Acts10
1कुरनेलियुस नाम के एगो आदमी कैसरिया शहर में रहऽ हलन आउर इतालियानी से आयेल रोमी सिपाही के एगो बड़का दल में सौगो आदमियन के सूबेदार हलन।2ऊ हमेशा ओही करे के कोशिश करऽ हलन जौन परमेश्वर के खुश करे; ऊ आउर उनकर पूरा परिवार अन्यजाति हलन जौन परमेश्वर से डरऽ हलन। जादेतर गरीब यहूदी लोग के मदत ला पईसा दे हलन आउर ऊ रोजदिन तरह से परमेश्वर से प्रार्थना करऽ हलन।3ऊ एक दिन, दिन के तिसरका पहर करीब तीन बजे कुरनेलियुस एगो दर्शन देखलन। ऊ साफ-साफ एगो स्वर्गदूत के देखलन कि जिनका परमेश्वर भेजलन हल। ऊ स्वर्गदूत के उनकर कोठरी में आके उनका से कह रहलन हे, “हे कुरनेलियुस!”4कुरनेलियुस स्वर्गदूत के देखलन तऽ बड़ी डेरा गेलन। फिन ऊ डरते-डरते पूछलन, “हे प्रभु, तूँ का चाहऽ हऽ?” स्वर्गदूत जौन परमेश्वर दने से भेजल गेलन हल, उत्तर देलन, “तूँ परमेश्वर के खुश करलऽ हे, काहेकि तूँ रोजदिन परमेश्वर से प्रार्थना करते रहलऽ हे। आउर तूँ हमेशा गरीबवन ला पईसा मदत दे हऽ। ई सभे चीज परमेश्वर के यादगार भेंट के रूप में देवल गेल हे आउर ऊ ओकरा पर धियान देलन।5येहिसे अखनी कुछ लोगवन के याफा शहर जाय ला आज्ञा दऽ आउर उनका से कहऽ कि ऊ शमौन नाम के एगो आदमी के, जौन पतरस नाम से जानल जा हे, ले अईतन।6ऊ शमौन नाम के एगो चमड़ा के कारीगर हीं ठहरल हथन, आउर उनकर घर समुद्र के किनारे हे।”7जब ऊ स्वर्गदूत चल गेलन जौन कुरनेलियुस से बात कर रहलन हल, तऽ ऊ अपन घर के दूगो सेवक आउर एगो सिपाही के बोलईलन जौन उनकर सेवा करऽ हलन आउर जौन परमेश्वर के उपासना करऽ हलन।8तब ऊ स्वर्गदूत द्वारा कहल गेल सभे बात उनका समझा देलन, आउर उनका से कहलन कि याफा नगर में जा के पतरस से कहऽ, कि ऊ कैसरिया में आ जईतन।9अगला दिन दूपहर के समय ऊ तीनो आदमी राह में चलते-चलते याफा में पहुँचलन, तऽ पतरस प्रार्थना करे लागी छत पर गेलन।10जब पतरस के भूख लगल आउर ऊ कुछ खाय ला चाहऽ हलन। जखनी लोग खाना बना रहलन हल, तऽ पतरस एगो दर्शन देखलन।11ऊ देखलन कि आसमान खुल गेल हे आउर एगो बड़ी चादर के जईसन कोई चीज जमीन पर उतर रहल हल, अईसन लग रहल हल जईसन ओकर चारो दने के कोना पकड़ के धरती में उतार रहल हे।12चादर के अन्दर धरती के सभे तरह के जीव-जन्तु हल। एकरा में से जानवर आउर पक्षी भी हल जेकरा खाय ला यहूदियन के मूसा के कानून के मुताबिक मना करल गेल हल। कुछ के चारगो गोड़ हल, आउर जमीन पर रेंगे वाला जन्तु हल आउर कुछ आसमान के चिरईंयन हल।13फिन ऊ परमेश्वर से ई कहते सुनलन, हे पतरस, उठऽ, एकरा में से कुछ के मार के खा लऽ!"14बाकि, पतरस उत्तर देलन, “हे प्रभु, तूँ तऽ नऽ चाहऽ हऽ कि हम अईसन करम, काहेकि हम कहियो कोई अईसन अशुद्ध चीज नऽ खईली हे जेकरा से यहूदी व्यवस्था के मुताबिक तोरा मना करल गेल हे कि हमरा नऽ खाय के चाही!” 15तब पतरस दोसरा बार परमेश्वर के ई कहते सुनलन, “हम परमेश्वर ही, येहिसे जदि हम खाय लागी कुछ शुद्ध ठहरईली हे, तऽ ई मत कहऽ कि ई खाय लागी अशुद्ध हे!”16अईसन तीन बार होल। ओकर तुरन्त बाद, जानवरवन आउर चिरईंयन वाला चादर के फिन से आसमान में उठा लेवल गेल।17जब पतरस ई समझे के कोशिश कर रहलन हल कि ऊ दर्शन के का मतलब हे, तऽ कुरनेलियुस के भेजल आदमी याफा पहुँचलन आउर लोगवन से पूछलन कि शमौन के घरे तक कईसे पहुँचल जाय। ऊ उनकर घर के खोज के फाटक के बाहरसी खड़ा हो गेलन।18ऊ बोल के उनका से पूछलन कि का शमौन नाम के एगो आदमी, जौन दोसरा नाम पतरस भी हे, ईहाँ रह रहलन हे?19पतरस अभी भी ई समझे के कोशिश कर रहलन हल कि ई दर्शन के का मतलब हे, तखनिये परमेश्वर के पवित्र आत्मा उनका से कहलन, “सुनऽ! तीन आदमी ईहाँ हे जौन तोरा से मिले ला चाहऽ हथन।20येहिसे उठऽ आउर नीचे जा के उनका साथे चलऽ! शंका मत करऽ कि तोरा उनका साथे नऽ जाय के चाही, काहेकि हम उनका ईहाँ भेजली हे!”21तब पतरस ऊ लोगवन भीर गेलन आउर उनका से कहलन, “प्रणाम! हम ओही आदमी ही जिनका तूँ खोज रहलऽ हे। तूँ काहे अईलऽ हे?”22ऊ उत्तर देलन, “कुरनेलियुस नाम के एगो रोमी सूबेदार हमरा ईहाँ भेजलन हे। ऊ एगो धर्मी आदमी हथन जौन परमेश्वर से डरऽ हथन आउर सभे यहूदी लोग जौन उनका बारे में जानऽ हथन, उनकर बारे में बढ़ियाँ गवाही कहऽ हथन कि ऊ बड़ी बढ़ियाँ आदमी हथन। परमेश्वर के एगो पवित्र स्वर्गदूत उनका से कहलन, 'कुछ लोगवन से कहऽ कि ऊ याफा जा के शमौन पतरस से मिलतन आउर उनका ईहाँ लावऽ जेकरा से तूँ सुन सकऽ हऽ कि ऊ का कहऽ हथन।”23तब पतरस उनका घर में बोल के कहलन, कि ऊ आज रात ईहें रहऽ। अगला दिन पतरस तईयार होके ऊ आदमियन के साथे चल गेलन, आउर याफा के बड़ी मनी विश्वासी भाई भी उनका साथे चललन।24ओकर अगला दिन ऊ कैसरिया नगर में पहुँचलन। कुरनेलियुस उनकर इंतजार कर रहलन हल। ऊ अपन रिश्तेदार आउर नजदीकी दोस्तवन के भी बोलईलन हल, येहिसे ऊ भी उनकर घर पर हलन।25जब पतरस घर में घूँसलन तऽ कुरनेलियुस उनका से मिललन आउर उनकर सामने झुक के प्रणाम करलन।26बाकि तब पतरस कुरनेलियुस के हाथ पकड़ के उनका खड़ा करलन आउर कहलन, “खड़ा होवऽ! हमरा सामने झुक के हमरा प्रणाम मत करऽ! हम भी तोरे जईसन आदमी ही!”27जब ऊ कुरनेलियुस से बात कर रहलन हल, तऽ पतरस आउर दोसरा लोग घर में घूँसलन होलन आउर देखलन कि ऊहाँ बड़ी मनी लोग जमा होल हथन।28तब पतरस उनका से कहलन, “तोहनी सभे जानऽ हऽ हमनी यहूदियन में से जे कोई भी हथन, जदि हम गैर-यहूदी वंशजवन के साथे संगति करऽ ही चाहे उनकर घर में जा ही, तऽ हम अपन यहूदी व्यवस्था के तोड़ दे ही। बाकि परमेश्वर हमरा दर्शन में देखईलन हे कि हम कोई के एतना अपवित्र चाहे अशुद्ध आउर खराब नऽ कहम कि परमेश्वर उनका स्वीकार नऽ करतन।29येहिसे जब तूँ हमरा बोलावे लागी आदमी भेजलऽ तऽ हम तुरन्त बिना कोई आपत्ति के चल अईली। कृपा कर के हमरा बतावऽ कि तूँ हमरा काहे ईहाँ बोलईलऽ हे?”30कुरनेलियुस जबाब देलन, “लमसम तीन दिन पहिले, हम अपन घर में, जईसन कि हम करऽ ही, दूपहर के तीन बजे परमेश्वर से प्रार्थना कर रहलन हल। एकबैग एगो आदमी हमर सामने खड़ा होलन, जिनकर कपड़ा चमक रहल हल।31आउर कहलन, ‘कुरनेलियुस, परमेश्वर तोर प्रार्थना सुनलन हे। ऊ ई भी देखलन हे कि तूँ कई बार गरीब लोग के मदत लागी पईसा देलन हे, आउर ऊ एकरा खुश हथन।32येहिसे अखनी याफा नगर में दूत भेज के शमौन के जिनका पतरस भी कहलावऽ हथन, बोलावऽ. काहेकि ऊ समुद्र के किनारे शमौन नाम के एगो चमड़ा बनावेवाला के घर में रहऽ हथन।’33येहिसे हम तुरन्त कुछ लोगवन के भेजली जौन तोरा ईहाँ आवे लागी कहलन, आउर हम पक्का तोरा आवे लागी धन्यवाद करऽ ही। अखनी हम ईहाँ जमा होली हे, काहेकि हम जानऽ ही कि परमेश्वर हमरा साथे हथन, जेकरा से ऊ सभे बात सुनतन जिनका प्रभु परमेश्वर तोरा से कहे ला आज्ञा देलन हे। येहिसे कृपा कर के हमरा से बात करऽ।”34तब पतरस उनका से बात करते-करते कहलन, “अखनी हम समझ गेली हे कि सच में परमेश्वर खाली कुछ ही लोग पर कृपा आउर पक्षपात नऽ करतन।35एकर बदले, ऊ हरेक जाति में से कबूल करऽ हथन जौन उनका से डरऽ हे आउर धार्मिक काम करतन जौन उनका पसन्द करऽ हे।36तूँ जानऽ हऽ कि परमेश्वर हमनी इस्राएली के का संदेश भेजलन हे। ऊ हमरा ई सुसमाचार के बात सुनईलन हे कि ऊ लोग के उनका साथे शान्ति स्थापित करे देतन, काहेकि जे यीशु मसीह करलन हे, ओकर चलते। ई यीशु खाली हम इस्राएलियन के प्रभु नऽ हथन। ऊ सभे लोग पर राज करे वाला प्रभु भी हथन।37तूँ ऊ वचन जानऽ हऽ कि ऊ गलील प्रान्त से शुरु कर के यहूदिया प्रान्त के सऊँसे देश में का-का करलन हे, जब यूहन्ना लोगवन के ई घोषणा करलन कि ऊ अपन पापवन से फिन के बपतिस्मा लेलन, तब ऊ ई सभे काम करे ला शुरु करलऽ।38तूँ जानऽ हऽ कि परमेश्वर नासरत नगर के यीशु के अपन पवित्र आत्मा देलन आउर उनका अभिषेक करे के सामर्थ देलन। तूँ ई भी जानऽ हऽ कि यीशु कईसे ढेर जगह पर गेलन, आउर हमेशा बढ़ियाँ काम करते रहलन। ऊ ओखनी सभे लोग के चंगा करते रहलन जेकरा शैतान दुःखी करलन हल। यीशु ई सभे येहिसे कर पईलन काहेकि परमेश्वर हमेशा उनकर मदत कर रहलन हल।”39हम सभे काम के गवाह ही आउर देखली हे कि यीशु यरूशलेम में आउर इस्राएल के हरेक कोना यहूदियन के देश आउर यरूशलेम में, जेज्जा ऊ रहऽ हलन, का-का करलन। उनकर दुश्मन उनका लकड़ी के क्रूस पर काँटी से ठोक के मार देलन।40फिन परमेश्वर उनका मरे के बाद तिसरका दिन जिन्दा करलन, आउर ई भी पक्का करलन कि बड़ी मनी लोग उनका जिन्दा देखतन। लोग के विश्वास हो गेल हे कि ई ओही हथन जौन मर गेलन हे, आउर अब ओखनी अपन आँख से देखलन आउर पूरा तरह से विश्वास करलन कि ऊ फिनो से जिन्दा हो गेलन हे।41ऊ घड़ी परमेश्वर हरेक कोई के देखे नऽ देलन, खाली ओखनी गवाह लोग के ही उनका साथे समय बितावे आउर उनका साथे खाना खाय लागी चुनलन हल, ऊ पहिले दिन में जब परमेश्वर उनका फिन से जिन्दा करलन हल।42परमेश्वर हमनी लोग के घोषणा करे के आज्ञा देलन आउर ऊ हमनी के गवाही बतावे ला कहलन कि ऊ यीशु के एक दिन सभे कि न्यायी के रूप में ठहरईलन हे, एगो अईसन दिन जौन पक्का आवत। ऊ ओखनी सभे के न्याय करतन जौन अभी भी जिन्दा होतन आउर ऊ सभे के भी जौन ऊ समय से पहिले मर चुकलन हे।43जेतना भविष्यद्वक्ता बड़ी पहिले उनकर बारे में लिखलन हल, ऊ सभे उनकर बारे में गवाही बतईलन हल कि जदि कोई उनकर नाम पर विश्वास करतन, तऽ परमेश्वर उनकर सभे पापवन के मांफ कर देतन, काहेकि ई आदमी यीशु उनका ला बड़ी कुछ करलन हे। 44पतरस अखनी ई बात कह ही रहलन हल आउर संदेश सुना ही रहलन हल कि एकबैग पवित्र आत्मा ओखनी सभे लोग पर उतर अईलन जौन अन्यजाति से अईलन हल।45जौन खतना करल विश्वासी पतरस के साथे याफा से अईलन हल, ऊ ई देखके हैरान होलन कि परमेश्वर अन्यजातियन के लोग के ऊपर पवित्र आत्मा उदारता से उण्डेल देलन हे।46यहूदी विश्वासियन के पता हल कि परमेश्वर अईसन करलन हे काहेकि ओखनी ऊ लोग के अईसन भाषा बोलते सुनलन हल कि परमेश्वर के महानता के बारे में बता रहलन हल तब पतरस कहलन।47ऊहाँ मौजूद दोसर यहूदी लोगवन विश्वासियन से कहलन, “परमेश्वर उनका पवित्र आत्मा देलन हे, जईसन ऊ हमनी यहूदी के देलन हे। तऽ तूँ ई सभे ई बात पर राजी होवऽ कि हमनी के ई लोगवन के बपतिस्मा देवे के चाही!”48तब पतरस कुरनेलियुस आउर उनकर परिवार से कहलन कि उनका यीशु मसीह के नाम में विश्वासी के रूप में बपतिस्मा लेवे के चाही। येहिसे पतरस आउर उनकर साथे आयेल याफा ओखनी सभे के बपतिस्मा देलन। बपतिस्मा लेवे के बाद, ऊ विनती करलन कि पतरस ढेर दिन तक उनका साथे रहतन। येहिसे पतरस आउर दोसर यहूदी विश्वासियन अईसन करलन।
Bridge Connectivity Solutions Pvt. Ltd.