Deuteronomy12
1जौन देश के तोर पितर के परमेश्वर यहोवा तोरा अधिकार में देलन हे ओकरा में जहिया तक तूँ धरती पर जिन्दा रहवऽ तहिया तक ई सभे विधि आउर नियम के मानिहऽ।2तूँ पक्का ऊ सभे के नाश कर देवऽ जहाँ जौन-जौन जाति के तूँ अपन अधिकार में कर लेवऽ ऊ ऊँचा पहाड़ पर, टीला पर, आउर सभे पेड़ तर अपन देऊतवन के उपासना करऽ हल।3आउर ओकर वेदी के ढा दिहऽ, ओकर खम्भा सब के टुकड़ा-टुकड़ा कर दिहऽ, आउर ओकर अशेरा नाम के मूर्तियन के जला दिहऽ। तोरा उनकर देउता सब के खोदल मूर्तियन के तोड़-फोड़ देवे के चाही आउर ऊ जगहिया पर से ओकरा नामोनिशान मिटा देवे के चाही। 4तूँ अपन यहोवा के अईसे उपासना नऽ करिहऽ जइसन ऊ लोग करऽ हलन।5बाकि जौन जगह तोर परमेश्वर यहोवा अपन सभे गोत्र में से अपन नाम रखे लागी चुन लेलन हे ऊ ओही जगह होत, तूँ ऊहें जईहऽ आउर आराधना करिहऽ।6ऊहें तूँ अपन होमबलि, अपन मेलबलि, अपन दशमांश, अपन हाथ से चढ़ावल चढ़ावा, मनौता लागी स्वेच्छाबलि, आउर गाय-बैल आउर भेड़-बकरियन के पहिलौठा के ऊहें ले अईहऽ।7ऊहें तूँ अपन परमेश्वर यहोवा के सामने खाना खईहऽ, आउर अपन-अपन घराना समेत जौन-जौन काम में तूँ हाथ लगईहऽ ओखनी सभे के के कारण आनन्द मनईहऽ, आउर जहाँ तोर परमेश्वर यहोवा तोरा आशीर्वाद देलन हे उहाँ तूँ आनन्द मनईहऽ।8जौन काम आज हियाँ हो रहल हे, ऊ सभे तूँ नऽ करिहऽ; अखनी हर कोई ओही कर रहलन हे जौन उनकर नजर में सही हे9काहेकि जौन देश तोर परमेश्वर यहोवा तोरा दे हथिन ओकरा में तूँ अभी तक नऽ पहुँचलऽ हे।10बाकि जब तूँ यरदन नदी के पार जा के ऊ देश में बसबऽ जेकर भाग तोर परमेश्वर यहोवा तोरा दे हथिन, आउर ऊ तोरा चारो दने के सभे दुश्मन से विश्राम देतन, आउर तूँ सुरक्षित रहिहऽ।11फिन जौन जगह ला तोर परमेश्वर यहोवा अपन नाम के निवास करे लागी चुन लेतन, उहाँ तूँ ऊ सभे कुछ ले अईहऽ जौन हम तोरा आज्ञा दे ही, मतलब कि होमबलि, मेलबलि, दशमांश, आउर तोर हाथ से चढ़ावल गेल चढ़ावा, आउर तोर सऊँसे पसंद जौन मन्नत तूँ यहोवा लागी मानिहऽ आउर उनका ला दान करिहऽ।12आउर तूँ अपन बेटा-बेटी, दास-दासी, आउर अपन फाटक के भीतरे लेवियन सहित अपन परमेश्वर यहोवा के सामने आनन्द करिहऽ, काहेकि उनका तोर बीच में कोई भाग चाहे निज हिस्सा नऽ होत।13आउर होशियार रहिहऽ, कि जेज्जा-जेज्जा देखवऽ उहाँ अपन होमबलि नऽ चढ़ईहऽ;14बाकि जौन जगह यहोवा तोर गोत्र में से चुन लेतन ओकरे में तूँ होमबलि चढ़ईहऽ, आउर जे कुछ हम तोरा आज्ञा देम ओही तूँ करिहऽ।15बाकि तूँ अपन सभे फाटक के भीतर अपन मन के मोताबिक जनावर के मार के खा सकल हे, आउर अपन परमेश्वर यहोवा से जे कुछ ऊ तोरा देलन हे ऊ सभे पर आशीर्वाद पा सकल हे; अशुद्ध आउर शुद्ध दुन्नो आदमी, चाहे चिकारा आउर हिरन जईसे जनावर के ओकरा में से खा सकल हे।16बाकि लहू तूँ नऽ खईहऽ; तूँ ओकरा जल के जईसन धरती पर उझल दिहऽ। 17तूँ अपन फाटकवन के अन्दर अपन अनाज के दशमांश, चाहे नया दाखमधु, चाहे टटका तेल, चाहे गाय-बैल, चाहे भेड़-बकरियन, के पहिलौठा के नऽ खईहऽ; आउर जौन मन्नत मानल जा हे, ओकरा में से जौन कुछ तूँ बलि करऽ हऽ, ओकर मांस नऽ खईहऽ, आउर नऽ अपन इच्छा से देवल गेल दान, आउर नऽ अपन हाथ से चढ़ावल चढ़ावा में से कुछ खईहऽ।18बाकि तूँ ओकरा अपन परमेश्वर यहोवा के सामने ऊ जगह में खईब, जेकरा तोर परमेश्वर यहोवा चुन लेतन, मतलब कि तूँ, तोर बेटा, तोर बेटी, तोर दास, तोर दासी, आउर जे लेवी तोर फाटक के भीतर रहतन ओकरा खईतन; जौन-जौन चीज पर तूँ हाथ रखव ओकरा बारे में तूँ अपन परमेश्वर यहोवा के सामने खुश होवऽ।19होशियार रहऽ, अईसन नऽ होवे कि जहिया तक तूँ अपन देश में जिन्दा रहवऽ तहिया तक लेवियन के नऽ छोड़िहऽ।20जब तोर परमेश्वर यहोवा अपन वचन के मोताबिक तोर सीमा के बढ़ईतन, आउर तूँ मांस खाय के इच्छा के चलते कहवऽ हम मांस खायम, तब तूँ अपन इच्छा के मोताबिक मांस खा सकलऽ हे।21यदि जौन जगह तोर परमेश्वर यहोवा अपन नाम रखे ला चुन लेतन ऊ तोरा से बड़ी दूर हे, तऽ तूँ अपन गाय-बैल आउर भेड़-बकरियन में से जे यहोवा तोरा देलन हे, हमर आज्ञा के मोताबिक मार दिहऽ; तूँ अपन घर के अन्दर खा सकलऽ हे, जईसे तोरा निमन लगे। 22जईसे चिकार आउर हिरन खायल जा हे, ओईसहीं तूँ भी ओकरा में से खईबऽ; अशुद्ध आउर शुद्ध आदमी ओकरा में से समान रूप से खा सकऽ हऽ।23बाकि होशियार रहिहऽ, कि तूँ लहू नऽ खईहऽ काहेकि लहू में जीवन हे; तूँ मांस के साथे प्राण नऽ खईहऽ।24तूँ ओकरा नऽ खईहऽ; तूँ ओकरा जल के समान धरती पर उझल दिहऽ।25येहिसे तूँ ओकर नऽ खईहऽ, जेकरा से तूँ ऊ काम करवऽ जौन यहोवा के नजर में ठीक हे, येहिसे तोरा आउर तोर बाद तोर वंश के भी भलाई होवत।26बाकि यहोवा के जौन चीज तोरा भीर हे, आउर जौन मनौता पूरा होवे, ओकरा लेके ऊ जगहिया पर जईहऽ जे यहोवा चुनलन हे।27उहाँ तूँ अपन परमेश्वर यहोवा के वेदी पर अपन होमबलि, मांस आउर लहू दुन्नो के चढ़ईहऽ; तोर बलिदान के लहू तोर परमेश्वर यहोवा के वेदी पर डाल देवल जईतई, आउर तूँ ओकर मांस खईब।28ई सभे वचन जौन हम तोरा सुनाबऽ ही ओकरा ध्यान दिहऽ, आउर कान लगईहऽ, जेकरा से यदि तूँ ऊ काम करवऽ जौन तोर परमेश्वर यहोवा के नजर में भला आउर बढ़िया हे, तऽ तोरा आउर तोर बाद तोर वंश के हर घड़ी भलाई होते रहत।29जब तोर परमेश्वर यहोवा दूसरा जतियन के सामने से नाश करतन, आउर तूँ ओकरा अधिकार में करे ला जईबऽ, तऽ ओकरा ओकर देश में से निकास के ओकर देश में बस जा,30येहिसे होशियार रहिहऽ कि जब ओखनी तोरा सामने से नाश हो जायत, तब कहूँ तूँ ओखनी के पीछे नऽ हो जईहऽ, आउर ओखनी के देऊतवन के पीछे पूछ-ताछ करे में नऽ फंस जईहऽ, कि ई सभे जाति अपन देउतवन के उपासना कईसे करऽ हथिन? हमरा भी करे ला हे,31तूँ अपन परमेश्वर के आराधना ई रीति से नऽ करिहऽ, काहेकि जे कुछ यहोवा के घिनामन लगऽ हे, चाहे जौन चीज से ऊ घिरना मानऽ हथिन, ऊ सभे ओखनी अपन देउतवन के सामने कईलन हे; हियाँ तक कि अपन देउतवन लागी अपन बेटवन-बेटियन के भी जला दे हे। 32जे कुछ भी हम तोरा आज्ञा दे ही, ओकरा पालन करिहऽ, एकरा में नऽ कुछ जोड़िहऽ आउर नऽ ही एकरा में कुछ घटईहऽ।
Bridge Connectivity Solutions Pvt. Ltd.