Acts9
1येही बीच में शाऊल क्रोध में आके प्रभु के पीछे चले वालन चेलवन के मार डाले के धमकी देवे ला शुरु रखलन। ऊ यरूशलेम में याजक भीर गेलन।2आउर ओखनी दमिश्क में यहूदी आराधनालय के अगुवन के शाऊल के परिचय देवे लागी चिट्ठी लिखे ला विनती करलन। चिट्ठी में उनका शाऊल के ई अधिकार देवे लागी कहल गेल कि ऊ कोई भी औरत चाहे मरद के पकड़तन जे यीशु के द्वारा सिखावल गेल मार्ग पर चलऽ हथन, आउर ओकरा बन्दी बना के यरूशलेम में ले जाय, जेकरा से यहूदी अगुवा फईसला कर सकतन आउर उनका दण्डित कर सकतन। 3जखनी शाऊल आउर उनकर साथी यात्रा करते-करते दमिश्क भीर पहुँचलन, तऽ एकबैग आसमान से बड़का तेज रोशनी शाऊल के चारो दने चमकल।4बाकि ऊ तुरन्त जमीन पर गिर पड़लन आउर ऊ कोई के आवाज सुनलन जे उनका से कह रहलन हल, "हे शाऊल, हे शाऊल, तूँ हमरा काहे सतावऽ हऽ?"5शाऊल उनका से पूछलन, “हे प्रभु, तूँ कौन हऽ?" प्रभु जबाब देलन हम यीशु ही, जेकरा तूँ सता रहलऽ हे।6बाकि अब उठ के दमिश्क शहर में जा! ऊहाँ कोई तोरा बतईतन कि हम का चाहऽ ही।”7जौन लोग शाऊल के साथे यात्रा कर रहलन हल, ओखनी एतना हैरान होलन कि कोई भी कुछ नऽ बोल सकलन। ऊ ऊहें खड़ा रहलन। काहेकि ऊ कोई के बोलते सुनलन, बाकि कोई के नऽ देखलन हल।8तब शाऊल जमीन पर से उठलन, बाकि जखनी ऊ अपन आँख खोललन, तऽ उनका कुछो देखाई नऽ देलक। तऽ उनकर साथी लोग उनकर हाथ पकड़ के दमिश्क ले गेलन।9शाऊल अगला तीन दिन ला कुछो भी नऽ देख सकलन, आउर ऊ कुछो भी नऽ खईलन पियलन।10दमिश्क में हनन्याह नाम के एगो चेला रहऽ हलन, प्रभु यीशु उनका दर्शन दे के कहलन, “हे हनन्याह!” हनन्याह जबाब देलन, “हे प्रभु, हम सुन रहली हे।”11प्रभु यीशु उनका से कहलन, “सीधे गली में यहूदा के घरे जा। ऊहाँ कोई आदमी से पूछऽ कि का तूँ तरसुस के शाऊल नाम के एगो आदमी से बात कर सकऽ हऽ, काहेकि ऊ ई घड़ी हमरा से प्रार्थना कर रहलन हे।12शाऊल एगो दर्शन देखलन हे जेकरा में हनन्याह नाम के एगो आदमी ऊ घर में अईलन जेज्जा ऊ रहऽ रहलन हल आउर ऊ शाऊल पर हाथ रखतन जेकरा से ऊ फिन से देखे सकतन।”13हनन्याह उत्तर देलन, “हे प्रभु, बड़ी मनी लोग हमरा ई आदमी के बारे में बतईलन हे! कि ई यरूशलेम में रहे वालन पवित्र लोग के साथे बड़ी बुरा बर्ताव करलन हे जौन तोरा पर विश्वास करऽ हथन!14आउर प्रधान याजक ओकरा दमिश्क में आके ऊ सभे के बंदी बनावे के अधिकार देलन हे जे तोरा पर विश्वास आउर नाम पुकारऽ हथन!”15बाकि प्रभु यीशु हनन्याह से कहलन, “शाऊल भीर जा आउर जे हम कहऽ ही ओही करऽ; काहेकि हम उनका अपन सेवा करे लागी चुन लेली हे। हम चाहऽ ही कि ऊ अन्यजातियन आउर उनकर सभे राजा आउर इस्राएलियन से हमर नाम के बारे में बात करतन।16हम खुद उनका से कहम कि लोगवन के हमरा नाम के बारे में बतावे लागी उनका बार-बार दुःख उठावे पड़त।”17तब हनन्याह चल गेलन, आउर शाऊल के घर में पहुँचलन। आउर जईसहीं शाऊल से मिललन। तऽ ऊ उनका पर हाथ रख के उनका से कहलन, “भाई शाऊल, प्रभु यीशु हमरा तोरा भीर आवे के आज्ञा देलन हे। यीशु ओही हथन जे दमिश्क के राह पर तोरा सामने प्रकट होलन हल। ऊ हमरा तोरा भीर येहिसे भेजलन हे कि तूँ फिन से देख सकऽ आउर ऊ चाहऽ हथन तूँ पवित्र आत्मा के द्वारा पूरा तरह से काबू में हो जा।”18आउर तुरन्त शाऊल के आँख से पपड़ी जईसन कुछ गिरे लगल आउर ऊ देखे लगलन। फिन ऊ खड़ा होलन आउर बपतिस्मा लेलन।19जब शाऊल कुछ खईलन तऽ ऊ फिन से मोटा ताजा हो गेलन। शाऊल ढेर दिन ला दमिश्क में चेलवन जौरे रहलन।20ऊ तुरन्त यहूदी आराधनालय में यीशु के बारे में घोषणा करे लगलन आउर उनका बतावे लगल कि यीशु परमेश्वर के बेटा हथन।21जेतना लोग उनका ई उपदेश देते सुन रहलन हल, ऊ सभे चकित आउर हैरान होके कहे लगलन, “हमरा विश्वास नऽ होवे हे कि ई ओही आदमी हथन जौन यरूशलेम में नाम पुकारऽ हलन ऊ विश्वासियन के सतावऽ हलन आउर ओखनी के बन्दी बना के यरूशलेम के महायाजक भीर ले जाय ला अईलन हे।”22बाकि परमेश्वर शाऊल के आउर भी जादे विश्वास के साथे प्रचार करे के सामर्थ देलन। ऊ शास्त्र से साबित कर रहलन हल कि यीशु ही मसीह हथन। येहिसे दमिश्क के यहूदी अगुवा नाराज हो गेलन काहेकि ऊ लोग उनकर बात के झूठा साबित करे के कोई तरीका भी नऽ निकास पईलन।23कुछ समय बाद, ऊहाँ के यहूदी अगुवन उनका मार डाले के साजिश रचलन।24बाकि यहूदी दिन रात शहर के फाटकवन से आवे-जाय वालन पर नजर रख रहलन हलन जेकरा से शाऊल के देखते ही उनका मार डालतन। बाकि कोई शाऊल के बता देलन कि ओखनी का करे ला जा रहलन हे।25येहिसे यीशु के पीछे चले वाला कुछ चेलवन जिनका ऊ विश्वास में लेके अईलन हल, शाऊल के एक रात नगर के चारो दने के ऊँचा पत्थर के दीवार भीर ले गेलन आउर बड़का मौनी में रख के रस्सी से दीवार के एगो छेद से नीचे उतार देलन। ई तरह से ऊ दमिश्क से बच निकसलन।26जब शाऊल यरूशलेम पहुँचलन, तऽ आउर भी दोसरा चेलवन लोग से मिले के कोशिश करलन। बाकि ओखनी में से लमसम सभे लोग उनका से डरते रहलन। उनका यकीन नऽ होल कि ऊ विश्वासी बन गेलन हल।27बाकि बरनबास उनका अपना साथे ले जा के प्रेरितवन भीर उनका बतईलन कि कईसे शाऊल दमिश्क के राह पर चलते-चलते प्रभु यीशु के देखलन हल आउर कईसे प्रभु उनका से बात करलन हल। ऊ ई भी बतईलन कि कईसे शाऊल दमिश्क में लोगवन के यीशु के बारे में हिम्मत से प्रचार करलन हल।28येहिसे शाऊल सऊँसे यरूशलेम में प्रेरितवन आउर अन्य विश्वासियन के साथे बेझिझक मिले लगलन, आउर ऊ लोग के प्रभु यीशु के बारे में निडरता से प्रचार करे लगलन।29शाऊल यूनानी भाषा बोले वाला यहूदियन से यीशु के बारे में बात करते रहलन, आउर उनका से बाद-विवाद करते रहलन, ऊ उनका तर्क से जबाब नऽ दे पावऽ हलन, बाकि ऊ उनका मार डाले के उपाय सोचते रहऽ हलन।30जब अन्य विश्वासियन सुनलन कि यहूदी उनका मारे ला योजना बना रहलन हे, तऽ ओखनी में से कुछ लोग शाऊल के कैसरिया शहर ले अईलन आउर उनका उनकर नगर तरसुस शहर जाय वाला जहाज पर चढ़ा देलन।31काहेकि कोई अखनी उनका सतावऽ नऽ हलन, येही से यहूदिया, गलील आउर सामरिया के सभे प्रान्त में विश्वासी लोग के कलीसिया शान्ति से रह रहलन हल, प्रभु के डर आउर पवित्र आत्मा उनका तागत दे रहलन हल आउर उनका उत्साहित कर रहलन हल। ऊ प्रभु यीशु के आदर कर रहलन हल आउर पवित्र आत्मा बड़ी सा दोसर लोग के विश्वासी बना रहलन हल।32ऊ शान्तिपूर्ण हालत के कारण जब पतरस ऊ सभे इलाका में यात्रा कर रहलन हल, तऽ एक बार ऊ समुद्र के किनारे मैदान में लुद्दा शहर में रहेवालन पवित्र विश्वासियन से मिले गेलन।33ऊहाँ उनकर मुलाकात ऐनियास नाम के एगो आदमी से होल, जे नऽ तऽ चल सकल हल, नऽ खड़ा हो सकल हल, नऽ ही आठ साल से अपन बिछौना से उठऽ सकलन हल।34पतरस उनका से कहलन, “हे ऐनियास, यीशु मसीह तोरा चंगा करऽ हथन! उठऽ आउर अपन बिछौना सरिया ले!” आउर ऐनियास तुरन्त खड़ा हो गेलन।35जब प्रभु ऐनियास के चंगा करलन हल, तऽ लुद्दा आउर शारोन के मैदान में रहे वालन ज्यादातर लोग उनका देखलन आउर प्रभु यीशु पर विश्वास करलन।36याफा शहर में तबीता नाम के एगो शिष्या औरत रहऽ हल, जेकर यूनानी नाम दोरकास हल। ऊ हमेशा गरीब लोगवन ला भलाई के काम करऽ हलन आउर ओखनी के उनकर जरुरत के चीज दे हलन। 37जब पतरस लुद्दा में हल, तऽ ऊ बेमार होके मर गेल। ऊहाँ कुछ औरतियन यहूदी रीति के मुताबिक ओकर देह के धोके साफ करलन, आउर ओकर देह के कपड़ा से झाँक के उनकर घर के ऊपरे वाला कोठरी में रख देलन।38लुद्दा याफा के नजदीक हल। येहिसे जब चेला लोग सुनलन कि पतरस अभी लुद्दा में हथन, तऽ ऊ दूगो आदमी के पतरस भीर भेजलन। जखनी ऊ ऊहाँ पहुँचलन, तऽ ऊ उनका से विनती करलन, “तुरन्त हमरा साथे याफा आवऽ!”39पतरस तुरन्त तईयार होके उनका साथे चल देलन। जब ऊ याफा के घर पहुँचलन, तऽ ओखनी उनका ऊपरे वाला कोठरी में ले गेलन, जेज्जा दोरकास के लाश पड़ल हल। ऊहाँ के सभे मुसमात ओकर चारो दने खड़ा हल आउर रोते-रोते उनका उनकर कुरता आउर दोसरा कपड़ा भी दिखऽ रहलन हल जौन दोरकास अपन जिन्दा रहते लोगवन ला बनईलन हल।40तब पतरस ओखनी सभे के बाहरसी भेज देलन। आउर फिन ऊ ठेहुनियाँ मार के प्रार्थना करे लगलन। फिन ओकर लाश दने मुड़ के कहलन, “तबीता खड़ा होवऽ!”, ऊ तुरन्त अपन आँख खोललन आउर पतरस के देखते ही उठ के बईठ गेल।41तब ऊ ओकर एगो हाथ पकड़ के खड़ा करलन, आउर सभे पवित्र विश्वासियन के, आउर खास कर के मुसमात लोग के बोल के ओखनी के देखईलन, कि ऊ फिन जिन्दा हो गेलन हे।42जल्दिये याफा में हरेक जगह लोगवन के ऊ चमत्कार के बारे में पता हो गेल आउर नतीजा ई होल कि बड़ी मनी लोग प्रभु यीशु पर विश्वास करलन।43पतरस याफा में शमौन नाम के एगो आदमी ही ढेर दिन तक रहलन, जौन जानवर के खाल से चमड़ा के सामान बनावऽ हलन।
Bridge Connectivity Solutions Pvt. Ltd.