Acts7
1तब महायाजक स्तिफनुस से पूछलन, “का ई सभे लोग तोर बारे में जौन कुछ कह रहलन हे, ऊ सच हे?”2स्तिफनुस जबाब देलन, “हे यहूदियन आउर आदरणीय अगुवन, कृपा कर के हमर बात सुनऽ! जौन महिमामय परमेश्वर के हम आराधना करऽ ही, ऊ हमर पुरखा अब्राहम के तब देखाई देतन जब ऊ हारान शहर में जाय से पहिले मेसोपोटामिया के इलाका में रह रहलन हल।3परमेश्वर उनका से कहलन, ‘ई देश के छोड़ दऽ जेज्जा तूँ आउर तोर रिश्तेदार रहऽ हे, आउर ऊ देश में जा जेकरा हम तोर बतायेम।’ 4येहिसे अब्राहम ऊ देश के छोड़ के, जौन कसदियन के देश भी कहलावऽ हल, हारान में आके रहे लगलन। उनकर बाबूजी के मरला के बाद परमेश्वर उनका से कहलन कि ऊ देश में बस जा जेकरा में अखनी तूँ आउर हम रहऽ ही। 5ऊ घड़ी परमेश्वर अब्राहम के ईहाँ कोई जमीन नऽ देलन हल, ईहाँ तक कि ई जमीन के एगो छोटा टुकड़ा भी नऽ। बाकि परमेश्वर प्रतिज्ञा करलन हल कि ऊ बाद में ई जमीन उनका आउर उनकर वंशज के देतन, आउर ई हमेशा उनकर रहत। जबकि, ऊ घड़ी अब्राहम के कोई बाल-बच्चा नऽ हल जे एकरा विरासत में पईतन हल। 6बाद में परमेश्वर अब्राहम से कहलन, तोर वंशज एगो विदेशी देश में जा के रहतन। आउर ओखनी ऊहाँ चार सौ साल तक रहतन, आउर येही बीच उनकर अगुवा तोर वंशजवन के साथे बुरा व्यवहार करतन आउर ओखनी के गुलाम बना के काम करे पर मजबूर करतन। 7फिन परमेश्वर कहलन, ‘बाकि हम ऊ लोगवन के सजा देम जौन जाति उनका से गुलामी करवावऽ हे।’ ‘ओकर बाद, तोर वंशज ऊ देश के छोड़ देतन आउर ई देश में आके हमर उपासना करतन।’” 8तब परमेश्वर वाचा देलन कि अब्राहम के घराना के हरेक आदमी आउर उनकर हरेक पुरुष आउर उनकर सभे पुरुष वंशजवन के खतना करल जाय जेकरा से ई साबित होवे कि ओखनी सभे परमेश्वर के हथन। बाद में अब्राहम के बेटा इसहाक के जनम होल आउर जब इसहाक आठ दिन के हल, तब अब्राहम ओकर खतना करलन। ओकर बाद में इसहाक के बेटा याकूब के जनम होल। आउर याकूब ऊ बारहो गोत्र के पिता हलन जिनका यहूदी कुलपिता, हमर पुरखा कहऽ हथन। 9तूँ जानऽ हऽ कि याकूब के बड़का बेटा अपन बाबूजी से जलन करे लगल काहेकि उनकर बाबूजी उनकर छोटका भाई यूसुफ के पच्छ ले हलन। येहिसे ओखनी उनका व्यापारी के हाथ में बेच देलन जे उनका मिस्र ले गेलन आउर ऊहाँ ऊ गुलाम बन गेल बाकि परमेश्वर यूसुफ के मदत करलन। 10जब भी लोगवन यूसुफ के दुःख देलन, तऽ ऊ उनका छोड़ईलन। ऊ यूसुफ के अनुग्रह आउर बुद्धि देलन आउर मिस्र के राजा फिरौन के यूसुफ के बारे में बढ़ियाँ सोचे ला मजबूर करलन। येहिसे फिरौन उनका मिस्र पर शासन करे आउर फिरौन के समूचे संपत्ति के देख भाल करे लागी ठहरईलन। 11जब यूसुफ ई काम कर रहलन हल, तब एगो समय अईसन आयेल जब मिस्र आउर कनान में भोजन के कमी हल। तब लोग परेशान हलन। ऊ घड़ी कनान में याकूब आउर उनकर बेटवन के भी पूरा भोजन नऽ मिल पा रहल हल। 12जब याकूब लोगवन से सुनलन कि मिस्र में अनाज हे जेकरा लोग खरीद सकलन हे, तऽ ऊ यूसुफ के बड़कन भईवन के अनाज खरीदे लागी ऊहाँ भेजलन। ओखनी ऊहाँ गेलन आउर यूसुफ से अनाज खरीदलन, बाकि ओखनी उनका पछान नऽ पईलन। फिन ओखनी घरे लौट अईलन। 13जब यूसुफ के भाई फिन से मिस्र गेलन, तऽ ओखनी फिन से अनाज खरीदलन। बाकि ई बार यूसुफ उनका बतईलन कि ऊ कौन हे। आउर ई तरह से फिरौन के पता होल कि यूसुफ के लोग इब्रानी परिवार के हलन आउर जौन लोग कनान से अईलन हल ओखनी सभे उनकर भाई हलन। 14जब यूसुफ अपन भईवन के वापस घरे भेज देलन, तऽ ओखनी अपन बाबूजी याकूब से कहलन कि यूसुफ चाहऽ हथन कि ऊ आउर उनकर पूरा परिवार मिस्र में आ जाय। ऊ घड़ी याकूब के परिवार में पचहत्तर प्राणी हलन। 15जब याकूब के ई बात चलल तऽ ऊ आउर उनकर पूरा परिवार मिस्र में रहे ला चल गेलन। बाद में याकूब ऊहें मर गेलन आउर हमर दोसरा पुरखा, मतलब उनकर बेटा भी ऊहें मर गेलन। 16उनकर लाश हमर देश में वापस लावल गेल आउर उनका ऊ कब्र में दफनावल गेल जेकरा अब्राहम शेकेम शहर में हामोर के बेटवन से खरीदलन हल। 17जब हमर पुरखा बड़ी जादे गिनती में हो गेलन हल, तब ऊ समय आ गेल हल जब परमेश्वर उनका मिस्र से छोड़ईलन, जईसे कि ऊ अब्राहम से प्रतिज्ञा करलन हल।18तब मिस्र में एगो आउर अन्य राजा राज करे लगलन हल। ऊ नऽ जानऽ हलन कि यूसुफ अपन समय से पहिले मिस्र के लोगवन के बड़ी मदत करलन हल। 19ऊ राजा हमर पुरखा के कठोर उपाय से खतम करे के कोशिश करलन। ऊ उनका पर अत्याचार करलन आउर उनका बड़ी तकलीफ देलन। ऊ उनका आज्ञा देलन कि अपन नवजात लईका के अपन घर से बाहरसी फेंक देतन जेकरा से ऊ मर जाय। 20ऊ घड़ी मूसा के जनम होल आउर परमेश्वर देखलन कि ऊ बड़ी सुन्दर लईका हे। येहिसे उनकर माय-बाप उनका तीन महीना तक अपन घर में चुपके से छिपा के पोसलन। 21तब उनका ओकरा घर के बाहरसी रखे पड़ल, बाकि फिरौन के बेटी ओकरा उठा लेलक आउर ओकरा अईसन देख भाल करलन कि जईसे ऊ ओकर अपन बेटा हे।22मूसा मिस्री लोगवन के समूचे विद्या सिखावल गेल आउर जखनी ऊ बड़ा होलन तऽ ऊ शक्तिशाली ढंग से बोले आउर काम करे लगलन।23“जब मूसा लमसम चालीस साल के हलन, तऽ एक दिन ऊ अपन मन में फईसला करलन कि ऊ अपन रिश्तेदारवन मतलब कि इस्राएलियन से मिले ला जईतन।24ऊ देखलन कि एगो मिस्री आदमी एगो इस्राएली आदमी के साथे अन्याय कर रहलन हे। येहिसे मूसा ऊ इस्राएली आदमी के मदत करे ला उनका भीर गेलन आउर ऊ ऊ मिस्री आदमी के मार के ऊ इस्राएली आदमी के बदला लेलन।25मूसा सोचलन कि उनकर साथी इस्राएली समझ जईतन कि परमेश्वर उनका ओकर गुलामी से उद्धार करे लागी भेजलन हे। बाकि ऊ नऽ समझलन।26अगला दिन मूसा दूगो इस्राएली आदमियन के आपस में लड़ते देखलन। ऊ ओखनी के शान्ति से रोके लागी कहलन, ‘हे हमर भाई तोहनी दूनो भाई-भाई हऽ! एक दोसरा पर अन्याय आउर हानि पहुँचावे ला बन्द करऽ!’”27“बाकि जौन आदमी दोसरा आदमी पर अन्याय कर रहल हल, ऊ मूसा के ढकेल के दूर कर देलक आउर उनका से कहलक, ‘कोई भी तोरा हमनी पर शासक आउर न्यायी नऽ ठहरईलन हे!’”28तूँ लगऽ हमरा मार देवे ला चाहऽ हऽ, जईसे तूँ कल मिस्री के मारलऽ हल!29जखनी मूसा ई सुनलन तऽ ऊ मिस्र देश से भाग के मिद्यान देश में चल गेलन। ऊहाँ ऊ कुछ साल तक परदेशी बन के रहलन। ऊहाँ ऊ शादी करलन आउर उनकर दूगो बेटा होल।30“चालीस साल बाद एक दिन यहोवा परमेश्वर मूसा के सामने स्वर्गदूत के रूप में प्रकट होलन। ऊ सीनै पहाड़ भीर रेगिस्तान में हलन। ऊ जरते ऊहें झाड़ी के लौ में प्रकट होलन।31जब मूसा ई देखलन, तऽ ऊ बड़ी अचरज करे लगलन, काहेकि झाड़ी जल नऽ रहल। जखनी ऊ आउर गौर से देखे लागी भीर में गेलन, तऽ ऊ प्रभु परमेश्वर के ई कहते सुनलन।32‘हम ओही परमेश्वर ही जिनकर आराधना तोर पुरखा करऽ हलन। हम ओही परमेश्वर ही जिनकर आराधना अब्राहम, इसहाक आउर याकूब करऽ हलन।’ मूसा एतना डेरा गेलन कि ऊ काँपे लगलन। ऊ अब झाड़ी के देखे से डर रहलन हल।33तऽ प्रभु परमेश्वर उनका से कहलन, ‘अपन जूता उतारऽ, काहेकि हम ईहाँ ही, येहिसे जौन जगह पर तूँ खड़ा हऽ ऊ हमर आउर पवित्र जमीन हे।34हम देखली हे कि मिस्र के लोग हमर लोगवन के लगातार कईसे दुःख पहुँचा रहलन हे। हम अपन लोगवन के दुःख सुनली हे जखनी ऊ एकरा चलते कराहऽ हथन। येहिसे हम उनका मिस्र से छुड़ावे लागी नीचे अईली हे। अखनी तईयार हो जा, काहेकि हम तोरा मिस्र वापस भेजे वाला ही।’”35“ई मूसा ओही हथन जौन हमर इस्राएलियन के मदत करे के कोशिश करलन हल, बाकि जौन ऊ ई कह के अस्वीकार कर देलन, ‘कोई तोरा शासक आउर न्यायी नऽ ठहरईलन हे!’ मूसा ओही हथन जेकरा परमेश्वर खुद उनका पर शासन करे आउर उनका गुलामी से छुड़ावे लागी भेजलन हल। ई ओही हथन जेकरा झाड़ी में एगो स्वर्गदूत अईसन करे के आज्ञा देलन हल।36मूसा ओही हे जौन हमर पुरखावन के मिस्र के देश से बाहरसी ले अईलन। ऊ मिस्र में, लाल सागर भीर आउर ऊ चालीस साल के दौरान जब इस्राएली लोग जंगल में रहऽ हलन। अनगिनती चिन्ह आउर अचरज करलन।37ई मूसा ओही हथन जौन इस्राएली से कहलन हलऽ, परमेश्वर तोहनी के लोगवन में से एगो आदमी के तोरा लागी हमरा जईसन भविष्यद्वक्ता बनईतन। 38ई ओही मूसा नाम के आदमी के हलन जौन जंगल में एक साथे रहे वालन इस्राएलियन में से हलन। परमेश्वर सीनै पहाड़ पर स्वर्गदूत के के द्वारा मूसा के हमनी के नियम बतईलन, मूसा ही ऊ आदमी हलन जे हमनी के पुरखावन के बतईलन कि स्वर्गदूत का कहलन हल। ई ओही आदमी हल जेकरा परमेश्वर से जीवित वचन देलन हल आउर जे ओकरा हमनी तक पहुँचईलन, ऊ आज्ञा आज भी प्रभावशाली हे।39बाकि हमर पुरखावन मूसा के आज्ञा नऽ मानलन, बलुक उनका अपन अगुवा माने से नकार देलन आउर मन मिस्र लौट जाय ला चाहऽ हलन।40तऽ ओखनी बड़का भाई हारून से कहलन, हमनी ला मूर्ति बनावऽ, जौन हमनी के देऊता होतन आउर हमनी के अगुवाई करतन। आउर ऊ मूसा जौन हमनी के मिस्र देश से निकास के ले अईलन हल, हम नऽ जानऽ ही कि उनका का होल!41जब इस्राएलियन मूसा के इंकार कर देलन, तब ऊ एगो बछड़ा के मूर्ति बनईलन, आउर ऊ मूर्ति के आदर में बलिदान चढ़ईलन, आउर जेकरा ऊ खुद बनवईलन हल ओकरे ला नाचते गईते रहलन।42येहिसे परमेश्वर उनका सुधारे ला बंद कर देलन। ऊ ओखनी के आसमान में सूरज, चंद्रमा आउर तरेगन के सेवा करे लागी छोड़ देलन। ई ऊ सभे बात से मेल खा हे जौन एगो भविष्यद्वक्ता किताब में लिखलन हल: परमेश्वर कहलन, ‘हे इस्राएलियन, जब तूँ ऊ चालीस साल के दौरान जहिया तोहनी जंगल में हल, तऽ बार-बार जानवरवन के मार दे हलऽ आउर ओकरा अनाज के साथ बलिदान के रूप में चढ़ावा हलऽ, तऽ तूँ जरुर ओकरा सचमुच में हमरा ला नऽ चढ़ा रहलऽ हल!43एकर उल्टा, तूँ अपना साथे तम्बू लेके गेलऽ जेकरा में मोलेक के देऊता के मूर्ति हल जेकर तूँ आराधना करऽ हलऽ। तूँ अपन साथे रिफान नाम के तरेगन के मूर्ति भी लेके गेलऽ। ई सभे मूर्तियन के तोहनी सभे बनईलऽ हल आउर तोहनी हमर जगह पर ओकर आराधना करलऽ हल। येहिसे हम तोहनी के तोर घरे से बड़ी दूर बेबीलोन देश से दूर देश ले जायेम।’” 44“गवाही के तम्बू जंगल में हमनी के पुरखा के बीच में हल; जईसन ऊ ठहरईलन, जे मूसा से कहलन, जे आके तूँ देख लऽ हे, ओकर समान एकरा बनावऽ।45बाद में, जब यहोशू हमनी के पुरखावन के ई देश में लईलन, तऽ ऊ तम्बू के अपन साथे ले गेलन। ई ऊ समय के बाद हे जब ओखनी ई देश के अन्यजातियन अपना लागी ले लेलन हल, जब परमेश्वर ओखनी सभे के मजबूर करलन जौन पहिले ईहाँ रहऽ हलन। येहिसे इस्राएली ई देश पर कब्जा करे के लायक हलन। तम्बू ई देश में बनल रहल आउर राजा दाऊद के शासन के समय तक ईहाँ हलन।46दाऊद प्रार्थना कर के परमेश्वर के खुश करलन आउर अनुग्रह मिलल ऊ परमेश्वर से प्रार्थना करलन कि याकूब ला एगो निवास-स्थान भवन बनावे देतन जेज्जा ऊ आउर हमनी के सभे इस्राएली लोग परमेश्वर के आराधना कर सकतन।47बाकि एकर बदले, परमेश्वर दाऊद के बेटा राजा सुलैमान से कहलन कि ऊ एगो अईसन भवन बनईतन जेज्जा लोग उनकर उपासना कर सकतन।48बाकि हम जानऽ ही कि परमेश्वर जे सभे से परमप्रधान हथन, ऊ लोगवन के बनावल गेल मन्दिर में नऽ रहऽ हथन। जईसे कि भविष्यद्वक्ता यशायाह लिखलन हे:49परमेश्वर कहलन, ‘स्वर्ग हमर सिंहासन हे आउर धरती हमर गोड़ रखे के चौकी हे। तूँ हमरा ला कईसन घर बनईवऽ?’ प्रभु कह हथन, चाहे हमर विश्राम के जगह का हे? 50हम ‘स्वर्ग आउर धरती दूनो में सभे कुछ बनईली हे। येहिसे तोहनी आदमी हमरा रहे लागी विश्राम के जगह नऽ बना सकल हे!’”51“तोहनी परमेश्वर के प्रति मन से अनज्ञाकारी हऽ, जईसे कि तूँ परमेश्वर के जानऽ ही नऽ हऽ! तोहनी एकदम से अपन पुरखावन के जईसन हऽ! तूँ हमेशा पवित्र आत्मा के विरोध करऽ हऽ, ठीक ओईसहीं जईसे ओखनी करऽ हलन!52तोर पुरखावन हरेक भविष्यद्वक्ता के दुःख पहुँचईलन हे। ईहाँ तक कि ओखनी ऊ लोगवन के भी मार देलन जौन बड़ी पहिले से धर्मी जन घोषणा कर देलन हल कि मसीह अईतन, ऊ हमेशा ओही करऽ हथन जे परमेश्वर के पसन्द हे। आउर मसीह आ गेलन हे! ऊ ओही हथन जिनका तोहनी हाल ही में उनकर दुश्मन के हवाले कर देलऽ आउर उनका मार देवेलागी कहलऽ! 53तोहनी ऊ लोग हऽ जिनका मूसा के व्यवस्था मिलल हे। ई सभे ऊ व्यवस्था हल जेकरा परमेश्वर स्वर्गदूत के जरिये हमनी के पुरखावन के देलन हल। बाकि तूँ ओकरा पालन नऽ करलऽ हे!”54जब यहूदी महासभा के सदस्यवन आउर दोसर लोगवन स्तिफनुस के ई सभे बात सुनलन, तऽ ओखनी बड़ी गोस्सा गेलन आउर दाँत पिसते ओकरा पर बड़ी गोस्सा होलन!55बाकि पवित्र आत्मा स्तिफनुस के पूरा तरह से काबू में कर लेलन आउर ऊ स्वर्ग दने देखलन आउर परमेश्वर के तरफ एगो महिमा देखलन, आउर यीशु के परमेश्वर के दहिना दने खड़ा देखलन।56ऊ कहलन, “देखऽ”, “हम स्वर्ग के खुलल देख रहली ही, आउर आदमी के बेटा के मानव के रूप में ऊहाँ खड़ा देख रहली हे जेज्जा परमेश्वर राज करऽ हथन!”57जब यहूदी महासभा के सदस्य लोग आउर दोसर लोगवन ई सुनलन, तऽ ऊ ऊँचा आवाज में चिल्लाय लगलन, आउर अपन कान पर हाथ रख लेलन, कि उनकर बात नऽ सुन सकतन, तब ऊ सभे मिल के स्तिफनुस भीर दौड़लन, आउर उनका पकड़ लेलक।58आउर ओखनी उनका यरूशलेम नगर के बाहरसी घसीट के ले गेल, आउर उनका पर पत्थर मारे लगल। आउर गवाह लोग उनका पर दोष लगा रहलन हल, ओखनी अपन कपड़ा उतार के देलन, कि पत्थर मारे में आसान हो जाय, आउर अपन कपड़ा शाऊल नाम के एगो जवान भीर जमीन पर बिछा देलन, कि ऊ उनकर रखवाली करे।59जब ओखनी स्तिफनुस के ऊपरे पत्थर फेंकते रहलन, तऽ स्तिफनुस पुकार के प्रार्थना करलन, “प्रभु यीशु, हमर आत्मा के कबूल करिहऽ!”60तब स्तिफनुस घुटना के बल गिर के चिल्ला उठलन, “हे प्रभु, ओखनी के ई पाप के सजा नऽ दिहऽ!” ई कह के ऊ मर गेलन।
Bridge Connectivity Solutions Pvt. Ltd.