चाहऽ हथन कि तूँ करऽ, आउर ओकरा करिहऽ!18दाखरस से मतवाला मत बनिहऽ, काहेकि लोग मतवाला होला के बाद खुद के काबू नऽ कर सकलन हे, एकर बदले, परमेश्वर के पवित्र आत्मा तोरा काबू करतन कि तूँ हर बखत का करऽ हऽ। 19एगो दोसरा के सामने मसीह के बारे में भजन आउर गीत गावऽ आउर ऊ गीत के जौन परमेश्वर के आत्मा तोरा दे हथन। ई गीत के अपन मन के आत्मिक गहराई से प्रभु लागी गंभीर प्रशंसा के रूप में निकले दऽ। 20हर घड़ी सभे बात लागी हमर पिता परमेश्वर के ऊ सभे बात के चलते धन्यवाद दिहऽ जौन प्रभु यीशु मसीह के नाम में तोरा लागी करलन हे21नम्रता पूर्वक मसीह के भय से खुद के एक दोसरा के सौंप दऽ काहेकि तूँ गहराई से मसीह के आदर करऽ हऽ।22मेहरारूवन के अपने आप के मरद के अगुवाई में अधीन रहे के चाही जईसे कि ऊ प्रभु यीशु के अधीन होवऽ हथन। 23काहेकि मरद औरत के अगुवा हे ठीक ओईसहीं जईसे मसीह विश्वव्यापी विश्वासियन के झुण्ड के अगुवा हथन। ऊ अपन देह के उद्धारकर्ता हथन, जौन सभे विश्वासियन के पापवन के सजा पावे से बचईलन हे।24बाकि जईसे कलीसिया मसीह के अधीन हे, ओईसहीं औरतियन सभे बात में अपन-अपन मरद के अधीन रहतन।25तोहनी में से सभे मरद, अपन मेहरारू से ओईसहीं प्रेम करतन जईसे मसीह कलीसिया से प्रेम करऽ हथन जौन उनका पर विश्वास करऽ हथन। ईहाँ तक कि ऊ हमरा लागी क्रूस के ऊपर अपन जिनगी दे देलन26जेकरा से ऊ हमनी के अपना ला अलग कर पवित्र करतन। ऊ हमनी के मांफ करे के अपन योजना बता के आउर हमनी के पाप के दूर कर के अईसन शुद्ध करलन हे कि मानऽ ऊ सभे के पानी से धो देलन हे।27ऊ अईसन येहिसे करलन ताकि ऊ सभे विश्वासियन के झुण्ड के महिमामय झुण्ड के रूप में पेश कर सकतन, जेकरा में कोई पाप चाहे नैतिक दोष नऽ रहे, बलुक ऊ पवित्र आउर सिद्ध होवे, जईसे कि एगो महिमामय दुल्हिन अपन दूल्हा से मिले लागी तईयार हे।28ओईसहीं, सभे आदमी के अपन औरत से ओईसहीं प्रेम करे के चाही जईसन कि ऊ अपन देह से करऽ हथन। जौन मरद अपन मेहरारू से प्रेम करऽ हे ऊ अईसन कर के खुद से प्रेम करऽ हे,29काहेकि कोई अपन देह से कहियो घिन नऽ मानऽ हे। एकर बदले, ऊ अपन खुद के देह के भोजन खिलावे हे आउर ओकर देख भाल करऽ हे, ठीक ओईसहीं जईसन मसीह हमनी सभे विश्वासी लोग के देख भाल अपन कलीसिया में करऽ हथन।30काहेकि हमनी उनकर देह के एगो अंग ही।31पवित्रशास्त्र वियाह करे वाला लोग के बारे में ई कहऽ हे: "येहिगुने जौन मरद अपन बाबूजी आउर माय के छोड़ देतन आउर खुद अपन औरत से जुड़ जईतन, आउर ऊ दूनो एक देह होतन जईसे कि ऊ एगो देह हथन।" 32एकर बारे में बड़ी कुछ जौन जेकरा हमनी नऽ समझ सकली हे, बाकि हम तोरा बता रहली हे कि मरद आउर औरत के ई उदाहरण हमरा मसीह आउर उनकर साथे लगाव रखे वाला लोगवन के कलीसिया के बीच के रिश्ता के समझावे में मदत करऽ हे।33जबकि, जहाँ तक तोर बात हे, सभे मरद के अपन औरत से ओईसहीं प्रेम करे के चाही जईसे कि ऊ खुद से प्रेम करऽ हथन, आउर सभे औरत के अपन मरद के बड़ी इज्जत देवे के चाही।
Bridge Connectivity Solutions Pvt. Ltd.