Acts8
1आउर शाऊल स्तिफनुस मौत के सहमत हलन। ओही दिन यरूशलेम के कलीसिया पर बड़ी बड़का उपद्रव होवे लगल आउर प्रेरितवन के छोड़ के सभे यहूदिया आउर सामरिया के सभे प्रान्त में तित्तर-बित्तर हो गेलन।2बाकि शाऊल के लगल कि सन्हेद्रिन स्तिफनुस के मार के सही करलन। ऊ लोगवन जेकर अगुवाई शाऊल कर रहलन हल, यरूशलेम में रहे वालन विश्वासियन के बड़ी सताव करे ला शुरु कर देलन। येहिसे ज्यादातर विश्वासियन यहूदिया आउर सामरिया के राजावन के दोसरा जगह पर भाग गेलन। बाकि प्रेरितवन यरूशलेम में ही डंटल रहलन।3येहिसे शाऊल भी कलीसिया के नाश करे ला कोशिश करलन। ऊ एक-एक कर के घरवन में घूँस गेल, आउर ऊ ओखनी औरतियन के आउर मरदवन के घसीट के जेल में डाल देलन। जे यीशु पर विश्वास करऽ हलन।4तऽ जे विश्वासी बिखर गेलन हल यरूशलेम से निकस के अलग-अलग जगह में जा के यीशु के बारे में सुसमाचार सुनईते रहलन।5ऊ विश्वासियन में से फिलिप्पुस नाम के एगो भक्त जन यरूशलेम से सामरिया के एगो नगर में अईलन, आउर लोगवन के घोषणा करे लगलन, कि यीशु ही मसीह हथन।6ऊहाँ बड़ी मनी लोग फिलिप्पुस के बात सुनलन आउर उनकर चिन्ह आउर चमत्कार के देखलन, येहिसे ओखनी सभे उनकर बात पर धियान देवे लगलन।7उदाहरण लागी फिलिप्पुस बड़ी मनी लोग में से अशुद्ध आत्मा के निकसे के आज्ञा देलन आउर ओखनी चिल्लईते बाहरसी निकस आयेल। एकर बदले, बड़ी मनी लकवा मारल रोगी आउर बड़ी मनी दोसर लँगड़ा चंगा हो गेल।8सामरिया शहर के बड़ी सा लोग बड़ी खुश हलन।9ऊ शहर में शमौन नाम के एगो आदमी रहऽ हलन। ऊ बड़ी दिन से जादू-टोना करऽ हल आउर अपन जादू से सामरिया के लोगवन के हैरान कर दे हल। ऊ दावा करऽ हलन कि ऊ “शमौन महान” हे।10जे लोग ऊहाँ हलन, का साधारण का खास लोग, सभे उनकर बात सुन रहलन हल आउर कह रहलन हल, “ई आदमी परमेश्वर के महान ऊ सामर्थ हथन।”11ऊ उनकर बात गौर से सुनते रहलन, काहेकि ऊ बड़ी समय से जादू-टोना देखा के ओखनी के हैरान कर रहल हल।12बाकि फिन ओखनी फिलिप्पुस के सुसमाचार पर विश्वास करलन, कि कईसे परमेश्वर के राज हर जगह लोग के जिनगी पर राज करतन आउर यीशु मसीह के सुसमाचार सुनावल गेल हल। फिलिप्पुस ओखनी मरद आउर औरत के बपतिस्मा देलन जे यीशु पर विश्वास करऽ हलन।13जबकि लोग ओकर पूजा कर रहलन हल, शमौन फिलिप्पुस के वचन पर विश्वास कर के बपतिस्मा लेलन आउर लगातार उनका साथे रहे लगलन। ऊ फिलिप्पुस के बड़का-बड़का चिन्ह आउर अचरज काम देखके चकित होवऽ हलन, जेकरा से पता होवऽ हल कि फिलिप्पुस सच बोल रहलन हे।14जब यरूशलेम में प्रेरित सुनलन कि सामरिया प्रान्त में बड़ी सा लोग परमेश्वर के सन्देश पर विश्वास करलन हे, तऽ ऊ पतरस आउर यूहन्ना के ऊहाँ भेजलन।15जब पतरस आउर यूहन्ना सामरिया पहुँचलन, तऽ ऊ ओखनी नया विश्वासी लागी प्रार्थना करलन कि एखनी सभे के पवित्र आत्मा मिले।16काहेकि पवित्र आत्मा अखनी ला ओखनी में से कोई के भी सामर्थ नऽ देलन हल, बाकि ओखनी के प्रभु यीशु के नाम में बपतिस्मा देवल गेल हल।17तब पतरस आउर यूहन्ना ओखनी पर हाथ रखलन आउर ओखनी के पवित्र आत्मा मिलल।18जब शमौन देखलन कि प्रेरित के हाथ रखला से लोगवन के आत्मा मिलऽ हे, येहिसे ऊ प्रेरितवन के पईसा देवे के पेशकश करलन।19ऊ कहलन, “हमरा भी ऊ करे के अधिकार दऽ जौन काम तूँ कर रहलऽ हे, कि जदि हम कोई पर हाथ रखम, तऽ ऊ पवित्र आत्मा पा लेवे।”20बाकि पतरस उनका से कहलन, "तूँ आउर तोर पईसा नाश हो जाय, काहेकि तूँ पईसा से परमेश्वर के वरदान पईसा से लेवे के कोशिश करलऽ!21जौन काम हम कर रहली हे, ओकरा में तूँ हमरा साथ काम नऽ कर सकलऽ हे, काहेकि तोर मन परमेश्वर के प्रति सीधा नऽ हे!22येहिसे अईसन बुराई से मन फिरा के आउर प्रभु से प्रार्थना करऽ कि ऊ तोरा मांफ कर देतन काहेकि जदि तूँ सच्चा मन से माँगवऽ तऽ ऊ तोरा मांफ कर देतन।23तूँ आत्मिक खतरा में हऽ! हम देख रहली हे कि तूँ हमरा से बड़ी जलन करऽ हऽ, आउर अधर्म करे ला लगातार इच्छा के दास हऽ!24तब शमौन जबाब देलन, “प्रभु से प्रार्थना करऽ कि ऊ हमरा साथे ओईसन नऽ करतन जईसन तूँ अखनी कहलऽ हे!”25तऽ पतरस आउर यूहन्ना ऊहाँ लोगवन के प्रभु यीशु के बारे में जौन कुछ ऊ निजी तोरा से जानऽ हलन, बतईलन। ओखनी प्रभु के वचन उनका सुनईलन। फिन ओखनी दूनो यरूशलेम में लौट अईलन। राह में ओखनी सामरिया के लोगवन के यीशु के बारे में सुसमाचार घोषणा करलन।26एक दिन पतरस आउर यूहन्ना यरूशलेम लौट रहलन हल, तऽ प्रभु फिलिप्पुस एगो स्वर्गदूत भेजलन, जबकि बड़ी सा सामरी लोग यीशु पर विश्वास कर रहलन हल, ऊ स्वर्गदूत फिलिप्पुस से कहलन, “तईयार हो जा आउर यरूशलेम से गाजा शहर तक जाय वाला सड़क पर दक्खिन दने जा।” ऊ सड़क रेगिस्तान इलाका में हल।27तब फिलिप्पुस तईयार होके ऊ राह से चल देलन। आउर राह में उनका इथियोपिया देश के एगो आदमी मिलल। ऊ आदमी एगो बड़का अधिकारी हल। लोग अपन भाषा में अपन रानी के कन्दाके कहऽ हलन। ई उनकर सभे संपत्ति के खजाँची हलन। ई आदमी यरूशलेम में परमेश्वर के आराधना करे ला गेलन हल। 28आउर ऊ अपन रथ पर सवार होके अपन देश लौट रहलन हल, आउर रथ पर सवार होके यशायाह भविष्यद्वक्ता के लिखल गेल किताब के जोर से पढ़ते जा रहलन हल। 29परमेश्वर के पवित्र आत्मा फिलिप्पुस से कहलन, "ऊ रथ भीर जा आउर ऊ रथ के साथे चलते रहऽ!"30तब फिलिप्पुस दौड़ के रथ भीर गेलन आउर ऊ अधिकारी के यशायाह भविष्यद्वक्ता के लिखल गेल किताब के पढ़ते सुनलन। फिलिप्पुस ऊ आदमी से पूछलन, "का तूँ जे पढ़ रहलऽ हे ओकरा समझऽ हऽ?31ऊ अधिकारी फिलिप्पुस के जबाब देलन, "नऽ! जदि कोई हमरा समझावे वाला नऽ होवे, तऽ हम एकरा नऽ समझ सकऽ ही!" तब ऊ आदमी फिलिप्पुस से विनती करलन, “कृपा कर के हमरा भीर आके बईठ जा।” तऽ फिलिप्पुस रथ पर चढ़ गेलन।32पवित्रशास्त्र के ऊ भाग जौन ऊ पढ़ रहलन हल, ऊ ई हल: “लोग उनका मारे लागी अईसे ले जईतन, जईसे भेड़ के ऊ जगह पर ले जा हे जेज्जा ओकरा मारे के हे, जईसे ऊ मेम्ना के जईसन जौन ऊन काटल जाय घड़ी चुपचाप खड़ा रहऽ हे। 33ओखनी लोग उनका बेईज्जती करतन। आउर गलत ढंग से उनकर निन्दा करतन। उनकर कोई संतान नऽ होत काहेकि लोग उनका जिनगी धरती पर बच्चा पैदा होवे के पहिले ही मार डालतन।”34तऽ अधिकारी फिलिप्पुस से विनती करलन, "हमरा बतावऽ, भविष्यद्वक्ता केकरा बारे में लिख रहलन हल? का ऊ अपने बारे में लिख रहलन हल कि कोई आउर के बारे में?"35तब फिलिप्पुस उनका उत्तर देलन; आउर ओही पवित्रशास्त्र के लेख से शुरु कर के, यीशु के सुसमाचार सुनईलन।36जब ऊ अधिकारी राह में चलते-चलते एक जगह पहुँचलन जेज्जा पानी हल, तऽ अधिकारी फिलिप्पुस से कहलन, “देखऽ, ईहाँ पानी हे! हम चाहऽ ही कि तूँ हमरा बपतिस्मा दऽ।”37फिलिप्पुस कहलन, “जदि तूँ पूरा मन से विश्वास करऽ हऽ, तऽ परमेश्वर तोरा बचईतन आउर तूँ बपतिस्मा ले सकऽ हऽ।” अधिकारी जबाब देलन, हम विश्वास करऽ ही कि यीशु मसीह परमेश्वर के बेटा हथन।38तब फिलिप्पुस सारथी से कहलन, रथ रोक दऽ। तब फिलिप्पुस आउर खोजऽ दूनो पानी में उतरलन, आउर फिलिप्पुस उनका बपतिस्मा देलन।39जब अधिकारी पानी से बाहरसी अईलन, तऽ एकबैग प्रभु के आत्मा फिलिप्पुस के उठा के ले गेलन। आउर खोजऽ फिलिप्पुस के कहियो नऽ देखलन। तईयो भी खोजऽ बड़ी खुश होके राह पर चलते रहलन। 40तऽ फिलिप्पुस के महसूस होल कि आत्मा चमत्कार कर के उनका अश्दोद शहर में पहुँचा देलन हे। ऊ इलाका में घूमते-घूमते ऊ अश्दोद आउर कैसरिया शहर के बीच के सभे नगरवन में यीशु के बारे में सन्देश सुनईते रहलन। आउर जब ऊ कैसरिया पहुँचलन, तऽ तईयो ऊ सुसमाचार प्रचार कर रहलन हल।
Bridge Connectivity Solutions Pvt. Ltd.